Welcome to Hong Kong International Hirport
「．．．乜我唔係去機場咩？？？」
「噢！撚多！」
同上年一樣，今年五月同一時間又係過美國做展覽的日子，又即係
「好野！美國！我又黎渡假喇！」
過黎美國一個星期展覽，幫公司拉客搵單之餘，亦可以遠離某人某事，噉樣出黎走走散散心對我可能較好。
同上年唔同，今年第一個印象已經冇咁嘆：只得我同老細兩個去、唔係公司自己過美國而跟住香港貿發局、一做完第二朝就上機唔似得上年做完展覽仲可以留多一日玩埋先走，喂慘喎上年其實好豪好有ｄ旅行團feel，差噉ｄ喎今年！更慘在今年搭早機，上年lunch先上機而家早左成晝，之前一晚收舖之後立即走返屋企執行李，點幾鐘上床訓陣先，四點幾就要起身趕巴士，真係死得人。我從來唔鍾意跟貿發局，雖然服務質素唔係話好差，但每次跟親佢地，硬係有事發生，好似今次一出發已經被賣左豬仔：
平安抵達Hirport，團友七點半鐘集合，我趕頭班車五點半過機場，其實都唔使咁早因為咁早條街冇人冇車九個字就到，但我慣左咁無聊冇計。去到仲可以坐低攤多個幾鐘，兩個鐘流流長，梗係聽下歌仔啦。咁長時間可以重溫一下PINK FLOYD "The Wall"，搖滾歌劇中的經典。除左睇電影版果陣會全套聽／睇晒之外，平時好少會頂得晒兩隻碟，冇辦法，經典在前瞻性同舞台效果，但講音樂全"The Wall"最勁果ｄ放晒去最前，過左頭四份一跟住耐唔耐有一兩首歌正之外，其實好多歌都未夠水準只為劇情舖排而寫，係今日咁多時間，先好耐未試過地拎出黎由頭播到落尾再重點金曲重溫，自然唔少得最經典之"Comfortably Numb"，被譽為「史上最佳guitar solo」。機場嘆住等集合，聽極都有得聽，話係七點半集合，但夠鐘都未見有人，有點被玩的感覺。再加上十點半機，
「使唔使咁早集合呀大佬？？？」
冇野做唯有入個閘先，香港好多野食都係機場至有，例如Burger King，但歷史重演地食佢地隔籬大力水手，上年午餐今年早餐，仍然覺得好食過KFC，就係唔知點解大力水手唔夠肯德基上校鬥要縮到入黎機場苟且偷生。食埋個雞先至八點半，仲有個幾鐘先上得機，實在無聊，去登機處大模絲樣地搵張凳大字型訓直聽歌，影衰晒全團各位香港團友。九點九開始排隊上機都未訓夠，過關仲要check好鬼死食野，一大輪先上到飛機一坐低即訓，重要呀大佬我做過research架，呢架飛機好野黎架上到天好多野玩架，仲唔抖足精神咩！今次係搭美國大陸航空，英文名Meiguo Dalu Hangkong，屬當今最大航空公司，由中美合資經營，航線環跨全球，美國本土超過九百個著陸點為全美之冠，08年計劃開發從未有人涉足之南北極航線，當然仲有將大中華地區哩數同航線數目增加300%，極具潛質成為全球最大航空公司，大得連其他計劃打入大陸市場或者擴大中華地區佔有率之公司好似港龍同華航，甚至阿拉伯油國皇子、多國政府同國際金融界炒家亦有意入股或加盟，業務重整後再組之「美航物流聯盟」預定下年上市，前途利好。
「真係信劉Sir講野的話，你已經不再有型了。」
不過有樣野就真係有型。我搭果架機，係波音777。
咁早起身辛苦到喊，上到機第一件事當然係訓覺，起飛對我黎講唔係咩問題，地面空中我照樣噉訓法你點飛點走對我全無影響。可能知道訓得咁舒服唔抵得，今程機想訓安樂ｄ都難，因為美航ｄ空姐超多野講，未飛前一輪，飛之後可以再一野連講兩個字唔停，英完再中一鑊，由地下到天空每隔半個字就講一大抽野過你，就要係轟炸到你冇覺好訓。都算。更灰係，ｄ空姐講野都幾唔掂，不論中英。噉先死。都要迫自己一定要訓番陣，我好鍾意搭飛機特別係長程機，坐得舒舒服服又有空姐餵我食飯（呵呵），仲有好多野睇同玩，今次架機有成個database俾足二百幾套戲你慢慢揀，上次國泰講戲數量可能差唔多，而且夠新夠出名加咩國家都有，只係分開好多個台不斷輪住重播幾套戲，美航講勁就一定冇咁勁架喇，新戲唔算多不過都有半年至近兩至四年之大作猛片，日韓亞洲片都多反而港產片冇乜，冇得好似上次睇足＆笑足兩次《買兇拍人》，不過重點係有彈性嘛，二百幾套戲想幾時睇邊套點睇法快慢停任你，況且話「舊」都有唔少正戲，只係唔知點解冇乜戲有中文字幕，連希伯來文字幕都有，點解會冇中文？俾個簡體中文都好丫大佬！（雖然俾左，一樣會小「得簡體中文字，唔俾好過俾啦大佬！」）
首先開套《梵海辛》，果年上畫時已經好想睇，但因為同期又上"Underworld"兩套戲太似連女主角都一樣搞到興趣大減，Ｎ年前107隻俄羅斯版東門正貨又食左屎，結果兜兜轉轉到今晚坐飛機先有得睇，嘩頂點解當年戲院上時冇去到睇？可能又係"Underworld"影響，硬係覺得呢套又係漫畫改編式中世紀驅魔電影，而之前漫畫改編戲中過太多次招再加冇咩心機，點知原來無論劇情影像定係深度，都夠贏當年同而家同類電影不知多少條街，唔係普普通通之「改編電影」咁簡單！（冇估錯的話，劇本應該係原創！）如果你係鍾意中世紀妖魔故事同美國漫畫式打鬥同思考性，雖然隔左咁多年，仍然值得搵番呢套戲睇睇。睇完到食lunch，遺憾地完全及唔上國泰地不值一提普普通通，我都係志在快手快腳食晒個飯再睇"Matrix"全線。以前冇乜用心睇（都係志在睇動作遮，唔使用腦嘛），但今次咁得閒「認真」地睇番晒一連三集，對劇情同哲理又明白更深一層，其中一個理解係，"Matrix"永遠係最（懶）型電影，我知係好Ｘ造作扮野到嘔，我鍾意喎！只不過睇完，第三集硬係覺得有點兒反高潮，思考性、劇力都係，好多人話機械人打機械人果段最有迫力最精彩，但由細打機打到大，呢ｄ場面都對到有點麻木，反而第二集飛車同打鬥呢類小至中規模動作場面更可睇出心機，所以可想而知，我最鍾意係第二集。
