三個月前去首爾開工兼過聖誕新年，雖然忙到黐線到走嗰日先放過一個禮拜假唔夠，不過做得好開心，最後被急召提早個半月返香港，十分唔捨得，所以返香港一個月之後，又飛過。呢次抽到搭早機，第一次見證大力水手炸雞開門做佢哋今日第一個客，上次臨上機都等唔到出新一期，今次終於可以繼續離開香港之前必定要嚟返餐《進擊的巨人》送炸雞嘅傳統，而好耐未食過Popeye早餐，兩份夾埋價錢先等於一份只得KFC份量嘅正餐，就等我打孖上自製一份歐陸式豐富早餐啦。

其實我只係嚟補返本應喺韓國過嘅最後一星期，今次走嗰一日，正正就係原定留足三個月的話上機當日，而過返嚟當然係為睇show啦，落機睇一場，臨上機一場，中間仲有一個禮拜，好多日好多時間，但係冇得玩。

當時走得咁急就梗係因為有大（鑊）嘢啦，就係要一個人喺一個月之內趕好一個正常起碼兩個人兩個月至做得晒嘅project，而deadline仲要撞正我喺韓國個星期，之前幾日已經朝朝早八點半上個客度，買兩份早餐，一份當埋晏晝，因為已經忙到連花半個鐘落街食個飯嘅時間都太過奢侈。臨尾一日更加搶到盡，八點半開始一直做未停過，九點收工上巴士繼續電話覆email，返到屋企老母都知我冇時間坐定定食飯就煎埋雪櫃底嗰半底蘿蔔糕俾我算，做到差唔多兩點發現唔掂真係冇可能搞晒全部嘢至上機先開始執行李，執完兩點幾沖涼，沖完一出嚟就拉篋衝落樓追一個鐘先一班嘅通宵巴。

然後晏晝落機去完酒店check-in第一件事，相信係立即走上個客度借部電腦繼續做嘢，即係我喺韓國嗟，個客喺香港仲做緊嘢要我跟嘛，下星期要交貨喇大佬。之前仲諗緊兩場show中間成個禮拜點揳好，係咪滑返一兩日雪先？點知接咗呢個project之後，發現到頭來根本唔使擔心，啲期撞到應一應，話就話去旅行，點知去到都係朝九晚六做嘢夜晚至有得出去，自己貼錢出國返工，我應該係邊一個發明了返工之後人類史上第一人。

（放心，老細，返到嚟我實claim爆你OT）