2008 Retrophrenia: Chinese General VIII

2008 Retrophrenia
Metal, Music, Merchantry

Chinese General VIII
VEGA《The VEGA》

「古典好玩，不過同rock一樣又係好難玩得起」

Pre:	2008 Retrophrenia The Provenance	Post:
Chinese General VII Beneath Beyond	2008 Retrophrenia The Provenance	Chinese General IX Ban Ban All-Star

2008年本地流行界最過癮，係VEGA。這裏用「過癮」，未必人人認同：音樂或表演過癮好玩，有更多其他選擇，我所指之「過癮」，係明知本地市場唔會制唔會受，仲毅然去馬燒錢。VEGA拆番開，一個字母一個人，二男二女用古典四重唱方式cover中文歌，出左隻碟《The VEGA》。唔知道、唔識，好正常；識得知道果班，通常反應亦是「正常」：

「嘩！好難聽呀！」

其實香港人好鍾意古典音樂。典型港式流行曲就係後面隊band除左鼓其他唔重要，跟住結他同歌手中間塞爆交響keyboard；港樂live場場爆滿；歌手「上殿堂」之一步，必定包括出一隻發燒碟，古典排場越大越好；當有歌手crossover主流著名古典樂手，又或改編名曲時，未聽歌已經話勁，同往往成為大熱。可惜，唔先經過「流行化」，正正經經玩古典音樂果陣，反而冇乜人肯接受，所以一聽到女歌手超高音玩花腔、男歌手莫華倫腔唱中文，聽慣流行歌同K歌，相信冇幾多個一聽覺得順耳，加上真係用黎聽而唔係用黎唱（根本唱唔到），市場更細，難免第一句爆出黎就如上面。我唔會話所有過失歸因香港人視野狹窄，公道一點，VEGA本身確存不足，女高音相信大把人唔鍾意因為太尖，男聲用平常聲唱果位運氣同咬字又脫離唔到古典派用力過度，有時甚至顯得造作，似乎只有唱中部位女聲我唔會批評。假如男聲用簡簡單單張崇兄弟式二重唱，而唔係莫華倫搭孫耀威，必定更多人接受得到。但噉，又何古典之有？

顧及本地市場同觀眾口味／接受力，全碟只得一首原創歌加一首英文歌，其餘全屬大家耳熟能詳新舊中文金曲。有四位主唱即音域同聲部比一般流行曲廣闊複雜，但編曲有時野心大左少少，亂過頭加幾把聲鬥撞，好聽有《明星》、《與我常在》、《小城大事》、《夕陽無限好》，始終呢類歌本身張力較大歌曲較適合古典化，其他歌有時太吵有時太怪。臨尾《唯獨你是不可取》先玩番老本行a cappella，撈埋《Canon》一齊玩幾得意，多重唱優勢正是此。

「四川賑災曲《承諾》搵佢地玩a cappella，係編曲最成功之一。點解隻碟只得一首噉玩？」

想知歌手同製作人實力，要聽唯一原創曲《快樂無罪》，玩開心玩音樂劇，香港流行樂壇正正欠缺呢種歌，成日要灰同R&B，好快冇癮又唔健康。雖然聲唔夠靚、唱功非超強、編曲亦間中有瑕疵，個人幾鍾意隻碟，因為幾首好歌吸引力足，《與我常在》同《小城大事》兩首重播極我都唔厭。仲有欣賞敢在香港燒錢嘗新之勇氣。資料顯示，VEGA出得到黎，係唔記得邊個猛料製作人投資，相信佢出碟時預左噉玩法、香港地出一隻唔K又唔發燒的中文碟蝕硬，但主流實在太小空間俾幕後人發揮，唯有如此獨立製作先可能盡情抒發，所以每每屬幕後人自資出或為主之作，我都會特別留意，呢ｄ先有野聽，可惜亦少。

「有幾多個余力機構丫／余力機構都難以為繼啦。」

跟住落去－假如落到去－點玩又係難題。唔少實力路線歌手會選擇第一隻碟以cover舊歌經典為主，唔止市場有保證，仲因重唱俾人感覺發燒、比一般流行作品高層次，好似衛蘭第一隻碟《Day & Night》擺明jazz唱黎明。需要考慮過左第一隻碟，成功到的話，係繼續cover、高檔落去，好似張崇兄弟？定還是似衛蘭，第一隻碟好正，但第二隻碟起「走自己路」，立即唔多需要理？坦白講，兩條路都難行，而VEGA本身連唱都「好難聽」，分分鐘揀行邊條路個機會都冇。有料到、有勇氣，在香港是冇用的。香港人要唔係要實力同質素，係朵，同型，同潮。

「請睇睇五年前CHEERS。《十年約會》聽左咁多年，到而家仲咁鍾意，但歌不復見，人已不在。香港音樂條路始終太窄。」

Pre:	2008 Retrophrenia The Provenance	Post:
Chinese General VII Beneath Beyond	2008 Retrophrenia The Provenance	Chinese General IX Ban Ban All-Star

劉Sir個網
lau-sir.com

劉Sir個blog
http://hk.myblog.yahoo.com/lausirisual