幾個月黎第一次上工廠，本來想講個幾乎返唔到香港的故事：夜晚返到屋企摷摷個袋，先知入面放左成疊《黑紙》，連六四果張都有，證明幾耐未執過個袋，好在過關時唔使查袋，俾公安查的話大家而家都唔會見到我。見近來香港成日拗人工同工時，倒不如同大家分享呢封信。

或者你唔會信，其實大陸勞工法律除左底薪低行政廢，保障員工方面未必差得過外國，有時仲會好到估佢唔到，好似前排有個員工搵左自己親戚入工廠做，點知入黎之後病死左，跟住可以告老細話係佢照顧不周，然後法庭話「有法例可依」判公司賠幾萬蚊。唔使問我我都唔明係乜邏輯，但事實係如果政府真係執正黎做、老細真係跟足規矩，大陸工人所受待遇同保障，大家只有羨慕。

眾所鳩知而家乜價都加到黐線，同大陸客傾過，而家廣東市區一家三口每個月生活最低消費四千人民幣，做工廠的話旺季加盡班一個月先得三千尾四千頭，如果唔兩公婆出晒黎做野好難捱，但有時屋企有細路阿媽可能唔返得工靠晒老豆，得一份人工又點頂，特別淡季冇得加班時？問老細，佢永遠同你講「共渡時艱」，每年一次加人工永遠低過物價升幅甚至係零。香港人？梗係粒聲唔出啦。大陸人唔同係唔妥你咪劈砲囉使買你怕，呢位朋友出返封「溫馨提示」算好斯文架喇，最後好似都幾多人因為資方講唔掂數擺唔平而走，搞到工廠貨期同質檢出左大堆問題。只要你反得夠團結，資方一定大鑊過你。

上面講左乜野參透唔到的話，我幫你參埋：

1) 大陸政府係好仆街，但人地好多年前好多政策已經同香港相反，保障員工多過保老闆。當然你可以話跟住做是戇鳩的，這是另一個問題。

2) 同樣身為廣東人，大陸人真係要出手做野時可以好搏命去得好盡，從來唔似香港人只得把口，唔夠人大聲唔夠人惡寧願死狗鳩縮繼續俾人恰都唔敢還拖。

看看大陸人怎「申請」，就明白為何香港人抗爭永遠失敗。