好多人話香港係商業社會，同錢冇關或者唔具商業價值，幾大成就都唔會有人重視。其實好真好中。正如李小龍令好多外國人知道香港去認識中華文化，佢出身地香港有冇紀念過佢？由成名到殞命幾十年，香港仲係一間李小龍博物館或一尊紀念像都冇。但其他中華地區、西方國家甚至東歐反而有，仲十分熱心。
「想香港都整？除非起完整完政府有錢搵啦。」

BEYOND亦係。而家冇幾多後生仔女會識或者知道佢地個名，但經歷過八十至九十年代中人士冇幾多個唔識，甚至隨口都哼得晒佢地幾首金曲。自己細細個未識聽歌時，除左430穿梭機同閃電傳真機ｄ兒歌、卡通片電視劇主題曲，有深刻印象之中文歌差唔多都係BEYOND，最記得第一首識得係《真的愛你》，未聽歌詞，齋intro段double lead已經永世難忘。好記得黃家駒死忌一日係我小學六年級畢業旅行，玩完上到巴士，收音機就係播黃家駒死訊，當時唔太大感覺，但越老越能感受到自己錯過左乜野。成世人第一次唱K，點第一首歌就係
「BEYOND《海闊天空》！」
係自己點完都諗番「點解我會點呢首歌？」因為以前未認真聽音樂，真正成為BEYOND fans亦係好耐之後，但當時一提起中文歌就係講BEYOND、就係《海闊天空》，未識聽音樂、唔聽歌都知道BEYOND同被深深吸引住，佢地就係如此具魔力。BEYOND為中文音樂付出心血、創作多首曠世名曲，對香港甚至全個大中華地區音樂精神帶來重大衝擊，已經被民眾／老坑視為粵語音樂界神聖代表，但你見「官方」同「音樂界」仍然冇認真對待過佢地。正如一開始，個個只話「嘈」、「夾band係飛仔所為」；跟住偶像派冒起好多妹妹仔追星追車，歌手冇事但BEYOND成為「教壞細路」的眾矢之的（我記得黃家駒過身果排，有晚新聞第一單就係大量靚妹因為佢死喊到俾老豆老母先生校長小），雖則佢地對比其他歌手如四大天王作風同心態完全唔偶像派，亦冇人會追究係傳媒過份吹噓形成追星風氣；音樂真係得到民心，但因為唔屬於娛樂圈同發言踩到好多人尾，「埋唔到堆」；二千年選「十大千禧金曲」之類懶係應節地為之前二三十年做個回顧，正路地係鄧麗君之類的真正經典，但劉德華《一起走過的日子》都有獎（幕後解畫「因為係某位評判心頭好」），BEYOND反而冇，相信佢地任何一首膾炙人口而具激勵性作品如《海闊天空》、《光輝歲月》、《真的愛你》，會比《一起走過的日子》更有意義、更值得作為「千禧金曲」卦？而家更加唔需要講，你見報紙講親都係咩不和咩醜聞，根本同音樂無關。BEYOND從來未入過流甚至被認真對待，因為身在香港，唔會重視文化藝術成就的香港。

夾band由進入香港第一日到今日三十幾年，仍被視為異端流氓之舉（當年唔係J-Rock同X-JAPAN香港人鍾意，BEYOND又點會成到名有公司簽丫非常老實），既「千禧金曲」之類都唔會有BEYOND，加上「冇商業潛質」同音樂整體未被香港重視過，媒體又點會刻意製作特輯或書目，向新一代講番呢隊殿堂級樂隊，俾大家溫故知新？真係等左好好好耐，港台《不死傳奇》專輯一連六集每集一小時向大眾再介紹幾位已故名歌手，難得唔係食住個復古熱潮，而真正係向音樂人致敬、認真對待音樂，第五集主角就係黃家駒。港台當年因「鑑於定位該不該繼續製作音樂節目」嘈左好耐，好彩有心人士仍在，等左十幾年，我地終於有幸睇到一個BEYOND／黃家駒致敬專輯真正從音樂出發。會有，或者某程度上2008係成立廿五週年。希望下一個，唔需要等到三十或三十五週年先有得睇。

