人生總有轉捩點，繼十年前畢業出嚟做嘢，同半個十年之前離開TRHK，2015年頭一定係最大一個。轉新工之後成世人第一次去外國出差個半月，跟住再接手大公司project，其實好開心嘅，因為唔係公務冇機會可以外國住咁長時間，做大公司project亦見識好多，而且人工仲有得加兼且唔差，只係好多時更睇際遇彩數，舊工人工唔高但唔算辛苦舒舒服服，而新工加一大截俾我時，又點會輕鬆得過以前呢。

去韓國坐個半月接近未放過假，一月中返到香港之半個月係今年頭半年唯一過正常生活嘅日子，跟住去個大客度落場，新年坐到佛誕個project依係做極唔完。幾個月前開始已經係星期一至五只得搭緊車時唔係做緊嘢，禮拜六日都可以做到朝九晚二，接呢個project前更加未試過可以成個月冇邊晚早過三點瞓加每星期起碼開一晚通宵，如此生活仲邊有生活可言呢。所以今年錢搵多咗犧牲亦好多，其中一樣犧牲最大係寫作時間，簡單嚟講，就係劉Sir個網加劉Sir個Blog。

劉Sir個網喺Geocities年代開始，貫徹當時乜都DIY精神，2001年到今日，成個網都係全部靠人手打HTML砌出嚟 — 其實係因為我一直唔識用Frontpage同Dreamweaver之類software整網頁，跟住先與時並進地開多個blog，雖然開時已經遲咗好耐，開blog幾年之後Yahoo blog都（俾我剋到）執笠了。十幾年間打咗上千頁近四百萬字，可以一己之力用HTML起一座content farm出嚟，都算一個好大／好戇居嘅成就，只係同時亦代表每次出一篇文章都非常花費心力時間，雖然每次出相出文都係facebook、個網同個blog一雞三味，但facebook就話upload張相上去打段字click個OK就搞掂，後兩者絕對唔止咁簡單。

想喺劉Sir個網出同一篇文，首先要執相改大細（lau-sir.com係每個月俾錢租位擺file架，張張相都唔執幾MB照上的話1TB都唔夠用啦），然後開個text file放堆字入去，之後就係寫code時間，點隔行、點分段、字體咩顏色咩大細、靠左靠右定置中、相同片同字點排版，通通要自己人手打一大堆砌。整好之後全部file擺正folder用FTP upload上網，upload完再檢查file path有冇set錯，debug埋至叫正式出到一篇文。再跟住同一段code搬過去blog，又唔係直接copy & paste咁簡單，因為blog個介面直接用HTML出文永遠會走晒位，加埋domain唔同，上之前又要再執過內文format再改link。

facebook半分鐘click幾click搞掂嘅事，HTML要用十幾甚至幾十分鐘打幾百字code至做得到。以前生活上時間尚算充裕，每日要花半個鐘去更新個網個blog都應付到（只講砌code部份，內容創作可能係（十）幾個鐘），但上年年底去到韓國，開頭夜晚都叫有空閒時間，跟住越嚟越忙加夜晚越嚟越遲放工／開始多節目，堅持到新年第一日之後不得不放棄，自問作文同打字速度高，叫即興作幾段擺上facebook絕對冇難度，但作完又要再用半個鐘到一個鐘時間，將相同內容變成HTML upload上個網同個blog度，韓國生活咁忙時，呢種時間就變得太過奢侈。

因為返到香港都冇叫得閒過，二月開始做大公司project更加比韓國時更忙，連facebook都冇時間上冇時間update時，更何況自己個網？一停就停咗半年，係近來手頭上工作清到咁上下，望返日曆至醒起，原來劉Sir個網十四週年喇。十週年忽發奇想拎個網去健力氏問有冇得申請世界紀錄之後，其實冇點關心週年呢回事，不過自從劉Sir個網開張，十幾年嚟今次係第一次休止咁長時間，就真係好大件事，代表從前生活點忙都每日同你嗲幾句甚至嗲返一兩篇論文嘅劉Sir，都變成一個生活得返個做字嘅典型港奴了，十四週年就係一個俾自己重拾寫作興致嘅理由。想寫嘅其實好多，韓國遊記《劉行首爾》未寫完，更加未寫好謝安琪上兩隻碟，講吓講吓佢新碟都就出喇，我目標係今個暑假內完成最少呢三樣，當搵返我自己嘅生活先。只希望唔會下次又咁長篇大論時，已經係十五週年啦。