昨天從《Iron Man 3》滿大人看大國勃起了，今日再由《追擊赤色風暴》繼續看。又係歷史堂：美國七八十年代經歷美蘇冷戰、石油危機、貨幣貶值、歐亞冒起等等好多國際大事，即使作為世界強國都不禁人心惶惶，好多危機感直接經文化產物反映，如八十年代中電影《Red Dawn》如其名係紅派即共產主義入侵美國資本土義本土，套戲拍得唔係好好，但其中蘇聯侵略美國意識當時黎講好震撼，因為真係有機會成真。

黎到廿一世紀，歷史再度重演。無論資本定共產其實個個政府都係洗腳唔抹腳，要補救唯一方法只有無限印銀紙，而大陸印得多過美國所以贏左，美國佬又變返三十年前噉船頭驚鬼（佢地本身係鬼佬，應該話驚人至係）船尾就驚賊（唔係賊，係共匪），跟住好自然又要拍拍戲應應景，既然時興重拍，《赤色黎明》就變成《追擊赤色風暴》，反派當然由前共產大國蘇聯變成其他國家。本來都好地地，但拍完之後強國不容外國勢力說三道四，又係為個錢字，成套戲拍好電影公司都夾硬再剪過將戲入面解放軍變成北韓軍隊。成件事就當堂柒晒了。大佬北韓連越唔越到界入去南韓都成問題，你敢話可以飛過太平洋去到美國，仲要大軍到可以同美國鬥？其他國家仲要食住花生睇戲咁開心？

所以而家見到呢類「北韓打美國」戲，例如跟住果套《白宮淪陷 Olympus Has Fallen》，就算拍得點好睇（我都冇預過會有幾好睇），一日你講共產勢力入侵而侵略者唔係中國，我都唔會睇＆只會恥笑你。做人特別美國人，有返少少骨氣好唔好。