三年前試過一次，又玩馬拉松式睇show連睇三晚。今年撞正失業再撞正六月底七月頭暑假紅假檔期，又有機會試多次。

29/6 Nothing to Declare，咁難得有一場metal fest梗要捧場啦，而且一搞就五隊仲要四隊外地，已經係非睇不可，但最大動機來自其中兩隊，而最想睇呢兩隊又會咁蹺排晒最頭。IBU係傳說中中國第一隊djent band（我唔知佢地定Qollision較早啦），但同我想像中有點出入，因為整體其實係technical/progressive deathcore，論概念論手法我覺得Black Night Red Sky會更接近djent，不過兩個結他手就真係好有相關方面認知，仲要兩個都唔同風格一個走free jazz好多tapping另一個玩sweep，加上歌同riff充滿別出心裁編曲，器樂部非常精彩同多野聽。不過差在歌佬，佢有幾種唱法保證唔會單調，但係把聲麻麻所以除左多元化之外唔太討好。跟住Horror of Pestilence（其實佢地有個中文名叫瘟疫之駭，改得好好），比IBU更想睇，亦睇佢地已經抵返晒，聽上年出隻EP已經覺得好黐線，（咪話唔益你，Bandcamp有得download架），而佢地真正實力有幾強，一定要現場睇過先體會得到，香港場因為bass手黎唔到得返三個人，已經可以玩到Decapitated咁喪，歌紮實三個人台風一流加超工整，彈出黎好有質感同氣勢，呢份壓迫力冇睇過幾多地下band做得到，如果成隊band齊到人的話，真係唔知點算。我敢講，呢兩年香港睇過metal band live，包括所有外地同本地樂隊，冇幾多隊音樂同表演功夫勁得過Horror of Pestilence。

「點解唔玩埋《XXX》呀？不過原因，明白的．．．」

Massacre of Mothman就講過好多次所以懶，而家最想係佢地會同Black Night Red Sky一齊出碟，再夾份搞返場double-headliner gig。豚鼠睇正過聽，歌我嫌有時拖得太長，好在歌佬正，矮過糖妹但係又肥到成個波噉，佢地音樂本身有點disco death metal feel，加埋佢媲美Emmure歌佬的台風，音樂有缺憾都彌補返晒。而擺最後的寶德費 Sideffect，或者壓軸所以最期待，搞到最後有點失望，音樂同台風都打動唔到我，同埋跟Periphery一樣現場三枝結他但無大發揮。仲有樣野就係，點解而家乜band都硬係要break呢？無論玩新野定舊野總要加加breakdown，正如豚鼠大體其實好old-school death，都要間唔中break一breakdown（所以搞到好disco）。你可以話今晚再加突顯Horror of Pestilence有幾神，正因佢地唔會沉醉於呢方面。

唔算非常滿足，不過一舊半有五隊band睇，大多數時間都好睇（頂，Horror of Pestilence一隊已經殺晒啦，如果齊人又有多幾首歌搵佢地做headliner都冇問題呀根本），仲要HA睇過咁多年show今場係數一數二地專業，雖然都遲左成個鐘九點先開場，但換場非常快一隊玩完唔使個幾字已經到下一隊，而且音響搞得好特別鼓聲好實好靚，絕對要多謝搞手帶到一場咁高質素metal fest俾我地。只可惜，咁好睇、咁高質素、咁專業，居然成晚先得五六十人左右。既然咁多人成日話支持extreme metal、話要睇metal gig要睇fest要睇外國band，而家仲要星期六晚搞都叫夠方便仲用左好長時間宣傳，誰知失望地少人。就係因為唔係外國*人*band？

30/6係Silent Hell 獄無聲 + Persefone，請恕我孤陋寡聞其實我一直都唔太知道原來仲有Jukator，之前只睇過一次就係release party，而家好似結他佬同歌佬轉左？歌路都唔同左，以前的確好／太Dream Theater，呢樣就好難擺脫架喇，不過新歌更重更多技術，同鍾意佢地開始唱廣東話，我會新新碟。其實佢地玩得好好，只係今晚對手實在太強喇，Silent Hell娛樂性太過豐富，即係見到一個細細粒小妹妹上台，跟住fing到仆街嘔晒泥，係非常過癮架，就好似睇一個萌版Angela Gossow表演，雖然我唔太鍾意佢把聲，拆聲叫應付到，但清聲第一次聽以為男人唱，而且唱清聲高音位都扯得幾夾硬（反而估唔到，通常女仔唱高音會易過中低音），就連平時講野都講到做大戲咁浮誇，即係可以唔唱咁多清聲同講野正常返少少就會正好多。但無損可觀性，音樂好老練melodic death底加埋歌妹十足後《Wages of Sin》Arch Enemy，不過老練不止在歌仲有台風，就連台風都好似大家一齊練過夾過咁堅，fing頭齊得黎個個都有力水，唔知點解真係未見過－香港metal band可以做到。（或者因為．．．陣間先講）

