勁大盒。仲好有metal/industrial味道。話係玩具，又唔多係玩具，
正確黎講係盒蛋，扭蛋你聽過，盒蛋同扭蛋一樣，
不過因為體積大，變成用盒包裝一盒盒賣而唔係一隻隻蛋。

睇見個盒都知係日本出品啦。品牌叫壽屋，以出品超精細動漫電影角色及場景figure見稱，
呢個鐵甲威龍系列就係壽屋將三集電影之名場面同角色，利用迷你figure再現。
話係boxset，但其實唔關boxset事，個盒．．．

查實係展示盒，一盒裝十二隻，好似上面噉打開放舖頭擺賣。
起碼只諗住買蛋，點知送埋個展示盒，都算意外收穫。
「喂！一盒十二隻，而家得六隻，你條傻仔係咪俾人昆左呀？」

「請先睇睇個蛋盒！」

「我唔識日文，都估到佢講緊『全系列五款，另加一款隱藏』！」

「賣主梗係開盒睇過，執晒六隻出黎齊全套啦！邊個白痴？你定我？」

全套冇講邊隻先邊隻後，就按喜好自由發揮啦。
先由最主角feel果隻開始先。

組合好簡單兩隻手對腳加個身四件。最欣賞右手加紙套保護枝槍。

砌埋，雖然細隻，但係真係靚喎，以四寸公仔黎講，精細過精細，
雖然個姿勢怪左少少，好似套衫緊過頭周身唔聚財噉款。
我都想擺個靚pose。不過唔得。我都唔想。

雙手只得膊頭郁到，前臂睇落有關節，但其實手肘固定。呃左。
膊頭頂突起，轉手時會頂住，唔噉樣垂向下，睇落幾樣衰下。

玩figure最忌武器好似長槍炮管入盒時拗曲壓斷，所以加個卡紙槍套夠晒周到，
加上本身夠晒台型之巨型手槍落足料已經硬淨，完全冇任何刮花屈爛，抵讚。
前臂都係固冇得郁，但手腕可以轉，好過冇啦，雖然唔太改善到整體擺pose之局限。

玩玩具又好、玩figure又好，一向只限機械人唔多鍾意玩真人角色，因為面相好難做，
呢隻算好架喇，或者因為睇唔到眼，只係鐵甲威龍公仔塊面永遠好肥。

前面靚背後同樣精細，紋理清楚而唔粗糙，亦冇剪口、水口之類，係對手膊位穿崩。
下身用腰位同上身駁埋，大脾位同腳掌可以轉，因為冇得屈膝對腳硬直，穩定重心全靠腳掌，
但除左企直，唔多其他姿勢擺得到，個人會斜晒甚至企都企唔穩。
另後小腿同腳踝有軸連結，只屬裝飾，因為腳掌轉親就會移晒位，亦拆得出預左整甩。

全身冇乜靈活關節，靠頭同手普通舉槍瞄準都做得到。唔由後面睇咪唔多穿崩。

就擺番個鐵甲威龍招牌開槍姿勢，你冇睇過套戲咩？唔知點解每次開親槍實係噉，
一定要紮恆馬，左手斜上高舉，右手伸向前，全個人成大字形先射。
「．．．都幾樣衰喎。」
「．．．起碼睇過你會記得先。」

同大盒張相拍埋，影相隻勁靚，但廉價figure唔會做得到咁重金屬色卦？
「張大頭相呢？大頭相都係figure影，但同樣好金屬喎？」
「Photoshop卦？唔執到咁正，點昆到你／我落搭？」
公仔同劇照比，九成似，只衰企得唔直向後傾，對腳亦分得唔夠開。
「坦白講，四寸做到咁像真咁精細，抵番晒個價錢啦！」

