食左咁耐吉野家，成日見到丼字，仲未知井字入面加一點點解點讀，門字入面加個小就識嗟。雖有麥記雞記Murder King等勁敵，賣東方飯款加日本泊來貨包裝，吉野家一直食物唔加款式只加價錢，照樣站得住腳。

以往落多少少汁或配菜，甚至細變大取名「特盛」就話係新出品，搵笨但冇乜不滿，因為最普通個牛肉飯已夠好食，冇新意照可以一款野食足咁多年。今次三重芝士牛丼係第一次吉野家俾到我「有新野」感覺。

其實幾貴，一個飯加餐飲套餐只得大牛肉飯份量，但比特盛牛肉飯餐價錢再多一蚊承惠$34.5。所謂芝士牛丼，即係熱辣辣牛肉飯上面灑一層凍冰冰芝士絲，初初對住碗飯，唔知點算，正確食法係點？食完芝士先食牛肉飯？定半啖芝士半啖飯？睇隔籬檯食先知，原來係成碗撈一輪，用飯焗溶芝士再食。都幾有學問。

叫三重因為用到三種唔同芝士，雖則一萬重我都唔會食得出邊種同邊種有幾大分別，加埋芝士伴一伴多少少鹹味撈飯確得意，只嫌落得唔夠多，實際上唔特別留意唔會太覺得味道同平時差得幾多。

同始終覺得好怪，似為夾硬整新款式撈出黎，不過是好食的，只係價錢略貴之餘限量供應。有食襯手。