「我要食薯餅呀！！！」

如果行行下街突然間聽到有人噉樣大嗌，唔使驚你只係遇到我嗟。講過好多原因令我一直冇諗過去日本，其中一個仲要幾大一個，就係對日本菜完全冇興趣甚至唔鍾意果隻，直到今時今日都未食過一舊壽司或者魚生，拉麵又麻麻，唯一會食係炸物，因為最西化。不過親身黎一次日本發現，就算唔鍾意食日本野，都唔需要餐餐捱吉野家同銀咖哩咁灰，因為有更好選擇，就係七十一。（．．．）

始終好難完全唔食。第一日到步立即朝聖，點知去到俾Kurry King耍左食唔到Slayer咖哩，就跟大隊食拉麵，印象只有 a) 連買碗麵食咁簡單都有自助買票機自己睇相入錢買飛，明顯知道我係日文白痴 b) 日本舖頭間間都好大，但食肆相反好多得細細間，好似呢間拉麵舖係長條形，得四五步路咁闊、走廊都開埋位一有人出入就要你就我我就你、迫到傳菜要先走出門口再另一邊拉趟門入返去上菜，就係迫到噉 c) 坐走廊位對正廚房可以睇住老闆娘拎住枝火槍燒肉幾爽，不過每次有人入舖出舖叫野食，老闆娘做緊乜野都會立即停手再用非常高音量爆百幾二百個字同人打招呼，我食一餐俾佢嗌左成萬字都有 d) 門口招呼你入去坐果個妹妹對眼大到呢（應該話對con大到呢） e) 終於講到碗麵，其實得兩個字：好鹹。我對日本拉麵印象一直以黎都只得個鹹字，而黎到食「正宗」拉麵，係比香港更加鹹。同埋都幾貴，一碗四五六十蚊是閒事，永遠唔明點解日本菜就算食唔飽人都必定收得比人貴。

所以留日本差唔多一個禮拜，正式日本菜只食左呢一餐，或者話只中左一次伏，睇我夜晚係去食莎樂美就知咩事啦。其實行開心齋橋果邊本身想食串燒，但一來果頭雖然叫消費區但要搵間食串燒都幾難，而且原來幾貴下，最後都係意大利野算，一定鍾意食而且幾好食，加一人一百食到滯仲有無限添飲，同原來香港都有莎樂美，返到黎可以覆灼。如果唔食莎樂美．．．小肥羊囉，真係唔黎都唔知原來小肥羊開到日本都有。其實有樣野好想試，就係pizza放題，有間薄餅屋你入到去擺低690 yen即係六十蚊港紙都唔使，你食得幾多就係幾多。勁想挑戰，知唔知我同我老豆其中一樣最想做的family day娛樂節目，就係叫兩個pizza大批返黎一人食一個？仲要一個人食晒成個大批都唔夠飽，食完實要再加料先夠喉？對我黎講薄餅自助餐絕對開心過同抵食過小肥羊啦。

食最多係七仔，黎到日本冇幾多餐唔係搵七十一搞掂。聽落好似好折墮，但日本便利店同香港完全兩個世界，間間都好鬼大，賣到同雜貨舖一樣咁雜連H漫專櫃都有仲有咩可以冇，又夠多選擇汽水已經有過百種你揀，而且好多估你唔到神奇野，因為健康飲品市場好大，見最多唔係保健乜乜乜就係維他命碳酸乜乜乜，搞到連可樂都有減肥版，話飲到飲落肚會吸收脂肪，食飯果陣飲就唔怕食肥你。係咪有用我唔夠時間驗證一下，不過你俾幾多時間我做白老鼠都冇用啦，真係隨便買罐都好味過晒香港大半本土貨，有隻朱古力奶我飲左一次之後已經每日最少要飲一罐先至上到癮，咁多正野飲樣樣都想試根本停唔到口，仲要價錢唔會貴得過香港多少擺明引你狂買，好似呢頭劈完枝減肥可樂，果頭已經整多枝香港唔見好耐的雲尼拿味可樂。飲多一百枝減肥可樂都冇用啦。雖然臨走冇掃幾箱汽水返香港，既然香港人咁哈日，返到黎去大超市或者阿信屋之類有機會搵得返，不過價錢當然差好遠啦，好似隻朱古力奶日本汽水機100 yen一罐，我當十算都只係十蚊，但同一罐朱奶黎到香港，我諗起碼貴一倍去到十六算以上，仲要成班港女大嗌「嘩好平呀！！」