播映日期係2008年第一個星期六26/1，遲左開電視第一節睇少左半，好在好戲在後頭睇得好感動。返到屋企想再重溫，上到港台網頁先發現
「因版權問題，本節目將不提供網上重播」
勁灰。香港音樂發展同傳播其中一個障礙就係「版權問題」。好在仲有非官方途徑：YouTube。節目出街之後，同晚已經有有心人分段上網，開心之餘立即搵software download左佢落自己部機。你都知自YouTube傳出會推出香港版後，所有唱片公司同電視台上去掃video掃得好勁，我怕港台冇得睇，YouTube遲ｄ都因版權被人投訴洗左，等電視重播分分鐘一年幾載仲要有緣先撞到，到時喊都無謂。
「唔會卦，當羅文梅豔芳張國榮特輯都未被洗，唔入流的BEYOND黃家駒又點會有事？」

特集以訪問為主，當然有BEYOND三子，同黃家駒身邊家人、朋友及音樂人，仲有盧巧音同黃志淙做主持，起碼夠說服力過求祈搵個港姐、演員、model或者DJ主持音樂節目先啦。另走訪兩隊現今香港獨立樂團，講講佢地對BEYOND有何感覺。整體十分正路 － 但你會發現多年黎都冇一個簡簡單單正路講BEYOND的電視節目 － 不過內容深入加插入好多罕見片段，剪接更是高明，學術感時事感重，唔似得無線唱唱歌仔玩玩遊戲講講八卦周邊就話係音樂節目。不過略嫌浪費兩位主持及兩隊樂隊嘉賓EVER同KOLOR，除左開場同前半出幾次鏡講講，後來根本見唔到，EVER都叫做有少少野講，KOLOR淨係影佢地玩一段仔《長城》出鏡廿秒都冇，好似拍完又用唔著，唔用又好似浪費就搵位攝埋入去，反而唔加做到成集《鏗鏘集》型式亦即如後半更好，單靠剪接功力已經足夠，除此之外論製作幾近無可挑剔。

因為係致敬黃家駒而唔係BEYOND，所以只由包括頭十年，亦係 － 老實講，大家（唯一）想睇的 － 光輝歲月。我嫌唔夠多講地下奮鬥史，一開始已經係四人時代，而冇乜講過五人時發生咩事（但劉志遠有一段訪問），其實真正應該俾人認識番係五人時期，可能好多BEYOND fans到而家都唔知有過第五個人、唔知《真的愛你》之前仲有大量遺珠，因為有趣在好多人話BEYOND係搖滾，但佢地真正出到名同成到名係pop rock，正如你問好多BEYOND擁躉、妹妹仔，
「知唔知BEYOND最初係五個人架？」
「下？係咩？」
「噉知唔知BEYOND第一隻碟叫《再見理想》，唔係玩流行曲，係玩art rock？」
「．．．你講咩呀？」
當年地下時點樣捱出黎、點樣做得成第一個騷、點樣踏入主流，只有好簡單好簡單噉交代：大家自己努力聽歌練歌、朋友同家人支持，同如梁翹柏所言，
「忽然有一些日本樂隊在香港大受歡迎，香港唱片公司覺得樂隊有發展空間，便發掘樂隊．．．」
避過左「再見理想」之後「背叛搖滾」，好多認真樂迷想研討之一環。但一來最舊作唔算得人歡心（想睇四個人玩《光輝歲月》人多，定睇五條友玩《再見理想》多？），同始終做果班「唔係果瓣」未必會想得咁深入會發掘埋「黃家駒點樣面對由地下上到地面之轉變同外界壓力」，甚至因為非局內人未有諗過呢條問題。當中，又可能有少少歌頌性質之政治正確。正如大家都知BEYOND真係紅果ｄ歌，唔係真正好rock好前衛果ｄ，而係最pop果堆。節目中對此之交代，只有由佢家姐為由《金屬狂人》變成《真的愛你》解話：
「這首歌很大眾化，琅琅上口， 我有一次批評他：『你不是說自己的歌很另類嗎？這首歌琅琅上口。』他解釋是因為母親節將至，是唱片公司要求製作的，似乎在暗示這並非他意願，並非你眼中那麼俗套，只是迎合唱片公司要求。」
但只交代到「上地面」一步，上到去毫無疑問BEYOND整體再加pop落去，最少你唔會搵得番以前七八分鐘一首歌走五拍八七拍八，到後來甚至《喜歡你》，都冇解。唯有當成之前解釋一里通百里明啦。
「那麼，BEYOND的成功，係令band sound入到屋，定還是只有BEYOND自己入到屋？」
亦有人問。好鍾意佢地一回事，我係支持後者。但黃家駒同BEYOND做到一樣野，就係令好多人開始玩樂器，而開始左玩樂器，即係代表有機會（唔係一定）會接觸同嘗試BEYOND以外其他band sound。pop？pop。肯定。只係你明知佢係pop都唔會投訴，因為神在佢作曲編曲填詞都係神來之筆，要作rock特別作pop，真係冇幾多首係唔好聽（老實講，「唔好聽」多數都係好初期仲係好娘果ｄ），pop歌保留到BEYOND式搖滾（保留搖滾精髓大量solo！結他聲樂器聲突出！加自己作曲作詞！噉先真正叫得做樂隊！），同好聽到你心服口服果隻，幾時拎出黎聽仲係回味無窮。有冇見過人唔鍾意《光輝歲月》、覺得《海闊天空》唔好聽？可以紅足十幾二十年全部老餅一致稱頌係有原因的。

