「靚呀！型呀！！！」
冇錯，又係俾個包裝吸引到。
好明顯我為左Venom先至買Mega Morphs，隻Iron Man純粹因為死貨價平順便搭埋。
Venom Mega Morphs，學名Venom-Bot，變就自然係變機械蜘蛛啦。
睇落唔係話差，只不過都幾夾硬。
之前第一波出過蜘蛛俠，基於大家屬性相，Venom-Bot係蜘蛛俠Mega Morphs改模改色就算都預左。
不過效果當然差好遠啦大佬，Venom型咁多！
我冇蜘蛛俠，唔知同Venom相差幾遠，眼前就真係好多野玩。
蜘蛛俠多定少過Venom已經冇所謂啦，有得揀俾我實係揀Venom，已經唔需要再理蜘蛛俠。
未睇大佬先睇條靚。個「駕駛員」公仔只係附屬性質，冇乜高要求，
全身唔預郁得幾多，但外型好過Iron Man，起碼個人「直」過佢先，最緊要係夠樣衰。
始終條靚最大用途係「開鎖」嘛，插上power pack一擰就可以「解放Mega-Power」－
其實即係解左保險掣可以射彈嗟。原來每個英雄確係有獨特「超能力」：
Iron Man鎖頭係 I 字，Venom係 V 字，調亂公仔會插唔到入去，
果真"unique power to unlock Mega-Power"。
我冇買Thing都估到係佢個鎖頭係 T 喇。
駕駛倉一樣求祈，唔緊要，樣衰搭夠。好在部野係黑色。
反而駕駛倉個倉門用料同上色都好。
Iron Man失望在膠料同處理都唔得，膠質過頭，Venom黑色加上用橡膠料，
啞色表面加反光紫手工好，最少冇乜水口位問題，玩玩具我好忌呢家野。
雖然未至於真係同包裝果個彷金屬效果接近已經好好，尤其有膠到爆之Iron Man在前．．．
對手只得拳頭一舊，手中間再加一條大罅，冇計變形所限，好在除左拳頭全隻手可以郁動好多。
手腕有好型之臂甲，可惜駁口太明顯，亦影響到成日移位，可惜左少少因為本身設計好靚架。
背脊夠晒生化機械，加上用銀色同前面黑色撞勁靚。
齋個背面都殺晒其他／Iron Man啦，好興幸冇執錯死貨。
Iron-Bot得一種炮兩枝裝，Venom武裝多有兩種唔同武器，奸角確係唔同。所以我鍾意邪派。
學官方擺法左手蜘蛛網炮，機關炮裝右手，同Iron Man完全兩回事。
玩Iron Man果陣點努力都好，枝炮裝到上手都唔實，只係吊住吊住噉，
Venom反而裝極都裝唔到，好用力先嵌到入去，仲要超實點郁都唔移位，噉先係質素。
但有個好戇居的問題，膊頭位只可以旋轉，對手唔可以伸直向前，點複雜都得就係最簡單動作做唔到。
所以官方影相永遠只得上面個火字型姿勢對手斜向上，睇落好型，但其實係迫住咁型。
蛛網炮，真係射蛛網彈。（．．．）同原著射蜘蛛絲唔同，不過對於一隻玩具你仲想點？
只係唔鍾意在油銀色而唔同原著紫色，紫色一定更靚同更夾全機色調。
好過Iron Man就係扣位夠實，連住power pack條硬身膠管唔會拉到枝炮跌出黎或者對手移位，
論攻擊力彈力唔係好強，但都強過Iron Man。照計大家結構同機關一樣，點解會噉？只有嘆一句
「邪惡萬歲！」
機關炮咁Ｑ大舊夠晒漫畫feel但原來好輕，裝左唔移位又唔墜手，只係成日走火好牙煙。
只係唔知枝機關炮咩來頭，係非官方武器黎，盒同說明書影相都唔見有，可能太大件；
但連漫畫都冇出過，雙手都係蛛網炮。或者代替條利？漫畫入面條利係Venom最強武器，
玩具做唔到條利出黎，所以俾番枝機關炮安慰你？
成日火字型有乜好玩，整番個真實型機械人宇行型態先．．．好困難先至擺得到架。
條腰可以後拗近九十度，問題係重心上身傾前或者傾後好易跌，上面個款試左好耐先成功。
因為一個power pack只可以射一樣武器，唔好意思唔可以玩雙槍雄，除非拎埋Iron Man個黎玩啦，
雖然幾低能但我好鍾意Mega Morphs個武器概念，噉先似玩玩具嘛。
個頭就差少少，同Iron Man調番轉可以水平轉但唔可以垂直郁，
靚係夠晒靚（差噉條利噉囉），只係個頭好鬆，成日郁一郁就跌左落心口入面。
隻手關節算多，但可以做到之動作都幾「奇怪」，除左唔可以向前伸，
更奇怪當然係隻手可以分體啦。
唔係玩野亦唔係壞，對手可以噉樣分體法梗係有用。
你唔記得左呢隻Venom係「變形金剛」咩？
雖然對手二分為四只係變形其中一個步驟，但分開對手反而仲好玩，
當成機械人特殊技能襯晒Venom反派角色，亦好玩過Iron-Bot個"GERWALK mode"。
（"GERWALK mode"其實係Iron-Bot結構不良之失敗結果，而非「原創型態」）
玩完對手仲有個頭，一百八十度轉之後，本來笑騎騎樣會變成阿修羅頭！
加埋兩對手，近接戰型Venom-Bot變身完成！
大脾兩塊甲可以拆除，可惜插位太淺好易跌，
跌得多，自己都未開始玩，已經跌到花晒崩晒連榫位都爛埋斷埋。
同手一樣，對腳都可以中間分開二分四，就變成兩手兩腳蜘蛛八足。
"Venom-Smasher!"