睇完有少少支力，大佬冇字幕用耳聽好費神架，劉Sir英文又唔係好你知啦。訓番陣先，咦除左有戲睇仲有歌聽喎．．．嘩頂，又有百幾二百隻碟任你揀，好多類型野都有，最正係超多60至而家之rock/hard rock/metal/punk經典大碟都有！即開隻QUEEN "A Night at the Opera"黎聽，而家少聽左因為太多選擇，但隔咁耐一開聽過，心目中最愛大碟之選地位仍然穩固，唔止《波希米亞狂想曲》一首咁簡單架，全碟曲詞同技術其實超前左好多人，講無敵當然係狂想曲啦仍是最愛rock song加眼中最重要rock song。訓住黎聽好舒服，聽完訓醒再開始"X-Men"全線，有「小食」芝士煙火腿肉飛碟可以睇住食，勁好食，正過正餐！最正係唔知點解地隻飛碟會跟一筒萬樂珠再加多杯雪糕！但我已經唔得閒思考呢個問題，個腦要留番黎睇"X-Men"嘛，呢套係其中一套我好想追番黎睇之美國漫畫，我覺得咁多美國漫畫之中X-Men係最成功之一，劇本同意思又係非一般動漫可比，可幸改編成電影之後人物造型同內涵都冇變質，頭兩集你從頭睇到尾會好理解同投入到各個角色之心路歷程，冇好似某ｄ改編噉變成齋賣角色互毆之膚淺動作電影，美國漫畫除畫風同場面正正係角色發展引人入勝，冇左呢樣野，打得點精彩都冇用。只不過都講左，係頭兩集，第三集唔知係換左導演編劇定點，完全換到兩回事，除左舊幾個角色，新果堆有等於冇，變成真係出黎出下招下幾場就收皮果ｄ蛋散，好失敗，係場面補救番。其實要拍的話，X-Men再拍多四五六Ｎ集實得，角色同劇情仲有大把存貨發展落去啦，只不過衰同一樣野的話，就真係唔拍好過囉。睇埋都仲有幾個鐘剩，反正《蜘蛛俠3》返香港會睇，順便encore定第二集先啦，講改編電影蜘蛛俠系列就真係不得不提喇，係有大量食晒屎的例子，但蜘蛛俠出乎意料地成功仲要一集成功過一集，因為個主角廢，唔係能力廢，係合乎番一個平民百姓的現實迫人。好多超級英雄設定已經係家財萬冠i.e.蝙蝠俠or高薪厚職i.e. Iron Man，背景設定已經將一切生活所需面對難題排除晒90%時間只需要專心做英雄拯救世界就可以，但蜘蛛俠唔係，除左做蜘蛛俠之外，一樣要讀書、一樣要做野、一樣要搵錢養家生活，有超能力但唔可以用呢種能力去搵錢而只可以救人，英雄每日一樣得廿四個鐘，噉你會投入多ｄ時間做無名英雄，還是做好自己？講打就當然精彩，但更精彩都係導演點樣描畫主角。今日先知道套戲原來好長下，足足兩個鐘睇完都差唔多落機，不過仲夠時間聽多陣歌，就麥記黑碟最出名果隻、我第一隻麥記，但第一次聽到而家都唔鍾意，除左一首"Sad But True"叫做好，有幾首直頭唔聽都罷。部機又得意喎似乎有人工智能知道我鍾意邊幾首，唔係首首播，而係播一兩首跳一兩首噉，剛剛就係跳過晒我唔鍾意果ｄ歌。其實要聽仲有其他好多選擇，我唔應該聽黑碟咁浪費時間，焚多次AC/DC都開心ｄ啦呵呵。
因為咁多正戲睇，上年上機狂訓，今年反而唔捨得訓，夾埋十六個鐘飛機訓左都唔夠兩個鐘，搞到今次好支力。同國泰比，飛機餐冇咁好食（灰，我係飛機餐fans），位國泰好坐ｄ，服務亦慢態度較差，係睇戲聽歌全互動夠晒效率爭番分數。好多人關心一樣野：
「空姐呢？」
國泰好多都係後生女，香港同亞洲人特別多，美國大陸呢就．．．大半係肥鬼婆，亞洲人都係老野，仲要有差唔多一半係男性黑人or白人。假如你上飛機其中一個目的係為左睇空姐，千祈萬祈唔好幫襯美國大陸航空。你會死。
「國泰就話正？維珍仲多靚空姐呀！」
老細話。
「就下年啦唔該！」
維珍我的確好想試一試，唔係因為空姐，而係因為有個超傳奇的老細：你會唔會諗到開航空公司可以開到開唱片公司，甚至連維珍可樂都出過？知道埋當初佢係點樣宣傳維珍、做過咩驚人舉動，可能你會同我一樣，對呢間航空公司咁有興趣。（雖然到頭來，相信你有興趣的係班空姐，而唔係請班空姐個老細）
晏晝兩點鐘落機，時差十二個鐘，即係而家係香港朝早兩點。照計係8/5朝早兩點至係，不過我已經難諗難計，當年劉Sir會考maths居然冇簡直係柒不思議。一落機就係生死時速，因為貿發局．．．卦。上一年公司自己訂機票，搭得舒服之餘就晒時間姿姿悠悠都得，今次完全唔知咩事，到美國中間得一個鐘頭轉機，個個趕頭趕命我就慢慢黎都得，因為黎過美國一次咁大把我都知道死硬：ｄ關員服務超慢態度超差，全個過程係排隊過關，填表俾passport、答問題、打左右手手指模再影相，理應唔複雜，一個字唔使一定搞得掂，但我排第四五個位，都可以等足半個幾鐘先到我，因為ｄ關員戇居問生問死，做做下又可以同隔籬果條友吹吹水先理番你，更戇居係完全冇知識，好似我老細用BNO過關，俾個關員問：
"Lay hai heung gong yan, joe mud yung ying gok woo jiu? Lay ying gok lie mei?"
之後要解釋番晒成個殖民歷史、講番香港97前後、點解香港人會有／用BNO呢樣野，半信半疑下個關員先至放佢走。但我反而一埋到去，望兩望問一兩句，一個字唔使就搞掂，我柒得滯卦。齋呢part已經冇左半個幾鐘。仲未止。跟住搭自動穿梭火車去第二個站拎行李，仲要再check，明明有X光機唔用係要推我去做手檢，我兩篋野算少架喇，有ｄ人五六七箱都有，仲要逐篋逐箱開黎查，煩到連個關員最後都廢鬼事求祈開左望望就算，不過咁「求祈」噉「算」又玩左我半個幾鐘。本身得一個鐘走位，三點二下班機飛，我出到黎都已經呢個時間，點算？好簡單遮，搭下一班囉，美國呢度搭內陸機就好似你香港搭巴士咁普遍。距離下一班機又係有一個鐘，而家乜關都過晒又check晒行李，順利過關唔係咩難事。首先要拎張新機票登下班機。點拎？好「簡單」。只需要俾Ｎ咁多位地勤老點（清一色係超肥的黑鬼婆），走勻晒機場三層樓接近全部counter，最後終於搵到真正果個櫃檯：「Missed Flight Counter」。冇錯，噉樣點下點下，連跟住班機都miss埋了，恭喜恭喜。排排下又多幾個，原來包括我一共有四位幸運兒趕唔切上機。我只黎過美國一次都知道呢個國入境過關幾快、關員工作幾有效率，相信負責編排行程果位仁兄一定比我有更豐富經驗，冇可能會唔知呢樣野。噉點解要搞到大家得一個鐘頭轉機咁趕，最後成團人走散晒，係坐成三四五架機先去到目的地？噉就要問問主辦單位。
搵到真正果個counter都已經四點二，搭到正第二班機起飛時間。問問counter，下班機係幾時？
"Tomorrow jiu joe chat dim gou ton sub yet dim sam!"
唔Ｘ係卦？？？如何想即日走呢？？？
"Upgrade first class law! Dou hai US$366 jei!"