Persefone就唔多使講啦。唔係隊band親身剖白，我都唔多知安多拉其實係咩位置（同，今場show之前，我都未聽過「安道爾」呢個叫法）。一路覺得佢地係隊奇band，十足後期Death加Dream Theater，獨一無二，好可惜就係因為出身國家不知名，今年出到第四隻仍然冇乜人知道佢地存在。老實我唔太鍾意佢地頭兩隻碟，就係有時學埋DT衰野死拖爛拖唔願停手，要到第三隻《真劍》開始先開始迷，今年隻新碟更加唔使講啦。不過佢地呢種風格玩live就最爽，要爆要blastbeat位有爆到悶想睇solo睇技術又有，加上班友表演欲超強，結他佬solo多野玩鼓佬打得夠花仲要手勢靚兼力水勁爆（打歌時變化多端，點知solo反而幾悶）（不過有樣野，西人體格就係唔同，呢兩晚打鼓最響最有力就係佢，大家都係噉打，就係佢爆得響過晒其他人），Persefone絕對係睇過數一數二強絕live band，論演出震撼性就一定係Horror of Pestilence大勝，但以全場整體而非單一環節計就呢場贏在娛樂性豐富，排名只計呢兩年的話同Alcest睇齊，睇晒咁多年呢就只會次於冇可能超越之Hibria。

咁好睇、咁享受，其中一個原因，相信係因為old-school。呢晚Silent Hell+Persefone其中一個最大啟示，係點解而家我地香港地上酒吧以外livehouse睇show，要靠外國band黎表演，先可以享受得到呢份舊式金屬帶來之樂趣？早於幾年前就提過，而家香港已經搵唔到新進純男清聲原創metal band，因為男清聲metal呢家野一早俾人排擠，這是極端金屬的時代嘛，除左本身玩開好多年已經捱出頭來一班e.g. BlackWine，要搵到後生得黎唔係玩cover亦唔係玩J-Rock同時唔會只困於酒吧而有機會上大場之新band，真係好難好難。其實香港metal band音樂發展一向有個斷層，一班死忠舊派或傳統派（老band們），一班追隨至近幾年之新路線（新band們），反而冇乜樂隊追求九十年代中至二千世代初，幾年前都叫做仲有band玩下Children of Bodom、Arch Enemy等較傳統之melodic death甚至歐洲式power metal，而家？我記得到之power metal band一係冇再玩一係變左女歌手唱，而melodic death metal真係好少見，取而代之之metalcore同deathcore就俯拾皆是。今場正正係彌補返呢個時代空缺，唔breakdown一氣呵成衝到尾、有拆聲亦有男清聲、結他同keyboard大大段鬥技術solo間唔中結他佬企出黎自己（鳩）啡一大餐，呢種表演從來唔會睇得你悶，從現場觀眾反應亦可見佢地唔係唔受呢種「老土野」、唔係只有間中放慢整個breakdown先可以精神同肢體上投入。可惜不知何故，香港metal band選擇玩咩音樂，幾近只可以好新或者好舊，唔會選擇追尋呢段被遺忘歷史。（因為，事實是，既是遺忘，亦即「已經唔潮喇」．．．）

