兩日內由電線壞到去電掣，我諗冇幾多人夠我咁黑。前晚雷電交加，突然間上唔到網，有線隻modem盞online燈冇著到即係收唔到訊號，頂自從交晒月費之後i-cable成日都有問題，都唔知今次係光纖定機樓俾雷劈親，駁黎駁去發現原來中招唔止係modem仲有屋企條lan線，平時已經神神地而家一壞就話壞，仲要係行緊雷時壞真係夠晒戲劇性，搞到成晚屋企可以Wifi上網但用唔到lan型到爆。

第二朝返到公司，你聽過USB線都會壞未？我就遇到，又係用緊時無端白事自己斷左訊號。老實我真係成世日都冇諗過USB線都可以壞，而當USB線本身咁襟用都死得，電掣都會死完全唔出奇丫。今朝起身冇耐之後，突然全間屋冇晒電，開電箱整幾次掣都開唔返，然後見到門口外面個緊急照明燈箱著左就知大鑊了。打去機電署同中電又冇人講到咩事，落街兜個圈發現成條街都死左，不過問問先知原來本身只係屋企對面條屋村停電 － 點解會揀回南天日子晏晝一點至七點停電咁戇居？唔使開風扇開冷氣都要食飯做生意啦下嘩！正常就唔關我屋企排唐樓事，但整電班友好順手地一熄就熄晒全條街電掣殃及池魚，剛剛搵到屋企樓下有架中電車立即搵師傅傾傾，佢地立即開街口電箱睇點樣駁返電俾我地班無辜受害者先。本來冇諗住咁快搞得掂，打算出去睇返一場甚至兩場戲（《白官淪陷》仲未睇雖然應該已經落左，同對《同謀》有點興趣），換晒衫著晒鞋臨出門口屋企就有返電，個人立即懶返晒食個靚飯之後訓足六個鐘。

一日一壇，聽日唔知又會發生咩事呢，死聽日仲會去中環睇SIU2新碟release party，唔會邪到人地地方又斷電show都開唔到卦，哈。