冇錯，升一升級就要差唔多四舊水美金，程機先兩三個鐘，即係一個鐘百幾蚊美金差唔多港紙成千銀，嘩好賺喎做航空公司真係。我全副身家都冇咁多錢啦，都係收皮算數。轉一轉第二朝早本身又係好簡單之事，但四個人等到五點幾先走得，轉左成個鐘，因為個姐姐除左幫我地轉機票，仲有大把野送：為表致歉，機場安排晒免費食宿，是晚等第二朝機一切行程通通由機場包晒，真係乜叉都包，係差未包多隻變形金剛俾我！（．．．）美國服務機制就係噉，雖然趕唔切機未必係佢地錯晒，但唔係我錯都有得送野俾我補番，夠晒古怪，可能佢地自己都知道自己海關有問題年中累死唔少人，所以用錢塞住你把口。唔緊要，我最鍾意人用錢撻我！撻多幾錢重我仲開心！
值得一提係當果位姐姐幫我地全組人轉機，坐佢隔籬隻黑鬼係打足成個鐘NDS。（容忍）如此工作態度，令已經夠頹的我更恨滯留美國。
而家搞到噉，點算？計劃1.0係訓機場算，訓機場唔會俾人趕又唔使錢，咩舖頭都有，而家有飯票仲食都免費，加上有得免費上網，抵玩喎越想越興奮！可惜最後計劃作罷，首先機場唔肯留隔夜行李，即係冇得推晒兩篋野入行李倉，帶住兩舊野走黎走去辛苦喎，又冇得出去玩（呢個就係重點）；又機場為左「道歉」，今晚包埋免費酒店房俾我地，我冇美國電話老細搵我唔到（呢刻我都唔知老細點），喂咁難得仲唔發癲出去玩咩！冇錯今晚我係以紐約遊客身份進行計劃2.0：
「紐約一夜遊！」
再轉自動穿梭火車，五點半，終於出到室外。久違了，這香港多年未見的天氣。酒店有免費穿梭巴士，因為機場同酒店區隔都幾遠下，呢ｄ地區的士唔係多，酒店呢ｄ服務都唔提供的話想有生意都難。搭巴士唔係耐兩三個字搞掂，係等巴士先耐，呢ｄ野要就定時間，廢事第二朝miss左班巴士就奧蘭多都唔使去。六點鐘到左酒店：
入到去相當高興，除左唔使錢就有得住之外，我去到奧蘭多又係住同一間酒店，今晚先住為快，今次間酒店都好正喎！不過更開心，梗係有得出去玩啦，一場黎到美國，唔玩番飽點得？只係玩之前，仲有正經野要做：
一入房放低ｄ野，大家立即飛出酒店間餐廳，機場送左每人十二蚊美金coupon ，夾埋四十八蚊即係差唔多四舊水港紙，立即叫番個大餐，每人一杯野飲再如圖地加多兩個pizza＆一個三文治拼盤，噉就清左倉，個量係多到食死有劉Sir坐鎮到最後都仲有三份一食唔晒，不過以四舊水呢個價錢黎講，得咁多野食其實唔係好多，相同價錢香港地夠pizza買個Ｎ人套餐啦。係叫做好好食囉，外國人整pizza同香港人整係唔同ｄ。一面食四個人一路傾，同行係一個經理加兩個老細，全場我最細粒，但各位老細講野我一樣吹到，你知死剩把口的劉Sir吹水扮野幾叻先得架！真係呃得下人令人地都以為我係公司高層黎架！
食完個飯就出去玩，七點鐘都未天黑晒，十三四度左右又有風，呢ｄ天氣真係好正，足夠令人唔想返香港。我地住呢個地區叫「紐鑊」，係NJ同NY交界處，周圍除左機場同馬路冇人冇物頹區一個，連的士都冇架只得白牌車，四條友包架房車周圍去，一上車個司機就超速飛車，冇乜人嘛呢個地區想點飛都得啦。首先去酒店推介之下鎮區，係葡萄牙人聚居地，好似成龍《紅番區》周圍溶溶爛爛轉角位隨時有班電單車臭飛拎住單車鏈衝出黎打柒你果種地方。舖頭係有唔少，不過．．．冇一間開。全個區收晒皮。借問有咩地方行，司機遙指全區最大商場：
今日星期日喎，呢個咩國家黎？剛剛撞到實Ｑ哥出黎鎖門，問一問，嘩，美國真係幸福，原來禮拜日所有舖頭一律七點準時收檔，佢八點拉閘已經係全個商場最遲走果個，黎左一分鐘已經走得人可以call番個的士佬返黎，呢晚「紐約遊」真係灰爆。或者呢ｄ地區冇乜車太好生意，入去出番黎半個字都冇，個司機已經兜左去唔知邊度食足幾個字風。呢度真係死城。係死到連行過街邊部汽水機入錢都冇反應，想飲枝野都唔得咁死。搵到個電話亭，
「係喎！要打個電話俾老細喎！」
玩得開心得滯（其實一ｄ都唔開心），唔記得要搵番老細添！原來佢都遲左班機，但總算今日去到目的地，全團真係得我地四個落難紐約。冇手機都有好處，就係老細想搵都搵唔到我點玩都得。夜晚真係凍到僵，汽水冇得飲又報到完，的士佬唔知去左邊，周圍望浪費時間。
呢晚話出去shopping同觀光，其實只係游車河．光想觀都冇得你觀，因為全個鎮條條路都冇人冇車，全部舖頭閂晒，連ｄ屋都冇燈，ｄ人去晒邊？返左屋企客廳同房都會著番盞燈卦，而家係全街甚至全區除左街燈車燈同月光乜光都冇，全部樓都唔著燈，十足喪屍片噉款。我真係好想知架，到底ｄ人去晒邊？八點幾咋喎！訓都冇咁早卦！
九點幾游到返酒店，估下噉樣搭一晚「的士」，幾錢？
"US$75 jei mar!"
香港搭的士起錶十五蚊，呢度都係十五蚊，不過計美金，而且去到目的地收幾錢係任佢吹話收幾多都得，好賺到佢架白牌車丫！今晚一晚的士錢，香港搭一年都冇咁多，不過錢唔緊要，大家夾番，同埋開公數遮！（真衰仔！）走到出黎一間舖頭都冇得行咩收穫都冇先係最灰！
返到酒店十點幾，沖個涼開電視原來好多野睇，勁多電視台之餘有ｄ台仲唔係野少，好似一開機已經係《魔戒》。難得黎到當然想玩多ｄ睇多ｄ啦，不過頂唔順直接撻上床訓左，未正式做野齋行都已經咁支力，黎緊幾日仲死。但十點上床都唔訓得幾耐，因為四點半就要彈起身，六點半要趕到去機場，刷牙洗面執好野就夠鐘食早餐。係呀真係好早，五點鐘間餐廳已經開，琴晚一餐非常滿意，但睇過餐牌，早餐似乎冇咁抵食，機場每人醒coupon一張coupon得六蚊，但原來六蚊並唔代表ｄ乜，因為食一個奄列已經七個幾，而你唔會只食隻蛋就走人咁少卦點都飲多杯野先啦？
芝士煎奄列再加煙肉，味好量多就連杯朱古力都狂好飲，不過同一款野，香港係港紙$12x2，呢度係$12美金連稅，酒店食野真係十分搵笨，不過算啦，反正我只係俾一半（都成五條呀大佬），野食得服務又好，乜都抵番晒係呢間酒店唔係播R&B、pop、古典或者電梯爵士樂e.g. Kenny G，而係播rock野，仲要係PINK FLOYD、KANSAS呢ｄ七八十年代rock野經典，得架喇劉Sir中晒招架喇齋坐係度聽歌已經好心滿意足架喇佢。琴晚食pizza加三文治，今朝食蛋，大家係度研究點解同一樣野，點解美國食會好食過香港食，吹一大輪，吹用料、煮法、天氣，係呀天氣都關事架，冇咁潮濕，ｄ野食就保存得好ｄ，冇咁快濕同潮，唔似香港擺一陣已經脆晒。出一次國，真係見識多好多野架。
六點一上酒店車過機場，而家係夏天但出面得十二三度，已經夠架喇香港而家冬天都冇呢度「夏天」咁凍，好在冇乜風，褸都冇件得件短袖衫會凍死。途中剛剛日出，由細到大都係住九龍城近機場，對機場景情有獨鍾，所以呢程車非常回味，機場區、矮樓加超低密度，完全係啟德時代九龍城一樣。我都係鍾意住舊區。朝早冇乜人冇乜車，兩三個字好快就去到機場，外面十三四度，但一入到機場立即標到廿三四度，加上多人熱到你標汗，美國人完全唔知諗乜野。琴日紐約少少野都搞個幾鐘，但入左境之後簡單十幾倍，排隊查行李再除晒全部金屬野鞋都除埋再過金屬探測機，多人加多手續好多反而快過紐約一半，紐約入境時排隊都唔止半個鐘啦大佬。
七點九機八點起飛，係噉訓，訓下醒下，睇睇窗外雲景，真係好靚，訓得好舒服，我愛搭飛機。預計機程係三個鐘，但早半個幾鐘落機，出機迎接的除左奧蘭多涼風陣陣，仲有一陣雞條餅飄香（真係咁神奇）。
佛羅里達算係個貧民州，而奧蘭多係渡假區，居民唔多而遊客多，因為近中美州所以好多中美州島國居民都會黎呢度搵食，超多黑人。黎到奧蘭多，有咩好睇？
「魔術囉！」
魔術係你地睇遮！我睇，就當然係睇
"Death Metalll!!! \m/"（黎到佛羅里達death聖地都唔睇death metal？你仲係聽metal？）
有興趣，不妨研究一下美國地圖甚至地域史。death metal，就係由呢個貧窮地帶走出黎，rock/metal事實上從來係屬於窮人之音樂。metal／音樂，可以令你學識到同明白到好多野。包括，點解係香港搞metal／音樂on09。文化唔同就係唔同、未捱過就係未捱過，果種精神同態度，唔係話有就有、講得多樂隊名聽左幾多激mp3可以培養到出黎。
入境時煩，但過到黎就好快，拎件行李出去十點九，正在冇紐約咁凍，廿度左右又好太陽但涼爽唔會太乾太晒，話需如此，噉樣曬住企係度等的士都幾辛苦架，撞正落機時間成條龍等車，又一定要搭的士喎你過到去識得搵巴士咩？呢隻ｄ的士佬真係好做，一日廿四小時都有客，保證有生意！今日朝早十一點鐘全世界酒店集合開會，問問司機，酒店有幾遠？
"Ya gay lay lo jai!"