另一啟示，係一同外地樂隊相比，立即睇得出好多香港metal band唔夠星味或大將之風。雖然只得三隊band但短唔過琴晚五隊band場fest，Silent Hell玩到成個鐘，Persefone直頭個半鐘，好少地下metal band可以玩一場show拍得住流行歌手演唱會咁長。但長得黎唔會悶，除左音樂得台風更得，仲有兩隊都唔係只視上台表演就係彈下樂器唱唱歌咁簡單，而真係諗過度過點樣將自己場演出設計成一場完整表演、一個娛樂節目。不妨留意獄無聲，佢地選曲非常有心意，好多歌係可以承上一首延續落去令氣勢持續高企，中間加幾個樂手表演時段，臨尾仲要自製encore呢樣最過癮，完全係專業級構思製作。Persefone更加唔使講啦，平時表演可以好嚴肅，但唔會一味扯到恆中間又可以破格，結他佬出黎一面solo一面同大家吹吹水彈錯都可以執生變笑位，炸多輪隊band又整返首《星球大戰》等大家輕鬆下笑下，個半鐘喜怒哀樂樣樣齊，方為全面之表演。相反香港band上台概念太多仍然係只為演好自己作品，一首一首盡量忠於原著地彈唱，每過兩三首就吹吹水大大聲嗌幾句煽動口號，就完左一晚，唔係會唔好睇，但就俾唔到一個深刻印象觀眾，正如呢場show同三年前Hibria一樣，我往後仍會經常回憶同人提起，但本地樂隊演出，就好難有幾多隊能夠做到呢樣野。

你可以話，因為風格，有時香港玩同聽一班，問題在於太執著於門派之別。所以，回到上面一個伏筆，我都明白點解Horror of Pestilence出現場特別琴晚場fest呢種場合，係唔會玩《XXX》呢首「古典演奏曲」，因為玩完，你班人都唔會好似Persefone呢晚歡晒呼拍晒手掌，而只會「做乜春呀你？？？」

而第三晚七一，係大日子「Kolor X 柏斯管樂團 The Journey演唱會」，因為又係時候見證Kolor再上一層樓。既然七一是遊行日子個個都鍾意計較人數多定少，我地又幫Kolor近幾場大show數數人頭：前年蒲吧「Now Loading」，連開兩晚都爆晒，即係一晚有七百幾人（我覺得唔止七字頭添）；上年年底Kolor X 柏斯管樂團，坐爆葵涌劇院，即係有九百人，半年後今次兩團再度合作（「SK2」乎？），沙田大會堂兩層坐滿晒，有千三人。你有冇諗過一隊indie rock band，可以自己搞show冇明星嘉賓，會有千幾人捧場？老實本身我唔太睇好，因為有鑑上次坐前面對正喇叭音響完全失準經驗，講過如果再有下一場「S&K」，一定臨到最後一日先買飛誓要坐到最後。今次就係開show前一個星期先買飛，都唔使刻意揀後排位喇，因為全場已經得返十個位唔夠，全部單丁位仲要通通接近坐到最後加最邊，換言之千三張飛一早賣晒，可想而知Kolor而家地位有幾高、名氣有幾大。大到管樂團都要一年內合作兩次先夠喉。

真係要寫，我又會寫到超極長篇長到你冇心機睇果隻（雖然黎到呢度，你居然會睇晒上面前兩場，都應該已經乜心機都消耗晒架喇），所以盡量簡短。最最最簡單，係音響好左，但歌仍然流於「管樂團＝keyboard」式處理有點失望。詳細點講的話：

• 係其實我唔鍾意上一次同管樂團crossover要跟足古典音樂會「唔講野、唔encore、中間要休息」種（懶）正規型式，實在太造作，所以今場見場刊冇印曲目已經覺得有料到，結果連踩三個鐘，爽到。

  
  

• 唔知係咪百屌成材呢（口桀口桀），上次鬧完現場管樂團嚴重失真加埋樂隊時兩者再加失衡，今場唔知關唔關坐到最尾幾行事，頭幾首都係炒晒粉全部野只得一舊嚇到我幾驚，好在《那年那天》開始慢慢調整到理想，雖然「最好的情況」依然係結他一開distortion基本上只感覺得到而聽唔出細節、bass成日大聲過結他遮晒、lead相反成日聽唔清楚甚至聽唔到solo彈乜，但起碼今場大部份時間都聽得清楚管樂部份而且音色保存得到冇失真，樂隊同管樂團兩者間相輔相成之效果終於做到，實在是個大大的鼓舞同進步矣。（希望坐前面果班同我一樣感覺啦，騎騎）

  
  

• 即係呢，其實我入場係諗住聽新歌架，點知翻炒上場曲目數量都唔少．．．

  
  

• 同，我仍然覺得快歌加交響有點多餘，《愚公》是唯一受惠，其他只得嘈鬥嘈，尤其一開場未推好聲就黎料，《天地會》同《賭博默示錄》，簡直直迫災難級．．．

  
  

