退休最大好處就係好多時間，我老母同我阿姨得閒到走左去半島排月餅，半島出品同半島中菜部嘉麟閣出品各掃左幾盒，每款兩個砌埋質左半底俾我，而我唔食月餅，點解唔去Haagen-Dazs排七星伴月雪糕月餅俾我。所以慷老母之慨拎左返公司益同事，唔係我都唔知點搞掂，各位同事如想表達謝意，歡迎問候我老母。

細細個已經唔鍾意食月餅，所以冇乜興趣理有幾好食（又話中菜部點解好似食緊酥皮西餅），不過老母塞餅俾我時講個故仔就幾有趣。佢話早排有個阿婆又係去半島排月餅，買完搭巴士返屋企，點知落車時發現成個袋唔見左，即係見到個半島字袋都知貴重野啦又見你一個阿婆，係有心仲唔落車時順手撻埋咩。雖然明知追唔返個阿婆都要報警搞大佢，搞到成車人落唔到車陪個阿婆睇佢發晦氣，發到上埋港聞版。係真定假就唔知，因為自從蘋果炒左肥龍同骨精強，我已經再冇睇報紙。

同事講到一盒炒到幾百上千都有，今日唔覺意下午茶就食左幾舊水，成世仔都冇食過幾多餐咁豪。正因咁鬼名貴老母千叮萬囑食完一定要拎返個袋同盒俾佢，「過多幾日中秋節送月餅俾人時咪夠晒體面囉，口桀口桀。」唔想學個阿婆上晒報紙，睇黎今日放工我要搭的士返屋企先夠保險。