上回提到，金融海嘯之後會展擺展覽會乜都縮，未衰得晒的除左免費小飲小食，仲有贈品。今天展覽正式結束，是次斬獲不少，返到屋企無聊盤點呢三年展覽會戰利品，原來都唔少，可惜有部份唔見左摷唔番出黎，同原子筆呀環保袋呀果堆冇出到鏡，否則場面更加壯觀。其實我地以前做展覽真係做展覽，大家坐定定唔會周圍走做個盡責好員工，悶到訓成日睇錶等收工，而家相反個個十分期待每年兩個展覽會，就係為左去會場呃飲呃食呃禮品，搞搞下連老細都癲埋一份。點解會搞成噉？

是咁的。事源四年前，2007還是百業興旺經濟蓬勃，咁唔好彩去拉斯維加斯撞到劉Sir的Manny姐黎會展探班，唔係參展商的佢反而收到我地都收唔到的風，知道憑買家證印多封email就可以換到精美咖啡杯，就係右上角果隻，高身陶瓷杯連茶隔，就算唔理隻杯齋放杯個筒都靚晒啦，出街買可能收你五六十蚊，而家，一張A4紙搞掂。立即成班人發晒癲，本身老闆娘小「知唔知叫你地去展覽會係去做野架」，睇過隻杯之後，「幫我換幾隻返黎。」手持尚方寶劍自然肆無忌憚了。從而成就一班為左少少小便宜乜都做得出的小職員，如何走法律罅跟主辦單位貿發局鬥智鬥力的史詩故事。

第一日，因為會場大部份工作人員係兼職未熟規則，加上當時不論香港還是大陸展商都比較守規矩好少可亂黎，更加冇預過有人似我地可以為禮物如此瘋狂，守衛十分鬆懈，派出女同事以美人計迷惑睇檔個哥哥仔，就用一張參展商證換到成箱杯返黎。冇錯係一大箱，抬住返屋企果隻。相信果條友即晚俾人炒左。

第二日，即時多左個經理／主任全日駐守，亦冇得再用展商證混水摸魚，唔緊要我地即場幫自己登記做買家，又勝一仗；到晏晝班阿頭見勢色唔對，再改規則一張買家證只可以換一隻杯。情況先開始受控。

第三日，一到會場立即用客人派同周圍偷的其他公司卡片，即場整左十幾廿個買家證，一樣有得換你吹咩！實在頂我地唔順，主辦單位再次還擊，就係只接受開展前網上申請之首批買家證，開展後入場新整唔計。不過我地仲未放棄，既然展覽到左最後一日，四圍問客人乞買家證，唔止熟客生客都唔放過就連自己公司個律師張證都撻埋，為求可以換多隻杯而不擇手段，攤位班人一見我地行埋去已經頂我地唔順。

自此每年四月同十月，買家登記櫃檯同禮物counter班哥哥姐姐，個個都認得我地各位同事、記得我地公司名。亦因為我地帶頭，往後展覽會免費禮物立即收到密晒，規則及管理亦做到你唔容易拎得到贈品，原因除左我地仲有大陸廠加入戰團，見過好多講國語姐姐換免費野仲狼死過我，蝗禍也。近兩年拍埋其他展商，我地面皮亦慢慢顯得太薄，見唔見到張相前排中間燈膽形果塊野？卡片燈黎，屈起個燈膽兩粒LED就會著燈，著左燈著唔著冇乜分別得個靚字拎左先知中招，但談的唔係張卡，係counter撞到個阿哥，我拎幾張紙去換已經覺得有點過份，見到佢立即自愧不如，因為條友係多飛要用背囊裝，我去到時正好遇上佢成袋禮物紙倒落counter堆到成座山咁高的氣勢，坐counter兩條友無奈地收飛點數，個阿哥接過大大盒卡片燈放入背囊，轉身走人前仲話阻住我咁耐唔好意思，我話唔緊要，因為我尊敬佢，正所謂識英雄重英雄也。這就是霸氣。如此行為通常係大陸人先會／敢做，但果位阿哥香港人黎，可想而知家陣競爭幾大。

同埋市道差自然少左公司肯贊助禮物，以前一場有五六款你換，部份你行行下姐姐仔會塞禮物券俾你去特定地方玩，正野就要行幾個地方吸齊印至拎得，嫌麻煩唔緊要，場務經理行過問有乜需要，「贈品囉！」（冇錯劉Sir就是如此厚顏無恥，環保袋都十幾個十幾個噉拎啦有乜野佢做唔出），投訴完轉過頭親自拎大堆黎塞住劉Sir把口簡直皇帝級享受。而家次次得兩三款，姐姐派禮物紙又要派到斯斯縮縮神出鬼沒，場務經理亦面有難色地「我地都搵唔到人俾禮物我地呀．．．」之後全個展覽唔會再見到佢。不過我們只志在有。即使數量少左、質素差左，跟點唔好食都照食的菠蘿叉燒包一樣，因為免費兩個字，使我們努力不懈。唔好鬧我地唔做正經野，我地已經係做緊正經野。

