我鍾意睇報紙 － $6大大疊夠你睇個幾鐘果隻，唔係唔使錢的通街版派版網上版 － 除左內容豐富仲為左睇廣告。雖然香港電視廣告一早退晒步妤悶，平面廣告依然好睇，往往玩野得多之餘多囡（口桀口桀），同好多大小活動仍然以報紙廣告做主要宣傳渠道，正如上次《太極》二部曲新光戲院連環播全靠報紙報紙廣告話我知，對我呢種足不出戶又懶上網吸收最新資訊的毒撚黎講，唔睇報紙真係好多野都唔知會發生。今次就到《打轉教室》，十二月底重演幾日前先由報紙知道，立即去買飛都仲俾我買到上層平飛區最後一個靚位。點知．．．

雖然耐唔耐過會展做野，正正隔籬的藝術中心反而今次先第二次入，對上一次已經係七年前「假音人之陳浩峰Ｋ唱會」你話幾耐世紀，當時仲有89268這回事，而家當然唔見晒啦，就同TRHK一樣R.I.P.。咁少入藝術中心咪代表劉Sir份人冇乜文化同藝術囉，而會睇《打轉教室》正因係一部雅俗共賞的動作舞台喜劇，既然劉Sir連睇戲都只睇由頭打到落尾唔使用腦騎騎笑就最好果隻對白講多句都嫌悶，叫得動作喜劇就知一定掂啦。

賣點係零對白，或者話好似The Sims講另一個世界語言，以跳晒舞唱晒歌打晒鼓甚至打晒交為主，講一個放學後三男一女一miss共處一個班房的留堂故事，睇晏晝場望住課室個鐘四點幾玩到五點幾夠晒真實同投入。題材絕對令你諗返起自己讀書時的那些年，留堂時發生的各種大小事，罰炒、圍埋玩、搞事搞破壞、群毆、媾女、俾miss鬧／打，演得夠精警同好笑，冇對白你都睇得明先好野，睇過先知原來鄭麗紗除左搶包山仲識得做戲，同個個演員都臥虎藏龍食過夜粥，跳舞得扮Michael Jackson得耍功夫得乜都得。雖然只長個幾鐘，情節多黎得好密集轉折又順，只係鄭麗莎部份表演同舞蹈加插得太刻意同學生線唔太配合，冇緊要啦無傷大雅黎睇得好開心。

場景道具要求都唔大，真係去到邊度都玩到，加上全靠肢體語言人人都識睇識笑，難怪可以香港打到去外國再打返返香港年底加場。買飛時買樓上$180，最後一個位第一行近中間，非常靚。但黎到時話有得升級可以坐樓下$250區，不過唔好開心住坐到尾二一行最右角位，有段鄭麗紗爬牆戲剛剛好俾前面樓梯擋住乜都睇唔到十分無奈。不過套戲咁好睇相信黎緊會再重演而到時我都會再睇一次，下次睇買左邊或上面由另一個角度欣賞先得。

「題外話：其實本身打算好似早前SIU2『超聲速漫遊 Sonic Travelogue』一樣回顧之餘順便答埋問卷調查，點知返到屋企先發現場刊入面張張紙都冇跌偏偏跌左張問卷唔知題目。有關人士見到的話，我當答左問卷架喇。」

素來最憎搭地鐵，好在灣仔有101直到Hidden Agenda，搭地鐵就慘啦又貴又迫又要轉車出左閘又要行大段路仲要落咁大雨淋餐死。八點半入到場都覺得有點遲，因為上幾場metal gig入座率都叫理想，今晚話晒有非常難得的black metal band，係唔及上次Dark Funeral咁大牌都叫向來多人支持的大陸band丫，點知入到場，場面真係可以用淒涼去形容。

Synergy：第三次睇加第二次HA睇，今次都算最唔得掂一次，可能因為身為band show多數做音響炮灰負責幫人試聲的第一隊，又可能始終三場panel推聲師傅都唔同，好多時候好拆好爆，樂器間唔夠分明。樂隊又好似狀態唔多好，呀歌手其實有時唔使唱時自己柄埋一邊唔係壞事黎的，好過結他佬solo緊時企台中間側身望住佢，好似自己band房綵緊排噉多過表演呀。或者等一月果場，轉轉環境會係好事。

「話時話Davey哥，你對boot著得好鬼死港女。」

Black Night Red Sky：今次表演同音響都好過上星期Masquerader，雖然八線結他真係好拆，本身企前排左邊，歌佬一唱唔掂要立即閃返去後排。《Partition（定Perdition？）》同《Sorrow》依然好正，特別《Sorrow》只係中間段靜位插得好怪，第二次聽仍然一入就以為轉左另一首歌歌，不過希望第時寫歌可以寫更多呢類post位，鍾意Black Night Red Sky一點係好多呢種Meshuggah式tremolo清聲撞power chord。又回歸到原點：出場前正正播住Animals as Leaders。香港會唔會終於有日唔再一味衝breakdown有人djent得起，玩Animals as Leaders之類技術野呢？（相信冇乜機會，djent一直未能成主流弊在器材、電腦同技術要求都好高，簡單黎講要錢同時間，兩樣野香港band仔出名少到差唔多冇）

第二次睇完，覺得樂隊差在一樣：鼓佬只得紮實，唔夠變化。因為呢類音樂結他節奏部份太偏向切分音，往往靠鼓手用較多cymbal/tom fill修飾，每一次都係由高roll到低，只會搞到整體非常悶局。

黑色祈禱：可能真係太少機會睇black metal band，冇諗過仲有樂隊會咁熱心化妝出場，而家見到呢種傳統反而會驚奇。老實頭兩首歌真係唔多知做乜，幾種唔同風格砌埋一齊又唔多順，第二首臨尾仲要有段chok chok chok相當無奈，似足二線melodic black metal band玩法。好在第三首開始黎料，除左中間一段播條超長鋼琴sampling又接唔到之後首歌唔知做乜（結果台下變左飲酒位廁所位吹水位），黑色祈禱玩得出真正old-school black metal種氣氛，鍾意結他佬好簡單但非常好聽的melodic lead，最後仲cover Mayhem《Freezing Moon》。雖然個頭開得麻麻、中間彈琴實在多此一舉、後半鼓佬blast得太盡打到有點震震地，今場睇得好high，當metal gig多返，而家仍然好難得睇到black metal band表演。

可惜現實係show好睇band玩得好一回事，前面都提到場面相當淒源。既上個星期剛剛台灣Masquerader玩完，食住個勢一個禮拜後再黎多隊大陸仲要black metal咁罕有，點知入場時場內有冇十個人都成問題，玩到完場先得四十人左右，仲要中間係班著到似去rave party多過睇metal gig的鬼仔鬼妹，睇佢地fing爆自製moshpit係好正的，成班囡狂搖狂撞喎！但為數唔少的佢地同場show格調唔多夾，減埋佢地又少四分一真係有好過冇。你可以話太趕，開前兩個禮拜先公佈，連飛都冇印宣傳又點夠時間？又或者真係因為同一晚撞幾場，包括同臨封盤的蒲吧道別之大堆頭band show？定還是，black metal真係咁冇市場？想當年Cradle of Borgir令「我聽black metal」成為香港band友metal友的型爆身份象徵，雖則當中好多「black metal友」會話「Darkthrone Mayhem好難聽我唔鍾意」。睇黎(black) metal，同之前提到的djent一樣，一切還需依附時局而生。