有幾類西片好鍾意睇：一種係科幻，我係大sci-fi迷，特別玩crossover好似steampunk之類空想世界觀更吸引。又鍾意睇西部片，浩瀚大漠、臥虎藏龍、自有一套道義規則、以武以德解決糾紛，西部根本就係一個西方江湖。有趣在其中一個主力西部片派別係意大利，學術名稱叫「意粉西部片」，因為地區文化同資源問題，意粉派比美式逼真、精簡同暴力得多，亦因國家／種族問題初時未受過重視，不過憑堅持努力，加上歐洲別於美國之美學同風格，成就最終被認同，於西部片歷史中舉足輕重。
其中經典必數《無名三部曲》，1964年至1966年每年一集，三年就拍好西部片中殿堂級大作，第三部曲《The Good, the Bad and the Ugly》更係史上最佳電影之一。只係而家經典只等同於老土，當連電視台寧願買同播外購劇都唔選擇電影，要睇除左靠DVD，只有等深夜殘片時段，或者開住經典台例如美高梅頻道撞。我就係咁好彩無聊開電視亂轉台撞到。故事好簡單，時值美國內戰時期，有兩個牛仔一齊搵食，發展落去不出因財反目各走各路再互相角力。戰亂間二人得知一筆戰爭寶藏，每人心藏半個秘密，不幸除佢地兩個，仲有個視錢如命之自由人知道寶藏存在，二人一方面逃避自由人追捕，一方面同對方鬥智鬥力搵出寶藏；片名好人、壞人、醜人，就係意指三個主要角色。咪睇我三言兩語講晒，全套戲差唔多三個鐘，不過長還長，全套戲唔悶仲好戲連場，相比而家荷里活片九十分鐘或者兩個鐘就一套，故事可能仲簡單但完左都唔知講乜冇乜印象，就知點解意粉派會咁受歡迎甚至更甚於美國人自己拍之西部片，同現代電影俾美國特別荷里活做死左。
睇開荷里活片，幾十個角度、飛天遁地鏡頭，再睇番舊片，好多人會頂唔順，當年資源加技術，唔好話特技，攝影要做到而家咁出神入化難上加難 － 四五十年前喎。而家拍戲，單一段對話，可能一個角色已經幾台定點攝影機再加一兩部流動，唔好意思呢度冇乜，好多時一個角色得一部機影，成段對話同動作大半時間維持相同角度，甚至可以連跟隨角色行動而作之細微鏡頭活動都冇。配合西部景觀，特別多廣闊空曠場景，角色同鏡頭相隔遠距離，好有立體感同空間感，另好多時會將角色視野代入鏡頭，螢幕上／觀眾睇到等同於戲中角色所見，重要事件時更常用到提升投入度同臨場感覺。西部片不可或缺之槍戰同對決，再將穩定鏡頭同遙距攝影發揮到極致，好似最後Good、Bad、Ugly三個攤牌，先離遠影三人分別走到廣場三角，然後輪流影大頭，拍佢地緊張神情；再影對手，大家慢慢摸近自己枝槍；再拍雙眼，每對窺視其餘二人眼神。成場對決成個幾字長，全過程一句對白都冇，只用鏡頭由遠至近，就係為砌出最後一剎那開槍之震撼，真正「槍戰」半分鐘唔夠，但靠之前一個字，零對白冇誇張動作仍然睇得緊湊，你覺得悶？江湖對決就係噉。古龍話齋：
「真正高手，一招定勝負，無需拖泥帶水。」（well，其實古龍冇講過，係我老作的，唔好意思）
當然，講睇打到金庸噉（亦即打到龍珠噉）大家會睇得更開心，特別睇荷里活戲大的新一代，叫佢地睇三條友企定定望黎望去兩個字都未開波，跟住一開槍打唔夠十秒就玩完，高潮只似反高潮，點睇得落呀？所以有格有味道一回事，經典作都係留俾老野夜晚睇算啦，日頭同黃金時段容唔下。
做得西部，大量開槍場面當然唔少得，導演要再加渲染血腥暴力，未至於殺到通地斷肢成街血咁堅，都有明顯地誇張化，好似明明一槍搞得掂，係要連掃六槍，條友仲要一槍死唔去，然後主角一面射佢一面飛起撻落地再彈起然後條屍碌去唔知邊，就係佢教壞左吳宇森，搞到二三十年後發哥雙槍連射二千發千人斬平均每人食五槍都唔使上彈。
「我鍾意。」
至於三部曲主角無名，更加係唔可以唔識：演出無名者，就係已經等同於西部片代言人之奇連依士活。就算你唔知佢係乜水、唔知佢做過咩角色拍過乜野戲，佢三部曲拍完，已經經典到唔知佢係邊個，都知道「奇連依士活＝牛仔」咁家傳戶曉（你唔知？？？），亦係佢話俾全世界聽乜野係牛仔、定下電影中牛仔之典型，雖然佢個角色性質上同真正牛仔其實唔係太大關係。但你會介意嘛？你唔會理佢係咪真係牛仔、有幾多成正確真實，你只在乎佢有幾型。唔係佢，我地可能仍然只會覺得牛仔係飛仔或者牧牛人之類，而唔係浪人、槍客。
不過，會留意套戲，絕對要歸功於METALLICA。由初出道仲係underground開始，佢地已經用一首非常史詩之交響樂做演唱會開場，直到廿幾年後今日都係，呢首不朽名曲就係《The Good, the Bad and the Ugly》重點樂章《The Ecstasy of Gold》，出自意大利最出名意粉西部片配樂作曲家Ennio Morricone。電影中出現於接近尾聲時，Ugly去到藏寶地點 － 一個墳場，跑黎跑去搵收藏寶藏個墳墓位置，背景就係播住《The Ecstasy of Gold》，只係我覺得畫面影住條癲佬四圍亂走又冇野講，襯首咁激昂之交響樂，係浪費左首歌。好在套戲近二十年之後，仲有METALLICA繼續發揚光大，一聽已經振奮人心，難怪METALLICA會揀佢做演唱會第一首歌，平時當然係播帶，《S&M》直頭用埋交響樂團玩live版，殺晒。都未夠。去到2007，一張由rock到pop到classical界都有份參與之Ennio Morricone tribute《Ennio Morricone》，METALLICA係唯一一個metal界代表，當然係cover《The Ecstasy of Gold》，廿幾年黎陪住佢地一路成功、墜落之一曲，聽過原版再聽聽佢地個heavy metal玩法，完全兩回事但出奇地同原版十分相近（當然最後Kirk Hammet臨狂啡solo唔計啦）。METALLICA番玩人地歌，成日玩得比原版正幾條街（《Stone Cold Crazy》！！），特別而家．．．Jason Newsted走左之後，玩自己歌已經冇心冇力。灰