彌敦道間The Live House經過就成日經，但落去呢今晚先第一次，即係場show掛住Heavy個名我就有興趣黎。其實本身只係第三選，原來打算睇蒲吧Long Revolution或者盧凱彤，畢竟唔慣太夜返屋企，十點先開一兩點至完真係唔多掂，不過屋企上網死左要等師傅夜晚上黎整，搞掂唔使煩睇邊場啦搞得黎得返一個選擇。但係，都唔錯。係爆筆直嗟。

Follow My Voice

http://www.facebook.com/followmyvoicehk

會黎，主要因為睇二寶樂極力推介極度好評講到唔睇好大損失的Follow My Voice。場地音響都幾唔掂，所以一開波頭半首聲炒band甩好在跟住執得返晒。

玩同台風都齊所以好睇，鼓佬節奏同鼓花諗得特別，唔會聽完只會得句「咪又係果Ｄ」有自己一套。歌唔點複雜寫得幾好，我麻麻地metalcore但呢種而家好難搵到、簡單直接偏爛得黎唔太旋律化唔一味breakdown的初期地下路線metalcore好受，係印象中有幾個位轉得較突然唔多順，同歌妹清聲太硬冇乜感情，好似為變化為清聲而攝落去就算。

第一次睇印象唔錯，但係玩得四五首少得滯，幾時再有show出先？

Screamhard

http://www.facebook.com/pages/ScreamHard/256452754391765

話玩new punk metal，實際上已經係crust，成隊都喪跳到撞到轉到揈到，笑到我，所以雖然中間玩到有枝結他冇左聲（音響咁殘仲玩到咁爆，乜喇叭都死啦），冇問題佢地係就算你聽唔聲齋用對眼都已經充滿娛樂性的過癮樂隊。一定要再睇，但下次睇個地方一定要有個大台先得。

Weeper

http://www.facebook.com/dontfeartheweeper

向來唔多鍾意聽hardcore，覺得太簡單太單調好悶，好在Weeper走返punk底編曲多野玩結他同bass都有solo，簡單得黎唔太悶（總有時會，因為一定好多時候直線死衝），不過歌都幾短，人地玩四五首就完，佢地好似玩極都仲有死唔斷氣，立即覺得好抵睇。

其中一個感想係，八線結他開始普及了。

烏托邦 Utopian

http://www.facebook.com/Utopianhk

我認我對壓軸的佢地好大興趣，因為有Choco結他妹份，但音樂是正的，玩九幾式alternative metal，我第一次聽佢地都覺得唔錯，係差一樣：唱。九幾rock/metal其中一樣臭名遠播就係唱，清聲同拆聲十個歌手九個係都要唱到好emo好造作，而Utopian，我只有話每次歌佬一開拆聲立即收我皮 。其實佢把清聲冇咩問題，如果全首歌／全部歌都唔嘔用晒清聲唱，我會受好多。

今晚落一次，就明白點解雖然旺角咁近，我而家先至第一次黎睇show。一來作為酒吧live house，有show基本上實係夜一夜先開玩到凌晨至完場，好似今晚睇完即走衝去巴士站，先趕到一點埋站班尾班巴士，而我最唔慣就係鬼死咁夜返屋企，仲要趕頭趕命追車返。二來，雖然已有心理準備，音響都係唔掂，其中一邊結他聲好似聽緊超任時代16-bit chiptune，Weeper拎枝八線出黎再推到沙沙聲，全晚隊隊都咁爆，好擔心推爆喇叭，個場真係唔太適合玩到咁恆。

而最大問題，當然係貴啦！酒吧show一舊水張飛唔叫貴，但包多杯野飲都好丫，坐兩個幾鐘又好難唔飲下野，而雖身為半個band仔我由細到大都唔煙唔酒，呢樣野落到酒吧俾人笑過無數次，今晚廢事又飲橙汁咁樣衰，結果點左杯Oreo朱古力奶，收五十蚊杯半分鐘飲晒仲要唔好飲果隻。所以，問我幾時會係下一次再落Live House睇show，真係答你唔到，睇睇幾時有無敵lineup先啦。