近來屋企多事幹，終於有時間做做好耐未試過的悠閒事：去九龍城廣場KFC坐低嘆個靚雞餐。九場封左半個場裝修半年，跨三層的吉之島終於開張，立即帶旺個場好耐未見過九龍城廣場有咁多人，更耐未見過場內麥當奴同KFC會多人到要搵位坐，點知走果時，見到門口貼左張紙，原來我有幸成為九龍城廣場KFC臨終一晚在座客。立即灰晒。因為間KFC陪住我大，我對佢好有感情。

細細個已經鍾意雞記多過麥記，除左覺得真係好好食，仲物以罕為貴，當時要搵KFC十分之難（仍然用中文名肯德基，官方改用KFC作主流係好耐之後之事），所以中學時九龍城廣場開左間，成日一班人走去食。果陣時一個大桶餐九件雞 + 兩個飯 + 兩條粟米 + 兩個薯蓉 + 三枝汽水只賣$98，另有$68六件雞桶餐，而家已經各加價三十蚊以上，仲要唔及以前咁多。順帶一提，當年係九龍城廣場黃金時代，每層都開爆你搵唔多幾多吉舖，而且乜種類乜級數都有大人細路都總有舖頭鍾意行，真正做到一個融合九龍城社區的成功商場。中學夏令時間一點三放學之後何文田行落黎九龍城，仲有只有我地一代先記得的（新）馬里奧餐廳十五蚊個下午茶，想食豪少少地庫有自助餐同西餐最平廿幾蚊位學生哥都負擔到，食飽上樓上Namco Land玩氣墊球，打完行玩具舖睇模型、去豐澤望望電子野，樓下仲有歡樂天地（有機會同大家講講一個睇場姐姐因為某原因俾我地成班人無限勁玩碰碰車的故事），戲院都未執，經典是兩個人包場睇《半枝煙》。而家？你問下蔡加讚，將個場開到廣東道噉款，會唔會令去開尖沙咀果班自由行過黎九龍城？順便問問各位九龍城街坊，佢地想屋企隔籬開間LV開間Gucci，定開多間雜貨舖或者十幾蚊一碗的粉麵檔？

經常過黎蒲KFC，因為從來唔多人坐 － 基本上十幾年黎冇幾何會爆超過半間舖 － 而且光猛又冷氣勁，環境又好成排落地玻璃睇到花園同山景，班職員又好少趕人，你隨時入黎坐低做乜都得坐幾耐都可以，成日撞到學生哥入黎做功課、潮童們入黎打機玩卡、師奶阿太擺部電腦或平板出黎煲劇，好多阿嬸阿婆更加擺到明黎呃水飲涼冷氣坐成個晏晝，冇人趕之餘阿姐會同佢地傾偈，見有幾個已經大家傾到熟晒，是現今香港商業都市大型連鎖店中難得的人情味。我都好鍾意屋企冇人煮飯的夜晚黎九場KFC開飯，其實食個雞記餐兩三個字乜都夠（好多時排隊仲耐過食．．．），重點是一邊食一面聽歌同拎部電話上網、睇書、睇漫畫，食完坐多一兩個鐘先走，屋企都冇咁光猛咁大冷氣啦。在我九場雞記就好似間別墅，一個俾我悠閒度週末的消閒地。

但幫襯咁多年生意都咁淡，見上年暑假一個月間先集體回憶一部份之菜街總舵再新之城地庫搬到去女人街之分部連執兩間旺角舖，已經相當擔心九場舖命運，結果好彩係捱多一年先執，唔好彩係始終都係要執，或者吉之島開得太遲，如果早開幾個月，可能人流夠帶番起生意令班老細肯俾佢捱落去。除左本來開KFC外面的銀咖哩（迫遷左去唔知仲有幾多個月先再開番的地庫），同真係好好食但價錢比得上旺區大舖的蒲鍋，九龍城廣場再無多少值得留戀，我諗黎緊幾個月冇乜機會會再黎。比我更灰係，住附近的婆婆們再冇其他地方可以大熱天時免費涼冷氣抖暑搵其他人傾偈。

我冇留到十點，陪九場雞記最後倒數。我驚會喊。