相信各位香港獨立樂迷，生活上皆遇著相同情況，就係工作及生活環境中往往欠缺知音，返學、返工，成班成校成公司得自己一個聽果種音樂，其他人一係唔聽歌，聽都只聽K爆中文歌，典型例子有我公司，除左當打唱片公司勁曲中文歌同外國歌，其餘所有野一概不聽。好多人覺得好冇癮，但識善用都唔錯，尤其我呢種人平日上網搵新歌新band都懶完全與時代脫節，間唔中謙卑一點問問近來有乜歌好聽時有驚喜。李卓庭就係公司會計靚女介紹，一次走埋黎話「呢條女好rock」，聽過，掂喎，聽下聽下仲做埋近年我最喜愛本地女新人，超過實力超群的G.E.M.。rock是最大理由。

未必好多人認得佢，包括我，相當遺憾，所以講番我聽佢原來07年拎過女新人金獎，同已經出到第二隻碟，好難唔窒一窒，因為唱得好掂喎！唔識佢舊碟，不過間唔中大家之間潮潮、電台播播、網上講講，原來上隻碟無意中已經聽過，幾首主打如《手槍與紅玫瑰》、《地獄少女》印象尤新，可惜缺乏傳媒支持，同我懶（．．．），之後冇特別留神去搵，成為記憶中「好似有個女歌手唔錯喎丫又醒唔起邊個」的甲乙丙君，到08一連兩個MV《失眠幻想曲》＋《工作狂人》勁rock，電視台賣埋廣告，加上同事吹噓一番，試過真係掂。點解會冇人理、點解會唔知？睇睇隻碟，細label出品，難怪。藝術概念突出，碟名《Eunix Mag》設計亦做到本雜誌噉，絕對唔係細label indie歌手就求鬼祈拍得住正式大公司出品，但單封面可能已趕左唔少客：始終一般本地樂迷對於女歌手一廂情願，想突圍形象設計一係玉女，一係肉女，同最潮扮日本妹，你睇個封面，三樣都唔係。敢噉玩確實夠晒indie，可惜香港獨立型格者從來死得最快，歌得唱得都係唔得。唔緊要，更大吸引力在於送精美環保袋一個，上面大大個X字標誌完全呃到人係X-JAPAN，為個袋抵番買碟錢啦！我見過有人出街用，型到爆！不過個袋純粹適合用黎睇，因為，勁細個．．．

聽完即時諗起兩個人：最初的何韻詩，同最近的關心妍，風格近何韻詩出道時流行搖滾，但折衷如關心妍《最愛Jade.i》較具時代感，亦係近年難得話自己玩rock音樂的確rock底重過pop底，搵「rock band」乒乓同佢排排坐，《撇低你》、《手槍與紅玫瑰》同《地獄少女》三首拍埋乒乓，你話邊個rockｄ？而家好多歌手「rock唔起」，最基本一樣野連玩rock都唔扭大distortion，rock得去邊？而且要rock唔係歌夠爆、結他夠拆就大晒，歌手更加重要，非種種聲底同唱功都適合唱rock，李卓庭聲厚得黎少少沙，應付得到低音又唱得夠高，夠氣之餘換氣聲壓制得好，現今香港難得一把如此搖滾聲音，加上收放自如，就算唔唱rock唱普通K歌照游刃有餘，搵到大label谷要紅到唔難，只有話又係樣問題。

第一隻碟《09．18》（個名真怪）夠晒rock，跟住擔心第二隻碟能唔能夠保持，始終rock非香港主流接受型態，好多話玩rock者，過頭一兩隻碟不論音樂形象通通軟化，李卓庭客觀環境優勢係indie，新碟《Eunix Mag》派台歌《失眠幻想曲》同《工作狂人》亦即令公司同事蜂擁兩首果真好得，不過聽晒全碟再加比較上隻，未如自己心目中理想。簡單剖析《9．18》：六首歌中，《手鎗與紅玫瑰》同《地獄少女》講過，《撇低你》原版以外仲有個更跳更爆「創業版」，剩番兩首屬必要之慢歌，《忘記密碼》典型英倫，《Morning娘》有點日式bossa搵埋銅管樂隊伴奏，風格唔夾其他歌一樣好聽，全碟冇一首甚至冇幾多時候唔好聽。覺得新碟及唔上，正因歌曲出現參差，或者開場《失眠幻想曲》太強，跟住兩首當堂失色晒，《工作狂人》冇期望中咁rock，《人釘人》（定《人盯人》？）編曲層次感強但明顯pop過頭。到第四首《嚮》（定《響》？）曲詞好到出乎意料，需要特別另外詳細講講，可惜埋尾為應付市場需要點要唱番首慢歌《眼花》，《忘記密碼》水準高得多；「bonus track」亦只得短短一小段練鼓花絮，上次《撇低你》送多個比原版更強remix版，唔夠誠意喎。聽開band的朋友早對此現象見慣見熟，始終剛出道需要落力，第一隻碟必定嘔心瀝血以求一鳴驚人，無論成功與否，往後能夠保持同風格而超越以前者不多，《Eunix Mag》拍得住《9．18》唯有《失眠幻想曲》及《嚮》。不過有感不足應只屬個人問題，獨立之相對就是主流，今次旋律編曲都「甜」左，冇上作咁去咁搶，或者其他人聽會話進步左，正如我硬係覺得錄音唔順耳，mixing從上作唱同樂器平均，返回典型流行曲式突出唱而推低音樂，音質亦退化失去質感，搞到印象再差些少，但其他人特別聽慣中文歌者，可能反鍾意新碟錄音，「冇咁拆」嘛。

