「環球片場，條隊排到環遊世界咁長。」

所以我呢種唔多遠行甚至出門的懶人，從來唔鍾意去主題公園，因為除了人多還是人多，連海洋公園都未去過，幼稚園學校旅行去過荔園之外，咁大個仔咁耐以黎只入過主題公園三次。第一次舊同學迪士尼擺酒，我非常欣賞擺晏晝酒會，雖然得燒賣蛋撻之類街坊酒樓下午茶時段式菜式酒都冇滴都幾流迪士尼喎，我仲係大熱天時著晒老西過黎坐出面草地烈日下見證朋友做老襯（難怪野食咁流，原來係個花園收得貴）。酒店飲完隔籬就係樂園，其實我細細個已經覺得迪士尼好低B完全唔鍾意佢地任何野，不過既然「飲」完有張免費 飛時間又唔算晏，一場黎到冇理由 唔見識下，結果果然合乎我預期。開頭以為叫得迪士尼點樣勁，點知勁細，又冇野玩（又或者話，冇野我有興趣玩），一個鐘唔夠已經走得人，而香港迪士尼最唔迪士尼果樣係，嘩頂做乜入面全部白雪公主呀灰姑娘呀冇個靚女黎？我唔係歧視師奶都可以做公主（雖然做黑心皇后會較合適），只係班細路一心諗住童話世界入面人事物都好完美好美好，入香港迪士尼一轉，會令佢地立即體會到殘酷的（港女）現實，即時童話夢碎再冇童年可言囉。

第二次，係去巴黎迪士尼。其實去巴黎主要為睇Dream Theater，呢個城市對我黎講除左勁多show睇之外只得一個悶字，但行名勝行左一日羅浮館又行一日，仲有第三日要消磨，迫住要去迪士尼，成日流流長唔去真係唔知點算好。初頭諗住歐洲會唔同卦，點知同香港冇咩分別，佈局一模一樣叫比較大囉，但都係唔玩機動遊戲的話行一陣已經行完，叫做起碼搵返後生靚女扮返動畫角色順眼好多囉，同好過癮迪士尼都唔禁煙四圍都有人食煙，睇住班老豆老母擔住口煙同仔女講「係啦行埋去啦去同米奇老鼠影張相啦」，場面都幾超現實。好在隔籬仲有個華納片場同一張入場券可以去晒兩個地方，同樂園唔同片場主要講電影，機動遊戲都以實景體驗電影製作為主，好似去玩《Armageddon》太空站俾你體會殞石撞太空站入面點樣地震點樣火燭噴水噴煙，又玩左次《Twilight Zone》跳樓機（其實開頭唔知咩黎以為鬼屋，入到去先知鬼屋只係頭盤跳樓至係主菜），可惜在Aerosmith過山車裝修緊冇得玩。雖然玩得唔係好多，一來唔算好鍾意玩機動遊戲，二來當其時係凍到樂園入面河同湖都結晒冰的冬天，機動遊戲四點幾已經截龍樂園五六點已經閂門，但印象唔錯，如果香港迪士尼都肯開返個華納影城區，我會肯科水入場。

第三次呢，咪就係今次囉。情況同巴黎一樣有一日冇節目好得閒，如果唔去環球影城成日唔知做乜好。環球影城係我唯一一個有興趣去玩的主題公園，其實好多年前有機會去一次，當年去奧蘭多做展覽，果度真係好多野玩架，可惜當時拍老細去迫住要同一齊去一齊走去其他地方玩都唔得，所以而家「被迫」黎都叫做可以笑住入場。問題係我去巴黎時係零下唔知幾多度的冬天，而去大阪係暑假日日三四十度仲要烈日冇雲，唔好話Summer Sonic啦齋行街都熱到喊曬到想死啦，所以都未到玩，齋迫一輪火車到站，落車已經熱到冇晒心機玩。一行四人仲要一朝早去，如果唔多使排隊其實冇乜問題，之但係邊有可能呢，去到邊想玩乜，閒閒地都要排返個幾兩個鐘隊，好彩的話排果陣可以匿到入室內或者樹底有風扇甚至有飲水機，唔好彩呢．．．一係好似我噉，繼Summer Sonic之餘烈繼續施展港女擔遮大法，行到邊俾日本妹笑到邊，好在今日終於遇到另一個會擔遮的男人老狗，而且佢同我一樣，係個越洋宣傳師奶文化的港佬黎。