Or!跟住超高速飛馳，廿幾里路，都要幾個字先飛晒，美國太大喇。沿途風光明美，周圍都係樹林、湖同河，除左大酒店之外冇乜高樓大廈，渡假區同旅遊區嘛講左係，所以規劃好、低密度、消費指數亦低，最重要係，全球最大（卦）迪士尼樂園同埋環球片面，都係坐落奧蘭多。落的士都十一點半啦，入到房已經開完會，其實我黎純粹係飲啖水同借廁所。好多人慰問：
「你去左邊呀？個個都好擔心你架！」
「乜原來我咁多fans！」
「大家都知你廢咋！」
機場飛車到酒店，大拿拿成廿九蚊的士錢，美金呀大佬即係二百幾銀呀！最關心當然係，有冇得claim先？
「有冇單？冇單收嗲！」
主辦單位曰。好明顯句對白係被劉Sir "lausirized"。唔緊要，
「反正都係開公數！多謝老細！」（呢ｄ員工早就應該炒Ｑ左佢）
ｄ時間已經調亂晒了，所以而家美國晏晝，變成香港新一天。大隊搭車去會場set場。
真係超大。我果個hall係較細之一個，已經大過會展最大個hall，仲有其他幾個hall，有ｄ一個已經等於大半座會展咁大，我永遠唔明ｄ人點樣行晒，俾足幾日你行，有時間都冇力啦。展覽會永遠係之前果日最灰，特別係出國擺展覽。地獄黑仔王唔止香港黑直頭黑到黎美國，全香港區三四十間公司，間間都冇事，係得我地一間ｄ貨唔知寄左去邊度。想搵個人幫手跟跟又冇喎，因為入到場撞正係食飯時間，黎到美國千祈唔好得罪ｄ工人，因為工會勢力大，係唔做就唔做吹咩，佢地唔做野時千祈唔好叫佢地做添呀撻個工會黎小狗你架！而家想做野都冇得做，反正得閒，食飯先：
意大利菜佢話係，ziti我都唔知係乜，食落係長條形通心粉，大大條落埋芝士焗幾好食，個meatball係所謂秘製牛肉加豬肉再醃成之特色食品，又唔錯喎，
「老細你呢十一蚊美金都算冇浪費到！」（．．．）
如此美食，其實係冇選擇中之選擇，個場冇乜幾檔你揀，今日未係正式展覽日子就更加啦，好在都好食，我又鍾意食鬼佬野多，呢餐ziti食得特別開心。食完ｄ貨仲未到，老細走左去小人，我好得閒，坐係度玩手指，今日一玩先發現到原來手指都有好多玩法，可惜冇拍低同大家分享，有機會寫寫呢個玩手指專題先（證明我有幾無聊）。唔知點解有個著住MOTLEY CRUE的肥佬成日行過我個檔口，冇野做，走上去大家一齊唱
"Girls Girls Girls~~~"
唱歌咁開心，個攤位點呢？
一直等到兩點幾，人地都set完場走晒出去行街買野，ｄ貨先到，遲左兩個幾鐘。每次展覽最灰就係set場。香港擺展覽，全公司所有男丁加幾個工程師一齊起場都要半日，而呢度個攤位一模一樣，時間亦一樣得半日，但只得兩個人砌，加上只有老細叫做有番多少工程知識，如果唔計呢一日同set場呢個環節，其實出國做展覽真係幾乎渡假咁完美。單單呢個晏晝已經等於成個展覽之消耗，未止，仲要見客，有個客email傾左幾個月，真係傾偈果隻傾，知我黎左美國特登由德薩斯州飛過黎奧蘭多見我（劉Sir fans連美國都有！），砌到五六點幾身水身汗支力，跟住再對住個客，好快就已經收皮了，所以老細英明決定：
「今日放棄！八點鐘走，聽朝先再砌！」
早就應該啦！應該話，早就應該全個場縮細一半or帶多幾個人黎啦！前者更合乎經濟原則，同劉Sir只食野唔做野的原則！
超級支力都未抖得住，返酒店沖個涼，九點幾又要飛出去繼續見客，就係頭先個客。知唔知最抵死係乜？呢個客香港時大家係噉鬥炸email，黎到美國特登飛埋過黎奧蘭多搵我，就連酒店都要住埋同一間，甚至抵死到係住我隔籬房．．．本來。訂房時係我同老細地下果層一人一間房，老細都頂唔順我俾間房我自己自生自滅，點知琴日冇出現酒店立即俾左我間房人，今日先蒲頭就補左間上樓房，本來我、老細同個客三間房拍埋，變成我走左去上面果層而樓下剩番老細對住個客。老細住地下，我住一樓，再一次證明邊個先係高層。
奧蘭多呢個地方七點先似香港五點，不過仲要涼好多，八點先開始天黑，我地九點半出發有ｄ似香港剛剛入夜，呢ｄ天氣真係香港求都求唔到幾多次。酒店一出就係餐廳，旺到要等位，旅遊區加有展覽會嘛。遠道而黎，個客特登叫我地呢晚出黎同佢食飯吹水，但過癮地唔係傾生意，而真係食飯吹水咁簡單。外國人係唔同ｄ，基本上你唔使理由佢自己講，佢都可以連續兩三個鐘不斷噉講到野出黎，仲要超多才。有幾？當見到劉Sir著住件DREAM THEATER撩同佢吹rock同metal野，唔需要再多講喇卦？雖然得六十至八十年代遮，都夠喇卦大佬！正如數'60年heavy metal教父，你可能會數得出三大，但第四隊教父，有幾多人數得出？更過癮間餐廳又係播六七十年代rock同funk野，每次有正歌播，立即好多水吹。
"Or yi chin dou hai GUNS N' ROSES big fan lie gar! Welcome to the jungle~~~~~"
過程中老細完全唔知我地兩個做乜春，唯有．．．食飯。
十點幾食完晚飯，三個人行番去酒店，老細同個客返房，我就返去我間高層酒店房（呵呵）。今日由朝撐到落尾加大量體力勞動，實在太支力，一入到房即訓，頂唔順，但都冇覺好訓，第二朝七點幾就起身，因為個客仲想見我，要同佢八點食早餐，鬼佬真係夠晒閒情逸緻。可能因為酒店近會場之地利，勁多中國人、台灣人同阿叉住我間酒店，同場食早餐差唔多一個鬼佬都冇，又相信全酒店得我同我老細兩個係香港人。食食早餐吹吹水，發覺我呢個客真係越黎越多過癮野，好似佢身上係有愛爾蘭戰士血統，佢同Mei Gibson套"Braveheart"個主角同一個姓，而阿媽係芬蘭人，即係又有維京人血統，而本身係德薩斯人再加牛仔feel，我發覺我去到好多地方撞親都係奇人。同個客食完個早餐老細都未起身，自已走過去會場先，今朝早得閒番ｄ，終於有時間睇清楚間酒店。
展覽會今日正式開始，我地頭仲有40%未完成，所以早半個幾鐘到繼續未完之事。仲要著住套西黎做苦力，身水身汗勁辛苦，再加一面set一面見客（冇錯又係果個，琴日起跟足全程），好多野做，邊見邊執野，全個場set好晒已經十二點幾lunch時間喇，只係想食飯都冇得食，俾個咁健談的客人纏住，佢一日未走，我一日都唔夠薑食飯啦。好彩佢四點要上機返德薩斯，到三點終於散場有飯開喇！琴晚傾左兩三個鐘今日再八點半直傾到三點，我第一次一日內講咁多英文，亦好慶幸自己為英文努力過，個客都話就係因為email傾過見英文「不像香港人地出乎意料地好」、「印象奇佳」，先特登跨州黎到見見真人。只不過，見完之後，旋收皮。
"Ding! Ying min gum ho, yuen loi chung yan gum se柒en!"
