每年一月，老豆總會叫做兩樣野：拜山，同食團年飯。今年團年飯搞搞新意思去左燒野食，話說老豆有個朋友做工程公司，上水租左塊地做倉同寫字樓，就去又一城買左幾份有幾貴得幾貴的牛扒，再坐佢公司車入去工地燒。個阿叔做工程好多年，退休唔係唔得，但工程佬就係鍾意起野，自己工地闢左個角落頭，四圍執人地殘餘物資自己一手一腳起，好似開飯張雲石檯，檯面係人地大屋搬細屋用唔到唔要（細個身邊人細屋搬大屋，大個身邊人大屋搬細屋，香港回歸後經濟衰落的見證也），得個檯面冇檯腳，拎個油桶鋸開放上去，就有張大檯招呼客人。再搵幾個貨櫃砌組合屋噉砌，砌左幾年個竇越砌越大，反而唔捨得退休，退左要還番塊地俾人邊有得玩？

特登美國訂左個煤氣燒烤爐黎香港，閒時叫成班人黎好似外國噉開個戶外燒烤party，大家圍住個長方爐主人家夾料上去鐵架反下反下即場烘俾各位朋友食果隻，絕非一般拎叉篤住碳爐上面燒可比。食完一轉飽飽地參觀一下，呢個貨櫃擺套幾十套Hi-Fi，隔籬個貨櫃就改建成影音房52寸大電視加9.2音響睇3D bluray一流，廚房士多房廁所全部都有直頭可以當屋企住。最絕係有「後園」，工地原身係農地，就同附近幾個業主將其中幾百千幾尺變成菜園同魚塘，種菜種果種香蕉俾自己食。所以返工定放假冇分別，因為到頭來都會入黎嘆世界，聽完Hi-Fi睇完戲可以落場鋤鋤地，嫌冇世藝仲可以踩單車沿吐露港單車徑出市區，生活健康又悠遊。唔黎見識一次，都唔知道香港仲搵得到呢種生活。

三點幾食到六點幾兩餐直落，五個人食左近三千幾蚊，計番仲貴過去酒店食自助餐仲要長途跋涉再自己落手搞買野煮野洗野，但一定比去餐廳食有feel得多好食得多，從來對食冇乜特別要求，第一次有一塊價值五百蚊的和牛（其實唔止，因為人人驚輻射，五百已經係五折左的價錢），會令我食完覺得真正物有所值、好希望可以再食多次。然後諗諗，自己有冇機會過呢種半退休生活呢？其實我地成個世代，即係'70/'80/'90後，根本諗都唔使諗，而家有錢或最少可以富足至此程度一班，最少都經歷過九七回歸前黃金時代，果陣肯搏命就一定搵到錢，落力做賺埋夠老來享福。而家？都唔使問你而家人工幾多、近幾年人工加左幾多，你睇下你份強積金再話我知啦。