咁多間美式垃圾快餐連鎖，仍真心支持只餘KFC，價都有加但冇其他e.g.麥記加得咁兇咁無恥，同加價之餘會長進個個月不斷推陳出新。雖然新唔一定好，好似前一輪加大碼雞脾餐食過返尋味，點知跟住名古屋壺物火鳥fans都撐唔落，但過左promo見到仲有得賣好很神奇（繼續賣大雞脾好過啦）。話咁快又有新野，今次是迷你桶餐。

曾幾何時，去到KFC一個人清一個桶餐是平常事，講緊係$89蚊一桶有九件雞加三人份粟米薯蓉葡撻同飯俾多兩枝大汽水的時代，即係仲讀緊書果陣都未夠十年前。當時六件雞桶餐賣緊$69。而家六件一桶已經要$99九件賣百幾蚊，即係加左最少三十蚊價。好懷念當年，除左象徵以前生活冇而家咁艱辛甚至輕鬆得多之超值價錢，仲有舊時的胃口，家陣要食一個六件桶餐都勉強應付到，九件就難矣，而且食到都唔捨得啦要百二百三我直頭去食放題去打邊爐唔好？

老左，心態由追求一餐食得幾多變成食得幾精，所以KFC個新桶餐賣迷你深得我心。兩件雞加小食汽水賣$36，其實同普通餐差唔多根本唔用桶都得，但當然你整多個桶我印象分立即+100，好老實我真係為個桶多過為左食。講到食同平常餐分別在於多個葡撻，另跟七條好鬼細條薯手指，同薯格濃味相反手指係薯餅式淡味，即係要勁落茄汁。你可以當一塊薯餅切開七份取巧宣傳，加埋亦一定唔夠平時薯格咁多，而且味淡靠茄汁，應該唔多人鍾意食，就算價錢接近再送多件葡撻，都冇左以往新餐好似大雞脾餐果種有新野食試同時平過多過普通餐份心滿意足抵食享受，我諗個迷你桶餐冇乜人會俾好評。劉Sir當然例外，以精做賣點正好迎合佢如今心意，加上對KFC同Buckethead存深厚情意結，冇錯無論你賣乜野只要加個雞記桶裝住，貴一貴劉Sir都會立即仆到黎幫襯。

「係有樣野好唔開心囉！個桶咁細，戴唔到上個頭扮Buckethead！需知雞記的桶餐就係劉Sir的開心樂園餐呀！」