《Iron Man 3》雖然唔及第一集但好睇，睇完有簡單講過（都幾多bug），其實中間出左個細路好驚《鐵甲奇俠3》會變《鐵甲威龍3》（你知迪士尼收購左Marvel啦），同今次Robert Downey Jr.又喬裝又查案演到似福爾摩斯多過Tony Stark，好在最後仲係Iron Man冇中伏。除左一樣野。

首先要講講歷史。十九世紀末中國大規模輸出勞工到西方國家，社會種族歧視風氣、東西文化差異同擔心俾中國人搶飯碗等等，令西方人視呢股移民潮為「黃禍」，二十世紀初小說家創作出中國大陰謀家角色傅滿州Fu Manchu，自此成為西方文學比喻亞洲／中國軍事及文化入侵代表人物。後來Marvel取材成Mandarin，除左一樣一日到黑諗住點樣侵略西方國家仲會打功夫施法術（鬼佬鍾意東方神怪野嘛），當時美國漫畫其中一個使命係宣揚愛國精神，Iron Man本身咁重軍事色彩，就梗係用黎對抗國家外敵啦，所以Mandarin就成為Iron Man宿敵。

只係當時流行但而家睇返一個清朝巫師實在唔配合摩登社會觀，就算係宿敵都冇諗過電影會用佢做反派，好在與時並進重新設計，只係個亞洲恐怖份子頭目唔會出法術單靠頭腦就合理得多。只係點解你叫得Mandarin叫得滿大人，居然會係個鬼佬黎？雖然好多人唔妥呢個滿大人但全個舖排我幾鍾意，不過睇到好唏噓，因為睇完發現，大國真的勃起了。回到二十世紀中期，外國人對華人觀念仍然不離黃禍同傅滿州，所以開始留意東方事物都只限接受文化不接受人種，搞到當年電影同電視劇入面「中國人」都係鬼佬黎好鬼搞笑，而黃皮膚就算出得鏡角色唔係低下就係醜惡好難正面。直到李小龍出現勁到嚇親外國人，加入《青蜂俠》以亞洲人身份演出加藤，從此外國劇組開始起用真正亞洲人做返正面黃種人角色。點知事至今日，堂堂荷里活大製作為左大陸市場收入，會將一個中國人反派角色變成西方人，仲要唔使睇特別為大陸人拍過剪過的中國特色特別版，睇國際版已經大把野擦鞋到爆，單一個叫滿大人的鬼佬其中一個使命係「打倒美國本土偽中國文化產物」，我係大陸人都睇到成地精啦。

五十年前，香港人以實力令外國人認同亞洲；五十年後，中國用錢令西方人向大陸低頭。身為香港人，都咪話唔灰。