上回講到：

「世紀黑仔王如我，居然一籤抽中
尋覓已久之鐵球筆座！
我唔會再俾你搵笨！」

點知，語聲方畢．．．

「點解會有？又話唔抽？」
唉！說來話長！故事發展，真係峰迴路轉．．．

話說抽到鐵球之後，苦主107踩到上門，
「你抽到鐵球，我仲未抽到馬沙眼罩喎！點計先？」
收舖之後，兩條友出陣OK，展開第二次超級OK機械人大戰。

阿姐：「你抽完鐵球仲有廿一張飛，而家得番十九張。」
「黎！電視機！電視機！！開！！」
OK頓變葡京。第一局，一人一籤。結果：

我抽到隻杯。上面隻哈囉係三款中最靚，不過日式茶杯設計唔多鍾意，因為有杯柄較實用，
同，當然，唔係有哈囉個嘜頭，即時減三十蚊啦隻杯。

至於107，之前抽左幾次，次次都係鐵球，
今次，順理成章啦自然。

「再黎！有邊！有邊！！開！！！」
第二局，不進且退，杯都冇得條毛巾，仲衰。107勁呀貫徹始終，都係鐵球。
唔順，再黎多局，今次兩個夾錢抽．．．

超無奈。都係毛巾。毛巾三款，得渣古眼一款靚。我有兩條。
都幾大條近半米長，同過癮嘛有渣古隻眼，不過好薄。唔知有乜好用。
至於107，自告奪勇再抽一籤：

「頂，又係鐵球！官方數據，抽到鐵球機會係24%！
連續抽中三隻鐵球，機會率係24%x24%x24% = 1.3824%！
我屋企已經有七隻鐵球！夠晒柒！」

再夾兩鑊，即係每人抽多一次，
「大！大！！大！！！」
結果．．．

．．．都係毛巾。107你屋企突然多左好多塊布抹塵。
「阿姐你之前唔係話好多人抽晒毛巾咩？」
非常無奈。因為成間OK鐵球俾我地抽晒。但眼罩仲未出現。

「唔信邪！我同花順！開黎見我！」
抽到第九次，劉Sir隻童子手柒頭手，終於不負眾望：

「我終於可以做馬沙大佐喇！」
一野抽中。個眼罩除左俾你做紅慧星馬沙，仲真係有用架。
眼罩位有者哩，平時放入雪櫃急凍，起身有黑眼圈時即出冰敷雙眼。
「黑眼圈敷完之後會點架？」「咪變成紅眼圈囉！」

「勁！一舖翻身！通殺！」
「起初十九張，你地抽完得番十張，大獎木馬號仲未有人抽到，搏唔搏埋佢？」
諗得過架，架木馬號空氣清新機，網上炒到四百幾蚊部！
不過阿姐的問題未有回應，因為兩條友已經被捉左去香港病態賭徒復康及治療中心。

臨走／臨死前，有理冇理，笠左107一隻鐵球先。唔係我今次黎OK做乜？真係抽馬沙眼罩咩！

兩臂普通版鐵球藍色身但個盒黑白，反而白色四手特別版個盒係藍白。果真特別。

四手鐵球以前未見過，冇深入研究過原著，所以唔知道係咪正史出現過之機體。
實物到手，一同普通版相比，正之程度高出倍數計。

雖然都係淨色同多手工瑕疵，左面同「左眉」位加番聯絡軍標記，立即靚得多。
藍色版為忠於原著連咁少野都唔加。添一添足已經可以好大差別架喇。

白波工業用味重好多，對鉗形狀唔同，下方仲有工具形義足，係高級型號？
起初覺得多對手怪，但我一早唔應該咁堅持old-school。正好叉多。

噴射器亦改成黑色可轉向型，外觀同顏色都改善左，係個駕駛倉出入口位置唔知做乜，
無端端變左舊黑色螺絲，係唯一及唔上原版之處。但有幾可睇個底丫，有乜所謂∼

就係噉，超戇居地兩條友夾埋抽左過五百蚊，我終於達成目標集齊兩隻鐵球，
一隻放屋企，一隻拎番公司擺，功德圓滿，OK機械人大戰正式結束。

「從今以後，我唔會再去OK。」
「喂！完左高達，玩五十蚊抽一次變形金剛喎！」
「咁正？去！仆到去！！」