雖然同90%香港八十後一樣，用日本電器、睇日本動漫大，但對日本個國家其實一直冇乜興趣，又正如同我一樣年代班人，細個時以為世界上只有中國、英國、美國同日本四個國家，好想去英國、好想去美國，就係從來未想過去日本。人大左更加，聽band sound，但從來冇聽／睇過J-Rock；開始對日本漫畫冇興趣轉睇美漫（因為日本開始乜都萌冇晒熱血自取滅亡）；打機都係，PS1之後，已經好少打日本game，始終鬼佬game寫實尺度大更精彩，同埋冇日本game咁dum波鐘；而如果日本妹我都唔係好大興趣，可能會俾人笑。

親身過黎旅行就更加，一向唔係鍾意外遊種人，睇古老建築只鍾意睇歐式，博物館之類值限好特色類，迪士尼等等更加冇興趣，我份人又唔鍾意頻撲要為去唔知幾多個景點趕頭趕命就唔好啦，自己又唔會買野，同埋，我都唔鍾意食日本菜，唯一鍾意食係炸物放題。另一個問題係，成日覺得日本同香港好似，分別在乜叉都貴同埋冇人識講英文，我又唔識日文，過到去雞同鴨講分分鐘搭車叫飯食都搞唔掂。噉我黎日本仲有咩意思呀大佬？

加埋從來最怕熱，所以只會每年年頭新年時間去一兩個禮拜歐洲避年兼避寒（的確係避寒，歐洲去到山區負十度，都唔夠濕氣重的香港咁凍），夏天要去旅行，除左南北極同澳洲似乎別無他選。結果今年終於破左個戒，熱天去旅行之餘仲係去日本，唔係為左Summer Sonic，我可能成世都唔會踏足日本，除非係陪女去啦，因為十個香港女仔九個去親旅行都話要去日本，第十個話去一次唔夠要去多次先得。雖然係為睇fest先黎，但俾六千幾蚊機票一場黎到又冇理由唔行下街，留多三日半。

以前去旅行好鬼求祈，事前差唔多咩都唔睇定，去到買張全部交通免費景點又有折的遊客pass再拎張地圖，見到邊度好似幾過癮就去目及目及根本唔會準備，次次去旅行都去得咁即興我都幾自豪。但今次唔得喇，一來大家唔知大家講乜，而且八月先過日本日日三十五六度曬住，邊可能到時先亂咁四圍走行住搵野玩搏中暑咩，迫住要事先睇定書查地點揀定想睇乜玩乜，覺得自己好似返返去當年學生哥時代摷notes做project噉。同咁多年都未用過背囊，為左此行特登求祈買個百幾蚊仲要老闆娘醒多個七折cheap野粗用，方便袋住個水樽同把縮骨遮出街，隨身帶定廢事中暑或者渴死丫嘛。成世仔第一次去旅行去得咁鬼肴底。

未正式出發已經灰一灰先。每次出埠必定入禁區食返個大力水手炸雞，我仲特登為為佢晚飯都唔食就出機場，點知一時唔記得左係坐第二朝六點半抵步的凌晨機，入到禁區已經十二點得返麥記食，不過機場入面麥記唔係貴出面好多，除左冇九蚊包之外都叫做有良心，衰呢個時間成場得佢一間平野食排餐死噉囉，好在原來上機會俾兩餐咁多，先唔使餓死，同我成世仔第一次搭飛機坐第一行，前面冇人拉長對腳點坐都得，出去又容易冇人阻到你一個鐘去一百次廁所又得，難得係agent幫我拎位而拎到咁靚。同日本妹空姐真係高香港幾班，雖然好過癮靚果個反而韓妹feel有點似LG Optimus G廣告條女。證明俾多少少錢搭國泰是正確的決定。同我幫襯開呢個agent真係做到野，抵次次去旅行都俾錢佢賺。

朝早七點幾出閘，對大阪第一個印象，係「頂！真係好叉熱呀！」真係好鬼熱熱得死人果隻，香港地三十五六度已經係上報新聞，呢邊呢個溫度算低添啦日日都三十七八度起，兩日Summer Sonic更加親身體會到4X度加曬到應可以有幾熱，只要一出門口，行幾步路已經成個人濕晒（話時話，黎左大阪咁多日，好似都未見過雲呢樣野）。熱加曬我最多唔出街，但更頂唔順呢邊室內一樣咁熱，落機機場同火車站已經冇裝冷氣噉款，出到市區一樣連商場都冇乜冷氣，去到酒店個大堂仍然熱到流汗，上到房冷氣預設溫度係28，結果全大阪唯一感受到涼的地方係，機場出市中心架鐵人28號高速火車。好在日本冇香港咁濕，所以相比下雖然更曬同度數高十（幾）度，反而冇香港咁焗促咁唔舒服。曬左兩日曬到怕加曬到個人傷晒猛甩皮識驚，就將我老母傳授俾我的港女擔遮大法帶黎東瀛發揚光大。不知贏得幾多人／日本妹的笑聲。

