Metal Night
在座各位好有幸，經歷得到呢個咁特別之日子，百年一遇之666。呢日係好邪的一天，三條六喎；呢日係好高興的一天，因為大家有騷睇；呢日亦係劉Sir好開心的一天，因為佢放半日假（．．．）。呢一日自然好多人出黎應節，相信會有勁多小說、唱片同電影會係呢日發行，例如大家都愛的SLAYER有National Day of Slayer，但唔係佢地搞而係佢地ｄ瘋狂fans搞，班友係瘋狂到要爭取呢一日成為公眾假期忝，癲到連SLAYER都話頂唔順，可惜本來SLAYER新碟"Christ Illusion"由原定之06.06.06延至七月底先出，呢個係一個唔完美的666。DEICIDE亦係呢一日將新碟sample放上網，但係就呢日出埋碟啦噉先夠deicide嘛。當然仲有《凶兆》，呢套咁邪的電影重拍版唔係咁邪的一日上畫點得？但最重要果樣當然係大家熱愛的metal show：
為左今日場騷，專登請半日假，但唔係為左場騷，純粹係等自己有個藉口
「咦？666喎！一個世紀一次喎！大日子大節日喎！冇理由唔放番日假先啦！」（．．．）
即係我都想放足全日，但近排忙，睇呢排個款請全日假朝早都一定要返黎做到十點幾十一點先走得唔化算，而且全日假都係留番搞大騷先放（即係可能唔使放）。之前一晚665，留係皆旺吹水吹到勁夜點幾先返到屋企，超極夜訓關係，今日唔係公司打電話黎，相信一定會訓到06:06:06pm先起身。接完電話見到九點半鐘即時彈起十點即返到公司，真係想比人炒咩！（講真，其實都幾想架！）之後忙足成朝。睇平時慣左準時走人的劉Sir都冇得一點即鬆，而要食住其他同事進貢／施捨ｄ飯（砌埋砌埋都成個飯盒），做到一點半先走得，就知道，日日返工唔做野的佢終於有報應喇。走人第一件事係上新世紀，去到剛剛好係《凶兆》開場兩個字前，排完隊買完飛入到去坐低剛剛好播片頭（嘩，分分鐘你入戲院睇戲最精彩就係呢part架喇，正場唔掂都有呢ｄ預告片補番數嘛！），順利到噉，真係魔鬼都叫我睇！好坦白講，對呢套戲興趣不大，大家都知劉Sir份人不嬲膚淺唔使用腦果ｄ佢先識睇（睇佢聽metal最緊要夠恆一咪死爆乜都唔使諗唔使理就知就知），呢ｄ要用腦諗果ｄ，坐左成場都冇反應＆唔識反應唔覺驚唔覺恐怖，會黎睇純粹應節，同埋追番呢齣經典睇睇。因為係Ｎ年前的經典，所以相當old-school，亦即係睇過鬼片咁多年的各位一面睇一面估到晒之後發生咩事劇情十分簡單，呢樣亦係興趣唔大的原因，亦係連原版都冇睇過的原因。噉又會黎睇呢個新版？？？
「應節嘛．．．」（．．．）
原版係咪好驚好恐怖我唔知，我只知道呢套戲對我黎講完全唔驚唔恐怖。同埋勁多唔明。好似冇乜詳細講解個影相佬咩來頭，點解會知咁多野咁猛料？點解魔鬼可以遙距殺人，可以殺晒所有想害死佢個仔ｄ人，但主角想殺死個仔時，唔一早隔空做低佢？（當然，咁早做低佢就冇戲做啦）
睇完就知道，點解美國咁邪惡。
睇完《凶兆》，出乎意料地，先去文具舖走一轉。上個月去美國時跌左支筆，返到黎香港一定要買番。但唔係咩貴筆，cheap仔用cheap筆，平野黎遮，三菱牌SN-80原子筆咋嘛。識得我耐的朋友，都知道我係最鍾意用呢隻原子筆，由中學用到大學用到畢業用到做野用到而家都係SN-80，因為成日借左比人之後唔還，想當年係買一盒十支裝之後個袋插滿成排筆點寫點有借冇還點唔見都唔驚冇得用，果時個個都識劉Sir就係因為呢樣（戇居）野。我絕對係呢隻原子筆代言人。雖然有好多筆都靚色過佢好寫過佢，但就係鍾意呢隻，因為好寫好轉，同埋慣左。
