D04
唔係我地，可惜。我地係．．．

你睇劉Sir幾架勢。全層最多野賣最精彩，就係會展Hall 1 D19。你睇過其他人賣乜就知點解。
「入黎唔通真係訂鑽石能量水同整信用卡咩！購物節呀大佬！」

D19御用囡囡達達姐姐。副業係「去澳洲幫夜總會小姐化妝」。
如果你有入場，睇晒冬購節+美食節+（特別）電玩節，就會發現
「107，原來你ｄ囡囡已經冠絕全場！」

每年乜節物節實多野睇，今年個時間表完全提唔起興趣。除左Dream 5 band show，聽過佢地大名。
「係隊jazz band黎，玩standards，長笛手好勁，全日最好feel就係佢地表演！」
此乃107講番我知。因為佢地表演兩日，兩日都係我走左佢地先出場。
「咦？原來廿四號晏晝有MAGIC KINGDOM！」

想知冬季購物節幾多元化，睇睇D19對面檔C20就知。一班大陸人走入賣燒雞。吹脹。
第一日，標$35隻、一百蚊三隻。第二日已經「無法運回」一百蚊五隻。生意興隆嘛。未夠。

「運費比雞貴」、「100元5只要錢不要雞虧本大甩賣」
好多大陸廠商帶住幾百箱貨落黎香港擺冬購節，似乎過份樂觀，賣街市野老餅野點做呀？
本地廠商都未必賣到咁多啦，結果第三日已經知死。仲死係賣參茸海味，本身已賣唔多，
運番上去運費貴關稅仲貴，幾間夾定換貨賣，燒雞檔兼賣蟲草，賣多幾款搏冇咁死。
但我留唔到全日，睇唔到佢地下場係點、ｄ雞最後係超賤賣定垃圾桶見。
「晏晝一點價，係三百蚊兩箱四十隻。肯等多幾個鐘應該再見新低。」
除番開最貴先七個半一隻，大手入貨再二十或十五一隻散出去，仲可以賺一大截。
可惜我份人冇乜生意頭腦同大志。
「話時話，咩叫甩賣？甩住尾黎賣？」

最抵死係斜角位有檔賣花灑，就係舊區街頭果種，幾條友接力戴住無線咪一面示範一面噉講講講。
「冬購節喎呢度唔係深水土步喎！噉都得？唔係卦？」
有幾個師奶長期駐守檔口前面，每次條友講完就會俾錢買。莫非佢地就係傳說中的神秘顧客？

「．．．所以你話，同行女人街有咩分別？」

「我係gofer！」
gofer是甚麼？小學作《我的志願》，就是gofer了。今次特登請埋假會會展幫107手做免費勞工，
車錢飯錢自貼買野都係自己俾錢果隻，酬勞就係得手上呢張pass。我都算唔話得喇卦107。
不過今次展覽幫親佢手都多災多難。達達姐姐試過撞著塞車搭左百二蚊的士，人工都蝕番。碎料矣。
我last一日追巴士，明明新淨之電話套可以無端端爆開成部電話飛出黎，
落地剛剛好一部的士經過，搞掂。仲打到，但個殼轆到爆Ｑ晒，同部機會經常過熱。
用左未夠半年就逢此厄運，都唔知保養包唔包機殼零件，唔包分分鐘換得電話。灰。

今次黎美食節，係想補完上次九龍城之旅，繼續搵果隻菲律賓餅乾。
但搵埋間真正賓館，班賓佬賓妹連個名都未聽過。隻餅唔係underground成噉卦？
不過撞番另一樣野。幾年前某次行過大昌有得試食撈麵，奇正，試完又試試到阿姐都唔妥，
最後科水買番幾包返屋企，因為好食加易整兩日已經冇晒，再落大昌補貨，已不復見。
事隔幾年，今次俾我見到，先歷史重演怒食，一袋五包兩袋十五蚊，抵到爛啦旋執啦！
返到自己檔口，遭無良僱主恥笑：
「白痴仔！好景果邊街市都有得買啦，仲要十蚊兩袋咋！」
我唔理！因為殊好食！有幾？

