是咁的，每次我想射波，之前一日就會著返件「I Sick Leave Tomorrow」tee返公司提提老細，正所謂射得波多終遇苦，I 終於 sick leave到老細都頂唔順，叫我勞動節之後唔使再勞動。量緊地時見Metallica第一次去中國咁歷史性又撞著生日，本身打算就飛過上海睇佢地，但Summer Sonic一樣有Metallica又有差唔多日子黎香港表演的The Smashing Pumpkins，仲有Muse加好多metal band，＆最重要的Scandal & Babymetal，仲要疊正我生日正日開！既然搵左幾個月工都冇聲氣，就索性放埋個暑假先算玩盡佢啦！成世人第一次過日本，加第一次睇大fest，結果發現，仲辛苦過返工。

其實唔係因為有咁大場fest睇，我係唔會黎日本，因為從來對日本冇興趣，仲要八月全年最熱時間過黎，大佬睇報紙都有見日本點樣四十幾度日日都有人熱死啦，仲叫我過黎睇露天音樂節，但計過數兩日夾埋咁多節目，點都抵過飛上海睇完Metallica返香港再睇Smashing Pumpkins，加埋第時搵到野做唔知有冇呢種時間呢種機會，曬死就曬死。

戶外睇fest是咁的，先上網用$2000港紙搶張2-day pass，再俾多一萬銀買機飛訂酒店，然後射波飛過日本（使乜射丫，量緊地啦你），fest當日七點幾起身出發，迫大半個鐘火車之後排隊等穿梭巴，條龍長到呢曬返你九個字就上到車架喇，落巴士個站正正同網上訂飛拎pass個攤位打大對角，結果搞多半個鐘先至正式開始睇，而由我出門口到睇第一隊（其實應該算第二隊，當時已經錯過左第一隊加第二隊玩左陣），用左三個鐘頭。其實蠢左，因為後來發現原來我住間酒店樓下有架直通巴士，雖然一程舊幾水貴穿梭巴四倍，但唔使趕起身加一落樓就直到會場舒舒服服，睇完又唔使怕趕唔到尾班火車或者唔識路返酒店，我會捨得俾一日兩舊水，但係知道有直通巴呢回事已經賣晒飛好耐，咪搞到而家三個鐘先入到去咁頻撲囉。

收得你成千蚊日就梗唔會少野啦，成個場面積好比維園，主場Ocean Stage就好似維園中間八個球場包埋後面入口空地咁大，最出名歌手同樂隊都會呢度表演；對面有座山仔，山頂就係顧名思義的Mountain Stage，大約有半個足球場咁大，多數一線尾二線頭單位會上山表演，而山腰山腳係紮營地區、飲食攤位同雜貨攤，因為地利上山仲睇得到對面Ocean Stage，而且距離近所以聲都唔差加睇得清舞台，有時與其入到場又迫唔到去前面，企後面聲勁渣台上連人影都睇唔到，我直頭過馬路上山側炒好過，仲可以買野飲企樹蔭下舒舒服服嘆住睇。

Ocean Stage另一邊有座紅館咁大的室內體育館Sonic Stage，專出「文青」點的東西（睇埋落去就會明白），再過係塊大空地，有唔同攤位、跳舞區、紮營區同一個專俾較細本地樂隊表演的細草地場Flower Stage。聽落好大但我睇大阪站已經算細架喇，另一邊東京地方要更大而且多三個台，所以更多野睇例如有大陸台灣樂隊同只出東京的外國大band，當然會比大阪貴啦收多5000 yen，本來我都想去東京但係一開始賣飛冇耐已經冇晒，不過大阪都唔錯丫，平四舊水事小（老實，差得幾多丫黎得睇都唔會志在慳，我絕對肯俾多四舊睇埋Pet Shop Boys、The Ventures、Living Colour同Tizzy Bac），因為安排係兩邊day 1樂隊表演完過另一邊出day 2，而大多數metal band包括Metallica都係出東京第一日亦即大阪day 2會係metal day、大阪站會由Metallica埋尾，我反而更鍾意，雖然結果生日正日冇得睇Metallica，但有Muse同我慶祝都唔差丫。

