劉Sir一向同公司各位女同事很混得來，佢地日日面對的問題是怕肥，無論點瘦e.g.九十磅唔夠都擔心「太肥」，飲完杯水又怕重幾磅。相反，劉Sir信心建基於唔怕肥，因為一早肥到救唔番，條腰年一早三十九寸啦可以點救？各位女同事每當提心吊膽之際，望望劉Sir，自信心返晒黎。因為肥這個共通點，劉Sir好受女同事歡迎，每日午飯時間大家無不主動獻上自己半份午餐俾劉Sir，一個lunch收集到的食物，往往夠食到夜晚，假如當日晏晝「胃口唔好」。

公司傳統包lunch，多年黎由一間相熟茶餐廳承包，近兩年餐牌水準日益退步，大家紛紛放棄食飯盒，進而令劉Sir無啖好食。唔食飯盒，食乜？食粥其實最好，但普通茶餐廳點會有？試過叫早餐茶餐做晏晝，又公仔麵又煎蛋又牛油餐包，結果仲肥。

「全賴公司女同事的慇勤款待，就算劉Sir唔想食，食餐lunch都好似食自助餐咁多。」

唯有轉食三文治。初時大家反應幾好全因的確減到肥，不過唔飽肚之餘冇乜味加選擇唔多，日日食話咁快厭，當一個同事頂唔順三文治破戒叫左隻炸雞脾，其他不甘後人雞脾雞翼薯條薯餅猛咁叫，進而日日lunch好似開大食會咁開心。

歡樂時光過得特別快，開多幾次大食會，女同事們發現有本錢同劉Sir條腰爭一日長短，識驚了，回歸三文治懷抱。本身已經難食飽人，食過雞脾雞翼更覺三文治無肉無味，點算呢唔通要食番難食到嘔的飯盒？好在會計靚女無聊打電話落茶餐廳嘈左幾晝，俾佢爭取到三文治新食法：

飯盒加底食得多，食件三文治仔都有得加底？？？都算年度奇聞之首。三文治加底唔係送多兩塊包俾你（你估飯盒咩），加三蚊同你落多一倍餡，三文治最貴都係中間果層嗟計落抵食。加完底，最大得益者，自不然又係劉Sir。

上圖為一次加底三文治午宴中，所有女同事為劉Sir共襄之善舉。三個人每人叫一款，再每隻味分一塊出黎，加加埋埋連個盒都閂唔到，因鏡頭所限自己份lunch雙重豬柳出前一丁出唔到鏡。三塊三文治成就是日午飯餐包環節。

第一份食芝腿治，加完底令我諗番起去麥記食雙層魚柳包：即使知道多左餡，舊餡本身淡，俾多層你入到口都唔覺有分別，最慘魚柳起碼夠厚有得趙多幾啖滿足少少，火腿咁薄又咁淡唔講你聽根本唔會知道原來加左底，而且咁鬼死平，即使唔止火腿連芝士都俾多塊你，夾夾埋埋都唔值俾多三蚊啦！

跟住蛋牛治好少少，不過食完覺得舊咸牛肉炒蛋厚係厚，牛肉唔算特別多，換言之加蛋多過加牛肉，有點呃秤成份。好在本身唔太鍾意食蛋牛治，就當試一次見識何謂加底算數，反正唔使自己俾錢有乜所謂？

壓軸重頭戲，捨餐蛋治其誰？最抵食一定係佢！咁多種餡午餐肉最貴，有幾多塊一望數得出呃唔到人，加上呢間茶餐廳叫有人性餐肉夠厚（我試過食茶餐廳勁到塊餐肉幾乎薄到透光呀個師傅刀法真係一流！），蛋加厚之餘餐肉亦由兩塊升級至四塊，仲要全份兩塊一齊噉加法，三蚊加底抵到爛啦！

厚加多料，一隻手拎起都拎唔實跌番塊餐肉落黎，覺得自己食緊漢堡包多過食三文治，四塊餐肉加蛋入到口夠晒鹹夠晒香非常滿足。善長人翁女同事好慶幸分左半份俾我，據佢所講普通餐蛋治唔算太多，但加完底食一份，份量已經差唔多多過普通版成份兩舊，有食左一個飯盒咁飽，冇我幫佢啃埋剩番果舊唔知點算。我食完都覺得真係好滯，尤其之前先芝腿再蛋牛，舊加底雙層餐蛋治令我感受到挑戰性。自己個豬柳漢堡一丁都係留番做下午茶好。

只不過，劉Sir成日口痕，咁多美食又點忍得住？見女同事仲有塊餐蛋治食剩，我又有豬柳，又有新野玩：

餐蛋治好味，漢堡扒又好味，兩樣加埋一定冇死啦！一碗麵有兩塊漢堡扒，我拎一塊出黎加送做餡，麥記都冇得食的豬柳餐蛋漢堡三文治正式上市。

打橫一睇，多麼豐富：餐蛋治加底已經有一層蛋＞兩塊餐肉＞再多層蛋，而家上面加多塊漢堡扒，睇見都知好食！本身餐蛋治加底已經厚到好難拎得穩，攝多塊漢堡扒入去，兩塊薄麵包夾都夾唔實。

令塊三文治更滋味，梗要拎去微波爐叮佢一叮：

劉Sir係個超級午餐肉fans，連打邊爐都要烚午餐肉（．．．），餐肉加蛋鹹淡合璧梗係無能敵啦，漢堡扒好趙夠香夠惹味，咬落去三種口感三種味道，只有親口試過先領略得到。而且真材實料，拎起塊三文治時一時手鬆，跌左中間塊餐肉落地，噉就冇左兩蚊，未能夠完全盡情唔開心，但冇左層餐肉仍然非常足料，絕對滿足過你去麥記食豬柳漢堡甚至足三兩。

加底三文治成為女同事們新寵，滿足到「食得少野減到肥」之一廂情願心理時，就算分一半俾劉Sir仍食得飽佢地，今次三文治熱潮相信有排都未完，亦即每日午餐下午茶至晚餐都有著落 － 假如我比各位女同事遲食厭三文治。相信都會，尤其個豬柳餐蛋漢堡治，真係超超超超超正。搞到而家我每日為左食佢，都要自己特登叫個豬柳出前一丁，變相為食三文治而食多個公仔麵。其他人食三文治為減肥，而我，大鑊，越食越肥。

烘底試過，而家連加底都玩埋，或者下次要研究炒底。