一星期前去藝術中心睇《打轉教室》，提返七年前第一次去的經歷。已經係2005，果晚睇假音人陳浩峰K唱會，點知入到89268買唔到假音人隻碟，而買左蔡汶家《Homemade》。就係咁神奇，平時想摷碟點有心都摷唔到屋企碟海太恐怖，到睇完《打轉教室》，無端端就不經意地見返呢隻碟，立即影張相留個念啦，唔係轉個頭又會唔見左唔知幾時先會再搵得返。

仲有幾多人記得89268？當年TRHK搬左去皆旺，冇幾耐太子就出現新鄰居89268，大家一齊做而TRHK越做越霉時，89268調轉開左幾間分店連藝術中心都搵得到，就知規模幾大層次幾高。達是抵佢發的，89268代理好多indie野特別大陸貨，果陣未興上網買野未流行淘寶，大陸band碟經佢地買最齊最方便。只係敗也因好多indie，正如好耐之前睇完陳慧琳演唱會之後提到的「香港metal K歌化」，其實好多indie仔心態同聽K歌去唱K果班冇咩唔同，分別在於好多時聽K歌果班比佢地更願意花錢花時間花心機去支持自己鍾意個歌手，十分諷刺，大家知唔知乜野係「記名黨」？最後諷刺到居然比TRHK早走一步，縮到搬左去工廠大廈，而家咩景況就唔多知了。

其實我都唔係幫襯過89268好多次，有錢都買metal碟先嘛，主要為佢地做發行的有耳非文，仲有呢隻蔡汶家。七年前出果陣已經非常鍾意，難得事隔多年俾我撞返，再聽仍然同當年一樣十分享受，好多年前我已經rip左首《自由自在》做電話鈴聲用到而家。重溫回味之餘，覺得蔡汶家出道不逢時：果陣2005樂壇仲係一池死水，旋律編曲悶爆K歌玩晒，唱作派未被重視，同一年謝安琪王菀之先剛剛出第一隻碟仲未多人賞識，而同樣玩清新民歌的at17同林一峰，當時叫佢地事業高峰期都唔係好多人特別重視仍屬小眾文化，而紅如佢地加有唱片公司支援都突唔到圍，蔡汶家簽間細到唔細的獨立公司，只有靠出草地show校園show等宣傳自己，又可以發到幾大圍呢？

我覺得隻碟唔輸at17等，有點聽戴佩妮的感覺，只係呢種民謠歌路當時仲算非常另類，要好多年先至得到較多人接受，不妨數數at17／林一峰／The Pancakes／My Little Airport同Robynn & Kendy中間隔左幾多年？如果佢係近一兩年先出道，民謠曲風終於為大眾接受、獨立界別唱作人終於有人重視、唱片公司終於肯支持非主流單位之環境下出《Homemade》，話唔埋已經做左Robynn & Kendy同門，而唔係而家噉人都唔知去左邊。最後聽返黎係出左隻碟之後冇耐離開左間公司，雖然咁細公司同自己一個人做所有野其實相差無幾，但遲幾年先出現或者可以支持多幾年，乘住而家indie出品自家製作品牌抬頭個勢，香港就唔會浪費左個難得的好歌手。時也命也。