其實睇show之前，仲要先做一個人生的抉擇：一場黎到，又邊有可能唔買紀念品例如演唱會tee？但係如果要買就一定要一朝早去到立即排隊，亦即係放棄最頭兩三隊，但我唔甘心睇少左，特別我入到場已經十點九，錯過左本身想睇開場第一隊，加Man with a Mission已經玩左兩首，我寧願放棄買tee都唔想再蝕。到睇埋Scandal（佢地音樂我唔算好鍾意但live真係超勁好睇，同除左bass另外三個真人真係勁正，歌妹仲好似同我一樣當日生日添，點解唔唱生日歌我聽，口烏口烏），再走返落山去Flower Stage睇埋Blue Encount同FLiP，跟住太pop除左《Call Me Maybe》條女冇乜想睇，襯兩點鐘到四點鐘呢個空檔去行，99%會場tee朝早已經賣晒得返幾款樣衰款。結果戇居地一場黎到Summer Sonic，反而買唔到件Summer Sonic tee留念，甚至乜都買唔到因為好野一早俾人搶晒，等我當初仲鬼咁擔心大出血預每日要用10000 yen先得掂，到頭來錢使得唔多，多在一樣：飲。就算自己帶定水入去飲都冇用，熱到每睇完一隊band已經要立即買返枝野飲，不過難得地平非酒精類基本上統一價200 yen，比出面汽水機貴一倍但都唔算好貴，嫌貴可以走返出去場外搵汽水機100-150 yen一枝（汽）水，但行到你死加一早俾人狂掃，可能行幾個字先搵到其中一部仲有一兩枝可樂留返俾你。而單買野飲食刨冰，一日可以用差唔多3000 yen。

食有好多唔同菜式你選擇，預600-800一餐啦想食得豪都有可以食扒餐千幾yen，不過食其實唔會使你好多錢，因為熱到胃口都冇晒根本唔會食野，我兩日都係早餐七仔搞掂，帶少少麵包入去當lunch，夜晚你想食都唔使旨意食，因為四五點就要開始衝台霸位睇夜晚headliner，根本入到場就出唔返去，兩晚我都係睇晒成場十一點幾返到酒店，樓下七仔買個意粉加兩塊薯餅整多枝奶茶搞掂。場內唯一食係刨冰，一碗400等於兩枝野飲，但計返勁大碗又有得食有得飲仲消暑解渴，後來我已經由每睇完一隊band買一枝野飲變成買一碗刨冰，買到連擺檔兩個妹妹都認得我（日本妹真係好正架，口桀口桀）。折衷一點有賣150 yen全場最平吮吮冰，又平又好食我試過連食兩枝嘆住睇show。由朝到尾飲咁多水都驚過睇show時會唔會好大鑊，好似第一日臨尾係The Smashing Pumpkins + Mr. Children + Muse，四點幾入到Ocean Stage，前面萬幾人後面仲有幾萬人，急起尿上黎真係唔知點算我連水樽都冇，但原來乜都唔使擔心，因為日頭熱到你成個人流汗流到乾晒，全日除左出發前酒店屙一轉，同睇完返酒店屙多轉，中間想有得屙其實好難。

以為第一日臨尾迫足六個鐘已經辛苦？第二日先入正題，因為day 2 = metal day，真係由朝到晚每個鐘都有band想睇完全冇空檔，夜晚仲要係Metallica出場點睇都大鑊過迫過Muse啦，不過經過第一日已經有晒經驗知道點樣應對。大阪成四十度仲要雲都冇舊曬到應，難怪呢度男仔個個著到成個農夫噉，女仔就個個包到成個印傭噉，我自然紅過燒豬啦第一日乜都唔理已經塊面同對手曬到傷晒喇，紅到返香港之後可以做返輪part-time關公填一填旅費先。第二日就醒喇，我將香港師奶擔遮文化帶到日本，全Summer Sonic十幾萬人，得我一個男人老狗擔住把遮四圍行，當堂覺得自己巧威威，而我去親邊度都會傳來連串笑聲，相信是其他人給聰明的我的讚歎聲音。由一出門口開始總之唔係睇緊show的時間就一定擔遮，分別真係好大架唔止唔會曬傷個人又唔會睇幾個鐘已經殘晒冇晒精神。又特登買定幾枝水入去，不過一朝未過已經飲晒，除左去食刨冰同吮吮冰之外，想醒一醒就要去搵吹水風扇。因為日本熱得黎較乾燥，好多地方都有花灑仔噴水霧俾你濕下涼下，而大空地多數會擺幾台正面裝左幾個花灑仔的大風扇一面吹風一面吹水，企前面吹兩個字，個人立即好似訓左陣晏覺一樣精神爽利好涼爽。香港點解冇呢樣野？有的話班港女就可以有新娛樂，學班日本妹噉一面俾部風扇顏射一面自拍。

