紮開頭髮條橡筋有點鬆，放工行街經過，先知而家賣橡筋賣頭箍都要搞「最後今天」咁難撈，見咁慘就幫襯俾五蚊佢賺啦。跟住第二日行過，舖面唔同左，但班友幾熟面口，咦，之前果檔唔係又係你地咩？

「又話琴日最後一日？做乜今日仲未執？」

「講緊之前水貨賣埋最後一日咋嘛！今日開始我地賣新野！」

住舊區一大樂趣，係去行呢種基本上寫住「最後一天」個牌等同於招牌的雜貨攤，品味價錢夠街坊而且貨色成日轉，今個星期賣飾物賣衫褲正正經經，下個禮拜變左前舖賣菜後舖賣袋九唔搭八，魅力正正係估佢唔到加次次有新意，出去行商場都唔會成日有咁多新奇野咁多驚喜，同埋合理價錢滿足晒生活所需。

只不過呢種香港地舊區街頭特色唔知仲可以見多幾多年，好似土瓜灣頂籠叫中產地區，都可以開始新界北化，每閂兩間街舖其中一間再開唔係變成地產代理、找換店就係金舖、大藥房，翠華之類食個餐蛋治都收你三十蚊的超高價連鎖食肆都進駐埋，只有令區內生活成本不斷拉高同越來越唔方便，好似有次想買少少文具，行晒屋企附近去開幾頭，居然記憶中之文具舖，以前好多間，而家一間都搵唔到，唯一買得到文具得返工聯會；屋企附近有兩個醫生老豆睇開，因為平夾近成日去睇，本身好地地點知唔聲唔聲兩個都執晒，而家想睇醫生唔想行好鬼遠就要俾人收好鬼貴。當連落街買枝筆都咁難，遲早總有一日以方便見稱之舊區，都會變到同商業區遊客區一樣連基本生活都應付唔到：

「唔該我想配條匙。」

「乜而家仲有人配匙咩？我同你配返劑補藥啦！」

「條USB線唔見左，想買返條。」

「唔好買USB線喇，買條金鍊咪仲好，特價$3888。」

「病左添，落街睇醫生先。」

「睇醫生？不如睇樓！近排有個新樓盤抵買呀，一尺先九千幾一萬蚊都唔使．．．」