你訓覺時，我食飯。基本上而家幾月幾號呢行亂晒冇乜意義，大家純粹當係劉Sir怕大家一次過睇咁多字辛苦，中間攝一行間開等大家睇得舒服ｄ啦。
三點幾鐘先食飯，立即仆到去food court睇睇，美國就是美國，每日係咁多就係做咁多野，賣晒之後，理你仲有幾千個客排緊隊一樣唔做。嘩咁威賣晒就唔做生意美國人真係勁I like！基本上你一點鐘先去買已經算遲。唯有行黎行去搵ｄ送頭送尾黎食：
除左小食，全場只有漢堡包算係貨源較充足之一樣，唔係太想食但今日真係冇得揀。如果唔係，就只有好似老細噉，食呢個針巴哩也，即係茄汁腸炒飯，但黎到美國又食飯，冇癮喎！迫住要食個包啦！朝早冇乜客，基本上只係服侍一個客咁大把，晏晝多番ｄ，但都唔係忙，得閒過上年唔少，重點活動包括去廁所吞pop、坐係度唔知做乜好、同走黎走去去人地攤位搗亂。美國有樣好，就係準時放工，頭先飯堂已經講左你知啦，個展覽話五點收，話收就收遲少少都唔得直頭趕你都似，我鍾意。琴晚間間公司收檔之後周圍去玩，今晚到我喇卦？撩埋其他公司ｄ人一齊去行街，三間公司六個人先要搵部的士，呢ｄ時間個個都走人人爭車，渡假區唔同市區的士唔係多，大班人要走到去酒店先搵到的士。劉Sir從來唔奉公修法係人都知，搵佢黎到美國，更加能夠證實俾大家睇美國人的公民意識幾強：話說走番去酒店果時，途經一條馬路紅燈，條路ｄ車塞實晒唔郁而個紅燈係唔等番半個幾一個字唔肯轉燈果隻，呢ｄ情況香港人肯定諗都唔使諗行左過對面，但在場所有鬼又真係見紅燈就唔行企定定等轉燈喎。一直等到典型香港人劉Sir頂唔順紅燈照過，後面立即成棚人跟住過。本來非常之守規則的美國人，就係噉樣俾劉Sir教壞左了。
據在場其他香港團友事後作供，其實內情係噉：
「即係呢，班美國佬見條路咁塞又唔轉燈，一早已經想紅燈照過架喇，但條路鬼死咁窄，叫劉Sir果條友塞住晒個路口又唔行，唔係班美國佬有修養晨早小狗左佢，我地亦企遠ｄ廢事行咁近佢啦影衰晒！跟住佢終於肯行，大家先至有得過馬路，佢行頭當正自己係大佬以為自己好型，我企後邊就聽到班美國佬係度講晒粗口狂鬧佢做乜唔早ｄ行阻住條路！不過大家都係香港人，我都唔好意思出聲啦！」
終於摷到部的士，又係一部八人轎房車，美國人乜都要排場，所以係唔係都要大，「的士」都要大陣仗過人，不過又真係要咁大部先容納到佢地同樣超巨大的身形。想搵間超市買野都要走十幾里路，仲要塞車，得閒無事成班香港人吹水。大家都係跟住貿發局過黎擺展覽，但只有我同老細係自己搵酒店住，其他團友都係跟足全團住埋大會酒店。聽完佢地講，更加自豪於我地唔黐住貿發局：大會指定間酒店成千蚊一晚，間酒店又要咩都唔包，又冇人冇物去第二度去展覽都要搭車，仲要抵死到有人間房俾人爆格，睇番我同老細，一人一間夾埋住兩間雙人房都唔使呢個價，大家都係三星級環境唔差得幾多，不過一出門口已經有野食有野買又行兩個字就到展覽會，有免費gym同spa又包早餐任食，仲有old-school機打，好自豪添我覺得自己原來我咁醒！
劉Sir個老細：「喂！醒都係我醒遮！你收皮啦！」
Wal-mart咩料懶講喇，睇番上年啦，黎到呢間超巨型惠康，第一件事當然係立即衝去玩具部！一面睇一面唱主題曲！！！
齋呢個"Transformers corner"，已經多款過晒全香港九成玩具舖夾埋，仲有唔少野香港真係搵鬼到。重點之一，當然係電影版玩具，暫時只得斯比頓星型態柯柏文同星星叫買，如果遲ｄ先黎美國就好啦到時會出多好多。途中出現另一位變形金剛fans，就係第一幅相藍色衫個肥佬。對住隻新版柯柏文，欲哭無淚：
"I watch him since I was a little kid. See what they have done to him!"
雖然其他人個個怒掃乜都執一餐，我好簡單，變形金剛就夠。買完，隔籬有間中菜館，我當然係鍾意食西餐多，西人嘛，但個個黎到美國都頂唔順，點都要食番中餐，噉我只好好無奈地一齊食啦。
一來鬼佬鍾意食啦，真係好鬼多外國人幫襯食中國菜，二來中國人好多黎到海外都係要食番家鄉野，真係好好搵架，睇睇今餐，七十幾蚊美金有六送一湯加無限白飯，超飽但貴左ｄ囉，相同價錢香港上酒樓可以豪多好多。食完梗係繼續濕瓶，七點半叫小二電召架的士，
「你地慢慢等都得！呢度ｄ的士係"always on the way"！有個客試過等九個字先有車！」
好好彩，我地遭遇同「果個客」一樣，七點半叫，八點三車先到，仲要本來一架大車分成兩架車變相搶多你一份車錢，咁鬼死辛苦，大家都只係為去下一站，商場九點鐘收，趕車趕到去已經只剩二十分鐘，我就唔明點解係都要趕。我唔明係好正常。因為跟住果站，係香港團的重點：二十分鐘狂掃牛仔褲。香港地買一條名牌牛仔褲，可以收你四五六七八百蚊，但呢度只係十幾蚊美金一條，三條先抵香港一條，真係黎美國走水貨都有得賺，所以次次黎美國，各位香港同事第一件事就係將一大堆尺碼同款號掟過黎。而我當然係唔Ｑ理。
「好得閒呀！我自己唔使買變形金剛咩！」
衫呢家野，我向來唔多使買，但掃衫我咩都唔掃，反而牌子同地方比其他團友更熟行，搞到個個都以為我係領隊。一個帶人買衫但自己唔買的領隊。臨走又係搭的士，係香港平時打死都唔搭就算返工遲到都算由佢點都唔多願豪搭的士，但美國真係視錢財如糞土地係唔係行步路都要搭的士 － 冇得揀嘛，當美國「幾步路」之距離已經等於兩三個字的士果時。有位團友係越南人，識越南話、識廣東話、識普通話、識英文、仲識法文，法文好似冇咩特別用處，點知黎到中南區呢度大派用場，因為呢度係窮區，南面ｄ島國黑人走晒上黎搵食，見親的士司機冇幾多個唔係黑色，而呢ｄ黑鬼地理原因好多都係講法文，好似今晚個的士司機海地人黎，團友用法文溝通，大家立即多好多野玩、講多好多野，知多好多野過癮好多之餘，亦唔怕人生路不熟俾人呃。十點幾返到酒店房，先睇睇戰利品：
．．．噉就訓左。今年真係好早訓，香港都未試過十點幾已經不醒人事，冇上年咁癲玩到好夜然後晨咁早四五點起身繼續。第二朝七點幾已經俾電話call醒，老闆娘香港打黎，冇辦法今次黎香港真係好忙，第一日剛剛跟住一個客，香港果邊又有大客要趕好晒ｄ報價同文件，呢次展覽真係好冇癮。起完個身，當然要食個靚早餐先啦。
「喂！唔係話早餐酒店包晒免費任食咩？」
「係！不過既然老細包晒條數，有得食點解唔食好ｄ？」
麵包、多士、生果同餐飲全部免費你點食食幾多任你，想食好少少咪上面噉囉，其實你俾錢只係買隻碗同隻碟。隻碗就係俾你食栗米片，俾足幾隻牌子奶都有普通同低脂你揀，但我地old-school自然係要食鮮奶沖家樂氏粟米片啦由細食到大。至於隻碟就好似Pizza Hut砌沙律（又係俱往矣），薯仔、香腸、煙肉同蛋由你點裝點砌，你堆到成座中銀咁高都冇人理你，食得幾多錢丫呢ｄ野豪俾你又點話，食完再裝無限復活加上野食唔係差（除左ｄ蛋唔知點解唔係鹹而係甜），食早餐都夠食到飽。上面見到果碟野，咁多朝黎講算少野架喇。最少好過上年朝朝早捱麥記先啦！今年係日日早餐自助餐，覺得自己好豪！