但黃家駒除左成功在天賦同無人能及的一把聲（仍然係我最愛香港男聲，無論抒情定搖滾，香港有史以黎得佢一個最近完美），仲有毅力同態度。節目中提到由家人買枝二手木結他俾佢開始自學，再自己儲錢買二手電結他、買器材，每日練幾個鐘同不斷聽音樂增廣見聞，呢樣野你搵到個靚仔會做都難啦，分分鐘佢練一日結他，都長時間過而家靚仔一個禮拜或者半個月夾埋。
「話黃家駒彈結他唔勁的『專家』們，睇完個特集，再搵BEYOND 1991演唱會睇，你就知佢有幾『唔識彈』，當可以同黃貫中鬥啡solo時。」
轉大路令BEYOND紅左之後，發言「香港沒有樂壇，只有娛樂圈」，再調番轉頭追尋理想做番自我，好似去非洲做義工，幫人三個月後返到香港寫出《Amani》，而唔似無線搵個藝人去遊幾日行行企企睇睇之後對住鏡頭喊晒「好Ｘ慘呀」就叫感受。亦透過不同遊歷，令BEYOND由art rock走到pop rock再回到art rock兼做埋「香港第一代visual rock」，《大地》、《農民》係我眼中「香港式創作」代表，加上阿拉伯同非洲系列，真真正正集各文化大成同時擁有自己風格。你話佢地pop？我未見過本地主流有pop友可以pop得咁有深度。就算比較埋地下界獨立界，都見唔到好多人／靚仔，能夠融合其他音樂同文化入自己音樂入面 － 玩到同人地一模一樣只係cover/tribute一隊band，唔係寫成自己音樂。唔好話寫，你叫而家ｄ靚仔唔好聽死一兩樣，試多ｄ新野接納多ｄ，都難。單包容天下一樣，黃家駒已經幾近無人能敵。