我間酒店位置係商業區梅田，附近除左寫字樓同酒店差唔多冇其他野，包括食肆，如果想食野就近只得便利店同汽水機，要出去呢就要先行兩三個字出火車站。但行出車站中途都幾多唔錯地方值得一行，好似酒店行過少少係ESP大廈，有音樂學院，網站講好似仲有custom shop。出門口過對面馬路係藝術中心，附近仲有幾間livehouse同(metal)酒吧，可能撞Summer Sonic所以冇乜好show睇，不過點都應該會好睇過藝術中心張海報係兩條靚妹加隻大狗好似好益智的舞台劇囉。行到大街就可以欣賞得到人地城市規劃做得幾好，馬路兩邊一邊係幾座大商場，想買野大把舖頭你行，雖則我只得Tower Records一間會去，有座商場最頂仲有摩天輪坐。另一邊由一列細商場連埋，每個商場仔一個主題專賣一種野，例如商場A係食肆、商場B係時裝、商場C係舊書二手貨，街頭入去涼住次氣逐個主題商場行同食，行到最尾一出就係火車站。呢種規劃真係冇得彈。香港絕對搵唔到呢種咁全面咁能兼顧不同市場不同階層的設計。

Summer Sonic兩日之外，仲留多三日半。其實我睇晒旅遊書都諗唔到有乜地方好去，八月喎唔係叫我去世博丫嘛更加唔好叫我去行城堡，所以第一日其實我只想去一個地方：Calayer。就係咁好彩黎大阪之前兩個月，有條metal友開左間Slayer做主題的咖哩屋，立即成為我地metal友黎到大阪不得不朝拜一下的朝聖地，位置仲要勁就腳開正市中心中央區、黎親大阪必定會黎行的心齋橋，其實我本來想住間酒店正正Slayer咖哩屋隔籬，但Summer Sonic實在太勁agent到頭來都爭唔到房俾我至去左梅田，如果真係住到心齋橋就唔會食唔到啦，因為Kurry King只做午市十一點半到兩點半仲要售完即止，我地一點半黎到已經話賣晒收檔明天請早。大阪多Slayer fans到噉？起初好好奇佢每日開得三個鐘點樣搵食，但黎到拎flyer拎卡片先知原來Kurry King唔只做三個鐘午市夜晚都開，不過晚市唔係Slayer亦唔係咖哩而賣餃子之類，開到賣晒為止清晒貨咪收工囉。呢種生活真寫意，雖然間舖開冷巷入面細細間起碼叫做自己舖頭丫，而且只係一間細房仔坐得十個人唔夠，當你以為香港食檔叫細，日本好多細得仲誇張。咁細間舖加全日夾埋可能先開八個鐘都冇，都夠食夠維持住間舖經營，而且有態度係做咁多就咁多今日賣晒想食唔該等聽日唔該有錢俾佢賺都唔賺他條最緊要，我夠想開返間MacDonalddica麥記漢堡賣Metallica主題漢堡包啦，但邊有可能好似Kurry King噉夢想得以成為現實丫，在香港地。

食唔到Raining Blood咖哩飯（跟住幾日比想像中忙，結果到走都冇機會，如果真係住隔籬間酒店就話日日有得食嗟），不過黎到大阪metal朝聖地影到張相，第一日基本上我已經圓滿結束架喇，即使一場黎到我真係冇野行到噉。噉梗會行埋心齋橋同道頓堀一橫一直兩條大街架啦，不過唔多買野我只會得行同睇兩個字，除左第一日就買晒手信，同叫做見識人地日本機舖，成棟大廈一層遊戲機一層夾公仔機一層貼紙相一層唱Ｋ一層碌齡幾咁宏偉。初頭仲諗住太多時間會唔知點算，但返酒店沖個涼訓個覺起身食埋飯開始掃碟之旅先發現，睇到全區打烊都行唔夠一半，原來應該擔心係留六日都唔夠時間行碟舖。