「仲有問題！」「咩？？？」「點解要紫色？」
我諗好多人想問，第一張相起已經好紫色，唔係我影得差or部相機廢，全身真係噴左迷幻紫。
至於點解？戲入面燈光效果下，鐵甲威龍裝甲表面會反射出霓虹光，亦就係其上紫霞效果。
靚唔靚見人見志。我接受到，只係咁突兀地油到「反光」，好難唔覺得怪。整體仲係靚的好在。

特技射擊 John Woo style

鐵甲威龍怪異劇場

然後到第二套，見到有咁多件野、鐵甲威龍之外仲有配角，就知係玩場景啦。

「Hello大家好！我係鐵甲威龍Jr.！細個營養不良，大高左先得兩寸半高！」

「同埋好慘，唔見左隻右手，睇我個樣幾唔開心！」

「壽屋見我咁唔開心，特製左枝巴拉特連右掌俾我，加多個吸塑盤槍盒，多謝！」

「"Anti-tank rifle, one-handed!"！唔好意思，近排打Time Crisis 3打多左！」

「呢位係我朋友，ED-209 ver. 0.5。橡膠味濃，不過細節唔差架！」

「因為腳跟同腳趾冇關節，裝左之後行唔郁，都要分開三舊純為方便入盒。」

「點解佢搞成噉？第一集結尾我去大佬總部，撞到隻ED-209睇門口，
然後俾我巴拉特狂掃打爆得番對腳！不過戲入面我冇咁靚仔架！
果part劇情之前我係同班匪幫大戰，俾人打到熔熔爛爛架！」

「我同佢都唔多郁到，趣味十足補救，唔鍾意玩figure的劉Sir都話過癮！
我咁細隻都整得我咁仔細枝槍又勁，梗係開心啦！」

跟住一跳跳到第三隻，睇睇我地第三集英雄鐵甲威龍。
阿英雄膠袋入面個姿勢，係舉手投降．．．

明顯同頭先「classic版」同一個模，只係對手唔同，另外上色改左金屬感覺更重。
我梗係鍾意呢個上色同表面處理多啦。

頭兩集目標市場係成人，第三集變成賣細路，設計梗係以方便玩具化為主。就好似佢左手。
因為得到天才科學家（一個靚妹．．．）協助，左手可以換成火槍、火箭炮、機槍三合一之臂銃。