之後行幾步路落信和，因為謝安琪。今年過左半年，佢隻新EP《K sus2》係第一隻一出即想買之CD（metal野已經冇晒追潮追快之意欲了，舊野同買落果ｄ都聽唔晒），但今日先買，已經算遲喇。音樂未知點我真係佢一首新歌都未聽過，但謝安琪呢個名加埋佢後面個班底已經完全唔需要諗見有碟出已經即刻科水架喇，只係一條問題：
「EP黎咋喎，使唔使包裝到digibook咁靚？」（同埋個封面好死亡筆記哈哈哈）
仲有隻碟想搵，就係BULLET FOR MY VALENTINE，有一排超極勁紅metalcore果隊BULLET FOR MY VALENTINE － 何謂有一排？先一排係LAMB OF GOD，再一排係TRIVIUM，又一排係BULLET FOR MY VALENTINE，呢一排已經輪到MENDEED了。鍾意佢地唔係因為metalcore，唔係因為emo，唔係因為core，係因為夠老土，聽真ｄ就會明。Metalcore同我係冇乜緣份，但某幾類metalcore反而會鍾意，除左已經玩到超越左metalcore同post-hardcore果ｄ唔知算咩core之band（呢ｄ先係正野！），仲有好初期仲係扮緊瑞典melodic death果ｄmetalcore，雖然果ｄ"metalcore"得少少hardcore唱位同少少breakdown大體根本同melodic death冇乜大分別，甚至根本就係瑞典melodic death完全唔core，但果時未聽過melodic death的美國人唔知點稱呼呢ｄ野，就將呢ｄ玩歐洲野的美國band歸類為metalcore，而我就係鍾意呢種melodic death式metalcore／「雛型metalcore」，因為同一種音樂，歐美band之手法同旋律都好唔同，雖然美國melodic death/"metalcore"同瑞典melodic death極似，仍然可以帶出「另一種melodic death」之感覺。仲有一類metalcore，就係較多新band玩果種「復古metalcore」，走番以前thrash metal或者heavy metal路線但加番ｄ新派元素。所以我鍾意BULLET FOR MY VALENTINE。
所以我係好驚同好唔鍾意metalcore band簽大label變大路，因為好多主流化左、「響左朵」之metalcore band都係乜都靠晒breakdown，而越趨主流之metalcore，越鍾意玩節奏搞到唔夠力。睇AS I LAY DYING就知發生咩事：當年TRHK入佢地第一隻碟，係大家對美國metal之概念仍然處於nu-metal階段、metalcore呢種野仲未變成世界metal主流、metalcore呢個字仲未係香港流通流行，而呢隻第一隻碟，點聽都係melodic death，仲要係好激好恆果隻。隔左唔係好耐，亦即係全世界雜誌又好網頁又好你把口又好個個度度日日提住metalcore呢個年代，真真正正變左metalcore，係多chok而唔夠恆、同以前比差成截果隻真正metalcore。LAMB OF GOD亦係衰同一樣野。但眼見，好多metalcore新舊band都開始脫離呢個得個chok字的階段，慢慢返返tharsh/heavy之正軌，相信黎緊會有唔少新metalcore band同舊metalcore band新碟我會鍾意。
行完旺角買完野轉地鐵過灣仔，過到黎先五點幾。上次DISAVOWED一落地鐵即過酒吧，都唔算正式行灣仔，噉正式行灣仔係幾時之事？我都諗唔起。太耐冇黎過呢邊行，落左車係地鐵站已經盪失路，出左站再盪失多次路，超級樣衰。行左好多地方（某程度上係因為唔識行亂走），行番去當年實習間學校，對面係哈迪斯，好耐未見過呢間野喇，入去坐低食個餐，諗下野回憶一下。噉就過左幾年。再過Rock Gallery同188，真係唔知幾多年冇黎過喇，但都係行行就走，而家已經冇乜心機行CD舖搵碟聽。原因大家都知：
