別了，首爾。唔拎簽證去韓國最多可以留90日，張機票亦係open三個月，當初諗住會逗埋利是先走，點知只留一半時間個半月就返歸，係好急根本嘢都未做完，但公司話要返就要返架喇，這就是前線的無奈。

因為走得咁急，聖誕開始踩足咁多日只叫放過一日病假（實際上唔係裝修佬都要趕工俾唔到位我做嘢，我都唔會有呢一日歇一歇），今日夜晚上機日頭都要返公司繼續衝，就喺本來出發返酒店執行李去機場個時間跳電，仲要一跳就跳兩次，到最後真係唔行唔得喇，然後好難落雪加好耐未試過落大雪嘅首爾，喺我一出門口就開始落雪，然後架巴士越近機場雪落得越大，去到夜晚機場落到好似落雨噉。係咪個天都覺得我唔應該咁早返香港呢。

你問我，我一定係唔捨得，雖然一條毒撚飛過嚟全個場要一腳踢，一個人要做本應起碼兩個人做嘅嘢，所以完全冇得放假仲日日都辛苦到人都癲，但成隊人都好落力唔頽做，日日都做得好開心嘅，同每日捱完夜晚收工去掃夜市或者成班人出去食餐好啤一啤，呢種韓式生活真係好正，香港你同你公司嘅人係唔會噉做，因為氣氛唔同好難提起呢份興致，同我好好彩合作嘅都係好客之人，裝修師傅唔使講啦個個粗豪一有機會劈酒必定隊返幾杯，就連樓上LG班IT佬，我唔識韓文佢哋只得非常簡單英文，大家三唔識七加溝通唔到，都可以「不如揾晚去飲酒囉！」就無端端識班新朋友，我喺香港係完全唔飲酒，但過到嚟呢邊已經俾班韓國朋友隊到兩枝燒酒再溝酒都唔會冧，有時仲會買返枝長壽米酒返房送雪糕食。亦受過唔少好客友人恩惠，喺韓國呢個半月，我都唔記得自己食過幾多餐免費大餐。

而對一個怕濕怕熱就係唔怕凍嘅人嚟講，喺韓國全年最凍兩個月過嚟首爾完全是上到天堂，韓國天氣簡直一流，加埋地大、路闊、車少過香港、舖頭多姿多彩，每日行路返工放工，慳錢慳時間又覺得自己好健康，跟住又可以俾多個理由自已去多次新村9000圜無限燒。只可惜今晚之後，一切俱往矣，又要返去香港做返個正常香港人，即係由朝到尾做牛做馬。

我會懷念各位出納組的同事。更加會掛住各位靚靚的朝鮮族sales（口桀口桀）。假如真係留足三個月，我可以睇埋2月28號Dark Mirror ov Tragey場十週年紀念演唱會，跟住上機之前嗰晚仲有Arch Enemy + Method。而家一月中走，好在可以趕到睇月底怒人，但係咪即係叫我二月底過多嚟一次首爾呢？