我諗今次黎大阪真係好多個好彩加埋，首先紙水跌到歷史低點八算，Summer Sonic lineup又正，去到市中心撞到Slayer咖哩屋開張冇耐，入到黎環球影城又遇到最新景點Bio Hazard the Real。其實今次入黎可以話就係為左佢，因為開一段時間就會轉第二樣可一不可再，難得撞到今次唔玩就冇架喇，所以到場第一時間仆去排佢。隊頭舉牌個姐姐話要排三個鐘，後來只排左個幾鐘，快左咁多係咪好開心啦，但成朝隊只係拎籌，叫你晏晝食埋下午茶三點幾返去先有得玩。當堂吹到脹晒。跟住過隔籬大白鯊，排左半個幾鐘，都仲未見得到隊頭，結果十點入場，排左三個鐘隊排到夠鐘食晏，終於玩到第一個遊戲大白鯊。五分鐘玩完之後，去排第二個機動遊戲侏羅紀公園，預計排隊時間120分鐘。原來環球影城最好玩，係排隊。

排個半鐘玩算快架喇，最受歡迎個蜘蛛俠4D劇場，朝早去到話要排五個鐘，當一半都死啦。正常繁忙時間一個遊戲排90-120分鐘，又唔係冇計可以俾多一倍加錢做VIP可以直入唔使排隊，又或者肯放低身段就得：部份遊戲有毒撚專用通道，只要你肯承認自己係一條毒撚，任工作人員揉圓撳扁點安排都得，就可以用快一半甚至快四分三時間玩到，見你個樣夠毒的話立即有得玩都唔係唔得，而且安排時都會計返人數，盡量俾坐每行最單邊，即係一班人拆開都有機會一齊玩，只係由坐埋一行變坐前後位，噉樣就可以排少個幾鐘隊值得。所以話囉，其實毒撚一個更開心。

另一個教訓係，第時大熱天時黎主題公園玩，都係晏晝至好黎，睇我地真人示範就知啦根本無論幾點鐘入場，成朝早你玩得到一樣野已經叫做好多，但到晏晝多數人一係去左搵野食一係已經排隊排到支力走去訓晏覺，人龍冇咁長，好多地方排唔使一個鐘就玩得，所以多返時間四圍走食下睇下。呢度有樣野好得意，就係去到邊都有One Piece，唔止自己專區，就連其他主題區商店，都總要擺One Piece野入去一齊賣，我知One Piece好紅，但乜地方乜舖頭都要有，又會唔會無厘頭得滯呢，係叫做冇香港迪士尼失驚無神喜羊羊咁on9囉。雖然對卡通人物冇興趣，但成日追住芝麻街公仔，梗係啦，曲奇怪喎！你知唔知我幾想同death metal教父影張合照！可惜佢每次出巡都太多信徒包圍，我街頭追到佢街尾，先好難得埋到身見一見佢正面朝拜一番，仲話影合照，你埋到佢十尺範圍而可以唔俾班日本妹日本婆日本細路迫返你出去，已經係一個achievement。其實仲有樣野好想試一次，就係過山車，Space Mountain果種室內拋下拋下唔太夠喉，想試一次外面飛到上天果隻，但三思完都係冇玩，一來過山車條龍幾時都咁多人，二來我覺得玩果陣肯定會同跳樓機一樣玩到唔停爆粗，個場又咁應聲，到時問候晒全場幾萬位朋友老母就唔係太好啦。

大家最關注的Bio Hazard the Real，為左佢值唔值得俾6600 yen入黎呢？玩左兩次，其實有點失望。玩之前點就廢事再講啦，一朝早排個幾鐘隊，跟住先話原來晏晝三點至有得玩，當然到時候又要排過啦，而間Bio Hazard the Real Theater外面永遠打晒蛇餅。玩法真係打喪屍，唔係睇芒射CG咁悶，而係十個人入一個好黑暗實境，有真人扮喪屍撲出黎，不過其實只要你會開槍佢就一定埋唔到你身。呢樣就流左少少：你拎住枝連臂帶槍，臂帶會顯示你有幾多血同子彈，但枝槍只會出聲，而喪屍身上冇反應彈之類，所以乜都睇條友演技，有時成班人圍住狂射都唔訓低，有時你未開槍已經死左。最大問題係，好多時你根本唔知自己射左去邊度，支槍又冇後座力，開槍時完全缺乏質感。

中間有「過場動畫」，Nemesis出黎，跟住突擊隊員帶你逃亡去checkpoint。根據說明到checkpoint會睇你情況決定跟住行咩路，我地估計係睇有幾多血剩，但諗落我覺得根本得一條路。首先所謂血其實係倒數計時，喪屍好難埋到你身基本上你唔會中招（中左都唔知點計啦，都冇sensor），但血係會一路扣，玩第二次已經特登走快幾步，走到checkpoint六個level血一樣得返最後一個level。同入場係兩班人一齊入，而佢checkpoint有兩度門，一隊入左去時另一隊係冇得玩住要先等等，所以我諗最後根本一樣，都係去同一間大房射一大堆喪屍。事實係咪好似廣告所講真係有隱藏關呢？你快襯今年內未轉新景點前飛去大阪玩幾次話我知啦。