但講到飲，最鍾意飲果樣其實係要黎食多過飲，就係刨冰。以前一直以為刨冰同思樂冰一樣，又係要黎一次日本試過正牌貨先明白得到。當去到Summer Sonic係可以熱到你一個鐘飲一枝水的時候，用400 yen試左人生第一碗刨冰，之後兩日fest幾乎刨冰當正餐野飲都唔使買咁滯，因為原來唔係思樂冰咁簡單，真係搵成舊磚頭咁大舊的冰掟落部機磨到變碎冰，所以本身係冇味，跟住妹妹就會問你想要咩味呀？揀完要咩汽水或者果汁，妹妹彎晒低身倒落去就搞掂，天氣熱單拎上手已經好舒服，一匙匙冰粒隊入口有得咬又有得飲透心涼，而且大大碗俾你嘆勁耐，大熱天時唔隨時隨地整返碗係手真係頂唔順，相比下思樂冰就只係結左少少冰的汽水，只得價錢一方面比得上。有樣可惜係原來刨冰唔係好多地方買得到，起碼我酒店果頭搵極唔見，而且唔係度度都有好多味揀，臨走都食唔到傳說中的煉奶味，是為此行一美中不足。

可以食便利店咁多日，梗係唔係齋飲汽水同朱古力奶飲飽啦，日本有樣野同香港相反，你要搵到有地方賣野食難食其實好難，就連好基本的微波爐叮叮都好食到飛起。即係香港七仔買個肉醬意粉，俾廿蚊咁滯先得細細兜幾啖食晒最重要唔好食，日本七仔就真係俾足成隻餐碟咁大兜意粉你，四百幾yen一個已經係香港茶記價位，但焗爐叮完拎出黎食，份量同味道都得住香港茶記水準，甚至超過部份我食過的香港茶記（焗）意粉，如果計返紙水同香港物價，你可以話日本呢邊食仲平。所以返到香港之後，去茶記我唔會再叫焗同燴意粉，只會食真正地道精髓百搭公仔麵午餐茶餐。冇計，日本七仔焗意粉就係好食抵食到噉。

飲完汽水食完意粉，未夠的話仲有甜品你揀。前面咪講過日本野我好鍾意食炸物，佢地任何時間都一定有熟食賣，炸雞柳炸豬扒燒腸仔大把你揀，當然有最最最重要的炸薯餅，食左一次已經知道大鑊喇我絕對會唔捨得日本。日本薯餅同我地食開好唔同，香港薯餅係西式入面一粒粒薯仔，好多時候一係太鹹一係太油；日式係薯蓉做餡再撈唔同配料好似咖哩、雜菜或者肉碎口味唔會單調，塊勁薄炸粉皮又脆成舊食落口唔會覺得好肥好油，由內到外都好食到黐線，價錢又唔貴市價係40-50 yen最平30我都見過總之四蚊港紙一定食得到，同佢地個保溫櫃好勁你幾點落去食感覺都好新鮮唔會凍，我最鍾意就係買一碟意粉，即場焗完再買多一或者兩塊薯餅掟落去，加多枝野飲，五十蚊港紙就食到一餐飽得黎好味又開心。所以無論去到邊度，只要見到有便利店我都會閃入去，一邊嘆冷氣一邊嘆薯餅，人生一樂也。搞到返香港之後好灰，因為冇乜地方有得食日式薯餅，有都貴過日本兩三倍十幾蚊一塊都敢死。同埋香港OK同七仔大舖扮日本種熟食檔，質素幾乎屎都不如，特別OK堆熟食簡直伏中之伏，除左營多真係冇任何一樣野令你有動機去食。（雖則營多都唔係好得去邊，仲要細細兜賣柒蚊搵笨柒）

成日蒲七仔，仲有個原因架，咪就係因為 － 非常明顯的理由 － 窮囉。雖然話紙水去到八算，但講過日本食野真係唔叫平，酒店樓下行出去有三百幾yen一碗拉麵，但都幾細碗，同埋我唔鍾意食嘛．．．七仔就成為我的最好朋友，平又好食，同想要乜自己拎就得，唔識日文都唔怕。都試過出去行景點時食食其他，但遊客區食個便飯都好鬼貴，價錢可以高出面一倍又唔係特別或好食，而我便利店以外食過最平係臨飛果餐。去機場check-in完掟走件行李之後，就可以搭地鐵出返去機場之前個站，係商場區有好多舖頭同outlet，冇野買的我其實只係為左食埋在日本最後的晚餐。同香港商場食野比外面貴唔同，反而呢個outlet商場美食廣場光猛乾淨又靜坐得好舒服之餘仲平過市區唔少，食個薯餅蛋包飯先$3X港紙，仲有刨冰只係180 yen一碗，大佬去銀咖哩食個餐豐富少少都要咁上下啦。

雖然大阪實際上除左Summer Sonic冇乜野我有興趣行或玩，但食令我對呢個地方、呢個國家留下非常良好印象，反而留咁多日都冇食過吉野家，唔知算成功定失敗。不過唔使擔心，大阪返黎話咁快就十月，Summer Sonic之後又到Loud Park，睇而家個情況我應該仲有排量地，應該話咁快又有機會過日本，今次去到東京，仲唔整返個吉野家薯餅肥牛飯嘆嘆？