上回講到，從會展每次展覽會場內囡囡人數質素每下愈況，看出本港經濟踏入蕭條期。不過點度點縮，fair有樣野始終唔會慳過頭，就係免費野食，始終各位外國buyer同劉Sir一樣最鍾意貪小便宜，咁遠水路黎到香港，點可以唔請佢地食野答謝下鬼地俾面？

「但事實係，算Ｑ數啦，請人地食個包仔，跟住晏晝飯五十幾蚊得個難食加小到喊飯盒加枝水，咪又係搵人＆鬼笨實。」

聽落著數，其實是谷你行多幾個館的宣傳技倆，因為要四圍搵coupon換領地點又分到好散仲要相隔超遠，三樓食完個叉燒包，落地牢先有甜品爆谷食，食到口乾請上五樓飲咖啡，除非你好似劉Sir咁有恆心（應該話咁無聊），否則會發現自己俾十幾蚊買舊麵包都好過做傻仔。同孤寒左，以前見人就派你行過就塞幾張俾你，而家收收埋埋，要行一餐符符碌碌先撞到唔知邊個角落頭企左個姐姐拎住最後幾張。好在有劉Sir呢庭無聊人，你今個院唔派，咪行去第二個院囉，行晒咁多個院行到有姐姐派為止你吹咩。基本上，得閒無事就走出去睇有乜野拎，先至係劉Sir在展覽會的正式工作。好在自己地頭佔盡地利，憑券可換一個叉燒菠蘿包（兩樣野根本完全唔夾勁難食都唔知邊個諗呢味fusion菜出黎），我地個攤位右手邊就係廚房，左手邊已經大門口得閒無事就可以行出去睇有冇姐姐派coupon，後來coupon姐姐入埋黎展館派，好揀唔揀揀企我地攤位出面，仲要係個十分善良十分馴品的小妹妹黎，就大鑊啦，擺明我地唔係買手都厚顏無恥地行埋去拎，搶足一疊果隻。各位同事得閒蛇蛇王鼠出去努力一番，最後收集到十幾張叉燒菠蘿包coupon，可惜都唔夠劉Sir食，佢一餐晏已經食一打啦，好在仲有爆谷食，行六層樓落去地牢食完行番六層樓上番黎減埋肥。不過有點灰，以前糕點係一水水出加水水唔同，可以食完蛋撻再去拎係超正雞批次次去都有驚喜十分開心，而家得番最難食的叉燒菠蘿包供應。一定夠食養得起你。但亦只限塞得飽你個肚咁大把。就跟會展的囡囡一樣，失晒色了。

除左免費怒飲怒食（飲呢家野都冇得怒了，免費咖啡我行左兩日先搵到兩杯，灰），每年參展另一樣正經野，當然係四圍呃各大參展商同主辦單位的精美禮品，好似今次有咖啡杯、陶瓷碗同card reader。那又是另外一個故事了。