更重要係有意思。今集《不死傳奇》副題係「流行音樂的清泉」，自然指BEYOND，但更有意指出黃家駒同戰友所寫歌詞。你而家唔會搵到粵語流行歌講南非、講戰亂、講和平，唔夠K嘛，都唔喊苦喊忽，唱黎又溝唔到女。勁在寫得黎歌詞靚，同埋唔老套唔說教，即係好多唔妥pop話流行曲乜乜物物的地下音樂人，自己寫ｄ「好偉大」的歌詞，未比文字，內容已經及唔上。《真的愛你》個名聽見覺得肉麻，睇晒全首歌詞，服晒你冇野好講。
「《真的愛你》唔係黃家駒填詞喎！」
我知。填詞人係小美。但唔覺同BEYOND共事幾位填詞人，可能唔夠出名，但全部唔係野少、唔會交行貨嘛？當中我最愛劉卓輝，我心中本地最佳填詞人之一，最初幫好多「Rock友」寫詞，夏韶聲《說不出的未來》講八十年代末、九十年代初香港對前途不信任之社會不安，「唔關我事」，但第一次聽（於2000年夏韶聲搖擺心窩演唱會）聽得好感動。幫BEYOND所寫，最具代表性同話題性係《大地》、《長城》，冇幾多中文歌內容會咁遠視宏觀，同刻劃及批判當時中華地區情況咁細膩。《逝去日子》（無線《淘氣雙子星》主題曲，我未睇過都識唱！）、《灰色軌跡》、《歲月無聲》（呢首本為黃家駒寫俾夏韶聲，其後BEYOND再唱番）三首具Bon Jovi早期詞作藍領色彩，未睇歌詞單睇歌名已能感受一份唏噓。就連情歌都有《情人》同《為了你，為了我》，我從來唔鍾意《喜歡你》，但劉卓輝有份兩首BEYOND情歌都係我最愛，《情人》曲同唱吸引力可能更甚於詞本身，但《為了你，為了我》，一首唔多人識冇乜人留意之遺珠，係我心中BEYOND繼《海闊天空》之後第二金曲，或者因為值《大地》時期好重中華文化感覺，詞亦實在太靚太到，所以我好鍾意好鍾意呢首歌。不妨上網搵搵歌詞及文獻，研究一下劉卓輝筆觸一份灰暗苦澀。往後合作伙伴變成如黎明等流行歌手，產量減少歌詞題材亦「pop左」，令我感到遺憾，或者同林夕一樣，收貨人只要行貨、只配要行貨咪求祈算囉，到真係有有心人有心歌出現，先認真落筆再一鳴驚人 － 自從K歌當道，真係令到好多填詞人馬虎創作。你話林夕近幾年／十年填詞廢左好多？因為冇太多歌值得填好詞。留意一下唱果個歌手係真正投入音樂，佢手詞立時「回勇」完全唔同，只係次級歌手氾濫，導致行貨居多而寶物出現偶一為之，太易被忽略。

講到BEYOND最重要，必定係1993年，最重要，亦係最悲哀。先，係黃家駒寫出《海闊天空》，粵語流行曲中最神聖作品；冇幾耐之後，就係黃家駒日本跌死，《海闊天空》成為遺作。就算唔係因為佢過身，《海闊天空》一樣會係香港流行音樂殿堂級作品，你試下用headphone聽首歌，編曲豐富同氣氛舖排完全唔屬於單純流行作品（但到而家我都未知編曲人係黃家駒、BEYOND還是他人），歌詞更加唔使多講，你係八十年代自會感受到當中情懷、隨口都唱得出，亦因為當中意思，逢遇「熱血」場面必屬首選，好似幾年前赤柱藝墟因為「太嘈」宣佈清拆（香港文化之荒謬），最後一刻，墟中全部人圍埋，執起一枝木結他高唱《海闊天空》。呢首歌就係無論邊個彈邊個唱，一班人一齊的話必定感人。
「話晒，我都靠佢賺過五蚊架。」
最被感動，係香港寬頻神來一記：

所以我鍾意香港寬頻，唔係淨係串人咁少野架，但我覺得個廣告令（現在的）人搵番BEYOND，多過記得香港寬頻。諷刺地，首歌係黃家駒最成功作品、最完美中文金曲，但佢未正式唱過live就走左，我唯一聽過佢唱現場，得馬來西亞unplugged演唱會，到最後仲要承諾「1994年再見」，而家聽番相當唏噓。至於當年甚至BEYOND自己都講番，黃家駒早有預感會出事，所以借《海闊天空》字裡行間透露玄機，信不信，由你。包括跟住一段：
「我讀教院時，有個同學個阿爸係命理大師，佢幫過黃家駒睇過相，提到佢會有個機會可以到外面闖出人頭地，但同時離開香港就會有血光之災。當時佢冇聽從師傅指點，最後，大家都知。」

