發覺我同胡忠好有緣分，上次Summer Sonic、今次Loud Park，兩次都係搵工搵到「嗚呀我要去睇show呀∼∼」agent先打黎話有工見，「政府部門，灣仔返工，返五日工五點九放工，人工唔差啦」，咪去試試。初時以為灣仔返工即係會展一帶，果頭係政府部門集中地嘛，點知唔係下海，反而要上山。

不過情況有少少唔同。上次係買飛訂機票卜酒店前夕先收到call，見完自然又要等返個零禮拜消息，跟住發現收皮已經差唔多要出發，先趕頭趕命去訂野買飛，機票酒店都使多不少；今次都係等，不過係為另一份醫管局。若講到量地後最想做，首選一定係紅館睇場唔使解釋啦，第二就係醫管局，因為行兩個字路就到lunch返屋企食又得，車錢飯錢都唔使出賺幾多袋幾多，其實咩職位都冇所謂只要係返醫管局已經無敵。可惜又係開始計劃出國先收到電話，跟住見完等極冇回音，等到出發前唔夠一星期至開始準備，趕頭趕命又使突。呢次係已經俾晒錢定好晒，臨飛去台中睇Soilwork之前agent又打黎，打足兩次話人地知我飛都肯請的話等多兩個禮拜至上工，上機前點都要見埋佢，結果再次臨出發去睇fest之前，過黎灣仔上去胡忠。

其實唔係agent介紹，我都唔會知道呢個地方，因為位置都幾隔涉，無論搭巴士定地鐵都要行多兩三個字路先黎到，同唔係特別見政府工根本冇乜機會會黎，因為大半棟大廈都俾政府部門進駐。第一次黎係見衛生署，睇水牌見到原來樓下就係教育局，心諗我教育出身但黎到居然唔係搵教育工都幾諷刺，點知今次立即有機會俾我試試，而且同我想像中幾唔同，見到成間office冇幾多個唔係廿尾三頭，見我兩個面試官仲要後生過我加一身便服黎見反而我著晒西凝重得滯，真係見得成人工又傾得掂的話，可能會幾好做，同兜兜轉轉總算回到教育界。不過當然，等我嘆埋Soilwork同Loud Park先啦，過埋呢野退休生活最後一擊，就真係要開始更加努力更加認真地搵工矣。

我同呢個agent、呢棟大廈的緣份就係，每次決定左去睇fest時，我地三者就會拉上關係、我就會俾agent點過黎。睇黎我要快手睇定最快下一場fest係幾時先。