去香港仔蒲窩睇show去得多，自從耐到我都唔記得左幾多年前個場再唔搞show個勢好似執鬼埋之後已經遺忘左，今時今日先知原來搬左黎九龍城廣場，仲要轉左行做放題添。（．．．）

一個人食飯唔係KFC就係KFC出面間咖哩飯，唔係八三三聚會都唔知道原來九龍城廣場都有正野食。放題食得多但自己燒第一次，既然向來食放題只攻燒物淨燒野我更開心，但野食選擇比唔少放題多又夠新鮮，攻略是一開波即叫雞翼同粟米慢慢熬，再落大量芝士魚蛋同無限雞軟骨，記得加大量胡椒粉同味粉自製喜喜喜喜雞軟骨串（差噉枝竹籤添）。格局同質素完全唔似九龍城區食肆，因為食過咁多放題呢間可比我試過最好的灣仔金田，睇我地一個月黎食兩次就知有幾掂。只係價錢都唔九龍城，$175一位仲貴過旺區。

連食兩次食到滯加價錢唔平，睇黎可以休休先唔使咁快又encore，不過都會擔心之後冇機會，話晒開九龍城仲做咁貴，兩次黎坐成晚都可以成間舖坐唔夠一半，環境超闊落檯凳唔迫狹，一定少人所以全場最嘈係部電視機（如果我地冇黎的話）同唔會趕你走，成班人黎食飯吹水一流，但噉生意頂得到幾多個月．．．唔好執住呀我仲想試埋你地個火鍋架。

「為防蒲鍋執左之後正到漏汁的芝士魚蛋失傳，請歐陽伉儷得閒落深水步同長沙灣街市區雪藏檔兜兜，我要芝士魚蛋出前一丁黑蒜麵唔該∼」