我去旅行唔太慣急住行，香港地仲唔夠急唔夠快咩，所以一般去旅行都係一早起身，朝早晏晝行三四個景點，六七點景點開始閂門就食晚飯返酒店訓覺，而家仲要咁鬼熱仲叫我四圍行想我死咩，所以睇完Summer Sonic之後果日睇動物算。點知起身已經一點鐘，仲話襯朝早叫未咁曬去行動物園添，而家只去海遊館跟住過隔籬天保山商場室內動物園（實際上只係間可以玩貓玩狗玩兔玩草泥馬的大型寵物屋），已經夠消磨一日，因為人地好早就收工，七八點已經冇野玩焗返酒店。其實我去咁多地方旅行動物園必行但水族館唔會去，因為好多動物園都有海洋動物睇例如最吸引的海獅，同時好多機會可以近距離睇甚至掂到動物，黎到大阪就調轉，既然遲起身就動物園都廢事去直入海遊館，一句講晒：

「唔使曬仲要有冷氣喎大佬！！！」

主要節目同去動物園一樣都係睇餵海獅，同埋海豹館下層個透明窗俾你上望睇到海豹游水，但除此兩樣同埋有冷氣，基本上只係迫同埋迫。海遊館本身得一條路而且好窄，撞正暑假日子（同可能好多人同我一樣諗住入黎就係為涼冷氣），八層館迫左半個鐘至睇到兩層，超級地多人，而且我去時即係晏晝時間，好多香港人，去到邊都聽到廣東話。其實街頭都遇到幾多中國人，我間酒店已經住左好多大陸遊客，相信同樓下有（賣晒飛我先知道有的）Summer Sonic來回直通巴好大關係，睇fest兩日落樓下便利店，日文同普通話比例係五十五十，唔知係咪為佢地需要，我幫襯兩晚，一晚係個蒙古移民當值，第二晚係個中國留學生。但去到海遊館反而一句普通話都聽唔到得廣東話，點解呢種景點反而撞唔到大陸人？可能去晒心齋橋同梅田商場區血拚緊啦。

行完海遊館同室內動物園，跟住一日去埋環球影城，臨尾一日再check out之後拉住隻篋行好遠水路造訪一間好鬼僻的樓上metal CD舖，我的大阪遊就係咁多，叫做加埋撞著香港八號風球，差少少打風打到起唔到飛，飛到上天再拋得勁過過山車，跟住幾乎要去台灣過一晚，比想像中驚險刺激，落機之後仲要同行人人都一早拎晒行李，係我隻篋排到最後先出，搞到出到車站目送尾班車然後橫風橫雨中等N車返屋企就唔好提喇。因為去大阪真係大半為左睇show，同真係冇咩特別野我大興趣玩同睇，再加埋咁熱天氣，行左唔算好多地方，但除左幫襯得唔夠多碟舖同食唔到Slayer咖哩飯之外，又冇咩叫做特別遺憾，更大得著係正式認識到日本呢個地方。最重要當然係，原來唔識日文都唔會死，搵路點都要靠自己因為問路冇人答到你，而且唔知點解就算去到火車站咁重要，都唔係好多地圖同櫃檯有英文，我見過有個火車路線圖，得幾個大站有晒日文名同英文名，中間細站就冇英文，擺明玩死你，加上你有心尋幽探秘的話（例如今趟的Slayer咖哩屋同臨上機去果間樓上metal碟舖），冇正式舖面只得個街號，而日本街道複雜到呢，如果電話上唔到網冇得睇實地圖跟GPS行絕對唔掂，不過食就唔怕好多地方有相篤篤篤就得，一係落七仔買囉有晒實物要乜拎乜一定唔會買錯。講起便利店就冇得唔讚啦，同香港比真係完全兩回事，好似我噉唔多鍾意食日本菜酒店果頭又冇乜食肆，落七仔買微波爐野食就得，三十幾蚊一大碟意粉，份量多之餘比唔少香港茶記更好食，再加埋無限咁多款汽水，仲有炸物賣日本薯餅實在太無敵。

