做展覽其中一個好處，係可以日日試唔同早餐，落巴士過天橋途中大量選擇慢慢揀。有時間的話。需知坐隧道巴過海，單塞紅隧一段已經可以塞半個幾鐘。

因為順路通常會食麥記，今次口痕想食KFC，都係行多個字路嗟。咁多間連鎖，最鍾意都係雞記，炒蛋好食過人地早餐塊雞扒又正，加上近幾年間間特別麥記猛咁加價，加幅較細的KFC反而變得抵食，但唔多地方有又唔係間間早開冇得成日食。今日上到去，原來做雞是對的肯德基而家做埋魚，咁多年都未食過雞記魚柳，值得試試呢個家鄉炸魚柳（點解乜都要加家鄉兩個字）。

魚柳餐廿四，加四蚊整多個朱古力鬆餅，買時好開心，拎到會展打開蓋先知中招，因為廣告張相塊魚柳切開左做兩塊，而佢半塊已經有而家我見到全塊咁大。連炸魚柳都要加平時炸雞用的炸粉，口感是過癮的如果你同我一樣鍾意KFC，不過麻麻。炒蛋可能行咁遠路凍左又係唔多掂。鬆餅亦鬆過頭唔夠脆。

「搞到好唔開心。覺得俾雞記呃左。早知幫襯番麥記食個雙層豬柳蛋好過。」