因為今日係metal day，場入面立即少左好多文青潮人，多返好多黑衫紋身肥佬metal友。本來想睇Crossfaith但佢地set極聲都搞唔掂，就過隔籬Flower Stage睇另一隊想睇的BiS，一隊比我想像中過癮的跳舞組合，都係幾個靚妹跳跳跳，但音樂底係hard rock/heavy metal，所以我鍾意同特登留定時間睇佢地，如果睇Crossfaith的話睇完佢地過黎應該得返一兩首歌，而家Crossfaith搞唔掂聲點知仲開心。最恐怖係做細場第一隊十點幾開場，佢地出時已經可以企爆台前草地，比之前一日唔少樂隊更多人，台下喪到連班黑衫紋身肥佬metal友都會成首歌跟住跳跟住唱，玩到轉晒圈果隻，台外面係條人龍，排緊隊班人可以索性隊都唔排衝埋圍欄同場內班人玩埋一份。日本呢個國家，真係唔可以用正常邏輯去理解。（話時話，其中一個場外面連隊都唔排玩到轉晒圈的metal佬，好鬼死似Hydrophobia個歌佬，哈）

第二日一開始我已經好開心，唔止Crossfaith同BiS，仲有一向極想睇的Volbeat，隻新碟麻麻地但佢地種「Metalabilly」我好受，可惜出第二即係玩得半個幾鐘，邊度夠丫好多新舊碟single都冇玩，我好想睇《Black Bart》同《16 Dollars》呀，不過live真係勁到無倫搞氣氛一流，仲要咁早出都企得爆成個Ocean Stage，我企中場位都high到爆炸，我隔籬個阿叔勁似劉以達，個樣一樣仲要又係射哩眼，不過知道唔會係佢，因為個阿叔肥好多。跟住走過對面山睇完Alt-J（live勁好睇），再九秒九山頂衝落海，都趕唔切成個Ocean Stage已經企爆晒，我預Maximum the Hormone出實會癲，都冇預過爆得咁快咁離譜架嘛大佬。呢隊「日本System of a Down」實在太戇鳩，比DMC再戇鳩七萬倍，所以成場癲晒，前半場人跳時可以搞到成個半空一片風沙，我走到對面山上面睇，隔左座山班女都可以睇到fing晒。所以黎日本睇metal show真係寧舍有feel，因為成場乜人都可以玩到好放，而女仲可以癲過班仔，點似得香港，唔好話見到女仔同你癲同你撞啦，搵到多個女仔都難啦。

如果今日係一股蠻勁心想乜都睇晒的第一日，我肯定按原定計劃Bullet for My Valentine > Babymetal > the GazettE > 上山睇多半場Cheap Trick至睇Metallica，但衰過一日心明需要留力之道，Maximum the Hormone之後就鼠入室內體育館Sonic Stage涼涼冷氣先，抖到三點幾走返出去睇Babymetal，你可以話除左Metallica佢地係其中一個黎Summer Sonic主要原因，但結果有喜有悲，喜在本來預左播帶點知搵左隊好勁live band，三條女仲要自己唱返冇咪嘴；悲在，佢地現場唔算玩得好好，同推聲條友好似飲醉酒噉款EQ差唔多秒秒都唔同，所以雖然企爆場連圍欄外面都超多人，玩完第一首之後一直有人走，咪因為同我一樣失望囉。搞到接住the GazettE都冇睇喇，除左俾Babymetal搞到冇心機仲有真係好熱，就鼠返入Sonic Stage訓覺。