• 好鍾意《燈芯》變左個吟詩版，夠晒on9好好笑，更大驚喜係終於再聽得到《對錯》，交響都係幫到呢類慢歌多，雖然我覺得用得一般，加起黎反而失去左原版帶點劉以達種迷離氣質。

  
  

• 當《對錯》都有時，點解又唔可以加埋《獵鹿者》呢？咁多首Kolor歌，我最想知道呢首實驗歌可以異變到咩程度。

  
  

• 同上場比較，我覺得今場新加之改編新歌，編得比第一場時好，或者經驗多左而得心應手。只係擺脫唔到「放座keyboard落去rock歌」感覺，另部份歌曲有點刻意地要加入交響序章或末章，其實好多都加得好唐突，例如《過客》開頭果段都幾唔知想點。可唔可能有更深度改編，即係真係將全首歌重新編曲，成兩者合一共同演奏，而唔係你彈時我幫你加多一浸少少野整色整水就算呢？《侯鳥》就是成功例子。

  
  

• 同我想話，做乜而家live唱《了不起》，總係要玩得慢過CD版．．．

  
  

或者上場同「S&K」印象偏負面，今場一在音響改善左樂隊樂團又玩得好，二在成場show冇中場八點玩到差唔多十一點超級抵睇，我評價絕對正面，初時仲諗住會好似上場兩個零鐘唔玩完，睇完仲夠時間返屋企睇《House》架，點知返到屋企已經差唔多播字幕。而走時見到有樣過癮野：因為要趕車所以未完晒就閃，演奏廳企左幾個職員，一齊望住門口側邊個鐘倒數，我出到去時剛剛跳到10:58，有個就話「仲有兩分鐘！」跟住成班人繼續凝望個鐘睇入面幾時散場／睇你班友仔會唔會玩到超時。睇黎佢地等收工等左好耐。

今場仲有一重非常重大意義：Law of 14終於停喇。坦白，聽到時，我心底在歡呼，亦相信我唔會係唯一一個，其實《Independence》之後，我已經覺得Kolor俾呢個創作模作自己累死自己，就如在上月中最後一首Law of 14出品時提到：

「Kolor 6/2013新歌，更值得細味，係評論部份。的確，Kolor成也Law of 14，敗也Law of 14，即使四個人都識作曲編曲甚至填詞係個好大優勢，亦唔等於一定需要快，當每月一首single搵夠fans賺夠知名度，我寧願見好就收先停一停回到舊時慢工出細貨，而唔係繼續（盲目）追求繼續個個月都有新歌，因為事實係你每個月都要有一首時，就好易寫到太濫而參差甚至太pop。」

「老實，而家Kolor頭三隻碟我仲成日聽，《Independence》我可以無限loop，但Law of 14，我真係非常鍾意同一樣日聽夜聽，只得《天地會》一首，呢首係我耳中最佳Kolor作品，勝過《了不起》。諷刺係，呢首本身就係Kolor最擅長同賴以成名之Canto-Rock風格，但Law of 14之後，反而等左咁耐先得一首重拾原本的Canto-Rock出到黎。」

講得唔太客氣，但呢個係事實，《Independence》跟住隻EP風格已經完全唔同變到好抒情好acoustic，一路落去連串慢歌情歌，但我地係想要音樂有火、歌詞有意思的Canto-Rock，又不客氣講句，由《As Simple As》開始，大半新歌都係聽左第一次之後，再聽多次都廢事，一隻碟之間，差距變化就係咁大。睇今晚就知而家Kolor追隨者數量已經係香港band之中數一數二地多甚至超過部份流行歌手，其中真心想聽好歌唔會少，樂隊已經唔再需要用流行歌手果套成日都要出新歌派台上無線維持同提昇知名度呢套喇，更應集中時間精神去精雕細琢。其實就算真係要Law of 14，亦唔一定要個個月都出呀，反正規矩自己定，改為兩月度甚至季度出新歌都冇問題架，但一首歌由用一個月時間造變成兩個月，成品質素分別可以比想像中大得多。而家當機立斷結束Law of 14亦未嘗唔係好事，我會期待再度破繭而出的新Kolor，連出六隻EP之後，係咪時候寫返張大碟呢？

睇完Kolor The Journey，不過journey並未結束，寫完呢三場又係時候出門口，今晚九展有Galneryus呀，下星期又到另一場fest軍械所加五隊香港嘈band，呢幾個禮拜真係由頭嘈到落尾。