除左禮物同換領券收埋晒古古惑惑，吸引力亦大減，基本上都係望到已經冇晒興趣的豬頭骨，好似今次「大獎」係單隻杯同套裝咖啡杯，可取是孖裝咖啡杯包裝個鐵罐，不過生晒鏽，相信係唔知放左幾耐的倉底貨黎。唔要杯，有碗（．．．），但第二日已經俾超大量大陸妹妹搶晒我第一次試過換禮物要排隊，最後一日仲有批瓷碟。其實十分唔等使，好老實咁多年拎落咁多隻杯差唔多一隻都未開過，但有同事十分鍾意套孖裝咖啡杯，拎兩套，就有三隻夠數可以拜神。（．．．）

嫌杯碗碟冇用仲有card reader你揀，但設計超唔掂質量更差，好後悔拎左三個，因為另一古惑野係好野收到最後先放出黎加不另行通告，第二日臨收工身痕諗住換多個card reader，點知變左送旅行插頭，咁多次展覽最有價值就係呢樣野但完全無聲無息，絕對係主辦單位計謀，先放雞貨出黎消耗晒我地班傻仔第一水coupon，冇晒飛或者換夠喇先放好野出黎俾鬼佬買手，頂早講啦禮物飛咁難搵平均行三層先搵到一張，早知收埋如此好野之前就唔浪費直頭唔換card reader啦！相信消息傳得相當快話咁快又送晒，換得一個咁大把灰爆，因為有得插USB平時屋企都用得著。同以往比，如今禮物實在太失色了，往時唔計雞到爆果類如太陽能報時鎖匙扣（我仲有一個，但同普遍冇開關掣太陽能產品一樣，耐唔叉電就死IC，膠袋都未拆已經壞左），差到盡都有電筒拎，最正係黑色橡膠身LED電筒，當時同場務姐姐講幾句立即拎左成打俾我，手感好LED功率出奇地高，仲要唔知用咩電鬼咁勁，開左一枝用其他未開過袋，隔左兩年今日無聊摷出黎試仲有電，反而另外兩枝不鏽鋼電筒已經壞壞地 － 有趣地，全場最大規模果間贊助商戶，枝電筒功率設計質量多方面反而最差。

2008年個市灰左，贈品反而係最落本最有心機一屆，玩cyber metal主題設計靚，同撞著硬件展連禮物都神化過人，拎左把小型瑞士刀其實質素同功能都唔掂戴住旁身純粹貪過癮，成把L尺噉款的係萬用探測儀，主要當金屬探測器等你碌左個一毫子去唔知邊度時搵得番，仲可以測微波洩漏測電線短路測好Ｑ多野，不過要入方電而方電實在很貴我拎左返黎都未玩過，而家日本核爆咁大單輻射飄過黎點點點，或者把探測儀終於有用武之地了。仲有其他無聊立雜野，好似電線斷路探測器，老實貪得意嗟拎到返屋企成世人都用唔著啦所以一早唔見左。覺得太偏仲有大路的card reader同USB hubs，全部亞加力加鍍銀膠加迷幻藍光LED製造，同今年真係膠到嘔果個card reader比．．．（不過更灰係同測電線邊度斷舊野一樣晨早唔知掟左去邊，幾靚都冇用）唉，過左三年嗟，TDC點解搞到噉？唔記得左臨尾一日四圍行，有個counter搵左班model做tutor開班教大家上網download iPhone展覽apps，可能靚女見劉Sir連iPhone都冇咁灰就送左張網上爬一日免費Wifi網絡卡，再加多枝激光電筒安慰佢。除左旅行插頭，呢兩樣最好，除左實用，有model姐姐教你上網當然是重點。

last day拆晒場呃夠野大袋細袋地返屋企今次展覽又告一段落，唔知乜事成條街都差佬擺晒路障，莫非劉Sir的衰野揚到禮物組終於頂佢唔住出到皇氣黎鎮佢？原來俄羅斯總統黎左香港，住正會展隔籬間酒店，難怪守衛咁深嚴。為免主辦單位出黎追討番手上幾大袋禮品，劉Sir就在俄羅斯總統的掩護下逃離現場，回家計劃十月全年最大展覽會東山再起了。