冇錯麥當勞價錢之高昂，與日下之食物及服務質素，已經不值幫襯，不過始終鍾意食麥樂雞同雞翼，有時都會破破戒。有晚屋企冇煮飯要食自己，返歸途上見到出左個雞翼拼盤一客包原味紅燒青檸各兩隻，就叫左黎食，唔想食薯條所以單買一個$24.4，個麥樂雞當然唔係送埋，要$13的。食完，想喊。

原味一向無敵，我鍾意食佢多過雞記香辣雞翼。紅燒雞翼年幾前出過，我鍾意食的，不過今次炸到好乾，冇晒肉汁唔掂。隻青檸雞翼直頭算Ｑ數啦，幾年前KFC出過一次，同用洗潔精醃隻雞翼差唔多，點知KFC賣完之後麥記唔識死跟風照出，而可以整得比KFC更難食，衰過一次好啦今次併盤又拎出黎翻炒，依舊嘔心，如果可以寧願轉多兩隻紅燒雞翼。最大問題係，麥當奴叔叔，加左咁多次咁多年價，點解雞翼唔可以大番小小仲要縮水？噉樣收我廿四個幾灰到喊，原味雞翼四隻先賣十五，即係買平時隻雞翼六件裝都平過而家幾蚊，新兩隻味又唔係特別好食，做乜仲要收貴我？唔加多個麥樂雞更加冇可能食得飽，但夾埋三十七蚊，同一個價錢可以去Murder King買個包餐，KFC買個餐份量更多仲有得找幾蚊，甚至去檔煎釀三寶街買隻炸雞脾，價錢平過個併盤一半，但絕對飽多倍，加一定更好食。

「唉。麥記即係唔係我唔想支持你。問題係每次食完，都不期然地爆句『頂你又柒左』，叫我點撐你？想我再幫襯，開始賣番黑椒漢堡唔該。」