隻game唔太長我諗個半字玩完，同大多數喪屍都係一早已經坐定企定，冇乜突然破門開窗穿牆陰濕位（最失敗係，居然冇牆窿窗口突然伸一堆手入黎嚇你果野），但個feel已經好正，好似枝槍個電筒要用手固定先會著燈，一緊張鬆手就會黑晒。成班friend入去玩去到門口同轉角位，行頭幾個突個頭望一望又縮返埋「喂，你行頭啦！」「梗係你行先啦屌！」真係好鬼緊張又好鬼好笑。不過最重要梗係同女一齊玩啦，排緊隊你已經會聽到唔停的尖叫聲，入到場玩會仲剌激，有朋友跟住佢個係阿太，成場縮埋佢後面係噉推佢行前，而我前面條女入左去幾耐，就係捉實佢條仔隻手狂走狂嗌幾耐，所以入到去你一定好feel。

「噉點解我會失望？除左冇得用刀片喪屍之外，咪就因為生日黎到都冇女陪我一齊玩Bio Hazard囉！！」

驚喜最大反而係未來戰士劇場。雖然五六點至去玩都可以排個幾鐘隊，好在大部份時間係排冷氣房先冇咁嬲。入到去先聽一條女用日式超浮誇做大戲噉吹左成個字水，梗係一句都聽唔明啦，跟住播多半個字片講故事背景跟住又係條女出黎吹半個字水，跟住開門，以為唔係卦噉就收皮？原來先正式開始，係真人演員同三面台螢幕3D效果做戲，雖然片入面CG仲係PS1時代唔夠多邊形所以起晒角果種擺到超old school幾廿年前整落又唔update你吹咩，但都睇到嚇親你好多野飛埋黎真係會驚到閃開收晒而家3D戲皮，而且節目名叫3D臨尾已經唔止立體版咁簡單，最後係成間影院大爆炸，我仲要坐正第二行正中間，爆果野煙霧水花氮氣一野吹晒過黎炸足十幾秒張凳震埋，我都係第一次睇呢種節目睇完會拍爛手掌。好想玩多次，但係入場時仲太陽頭殼頂曬餐死，玩完出黎已經七點幾太陽都落埋身，而間院收七點九，冇機會encore喇。

第二轉Bio Hazard八點半，就去食個飯先，lunch食左碗刨冰咋，但見到食個pizza餐都用左我九十蚊，似乎食多兩碗刨冰質飽個肚比較化算。黎到夜晚已經走左好多人，令我可以食完pizza又未夠鐘玩Bio Hazard呢段空檔，先過隔籬用毒撚身份玩一次蜘蛛俠4D過山車。就算只當係普通室內過山車都非常刺激好多飛上衝落旋轉位，再加埋蜘蛛俠打壞人救你劇情，合情合理地加埋噴水噴火4D效果，全隻game又長，仲幫你影埋相，好玩到癲難怪朝早會話要排五個鐘。其實我玩左一次已經好滿足，但唔知好彩定唔好彩遇著成班癲人，九點玩完第二輪Bio Hazard出到黎剛剛好花車巡遊，襯個個都去睇花車立即衝入去玩多次，出返黎九點幾正常已經閃人架喇，但四條友九點半到十點呢最後半個鐘一出黎又入返去連玩兩次，人地臨收工最後一次四個人包車，送我地車條友仲要又係Summer Sonic fans黎，真係他鄉遇故知。結果我一晚坐左四次蜘蛛俠過山車，仲要成班人一齊擺Babymetal手勢影埋相，呢6600 yen入場費抵返晒。

本來呢日大阪last day只諗住日頭隨便hea夜晚睇Lindsey Stirling就玩完，點知環球片場比我想像中好玩得多，雖然朝早入去排隊排足三個鐘做左傻仔，但單夜晚玩到咁喪，已經開心過睇Lindsey Stirling啦。冇諗過會有主題公園令到我想再黎多次，或者會搞到我將來黎多次大阪睇多次Summer Sonic，因為真係好好玩又未玩晒全部野，唔黎大阪encore唔通飛去奧蘭多咩。又另一個令我愛上環球影城的原因，係十點閂門送大家走時，場內居然係播Moby《God Moving Over the Face of the Waters》。