「如果黃家駒當年冇去到日本、冇死到，而家BEYOND會點？」
最多人討論話題。當佢地最成功最出名時都「唔入流」，之後香港音樂明顯地走下坡（唔知是否巧合，香港樂壇發展真係自佢離開之後衰退），就算有心是否有力力挽狂瀾？又或變成另一個崔健同主流妥協？唔知。退居幕後、回到indie似乎係兩個最大可能性，因為可能真係入唔到流，正如港樂成日話搵唔到歌手合作，結果你見港樂live一係來來去去果幾個，一係望見覺得有實力但有少少質疑，反而最大發揮之港樂BEYOND仲未發生。做唔到？唔係，林子祥港樂都有唱《海闊天空》、張學友都唱《情人》，就連恭碩良都可以做到一場symphonic rock港樂live。BEYOND好多歌編曲多層次，要改成交響或協奏型式絕對唔難，《海闊天空》已經係個例子。既然如此，點解唔做？好多大陸人唔識廣東話都識唱BEYOND、都係聽BEYOND學廣東話，直到今時今日大陸人仲係尊敬BEYOND到差在未當神咁拜，反而香港依然未會去尊重去珍惜。作為樂迷，睇見亦好感慨，當全個特集三子未試過同時出鏡，全部係三人各自接受訪問，BEYOND而家搞成點，冇言明之必要啦。不禁自己都想再問多次：
「如果黃家駒當年冇去到日本、冇死到，而家BEYOND會點？」

最後，簡單輯錄節目中幾段發言，同前面一樣取自字幕，而非口頭原版。差很遠嘛。字幕組確應寄一功。
黃志淙：「不管是俗世或是都市森林，可以突然靜下來，慶幸我有過這些音樂．．．西洋搖滾樂歌手，聲線沙啞的很多，若以沙啞聲線唱中文歌而不會令人覺得老套或覺得出色的，可謂萬中無一。」
劉卓輝：「第一次見他時尚未成名、BEYOND尚未推出唱片，我覺得他技術好，站在台上予人大師、未來之星的感覺，很少地下歌手具巨星風範．．．有些歌流行十年、八年便不再流行，但是他的歌流行了十多年，至今仍然很流行。」
北京BEYOND迷：「覺得在我們心中，不可能有人再超越家駒．．．在香港和內地，別的音樂人，我只會稱之為偶像，但是黃家駒我一直以藝術家來稱呼他．．．」
黃家駒：「音樂應該有很多種類、有很多不同性格、有很多不同品種、有很多色彩、有很多不同的感情、有不同的文化在其中。音樂是藝術，包含許多很虛幻的感覺．．．」
梁翹柏：「以前在香港組樂隊，在BEYOND之前，樂隊被視為沒前途，亦不知道原來可以有此成績，也不知道將來有何前景，我們當時會反問自己為何玩音樂、有何目的？．．．當BEYOND在香港樂壇奪得最多獎項時，曾經有人說：『怎麼香港樂壇一潭死水、青黃不接，BEYOND也能獲獎！』他們這樣說。但現在全國最多人唱的是甚麼歌？是BEYOND的歌。你說是不是諷刺？」

製作質素及節目深度皆專業，好期待港台有更多音樂節目。我冇旨意過無線。我期望新班子亞視，都冇期望過無線。

另，錯過當年如我的朋友，強力勸籲去搵番隻Beyond 1991演唱會DVD，成場live除左冇《海闊天空》（91嘛），好睇到睇極唔厭。BEYOND單聽CD唔夠，因為精髓係live，睇過佢地表演就知咩叫live，玩得好過studio幾倍，又試新編曲，全場夠晒氣氛，一流。最重要：罕有地仲有黃家駒之現場錄像。
「『搵唔到』或『冇錢』者，YouTube一早有人成場放左上網喇。不過，係有心，破囊支持下啦。」

「生命不在乎得到甚麼，而在乎做過甚麼。」
黃家駒　1962-1993