食完個自助餐走去開檔，先去貿發局度撻電腦上網，今年會場全部線都偷唔到冇得上網好冇癮，尤其是今次真係有野做再加唔方便，除非肯磅番幾舊水租條線啦，美國呢度就係豪起上黎可以好豪，但更多時間度到爆乜都講錢。第一日已經靜，第二日更靜，可以成個鐘頭一個人都冇經過，噉又好反正我都有野做，冇客黎可以開部腦靜靜慢慢做埋ｄ野。悶到出汁，老細都唔知走左去邊度，做野時播住陳奕迅隻《U87》聽，冇辦法我實在太懶部電腦個playlist同上年一樣，metal野呢種場合唔敢播啦，謝安琪夠喇舖頭都聽到飽，盧巧音同關心妍同樣聽得太多，《U87》反而少聽，其中一個原因，歌路真係唔多鍾意，隻碟上年俾人谷到幾勁幾高都好，唔係我杯茶真係冇計，玩野果幾首夠晒過癮，問題係始終要留番ｄ商業歌係度，全隻聽落去唔多順意。做完野聽完歌，貿發局ｄ人見我得閒無事走埋黎，
「同你影張相啦！」
繼上次會展同個客傾生意時俾人拍低之後，黎到美國都係搵我上鏡，次次展覽會我都有份，好快上貿發局個網，度度都見到我個（＿）樣。
又係食個大餐迎接新一天的時間。上年展覽其中一個遺憾，係冇機會食pizza，ｄpizza靚到仆但有得睇冇得食，今年幾大趙番個先 － 係呀係一個呀，12" pizza加超厚芝士同辣肉腸，我一個人食晒。好多？好少架咋，對劉Sir黎講！只不過好滯，因為ｄ芝士好Ｑ厚，個批唔係大但芝士都塞爆個胃。食到咁飽梗係要出去行下消化下啦，噉我當然唔會咁益智去睇人地同見下自己ｄ客，志在周圍拎野。呢ｄ展覽場合ｄ大公司當然唔會孤寒豪盡俾你又點話，有一檔有熊仔毛公仔任拎，拎到返黎立即俾隔籬檔ｄ靚女明搶左去，索性拉隊去再拎過，點知行行下有個黑鬼睇到鍾意，噉我又鍾意黑鬼（I love lower class!），咪送埋自己隻俾佢。結果自己都冇，連拎兩隻，之後經過個攤位都俾人小走。繼續周圍兜下，好在都有番樣紀念品：
拉完隊／帶完班姐姐去拎熊仔，返到自己檔口，咦？有個大客黎左喎原來！立即閃去隔籬果檔迴避！
「咁衰架你！大客黎喎！老細見緊你都唔幫手？」
「老細見近，唔好意思嘈住佢啦！佢見到我小又唔係唔小又唔係，一唔覺意講錯野，得失左個客冇左幾千萬生意點算？我走先啦！而家我去行商場，老細見完叫佢執好個檔之後拎我個袋去酒店等我！」
想知劉Sir玩到幾癲？呢家算好架喇，知道邊個係主邊個係賓。有ｄ公司到走果日都以為我先係老細我老細調番轉係我條靚呀！
跟住去番琴晚個商場繼續 － 以免引起誤會，先講清楚：雖然劉Sir大大聲，但最後都係肴晒底地，等到五點收檔之後先同香港團友一齊出發買野，某程度上劉Sir都係一個「專家」（呵呵呵）。先坐低food court，所以話中國菜當道，個food court十幾間野食，超過一半都係（扮）中國菜／亞洲菜，各位團友好開心因為老野始終要食中國菜，但我仍然唔係太接受鬼佬煮中餐我成日覺得噉樣係用黎呃鬼佬多，況且，都係果樣啦，西人食西餐嘛。
在座全部都係老細級，佢地有佢地吹水，我有我睇電視。睇到OK GO個MV "Do What You Want"。邊隊OK GO？好耐之前YouTube有段紅到爆燈、四條友係跑步機跳舞唱歌拍MV，果四條友就係OK GO，呢隊野ｄMV真係好鬼死好睇，就算唔識首歌齋睇都已經夠晒過癮，好似"Do What You Want"係玩顏色同雜技，上YouTube搵啦呢隊野ｄMV真係好好睇架。有條問題，想知答案好耐：
「OK GO，係咪就係跳CYNIC "Veil of Maya"果四條友？」」
食完個天仲好鬼死光，但睇睇錶，嘩七點幾八點原來已經，立即走去周圍行先。我地黎左全佛羅里達最大果間魔，佛羅里達魔（咁似哈里波德奸角ｄ名），美國一間超市已經等於香港一間超級廣場之兩三倍，而間魔有幾間超市，仲有更多大量其他舖頭，我只係行個商場一個圈睇睇有乜舖頭，未入舖頭睇，都逛左半個鐘。齋睇門口同櫥窗，都幾多野睇。
可惜乜都冇，間商場除左食野同賣衫多，game舖同玩具舖得幾間，係有野行只係時機唔好，撞正《蜘蛛俠》上畫，所以度度都係蜘蛛俠玩具，真係多到你唔信無論款還是量，如果遲一或者兩個月黎就好啦，到時到《變形金剛》上畫，就通街都會係變形金剛，肯定開心死，求祈搵間都會多過琴晚去果個"Transformers corner"，美國人搞宣傳真係好落本架。亦因為噉此行乜收穫都冇，「此行」包括今晚同今次美國行。等其他團友都行晒再買完衫，又係遊的士河時間。搭左咁多次的士，只得機場去酒店果程係白人仲要係個阿伯，白人始終覺得自己高人一等，低下工作好似的士司機同清潔全部黑鬼做，反而仲開心喎對住ｄ黑鬼。又經團友口法文同今次隻鬼溝通，呢隻鬼處女島黎，全程車就係大家係度發癲，差未癲到炒車，所以我鍾意同社會中下層人士相處，冇機心、好開放同好真，唔會下下計住你、硬係想搵你著數，見得黑人多，就會覺得白人／美國人好賤格。雖然呢度冇上年拉斯維加斯咁多野玩咁豪，但我鍾意今年，舒服無論人定環境，同埋舊區長大，冇辦法，都係呢種「爛爛地」的生活適合我。
雖然呢個地區咁多黑人，而佛羅里達正係盛產metal，點解冇乜metal band會見到有黑人成員？因為黑鬼都係鍾意hip-hop同reggae多ｄ。
九點幾返到酒店算好早喇，沖完個涼打多陣野聽陣歌，十點幾就訓著，起身已經第二朝七八點。時間真係點樣過左自己都唔知。三日展覽人數一日比一日少，最後一日直頭靜到接近冇人，我繼續留係個位度做野，同埋走去人地度搞事＆比人地過黎我地頭搞事／搞我。等極都係得小貓三四隻，只要撞到一個意大利客就夠：今日撞到個意大利人，吹開水先知道原來我而家公務用個名（劉Sir有好多花朵的），原來意大利文意思就係"meshuggah"。居然會搵個鍾意MESHUGGAH鍾意到著住件MESHUGGAH tee再紮多條辮連個名都叫到明「神經劉」的sales去sell佢，呢間公司真係黐Ｑ線，所以個意大利佬都頂唔順，旋閃。
改呢個名，純粹係因為冇英文名而工作有此需要，就求祈改左個「好metal」的英文名，點知求祈亂作都作得咁有意思，我同MESHUGGAH果真有緣。呢個無聊名又係經典作也。