都未叫做正式變形，已經有好多野玩，Venom-Bot先叫做真係好玩嘛！
上面個原創"Venom-Smasher"，我覺得仲正過型過預設個"Spider-Smasher"蜘蛛型！
其實手腳分體轉完個頭都差唔多變晒形架喇，只要黎多一野拱橋．．．
執番正ｄ位，掂晒。四隻前足收埋左所謂"stabilizer"，其實只係橡膠仔各一粒，
睇個名要放落黎等部野擺得平穩，但細得離奇（你見唔見到？），有同冇係完全冇分別。
大脾兩塊裝甲唔係拆左就算，變完機械蜘蛛之後，
兩塊甲合併再裝上機頂，立即美觀得多。
再裝上枝炮，變形完了。一句講晒：
「我好鍾意。」
我都係鍾意機關炮多過蛛網炮，型嘛。都係要咁重火力先襯奸角形象。
不過裝乜都好，按照「官方」／漫畫，武器係裝手腕，變形後都唔會出現機頂．．．
外觀一流，但就玩具黎講未夠合格。因為似figure多。
你見隻野擺極都係幾個款冇乜唔同過樣就知，蜘蛛型大幅限制活動空間。
八足用雙手雙腳分開就算，漫畫當中變形之後蜘蛛腳會變成尖尾，
玩具後四足顯得好求祈，對腳分開就算搞到好死大舊，
前腳其實腕甲本身變蜘蛛後移前可以扮番變尖腳，但因為太細件冇乜差別。
不過算啦，真係要完全變足漫畫變法，只有成隻手腳換或者加件。
玩完梗係要睇睇本漫畫啦，Mega Morphs系列就係吸引在有埋漫畫劇情嘛，雖則唔多掂。
全系列三隻，但冇講邊本係邊期，睇左先知次序係Iron Man > Thing > Venom。
劇情講到Venom偷晒Iron Man最新發明，令佢部Mega Morphs變成全世界最強，
之後突襲飛彈基地，想發射核彈炸爆紐約做低世仇蜘蛛俠，
Iron man就搵埋Thing幫拖，最後梗係（無奈地）邪不能勝正啦。
有趣地兩集都係邊個上封面邊個負責做捱打果個，但Venom好睇過Iron Man，
最後一集卦，起碼佢盡番奸角本身，出左好多招死前都打到正派死死下先啦。
Thing冇買，但其實miss左集劇情都完全連貫，可見編劇功夫幾高／低（睇你點睇），
大佬，俾細佬仔嘛，睇劇情畫功同對白咁細路向就知，我買係我白痴低Ｂ遮！
通常漫畫入面部機畫得好靚但玩具唔得，Iron Man同Thing就係噉，
但Venom調番轉頭玩具靚過漫畫幾倍，可能因為噉，佢係我唯一鍾意同滿意之Mega Morph。
經過Iron Man之超失望，Venom比預期中高質素得多。
相信我會將佢變成機械黑蜘蛛長擺屋企，Iron Man就．．．唉。我都唔知點搞。
「恐怖萬歲！Hail Horror Hail！」
好在冇調轉先開Venom，唔係隻Iron Man已經變左碎片。（但噉樣可能我會更開心）