一直奇怪點解個場大片爛地又要上山，仲可以有咁多女著到好似去街去蒲噉勁靚又或者拖地長裙再高爭鞋，今日入一入先明白，就係為左Sonic Stage。室內場外面點嘈入面都聽唔到，最重要有位坐同有冷氣，然後排晒文藝歌手文青band出呢個場，迎合晒「上流」市場，難怪咁多仔同女可以打扮到唔多夾出邊場面啦，因為對佢地黎講全日唔出外面其他stage睇都唔係問題。對我黎講都係好事，全場得呢度有冷氣自然個個走晒入黎抖暑，就算我成個人係走廊攤低訓覺都冇人理反正個個都係噉，仲要有Mew聽訓得特別舒服。訓左個幾鐘，在一連串笑聲中起身，紮醒時發現同我一齊訓班人已經走晒，走廊只餘散場走緊出去睇尾場的文青囡囡們。當成條走廊得返你一個攤屍噉訓係度，仲要成排女係你條屍旁邊走過，樣衰到呢。

至於最重要的Metallica玩成點呢，簡單黎講，真係老喇Lars跟另外三個跟得好辛苦，但同基本上等於《Best of 1991-2013》的上海場唔同只玩得一首新歌，好在買唔到上海飛。要講得仔細的話．．．其實show時已經寫落唔少（我冇諗過拎部電話都可以篤到咁多字），所以，自己further reading啦：

Summer Sonic Osaka 2013 Day 1 The Smashing Pumpkins + Mr. Children + Muse 後記

http://www.facebook.com/photo.php?fbid=10151812064165928

Summer Sonic Osaka 2013 Muse小少相集（真係好小＆少）

http://www.facebook.com/matto.lausir/posts/10151812848600928

Summer Sonic Osaka 2013 Day 2 Babymetal 後記

http://www.facebook.com/matto.lausir/posts/10151813591700928

Summer Sonic Osaka 2013 Day 2 Metallica 後記

http://www.facebook.com/photo.php?fbid=10151814100545928

我諗今次人生第一個越洋戶外大fest，有四個遺憾。一係去唔到東京場，雖然大阪編排比較合我意，但東京大得多台都多幾個，先至真正體驗得晒嘛。第二當然係未試過紮營啦，聽落好激其實仲舒服，因為有自己竇可以隨時匿埋避太陽同訓覺，亦係一種體驗。第三係冇試Midnight Sonic，day 1十點正場完之後體育館接住開深夜場玩到四點，當然係DJ party之類但開場係一隊唔錯的本地metalcore band，本來打算睇完Muse入去睇埋佢地先返歸，但到時已經十一點，同幾千人爭穿梭巴爭到又驚趕唔到尾班火車，的士又超級地貴，加上睇足成日對腳就斷只好放棄。最大遺憾就當然係同女有關啦，不過女呢家野，就留返下次一次過講。

今個生日絕對快樂，尤其睇到現場表演同選曲都唔算差的Metallica（如果去上海睇再知道呢邊個setlist，可能會睇到喊），同埋幾萬人同你一齊迫觀眾反應特別女超好，呢種體驗香港永遠俾唔到你，希望Clockenflap等有朝一日可以做到，不過真係試一次就夠我曬到夠皮，下次要夏天過黎，睇室內fest就算。而講到全場fest最難忘，反而係場show之後。Metallica玩完個場誇到放煙花，大家一面睇煙花影相一面返屋企，途中又撞到個輪椅人士，坐住輪椅去睇metal show唔係未見過，但遇到呢個係直頭全身癱瘓，用僅餘郁動到手指控制架電動輪椅，再由佢朋友幫佢開路四圍去。成日見到佢幾次，到最後Metallica都睇埋，由佢朋友幫佢較角度坐係輪椅上面睇足全場。我身體健全行得走得都覺得好辛苦，真係唔知佢點樣支持成日。

而且，果個人，仲好似係女仔黎。