另外坐警車過時喇，唔識飛點叫做英雄？立即加多具飛行器。

「正史」入面，最重武裝一定係第三集，一隻左手等於三枝槍（本來枝手槍唔需要再用喇），
仲要識飛，玩晒啦。可惜敵人最白痴亦係第三集，得物無所用。

飛行器分別有左右手兩個控制器。「左手」冇手，但有位可以（夾硬）扣住。至於右手．．．

靚但設計唔多好，兩個控制器同主體之連結唔夠長，揹左上身後，會套唔到上右手。
方法唔係冇，有一個．．．

就係先戴右手，然後反手一擲，掟番個飛行器去背後再過左手，就可以揹穩加裝晒兩個控制器。
係我都知呢個方法好古怪好反傳統。鬼叫做到出黎係噉咩？

「裝埋飛行器，曉唔曉飛先？」
睇你點睇啦。唔太高要求，都叫做曉飛的。

隨件附送地台同長管，俾你隻鐵甲威龍擺番個飛空型態。不過好重，唔落架生固定地台，必跌。

拎埋個蛋盒出黎對比下先。壽屋「人道」左。起初係篤細路。而家成品係篤屎忽。

「喂！頂唔順喇！得未呀？」

「唔得喇！重過頭，支持唔住，我跌喇！
不過叫壽屋篤番我細路算啦！起碼重心平衡番冇咁易跌先！」

「．．．呢隻又咩料？」 「咪就係隱藏盒蛋囉！」
所謂隱藏，就係鐵甲威龍半身像。唔好睇到好似好大隻，只得兩寸半高少少。

仲有隻右手，不過得個睇字郁唔到。

「就係咁多拿？」「就係咁多喇！」
所以我唔鍾意玩figure。點靚都好，冇得玩，得個擺字，冇癮。

鐵甲威龍公仔永遠衰一樣野，塊面超肥，表情想笑又笑唔出噉，呢個隱藏版就同佢一樣，得啖笑。

黎番張鐵甲威龍全家福先。姑勿論好唔好玩，大隻排到細隻，製作質素確冇乜地方好批評。
不過買個boxset，並唔關佢地事。玩玩具睇動漫，從來奸角先係重點。

隻野分咁多件，一睇就知係正野啦。

盒蛋冇說明書，難度低嘛，但開左之後發覺自己好需要呢樣野。好多喎真係。
最突出自然係中下有獨立吸塑盤保護之右臂。逢係重要部件，真係唔會慳錢去保住佢。

砌埋，就係鐵甲威龍第二集大佬、鐵甲威龍二號。靚，但少少未達預期。
「噉都未夠？你仲想點？」
「．．．我都唔知。或者對奸角，我要求係較高。」

失望在除左未夠靚，仲得三寸半高。鐵甲威龍都四寸啦。整到咁細隻，完全壓唔到場。
戲入面高鐵甲威龍成丈，而家只有拍埋Jr.版先合番比例，雖然仲係太矮太瘦。

初時驚咁多件，唔知邊隻手邊隻腳插邊個位。原來每隻手腳有自己榫位，唔怕插錯因為只插得落一個位。

可能因為奸角身份，同劇情急於完成之背景，唔同鐵甲威龍，二號全身粗糙同工業味重得多。
冇乜特別修飾掩飾，好多部件、電線、導管之類外露，比主角粗獷野性。雖然諸多弱點暴露得不合理。

除左體型同機能，另一優勝過主角係重武裝。攻擊主力係左手，有重型拋槌埋身攻擊同破牆用。

最重要自然係格林機關炮，同鐵甲威龍只得枝大口徑手槍比，火力強大不知多少倍。

最正係連輸彈帶同子彈鼓都有，雖然比例唔多正確，咁大粒彈咁細個鼓，以格林炮之射速，幾秒已經射晒。
因為結構複雜而部件細舊，成個部件特別槍管一件過唔多分得細致，但尺寸所限就算數，已經好足夠。

右手係典型機械手，應該話係機械爪。同左手比，右手顯得幼線條好多。

表面刻劃仔細，好多舊化花紋。唯一衰前臂駁位對唔準。
上身咁巨大但對腳相比下幼細，獸足式設計更加配合邪惡形象。

心口有核標記同其他其他（睇落）重要零件，戲入面頭罩會打開彈個螢幕出黎顯示真正塊面，玩具當然做唔到啦。
右膊頭仲有枝重步槍，只係造得唔多靚同唔夠突出，加唔可以瞄準正前，只可以向斜上。
仲未完。仲有兩樣「隱藏武器」．．．

另外有兩隻手捲住膊頭。第一次睇套戲時覺得好特別，冇乜諗過會噉樣收藏法。
左手係機械鉗，右手係燒銲器，其實唔算武器，似用於自行維修。機體設定相當完整。

「點解好似擺極都係果個款？」
「咪就係因為隻野唔郁得囉！膊頭對手轉到出黎，已經算『郁到』架喇！」

仲有個地台，或者怕隻野上重下輕會企唔穩先俾，但砌完好穩喎其實根本唔需要，裝上地台反而仲樣衰。
噉整個地台同支架做乜？咪就係知道劉Sir黐線囉。
「乜手乜腳都郁唔到，玩唔到隻野，唯有玩個地台！」