臨尾一日係頹ｄ，煮野食果班都唔多願郁，冇幾多檔開之餘開果ｄ都慢慢黎，呢個粉我等左四個字先有得食，仲要係唔好食果隻送尾。本身塊雞扒個面係放左大大塊芝士再焗，就係因為咁靚今餐先至試雞扒，大佬如果肉波加塊雞扒噉拼法要加錢架！點知就係到我果時ｄ雞扒賣剩最後一盤，班友又趕收工，直頭焗都唔焗就噉一塊凍冰冰雞扒掟出黎就算，又唔熱又冇芝士，唔係後來收銀果個冇加到我錢真係唔Ｑ食好過。只係點唔好食都好都要食，因為跟住食飽ｄ，就要上路喇。每年展覽都係大陸十幾大箱野送到過黎美國，最後一日呢ｄ野當然唔會送番去大陸啦，叫工廠再造過一次分分鐘仲平過運費，噉點處理ｄ貨？上年有個傻佬擺低舊幾水美金成個攤位一次過買野，所以一夠鐘就走得人慳番唔少工夫。但前幾日同個客傾傾足兩日，傾到佢決定接收晒ｄ貨，問題係要包番好ｄ貨先可以寄出去俾個客，而「包番好ｄ貨」，自然係落係兩個人身上啦。即係黎果時將十幾箱野變成一個攤位，走果時將成個攤位還原番做十幾箱野，今年仲要得我加老細兩個人執，真係夠晒大整蠱，當其他香港公司夠鐘之後唔使一個鐘甚至半個鐘已經唔見晒人去晒行街的時候，我地兩條友早人一個鐘開始兩點鐘開始執，直執到七點半先執晒，包足五個半鐘，全香港甚至全亞洲最遲走就係我地，又要累晒街坊，因為場館ｄ工作人員都要等清晒場先走得，就係等我地。
「鬼叫你撞到劉Sir咩！有佢份都係冇好結果！」
噉樣連做五個半鐘已經好鬼支力，難得老細仲可以咁有精力話去行超市，噉我點都要跟住去架啦。
美國人生活十分幸福，朝九晚五就係朝九晚五，準時放工禮拜六日又唔使做，只係夜晚ｄ舖頭又係準時七點收晒，百無聊賴咪屋企好多野自己做番同自學好多野，例如鬥木，除左因為生活太得閒唔做呢ｄ野冇野做，仲因為屋企有咩要整車錢同人工費貴，與其係噉不如自己整番，消磨時間之餘又慳錢。就好似呢位阿叔：
香港人唔會明白呢種生活同文化架喇，你屋企個天花塌左、個水喉塞左、條水管爆左，你會自己整搞掂佢，定係call人幫襯？睇死你都係立即打電話俾師傅求救啦！（我都係！）一睇呢種地方就知道唔關劉Sir事啦，
「都冇玩具睇！都冇變形金剛！」
係老細黎睇同買野遮，我負責行行企企等食飯：
一間香港人開之「中餐館」，不過分兩半，一半係中菜自助餐，另一半係壽司吧，梗係食中菜部啦貪有得任食嘛，壽司都當係中國菜呃到鬼佬呃唔到我！承惠每人US$7.85，貴唔算貴黎左美國黎講呢餐算平添喇，只係話中式自助餐但唔知點解有好多西式送，而且ｄ野食．．．睇我拎左一次就收皮就知，連劉Sir都可以同你講：
「難食到嘔。」
全餐最好食，係免費任食果個"nuts"炸雲吞皮，話係伴碟用但伴碟果味反而係全餐館最好食果味。仲有水。呢間中國餐館不知為何請左個超超超靚的金髮美女做侍應，專責湛茶遞水。所以你見劉Sir去到乜都唔食，淨係係噉飲水。
食完又飛十幾廿蚊的士，住美國冇車會死同跛，or破產。今年非常遺憾，今晚做完展覽，聽朝早已經夠鐘上機，所以返到房執完行李立即撻低，真係好支力，同埋慘呀五點幾就要醒趕早機呀。六點半落到去食早餐同等的士，好得閒周圍走，當然唔可以忽略呢部機：
唔知在場有幾多人記得or見過呢部機，Area 51，當年一大槍game也，賣點係舊世代CG結合真人片段，同射爆喪屍時會出現不合理地多的血花同碎屍，其實好鬼樣衰，但正正係我鍾意九十年代初街機之原因，另一個案請睇真人快打系列，咁樣衰好正好有味道架而家玩番仲有點兒cult cult地！仲記得我係兒童場玩架，不過細個時打機唔叻同隻game本身難玩好快就死，隔左十幾年都仲俾我見得番即係唔話有緣都唔得啦。只係住左幾日都冇玩過，一舖兩個代幣，一個代幣一蚊美金，即係十六銀港紙先打得一舖，唔抵喎！係今朝無聊行行下，見到有人入左錢冇玩到，即係個天都叫我玩番舖先返香港啦我區區凡人又點可以違抗天條呢！
雖然有兩個credit，單打兩舖又得玩一舖雙槍雄又得，不過打完一舖就算，唔係因為難玩，而家打番除左平衡做得唔太好之外其實算好易玩，我可以話係第一次正式玩，都可以一野去到第二排，只不過一舖就算喇，唔關隻game事關枝槍事，好多槍game老化之後都有同一個問題，就係準星移位，玩果時成枝槍要向左傾斜四十五度先對得準正前面，game over中三槍都係支槍瞄極瞄唔到或者上唔到彈而死，如果枝槍唔壞的話會有心情玩多舖囉。玩果時無聊到拎部相機拍左個video，但同唔到大家分享劉Sir對外星喪屍的英勇雄姿，因為一take拍晒全程二排段片成百幾MB，我又唔識點樣整細同剪片，各位只好嘆句無緣啦。一係噉，你搵到香港邊度仲有得玩，請我去我live一次俾你睇囉，呵呵。
早餐食完機都打埋，架的士等極未到，唯有周圍影埋晒ｄ無聊相浪費時間。
回程唔係直接上機，而先去大會酒店join番大隊，然後一架大巴過機場。等左幾個字架的士都未到，在場有個機場接駁車司機都睇唔過眼，開自己架車接我地去酒店。何解咁主動？「睇唔過眼」，係次要。主因係反正佢都要由我間酒店兜番去機場，順路就做埋我地呢單生意，兩分鐘車，收八蚊美金。美國做司機真係好搵。
七點零現身酒店樓下，已經好多團友落左黎等緊，最重要梗係收皮自己唔好俾大會班工作人員見到先，搞到人地琴晚鬼死咁夜走，都係因為我地賴死唔走執到八點幾先散。為保人身安全，我唔太方便在場，
「老細你幫我頂住先啦！有人搵我叫佢地入你數得架喇，你話今次出差咩都開公數嘛！」
話大家七點半上車，大家經過幾日知道美國人工作態度，唔使劉Sir講都知架巴士實係遲到啦，冇野做期間各位團友係度玩同吹水大家鬥講鬥窒鬥串，又係唔使提啦，講窒講串呢家野全場都冇人夠我黎，各位團友遭到劉Sir的惡意中傷心靈受創，大家都（唔）明點解老細會請我。
不過劉Sir都唔開心得幾耐，因為搞完展覽即返香港唔算好多人，有更多完左之後留低玩夠先走，例如我隔籬檔成班女仔奧蘭多住多三日，一日去迪士尼樂園、一日去環球片場、一日行街shopping，我連環球片場咩樣都未見過就要走，灰到爆。八點幾去到機場，出關神快，入時乜都睇一餐，出時唔理你你帶成斤炸彈出去都唔Ｑ理你，仲叫你走快ｄ添唔好留係美國獻世。閘都入埋，
「弊！原來今舖我乜手信都冇買到！」
上年都話最後仲有一日周圍行有得買野，今年乜都冇買到，返到香港會俾人斬死架！但最後選擇，都係俾人斬，機場乜都貴到飛起加全部中國製造，一件國貨美國機場價同香港女人街價相差十倍，算啦同事們你地一人一刀斬Ｑ死我算啦。離起飛仲有兩個鐘，冇野做唯有坐係度怒訓，你都知劉Sir一訓就大劑架喇，幾乎訓到機都唔想上，上到機延遲多八個字先正式起飛正呀真係又有得再訓，飛到上天我隔籬仲要係個BB怒喊，冇所謂我一樣不醒人事嘈唔醒我，可能之前幾日訓得唔夠多，今程機反正大把時間係噉怒訓。一直到架機撞到氣流，每次入雲出雲都搖到仆拋上拋落，雖然都係訓度，但噉樣訓下醒下始終唔多開心，反正訓飽精神，睇睇窗外靚雲景好過啦。
噉樣掟上掟落，已經係今次旅行最驚險環節，可想而知幾悶呀今鑊美國之行。唯一可取係訓囉，我度度都訓到覺，只係屋企訓都冇今次咁好訓。
同黎果時一樣轉機得一個鐘，本身登機時間2:10，但起飛遲左大半個鐘，架機落地已經2:20，跟住成機人爭落機又用多三個字，
「會唔會又趕唔切，住多晚免費酒店住？」