「執碟都執晒TRHKｄ死貨先啦！執極都有得執！聽極都聽唔晒！」
兜多輪，起行。今日勁多電話：
「你到左未？係咪已經係果度？」
當然未，使乜咁早到？雖然宣傳係一場「騷」，但實際上，呢場唔係一場騷，而係一個party，即係幾隊band上台喜喜哈哈噉就一晚，只不過後來大家對呢個"party"太過認真，ｄband就認認真真地練歌當騷噉出。有呢場騷，係因為上次DISAVOWED Live之後，NANAHARA SHVYA個鼓手Pranjal話
「掂呀！Soni！一定要搞多場騷！」（冇錯，唔好睇佢叉樣，佢係識講中文的）
「點搞呀！邊有咁多錢？？？」
「搞呀！一定要搞呀！666呀！！！」
「係喎！666喎！要搞要搞！」
即搵埋Star Crossed Tattoo對紋身夫妻幫拖 － 有去場騷都會見到，就係必定著住MISFITS tee全身紋到黐晒線果兩公婆，雖然佢地係開紋身店，但對音樂之投入同支持絕對超過好多人，會去好多本地band騷亦支持搞騷，呢場666張poster都係佢地設計，大力幫手宣傳更加唔使講。大家過隔籬搞live搞左好多年之The Wanch借場，人地又肯借喎！再極速搵band，搞掂。基本上DISAVOWED Show完左，666 Show已經準備好大半，加埋細場仔酒吧場，ｄ野一早係晒度唔使set野又冇特別野安排（party嘛唔係騷嘛），使乜咁心急咁早到？所以行到吉時先入去：
呢一晚，成間The Wanch包晒。呢個場第一次黎，黎到就知今舖大劑，個場超細，肯定唔夠位，睇七點已經滿左半場，過多陣已經爆晒全場要提早三個字七點三開騷，開始玩果時出面仲有好多人圍觀兼人數不斷增加，就知道呢場騷真係好多人！星期二晚唔係禮拜六日，又冇外國band，又撞考試，起初絕對冇諗過會有咁多人，點知真係黎左百幾二百人，呢個場完全唔夠大，但有乜計，唔係細場，邊個會無端端唔收錢借個場出黎俾你？
HERMETIC SILENCE
DYING PROCESS玩左半set，出面已經圍左好多人，聲就一定夠大聲架喇外面實聽到，入唔到黎隔住窗口都叫做有得睇。實在好逼，所以行出去外面鬆一鬆，不過出去都係一ｄ都唔易：
出黎兜個圈撩下人吹下水，再行側門走番入去酒吧，直入到最後廁所位：
行到咁後，果然靚聲到爆。雖然睇騷越前越好，但查實企到最前，睇係好睇，對到正ｄamp聲反而唔靚，場中場後位所有喇叭ｄ聲出晒撞好合埋晒，先係最靚聲位置，所以你見我永遠睇騷都唔會走到咁前，而揀中後位，好聽嘛。上個月望完今個月再睇多次，以前冇乜機會睇HERMETIC SILENCE，今年一個月有得睇兩次，正！因為走出又走入再走黎走去又飲野，都冇乜留心玩乜歌同玩成點，最happy當然係SLAYER medley啦（如果你係睇完佢地玩呢首medley都唔知佢地玩乜，就應該花花心機時間補一補喇，metal並唔係只係得最新最潮先聽得過），冇留神但聽得出一直進步，特別係歌佬呢兩場唱得比以前好左，再練好成場keep得住狀態同咬字清楚ｄ更好。較唔鍾意係第二首歌，一聽就知道係舊歌因為無論riff定歌都直去簡單好多亦冇咁技術化，同較新ｄ歌比較悶好多，但新寫ｄ歌無論技術定氣氛都大幅改進，但始終差一樣野，亦係成日聽到其他人對HS之評價：
「快位似CRYPTOPSY，慢位似SUFFOCATION。」