「鐵甲威龍，戲入面我唔夠你抽，我入丐幫學成打龍棍法，返黎搵你尋仇！」

「激戰連場，終於一雪前恥！不過俾鐵甲威龍打到雙目失明，好在有盲公竹引路！」

「報仇雪恨令我看破紅麈，放下屠刀歸園田居耕耕田罷！」

「耕田耕到我身手身汗，仲周身痕添！好在我有不求人！」

「隱退仍然要keep住最佳狀態。等我健健身先！湯瑪斯迴旋！」

「唔覺唔覺就到晏晝，好曬添！等我擔番把遮擋太陽！」

「天氣咁好，最好去沙灘曬太陽！有把太陽遮，唔怕曬親！」

冇錯。劉Sir就係咁無聊。

連過五隻，到主角喇。都係因為佢，先會咁有衝動摷鐵甲威龍玩具。
「ED-209。」

ED-209好簡單，就係得上身、腰位、對腳。首先，睇睇個身。
似唔似舊世代射擊game戰機？就係鍾意呢種old-school味。所以歷久不衰。
睇真左，唔開心：右手枝炮彎左，好彩係軟膠拗得正。不過執唔番到最靚囉。

然後到對腳。同頭先ver. 0.5好似。唔係似，基本上係一樣。
分別係0.5中間腰位"battle damaged"，同因上身爆炸而焦黑。

ED-209。第一集奸角機械人。第二三集丑角。機械人中之永恆經典。
首次出場故障殺左個無辜市民，同鐵甲威龍打又唔識落樓梯，最後俾佢炸爆（見前章）。
因為無能加低智慧，跟住兩集出場都係負責俾人奚落同搞笑，繼而聞名。

突出在逆於當時主流更近日本動畫，ED-209冇頭冇樣冇眼耳口鼻，
完全非人化而加重工業同機械感覺。機械人就應該係噉嘛、噉先似機械嘛。

另一特點係非常龐大之逆關節雙足，同樣工業感重。
當然水壓升降軸用唔到啦。一舊膠啤出黎，係噉架喇。

同樣各部位刻畫得好精細，就連頂部零件花紋都一絲不苟。

「額頭」個黑色蓋亦忠於電影加上網紋，質感一流。
用攝影同後期加工絕對呃到人以為好大隻，表面精密到按比例放大完全唔需要修飾。

跟住睇睇佢副架生。左手有兩枝20mm機關炮，屬主武器。
右手仲有一枝，同火箭發射器。全副武裝就係雙手。
「噉打爆晒兩隻手，佢咪冇叉用囉？」
「隻野整黎搞笑居多嗟！係咁上下架喇！」

有關活動性，個頭／身靠腰位上下郁，另可以水平左右轉，
後腳水壓軸頂住，兩個方向唔可以做到好大幅度擺動。
雙手亦只可以水平上下，膊頭塊甲頂住，轉到指向前就唔可以再上。
不過相信你完全唔會郁佢對手。指向前合理。你唔會叫佢向下指住地板卦？

對腳睇落好勁，但一舊過冇關節，一郁就只可以成隻郁，
所以同對手一樣，一定唔會郁佢，除非你想佢企到好似玩雜技，又或者仆街。
換言之，隻野又係得個擺字，冇乜得玩。靠靚同感情分搭救。

除左右手槍管彎左，另一唔多滿意，就係隻色：
戲入面係白色，盒面加銀，但實物係白綠橡膠色，唔似原色之餘亦唔夠金屬化。
上圖似全靠攝影效果，真果隻好唔同深綠好多膠好多架。

我係因為ED-209，先會搵鐵甲威龍玩具，繼而先會執左呢個boxset。
ED-209固然正。鐵甲威龍二號係意外。正派唔係目標，但都達到我要求。
唯一唔開心？二號囉。
「會唔會細隻得滯呀？高過其他幾隻幾cm都好丫！點睇都唔大佬！」

全家福。頭兩集鐵甲威龍矮過奸角，特別第二集矮成截，但套figure．．．
係figure。不過照當玩具噉玩。有乜野經過劉Sir手會好地地收場？立即去片：
（又）鐵甲威龍怪異劇場