「係就好呀！一場黎到紐約，都叫做可以去睇番場David Letterman！都未shopping夠！」
一出即飛奔，好在出境快好多，兩個字唔使已經坐到落第二班機個位，入境都咁有效率就好啦。坐到低又即訓番兩個鐘，除左因為支力，仲因為呢架機好灰。黎美國時睇戲睇到仆覺都唔訓，《魔盜王》加《魔戒三部曲》加《Harry Porter》全線根本睇到落機都睇唔晒，諗住回程可以再慢慢刨，點知今架機係舊款機，唔係成個database任你睇戲點歌，而係似番國泰之經驗，十幾個台固定播一set野不斷重播，更衰係每個台只播一套戲or幾套電視劇，冇得自己揀幾時播又冇暫停rewind fast forward灰到爆，冇乜心機當堂訓左先算。訓番兩三個鐘食飯先起身，lunch係西冷扒聽落好high，不過唔係太得，
「美航真係越搭越唔開心喎老細！下年一定要轉搭維珍！」
實在無聊得滯，食完飯冇野做研究自己個位，先知道原來美航有機打！雖然唔係咩正野，個控制器係好超任feel但點會咁high卡士丫，只係得ｄflash game級數之益智遊戲遮，只係訓又訓完食又食夠冇戲好睇，冇得揀啦點狗屎垃圾game都要打啦！"Invasion"簡單黎講就係烏蠅機改版，敵人多花款攻擊同陣勢都多變化之外，可以用戰機對扇吸子彈轉做能量，儲夠能量就可以出超必 － 所謂「超必」都只係射三叉彈、五叉彈同大粒ｄ子彈遮，我都想好似雷電噉成粒核彈掟過去呀。係我都知好無聊，冇野玩嘛無聊都要玩架啦！隻game超慢甚至衰過flash game，lag到爆果隻一面打一面死，後來俾我研究到點樣整到隻game唔lag，一樣係怒死，點解？難玩到飛起。全隻game六關，爆機之後仲有boss challenge mode三條命打晒六個boss，但冇可能玩到，因為單第二關大佬已經係屈機，去到第三關大佬直頭係戇居，係飛到正你前面之後機槍式狂射三叉彈避無可避，無數次第三關就game over玩到我都唔想玩，我仲要玩緊normal咋喎expert級都唔知點玩，太戇居了唯有放棄。打完又訓，勁訓果隻，再醒先過左半程機八個鐘，到「下午茶」時間。
「芝士漢堡！！！」
不得不大聲爆番句，下午茶係芝士漢堡加Haagen-Dazs雲呢拿雪糕，今次旅行唯一一次有encore就係呢餐，好大原因係為左杯雪糕，兩程美航機都只得下午茶叫做合格，特別係今餐，
「芝士漢堡！！！！！超好食！！！」
一面食一面睇《天行者》，就係07年頭上果套港產片，劇情講一個黑幫大佬入獄，出獄之後改邪歸正，但面對「一日係黑一世係黑」之難題。鄭伊健一向唔鍾意睇極都唔覺佢有咩演技，戲名又太似福音電影更冇興趣，但睇過先知道原來唔差喎套戲，而家港產片一係警匪黑幫動作一係愛情一係白痴，反而冇乜呢類題材電影，《天行者》我係近年幾鍾意之一套港產片，只係睇完都唔知戲名點解。但當年一樣冇去到戲院睇又係事後孔明，冇計，港產片我都想支持，只係太多未如人意之港產片（衰ｄ／坦白ｄ講係垃圾片）搞到對港產片整體之印象持續負面，到真係有好戲上果時都錯過左。食完睇完又係勁訓，一面訓一面聽RAM-ZET全線，追左佢地咁多年，追極聽極都未厭，太多大路band太多籠統band充斥，呢類冇人玩得佢玩、一個音你已經知道係佢地之奇怪樂隊先至有吸引力同襟聽，同類band只諗到PROJECT HATE，雖然PROJECT HATE我都鍾意，講成日聽都係RAM-ZET多，PROJECT HATE真係好有mood果時先會摷番出黎，佢地係勁同正，但係好惡啃，凡事都係popｄ好。部mp3機聽到冇電，轉聽飛機上面ｄ歌，音樂都分十幾廿個台由world到country到urban到ambient都有，但煲中文歌channel，因為個songlist好吸引：鄭融聽過都係跳舞歌，但機上plug果首《一分鐘漂亮》，係勁到爆的班底（Joey Tang加真係夾band出身之幕後功臣），真真正正rock彈晒solo果隻，就連歌詞都寫得好，講足球員球賽最後一分鐘都要全力踢出超水準之精神，歌同詞外邊都搵唔到，立即對鄭融產生興趣；都未夠楊乃文，隻新碟又係all-star幕後陳珊妮有份，機上就係播陳珊妮果首，一聽就知係出自佢手佢隻風格實在易認亦完全係我杯茶，同樣單靠一首歌，已經夠令我想搵番隻碟。另外繼泳兒之後，估唔到英皇仲有野提得起我興趣，就係Mandy+李勉朗cover《愛的故事上集》，兩個人唱歌以前冇細心聽過，就呢首歌亦唔係話唱得點好聽法，只係夾埋我覺得好聽聽得舒服就得，有時唔係一定要五粒星10/10一百分出晒名人人都聽個個都話好聽先值得去聽，聽歌係憑自己對耳去聽、自己鍾唔鍾意去判斷。有陳慧琳《你有事暪住我》，係新歌定舊歌首歌幾時派台都唔知，又係只知道一樣：
「我覺得好聽，我鍾意聽。」
隔左咁多年、經歷過咁多階段，香港女歌手之中我仍然好鍾意佢，把聲好靚、唱歌亦好有感情，唔係後來夾埋雷頌德變左"disco queen"（在PoS新碟出時提番起呢樣野真應景啊呵呵），我覺得我會一路鍾意甚至鍾意到追番佢全線架。有好多國語歌好勁，有首好實驗acid jazz feel，連個歌佬都要唱到成個黑鬼噉，不斷聽中文歌台重播除左捕楊乃汶+陳珊妮果首，仲因為呢首jazz野，衰在冇講到係咩歌查唔番，另外有個新加坡女新人，唱同歌又係殺晒。中國、台灣同新加坡而家流行音樂真係好勁，有ｄ超band sound，係結他勁恆、solo啡到飛晒天果隻，加上唱果個真係有料，香港流行曲拍埋人地度完全收晒皮：你叫而家ｄ歌唔好一係濫慘情一係R&B，同錄音時結他隻聲拆番ｄ加錄得出番ｄ先啦唔該，只係有ｄ難度，面對rock少少已經「太嘈」的妹妹仔群眾，幕後製作果班面對之掣肘實在太大。再訓過，預計抵港時間夜晚六點半，訓醒剛剛夠鐘落機仲早左四個字，加上香港機場超有效率，乜都唔使check掂行掂過，出到去呼吸番香港之空氣都未使六點半。我鍾意香港。換著係美國？四個字，都唔夠ｄ關員自己吹水啦！
美國tour噉就玩完。睇完遊記、睇過ｄ相，都知道悶到灰啦，又冇野玩，又冇野買，而且晚晚都咁早訓十一點唔夠已經唔見人，
「唔似劉Sir喎！」
查實做展覽係十分支力的一回事，做完再出街行更甚，上年都話每日做完先返房沖個涼再訓個零鐘先出去，今年日日都係一做完直落再行，辛苦得多。而且慘在今年程程機都係早機，有親飛機趕都要四五點起身好死頻撲，做完展覽又即早留多日都冇，今次美國之行真係得個做字完全冇癮冇意義。慘。
仲有一個啟示：黎到美國奧蘭多、夾埋三十幾家公司，全香港區英文最好、叫座力最高果個，係我；但同時職位同收入最低果個，亦係我。確係值得思考。
然後，一個冇預過會打通、通左亦冇諗過會有人聽之電話，通左，亦接左。結果今次美國之行回歸以後，只更亂。