技術其實已經好勁，問題就係呢樣：一面聽，一面諗番起其他band，亦即係未有自己style。亦可以話，而家聽HS，聽技術之成份高於聽歌之成份。但技術可以練，造出新風格確係難幾萬倍，來日方長，希望有一日真係可以聽到完全屬於HERMETIC SILENCE之death metal金曲。
當然，呢一次live大家最高興的當然是：
「今次終於講中文喇！」
BEREAVEMENT
HERMETIC SILENCE玩完之後，走左一班人，入黎更大班人。轉移到去吧檯前面場中間位置睇，同埋比傳說中的魔神丁丁丁丁丁丁丁丁搞。
有邊次睇BEREAVEMENT會失望？（「冇得睇BEREAVEMENT果次囉．．．」）睇佢地之機會比睇HS更少，今場對我＆好多人黎講，黎呢場騷都係專誠睇佢地。
除左根本冇得同THE ETERNAL呢ｄ國際級數樂隊比較之King Eternal Live，每一次BEREAVEMENT都係全場騷最靚聲果一隊，歌佬功力絕對一流，可惜都有一個問題：個鼓太爆。因為HERMETIC SILENCE同BEREAVEMENT鼓手係同一人，或者剛剛玩完HS手brutal death太high，黎到BEREAVEMENT玩doom無論力水定fill-in都爆到九彩，如果呢兩方面控制番好ｄ協調番音樂整體效果好得多，因為好多時鼓聲遮左結他聲，又或者ｄ花好激動，破壞左個氣氛。呢場都係玩舊歌全部doom野，我更想聽聽新果ｄpost-rock野，不過乜都夠啦，舊歌都夠殺晒啦！聽／睇過咁多次再聽／睇依然回味無窮。但有條問題：
「之後會變成點？doom metal？post-rock？post-doom？」
上次DISAVOWED佢地係第一隊開場，果時反應偏向負面。或者因為好少鬼？今次放最後，諗住一定唔會有人睇，點知BEREAVEMENT完左之後唔係鳥獸散仲係成村人留係度，兼要多左ｄ鬼同埋hardcore友，跟住一開波前面半個場已經撞到九彩，好似全場都睇過佢地出騷聽過佢地ｄ歌好耐噉！點解會咁得意？或者因為好多鬼？
最後玩左九個字，算短架喇，佢地最長果場live試過玩左兩個鐘！但好坦白講，佢地ｄ歌其實十分模式化，就算forever & ever地重覆同一首歌重覆足幾個鐘你都唔會知！因為支咪壞左，最後成場完左都冇人宣佈，大家見冇料到，黎得快，走得更快。七點三玩到十點三，三個鐘，抵！就算要俾錢買飛都抵睇！齋睇BEREAVEMENT同NANAHARA SHVYA都賺番晒！
返到屋企，聽住關心妍新碟同謝安琪新碟（呢隻碟封面同寫真真係意想不到地靚，有ｄ後悔冇拎到果張超靚超巨型海報忝），又係寫野時間。一個月內睇左兩場metal show，有捧晒兩場的朋友，都會睇得出，而家香港metal band技術甚至音樂已經達到唔低之水平，同時資歷唔淺，玩左咁多年絕對已經有足夠歌存貨，出＆搞過騷亦唔少，相信錄音技術、知識甚至器材亦唔會過於缺乏，但香港metal band硬係唔會出碟。唔計大路果ｄmetal band，除左十幾年前香港thrash metal傳奇，亦係TRHK創立人Soni隊band AZYLUM出過一隻碟"Are We Born To Suffer"，四年前BLACKWINE出一隻追夢，同埋近年HYPONIC活躍出碟，仲有冇其他(extreme) metal band出過碟？Demo會有唔少，但正式錄好歌出碟，實在係半隻手數得晒，尤其是近年，真係只諗到BLACKWINE同HYPONIC一隊會出碟，仲要只有HYPONIC係真正有心持續創作出碟。睇番hardcore/metalcore，係出碟方面踴躍好多，可以見到已經有唔少core band出到EP或者大碟，出左，起碼會多左人注意到自己，某程度上亦推動到成隊樂隊再進一步繼續向前行。既然水平夠，點解仲唔出碟而繼續拖落去？只係一味寫歌出騷唔落本出碟，本來已經有限之發展空間只會變得更細，尤其是香港metal band出騷之機會已經少；諗住淨係一堆歌／幾首歌玩過世，就更加負面．．．
