九龍城太子道天橋底間酒樓，上年中秋前後出左呢個廣告。靚女叫黃詩思Jancy Wong（按照香港模特兒工業行規，應該叫Jancy W.），出左道幾年，近年較多人識因為做左Unwire數碼天使又拍多左廣告，而家做promotor正過以前私影好多，唔知係成熟左冇咁萌而順眼，還是專業化妝級數就係唔同。九龍城開酒樓就預左唔會點大生意唔會點好，所以之後廣告一直冇換過，朝朝早行路去搭車必定經過，是每日返工醒神之選。

唔覺唔覺又到中秋，諗住反正個廣告應節又唔殘唔會換啦，點知中秋節前夕唔見左囡囡得番個餅。搞到今個中秋過都過得唔開心唔安樂，立即冇興趣食佢地隻月餅。（雖然對左成年，我都唔知道其實係賣緊咩牌子廣告，而家冇左Jancy只係更加唔會理噉解）