S.O.G. 完美自護

20071208係畢業出黎做野後，第一個短週，唔使返工，特到九龍城懷古。上到龍珠探望舊TRHK，走到隔兩個舖位間新玩具舖，見到一隻心頭好，跌錢。

終於唔係變形金剛喇，今次係掃高達，一隻盒蛋，實物其實只有相中一半大。
$45貴左少少，但自己所好，又黎到龍珠有緣，當買份禮物俾自己慶祝人生首個短週加回饋龍珠啦。

睇睇盒頂，一睇就知係玩classic重溫。高達興趣唔大，但勁like渣古小隊，
只係要儲齊都幾大劑，改少少顏色同裝備又話有新型號，追的話成世追唔晒。

全系列五款，除左三號，其他四款都係打孖上一套兩隻連地台。
五號正喎係渣古加馬沙專用大魔重裝版。但我犯賤地揀只得一隻的三號。鬼叫我係自護fans。

連盒入面都有料到。盒蛋系列叫"Strategy of Gundam"，比例1/300之迷你景品作，已經出左好多個系列：
1. V作戰　2. 08小隊　3. 查布羅降下作戰　4. 0080口袋裏的戰爭　5. 所羅門攻略作戰　6. 星一號作戰
仲有Extra線，補完各系列／年期特別機種、冷門機體同非正傳角色，好似Extra第五集呢隻完成版自護。
越後之系列越大興趣。特別第四0080，因為有我所愛魔蟹改、京寶梵同NT-1。
「全套0080先係九十咋！可見隻完美自護幾貴！鬼叫自己鍾意有乜計！」

作為一個模型白痴，即使鍾意，長久以黎同以模型為主之高達絕緣。
要我買高達，只有兩個方法：一係現成拆盒有得玩唔使砌唔使油，一係超簡單散件細路都砌得成果種。

一分鐘唔使，自護成型。一年戰爭入面，自護算係自護公國最型一部，
本身設計好（話晒壓軸同馬沙坐駕），線控炮同冇腳機械人當年係非常嶄新概念，到而家依然經典，
又因其他自護機體特別MA實在太過樣衰，雖然高達係劃時代動畫，
機設卻冇跳出當年日本動畫框架，用機械獸外觀突顯邪派性質，係我眼中初代高達一個黑點。

放平面時，個身會向前傾，係模擬宇行時之動態？
其實係背後一列噴射器抬高機體而放唔到平，但效果仲好，冇地台都可以扮飛。

重點當然係對腳，動畫入面冇出過，玩具為自護補完，亦係賣點之一。
裝埋對腳，成隻立即高左差唔多成倍，全高4寸，1/300計，自護完成版成三十米高。
重高達出現之前，完美自護係最巨大MS，不過正史中冇出現到。

全身郁得部份，集中晒上半身，就係個頭同對手。個頭要側少少傾右。睇落串串地型？似中風多。
起初我期望手肘位有關節，都係發下夢嗟，只得膊頭上臂同手掌，搞到右手好怪。
算細致好多紋理都睇到做到，只係上色手工唔太得，定係儲存不善刮到甩色？
可動性低外關節奇鬆，特別對手郁一郁就跌，轉個pose接近要拆晒出黎擺好再裝番上去。
始終只係蛋類景品，唔係玩具。只好將就。

第一次近距離觀賞自護對腳，大量噴射器同厚重裝甲，重量感質感一流，只差在冇關節。

唔知係玩具舖老細問題定間廠問題，背後裙甲位勁污糟。唔係特登做到戰場效果卦？
同埋，個頭真係側得好犀利．．．

因為關節所限，隻野最好玩都係扮僵屍。側面睇到腰位背後俾排噴射器搞到好臃腫。
個完美設計，點睇都只係將原來之半身版，原封不動加多對腳就算，懶左少少。

基於機動性所限，盒上面個姿勢，已經係可能之中最型，四寸高黎講盒蛋玩具算大型架喇。
正史記載，馬沙駕駛自護出戰，機體只屬80%完成，高達迷間其中一個常見討論，
係假使自護同高達對決時已經完整完成，歷史會唔會因而改寫？
只係對比兩個型態，所餘之20%只差對腳，作戰系統已經齊備。假使真正裝配好，
對機動性同戰鬥力之提昇，係咪真係會有黎咁大影響？而且以附加噴射器取代雙腳，可能更適合宇宙戰用。
除左係宇宙用機，自護另一創舉係首部新類型人專用機，雙手拆出成線控浮遊炮，危急情況頭亦可以分離。
呢隻當然做唔到啦。唔緊要，我自己做。

自護全方位攻擊！
（特別鳴謝史上最強繪圖軟件MS小畫家）

Halloween Special: Zombie Zeong

大過左開始追夢，第一隻高達玩具，反而係細細隻的蛋，叫做係盒蛋未去到扭蛋咁細囉。如果我識砌模型，有兩部機肯定旋買，先係最愛高達GP02A（MLRS型態！），再黎隻自護。自護最高只出到Master Grade，相信唔會亦唔敢出Perfect Grade，隻MG係完美版連腳1/100砌好成尺高，尺寸同精細度已經追近一般PG MS，Perfect Grade係1/60喎大佬真係出已經係玩雕塑唔係玩模型。

「唔係講笑，隻Master Grade完美自謢，曾經差少少令我決心學砌模型。就係咁鍾意佢。」

模型同景品類一向唔係我所好，因為我係玩玩具，買返黎係為左玩多過為左擺，不過S.O.G.系列真係死得人，雖然手工用料都有待改善，細細隻加易砌適合空間不足加惰性過盛的我，價錢又唔係貴隻完美自護以外好多廿蚊甚至十零一隻，間中見到執番隻過過癮機會甚大，亦即又多左一個跌錢途徑。