體會最深，自然係日本人質素絕對冇得彈。好似住酒店，冷氣唔夠就算啦，以同價位同級數計間房唔算大（嘩，$670一晚，我去德國可以住到間房成間客廳咁大再俾多一張勁大雙人床或者兩張雙人床，上次去柏林住間四星尾大房價錢只係而家一半），不過有熱水壺加茶包，反而好多細節位照顧周到比歐洲酒店齊全，同埋會噴水幫你洗屎忽種自動廁所，試過一次之後有陰影都係唔好再掂。去旅行我好少睇電視，但既然日本出名電視節目乜都有，有晚無聊又唔想沖涼住就開黎望望，搏下會唔會撞到有甜片睇。點知一開就見到范冰冰原來做緊《封神演義》，隔籬台播《神探伽利略》，一粒字都聽唔明都睇晒成集，因為成集劇居然睇到尾都冇廣告咁爽，日本仔為左觀眾享受，可以去到咁盡連廣告生意都唔做。如果香港電視台（其實即係無記嗟），劇唔好拍得咁垃圾又肯學下呢樣野，我一定會成日睇電視。

再贏香港幾條街，係公民意識。其實日本消費文化都幾唔環保，好似去七仔食薯餅，買兩塊，每一塊都要獨立入一個紙袋仔，紙袋外面再貼張貼紙，再入多個膠袋先俾你，但係買少少野都製造咁多垃圾，條街都可以非常乾淨。去到日本有樣野好難搵到，就係垃圾桶，可以行幾條街都搵唔到一個，好多時為左掟一舊垃圾可以行幾個字，最後閃入便利店或者人地大廈借佢地垃圾桶先搞得掂，同梗有一個係左近的香港完全相反，但係我唯一見過有垃圾的地方係Summer Sonic會場，街上面垃圾同垃圾桶一樣，搵得到話你好野。唔知太濫製造垃圾係因定係果，日本有個完善回收機制應對，當然亦要人肯配合至得，奇景之一是睇show其中一個最多人排隊攤位係膠樽回收，入場時好多商販會派大膠袋俾你，班人就會用個大膠袋收集垃圾，然後自動自覺去回收攤位，一般垃圾劈埋一邊，膠樽逐個摵膠紙扭開蓋分開三個部份回收，不論攤位有幾多人照係噉排成日排長龍，有時仲旺過隔籬賣野飲野食攤位。再睇返香港，從來乜都掟晒入同一個垃圾桶，近幾年終於開始有回收箱但政府唔宣傳各位阿哥阿姐更加唔會理，如果仲要叫佢地去活動時噉樣膠袋袋住垃圾先再搵攤位分類處理？on9咩搵唔到垃圾桶時唔一野飛落地已經叫俾面你啦。無論城市發展定係人文發展，香港都遠遠落後人地。

不過有時好野都會物極必反，留日本五日幾，有一樣野好頂唔順。係日本人真係好有禮貌，少少野都鞠晒躬行晒禮，對我地呢挺粗人黎講有時都幾煩，特別你去買野，佢叫你俾錢，香港人可能兩個字「廿蚊」講完，日本人要用二百幾字去詮釋呢兩個字，由你行埋去開始到收你錢到找錢俾你到你走，佢把口可以一秒都冇停過，有時我寧願簡簡單單就算，特別佢講幾多隻字我都係一個字都聽唔明果陣。同有時表面睇日本人都幾歡欣，但做得亞洲城市就註定一生奴才命，返工時人人都笑面迎人非常專業，但一放工，唉咪又係一面愁容，唉咪又係逃離唔到我地香港人一般的命運，但起碼人地做緊野時唔會俾面色客人睇先囉，唔似香港人特別港女，你幫襯佢仲要受佢氣咁威水。第一晚行街，雖然去唔到世博睇《二十世紀少年》，都搵得到《Gantz》百鬼夜行最後大戰條橋，而橋口係一間居酒屋，叫做「奴」。見到都灰。

到最後，又係計數時間。暑假時間越洋去睇一場fest再玩幾日，要使幾多錢呢？

• 紙水 = 八算

• 國泰單程來回機票 = HK$7,000

• 五晚酒店 = HK$670x5 = HK$3,350

• Summer Sonic 2-day Pass = 2,735 yen = HK$2,000

• 全副身家用左58,000 yen = HK$5,000

• 全程五日半電話上網 = HK$150

• 即係為左睇Summer Sonic = HK$17,500

其實幾貴，大半年前新年時一樣臨出發前半個月先訂機票酒店，但去左歐洲三個城市玩十一日先至$22,000全包，仲要第一次想黎日本就難得遇到幾乎歷史性咁低的八算先可以咁平喎，如果第時去到十（幾）算，就真係要再諗諗係咪仲會黎日本喇，分分鐘同樣價錢夠我去歐洲玩足兩個禮拜。（但係，我又好想十月去東京睇埋Loud Park，有Devin Townsend + Carcass喎．．．）