住舊區大廿幾年生活清淡，由細到大思維都係「早餐下午餐午餐晚餐食乜餐都唔會過20」，出到外面旺區商業區返工去街冇乜可能做到，而家通貨永遠只有膨脹，五月一日實施埋最低工資，連住開舊區想繼續食平野都開始難。晏晝飯可以捱到兩點半先落樓食，吉野家下午茶比正餐時段平一半，買個牛肉飯加杯汽水只係十六七蚊 － 想當年吉野家早餐同下午茶可以賣到十一蚊呀。午餐易解決，但係晚餐呢？

好多茶餐廳同燒味舖都加價到近三十蚊，美心之類連鎖舖更加唔使諗食個飯加個餐飲收你四十都夠膽死，喂我住土瓜灣老人區咋大佬。好在未有領匯入侵未有大財團收購，仲有部份老食肆繼續低價經營，仍然搵到十零蚊碗粥（雖然食唔飽），同十五蚊個盅頭飯（雖然食唔飽加唔好食．．．），想食得好味又飽到滯，有檔牛腩麵食足幾年都係佢。讀緊書時已經成日幫襯，當年加埋外賣一蚊先十四蚊碗，主要加價都係近幾年，每半年至一年加一蚊，兩三年間加到而家外賣十九蚊碗，都叫未過廿蚊，而且幫襯咁多年熟晒可以custom落單點玩都得，食開半底河粉溝半底米粉，牛腩半肥瘦最好雖然本身已經好多可以私人醒多幾舊更合皮，然後唔落湯只落牛腩汁，返到屋企焗佢一兩個字等河粉米粉索盡腩汁黎食，呢個劉Sir特製牛腩麵食左四五年，次次去到唔使出聲廚師就曉自己搞掂。我諗過多一兩個月應該會加價到最少齊頭廿蚊，不過都幾難搵到另一檔可以同樣價錢合理之餘食得開心，最少唔會好似十蚊雙拼燒味飯之類一面食一面驚食完會唔會肚痛真正為平而食。

通常自己一個人食飯食過廿蚊已經叫豪，但出左黎做幾年野，油尖旺食飯冇幾可三十蚊樓下埋單，已經慣左廿幾三十蚊食餐飯。有時慳左一排想食好少少會加加送，齋做粉麵生意唔夠而家間麵檔賣埋雞蛋仔，兩三年前五蚊底而家七蚊加得唔太兇，買多一底一餐廿六蚊食得飽仲有埋甜品心滿意足，如此價位有如此享受冇乜地方搵得到矣。所以我死住舊區唔願走。