好多人都投訴，個場太逼、太焗、太熱。呢一點絕對認同。起初就係見得香港band又要星期二晚跟住星期三唔係假期大家都要返工返學，確係失策冇預過真係有咁多人黎睇，如果知道反應會咁好，籌備果時一定會搵個大場，空間大ｄ地方亦舒服ｄ。之不過，係咪真係咁容易搵場地搞騷呢？呢場騷比預期中多更多人，最大原因絕對係免費。你有幾可睇過免費metal show？免費band show都唔係多啦。呢場騷可以免費，就係因為個場唔係租，而係借，免左租金先至可以唔收入場費。問題係酒吧都要做生意，點會無端白事唔使錢俾個場你任玩？會借個場出黎都係因為投機心態：既然有騷，冇百幾二百人，都會有幾十人黎卦？當有一百人，每人買一杯野飲，都有三四千生意。亦因為顧及好多朋友覺得「酒吧飲野貴」呢場騷同上次DISAVOWED一樣，係爭取到各式飲料折扣優惠，進一步減輕各位之負擔。當然你會問：
「喂！又話免費騷？而家要我入去買野飲，咪即係唔係免費？」
一向酒吧騷之不成文規定都係免收場費的話，起碼都要買番杯野飲向酒吧老細交代，就係因為之前提過之免費借場雙方互惠互利情況，但話就話有呢條規矩，其實好擔心冇人會噉做，同時相信呢一場騷好多人都係未夠秤或者好少去酒吧睇騷，所以後來都要特別講講呢個酒吧騷不成文規矩：入場係免費，但都希望大家入到去每人最少買一杯野飲幫幫酒吧做個交代，今次酒吧搞騷賺到錢，第時自然會再借場出黎。結果，唔使我講，你問下自己有冇買過野飲 － 一杯都好 － 就知。所以呢場騷搞到酒吧老細非常唔鍾意。黎睇最少一半人係未夠秤，即係一定唔會買酒飲，唔飲酒唔緊要，仲有其他野飲，例如汽水同果汁。話貴的話，本來要三四十蚊一支／一杯，而家講價到廿幾三十咋喎，橙汁一杯只係廿五蚊，仲想點？本地騷起碼都要四五十蚊張飛啦大佬！而家當三十一張都算平喇卦？仲要包多杯野飲唔係咩都冇喎！或者就係因為「飛」同「免費騷」呢個觀念，令好多人真係覺得呢場騷係可以一蚊都唔使俾，就算要俾都唔需要俾：唔係強迫買飛，係叫你買野飲咋嘛！入左場就算唔買都吹你唔脹！係到最後極力勸籲先叫做多ｄ人幫襯買野飲，但都係只得少數人，大部份真係買野飲都係鬼佬，而唔係本地人。各位參加者會自律自動自覺有權利亦都要有義務呢樣野，似乎香港都係行唔通，所以你會見到我唔飲酒都不斷買橙汁飲，唯有自己盡量去補鑊囉。玩左成晚睇左一晚，睇呢場騷睇得好開心的你，唔會知道奉旨當正唔使付出有騷睇的心態，令呢場騷搞到酒吧老細幾唔滿意，因為借成個場出黎仲要野飲有折，成個場滿晒人，生意額都可以差過平日最淡一晚，搞到人地覺得借個場出黎係白借；更加唔會知道，因為開場騷好耐酒吧都係冇生意，個個人真係擺到明只係黎睇騷完全唔幫襯，係幾乎搞到要cut show收場，好在最後冇噉做，但間吧都熄晒風扇熄晒冷氣，呢個先係令各位投訴的原因：個場咁熱咁焗，唔係因為多人，一開場時已經爆滿啦果時完全冇人覺得有問題喎，係到後來大家搞到酒吧都唔開冷氣連風扇都唔開，先會搞到噉收場。你都唔係幫襯，酒吧老細點會對你咁好？似乎要再搞多場免費酒吧騷，都好難。如果你問：
「下一場免費metal show係幾時？」
我可以答你：
「可見之將來，我都見唔到有。」
因為大家之心態都未達到果個水平。真係未到。如果可以再搞到，當然會試，但相信以後ｄ騷，更大機會係變番收錢買飛入場，收三四十蚊張飛俾番酒吧都好，或者係一張飛包杯野飲，噉先可以再搵到酒吧搞騷。只希望到時唔會有人出黎大大聲：
「又要收錢先有騷睇？商業！要我俾錢睇騷？唔睇！」