上年年底大約無記開始播《天與地》起，每星期一晚到西九龍中心food court聚餐已成八三三慣例，成日食完之後深水土步＞太子＞九龍城＞土瓜灣行路返屋企，返到剛剛好夠鐘開電視睇《天與地》。而身為六點準時放工永遠最早到果位，正餐前掃掃街打個底屬必然，每次出深水土步一定要去黃金對出喜喜喜喜整串全香港最正雞軟骨是常識吧。

本來之前一晚係開年第一餐，點知臨門被放飛機，反正都要出街食就去左旺角亂行，先發現原來朗豪坊正門向油麻地直行兩三個路口都有間喜喜喜喜，價錢整體比深水步貴少少始終旺角區可以體諒，但水準未夠雞軟骨太鹹又欠火喉，仲諗住第時唔出深水步都可以食到平靚正雞軟骨串，試過之後發現總舵就是總舵無可取替。

其實公司行去兩間囍囍時間差唔多，第時口痕都係出深水步，除左好食又平一蚊，仲有串燒部個阿姐唔係著高達tee就係著band tee夠晒metal，見到佢著住件Trivium隊串雞串骨過你，食都食得開心Ｄ。