最後一日，索性直頭一箱掃，五十五塊錢四十包，阿姐慷慨送多兩包牛肉味特別版。
但最重要係個贈品環保袋，有佢地email同電話，方便將來補貨，唔使大箱麵抬過海先啦！
正在好食加夠平，俾盡先個半一包，一個夠當一餐，唔夠死兩個先三蚊一餐，仲抵過食麵包，
食麵包平極都三四五蚊個啦，仲要食完唔飽分分鐘反效果。撈麵惹味得黎飽肚仲要更平！
所以你見我一掃掃咁多，唔係口痕。兩日買埋，慳慳地夠食兩三個月，慳埋儲到幾多錢知唔知？
「劉Sir由細到大，買碟錢就係噉樣慳番黎。只係已經冇幾多『metal友』知道，
唔辛苦唔得世間財的道理。因為根本唔需要知。download就得啦！」

行完美食節行電玩節，可能有所期待，點知全場得Sony座鎮，乜都冇一個字唔使走得，灰爆收場。
冇野買係拎埋拎埋好多免費野。幻想學園終生免費試玩版。冇興趣。免費咪拎囉。
重點係107新寵高清寶寶。原來我地入場前兩日同同一晚，有佢地真人睇！miss晒！
不過有高清月曆卡任拎，全套四款！阿切我拎左兩張俾你！
「至於巨型高清poster已進貢給107大佬！想要問佢拎啦！」

仲有鑽石能量水！我地檔口條街街口，就係鑽石能量水個檔，勁大檔！
唔係講笑，佢地個攤位真係勁好生意成日爆滿！完全唔明點解！
「唔通飲完真係好似劉德華咁靚仔？」「唔覺喎！似元華咋喎！」

107送的聖誕禮物，睇個size都知係咩啦！一收已經估到！咪就係．．．

「今期流行！」
椎名林檎《無罪Moratorium》，仲係indie時期之第一隻碟。一個字講晒：
「正到爆！」 （噢，三個字添）
107我等你幫我執齊椎名全線。佢手癲野，我太like。

再跟手掃貨。107個檔口一日比一日多正野，收埋咁多入倉唔拎出黎，早就要摷出黎啦！
雖然超音鼠從來冇玩過亦冇乜興趣，見隻機械蛋人幾過癮，價位奇低，旋掃。
「算啦！唔係我，相信永世都唔會有人要架喇呢隻野！」

再黎隻日本仔李小龍tribute，將電影soundtrack remix玩爆，係全冬購節最好賣產品之一，
一來，李小龍。二來，「恆野」。三來，有李小龍黃色腳印tee送。當買件tee都抵啦。
何況隻野係將李小龍電影soundtrack remix成metal、rock、funk、jazz、techno、lounge．．．乜都有。
「過癮也！107仲有貨架，價位亦靚！有興趣堪搵佢問問！」

上到皆旺，見到104肥仔有對鐵球，十五蚊，執左。我鍾意鐵球嘛。
對鐵球來自SOG系列，同之前隻完美自護同系，玩景品1/300，
之前玩具節走失左隻鐵球筆座，唔開心，既然佢有隻野又的式，當補番。
「鬼叫鍾意咩！越茄哩啡的角色我越鍾意！」

又去左寵物嘉年華，執左隻床俾隻狗。佢訓開張床褥上年換季收埋，今年摷晒間屋都搵唔番，
天氣漸凍，隻野年老關節健康唔好，買番張床仔俾佢舒服過冬安享晚年啦。
平時隻野不論天寒酷熱，就係鍾意匿係廁所訓覺。而家一日十六個鐘撻落張床唔肯起身。

來自大佬的聖誕禮物，GP01核戰機模型。睇落易砌喎，未玩過模型的我都覺得。
玩具節執左盒廿蚊SD自護模型，都有少少肴底驚自己唔識砌，而家唔驚喇！
起碼有隻核戰機做預賽先！我未至於白痴到一隻戰機仔都砌唔掂．．．卦！