如非純粹聽歌、為唱而聽，indie比起一般流行曲更具欣賞價值，是歌詞。我極鍾意主要題材圍繞生活工作，上隻碟五首已有兩首講上班族（《撇低你》整「創業版」合情合理），《地獄少女》講宅女又是特別，當然顧及商業考量冇可能完全冇情歌（有幾多個謝安琪？），但《手槍與紅玫瑰》個名咁GUNS N' ROSES都知熱血啦，就算《忘記密碼》詞作都唔差唔俗。《失眠幻想曲》同《工作狂人》繼續講香港工作壓力加地道打工仔心態非常受落，《人釘人》有關都市人口密集（所以應是《人盯人》），最indie莫過於《嚮》，又玩《我歌故我在》講獨立歌手理想同苦況，冇人欣賞更甚被（盲目）批評，非因音樂不夠好，只因名堂未夠響（所以應是《響》）。難得現今流行曲，詞題仲可以咁許冠傑 － 而家應該形容為咁周博賢，情歌當道，冇太多填詞人肯寫得咁生活化同社會性，有時寧願佢繼續indie落去，因一成到名大路左想玩都冇得玩，睇睇當紅的謝安琪，名成利就後身不由己是平常事。之不過indie從來難捱，首當其衝缺乏實力後援，錄音混音已帶瑕疵，歌詞文筆粗糙微亂有待改善，部份段落編曲或演奏存在進步空間（bass玩花少少已經好feel好多，鼓整體亦唔及《9．18》編得好），畢竟一經專業監製手，成品水平可以相差甚遠。謝安琪走獨立路線最終走紅，全靠搵著個好監製，周博賢作曲填詞皆能之餘能主流得來另類，問題香港地伯樂難尋，千里馬亦非經常有機會表演自己獲賞識。

眾多新人中佢屬最名不經傳之一，出過碟唱過歌都冇人知，拎埋新人獎冠軍又點？照冇人理，慘到出道兩年只得一年一EP大碟都冇得出，唔係歌唔得唱唔掂喎。唯有嘆句rock在香港始終不是音樂，只是潮流，兩年際遇及音樂路向正好可作個案反映。出道時值Nana紅爆期，突然好多靚仔靚妹話聽rock，照計歌路順應潮流，加上唱中文更有共鳴，冇理由會紅唔起喎？事實上就係唔得，係咪真係因為Nana而多左人「聽rock」，從而會聽埋佢呢？就經驗之談，相信更多香港人／專家聽完只會鬧「抄Nana」、「抄Avril Lavigne」甚至「抄EVANESCENCE」 － 《工作狂人》唔係EVANESCENCE cover黎咩？香港地現象泊來特別日本過來必定好野，但自家出品無論質素幾高只會被彈多過被讚，要外地出左名紅返黎香港先有人追之例子唔係冇。我承認好多時香港人食水抄襲作品的確好屎好樣衰，李卓庭必定不在此列，對比又是乒乓，但最後邊個多人支持大家都知，所以要寫《嚮》，嘆句「我未夠響，你未注重」。既然同一首歌，外國人唱唱日文唱英文甚至唱國語就會話好聽，但香港人唱廣東話一係未聽真已經話唔好聽．一係聽到唱中文就話人抄歌，香港音樂發展長期停滯不前是自作自受之果。睇番BlackWine演唱會後論就知，香港人因愚昧以廣東詞為名屠殺左好多有才之士。。

幾後來先發現到李卓庭，聽完新碟追番舊碟感慨相逢恨晚，indie氣息重及詞佳外，另一原因聽佢時諗番起謝安琪，唔止音樂歌詞感覺接近，處境亦同。大家都indie label出身，有實力幕後創作，音樂聲線唱功極具潛力，接（免費）商場秀開始，死求爛問派歌搏有人播，長期浮沉終因實力及風格偏離平常慢慢得到注意，甚至出道一年兩載走左去做舞台劇都相同。所以聽住睇住李卓庭，自不然諗番起當年發現同追謝安琪，佢已去到音樂劇階段，相比下媒體宣傳規模更大，有冇機會踏上同一條路，做完舞台劇再出碟跟住簽到大公司走紅呢？一日唔改路向，一日都幾難。佢歌路比謝安琪更遠離香港主流；rock歌間唔中一兩首派台過過癮冇所謂，但廣東話搖滾從來唔屬於香港人長期鍾意長期聽果種，加上rock歌到底唔係為唱或易唱，但香港市場主流仍是K歌，就好難以搖滾作為主路線，rock從來在港只可以作為其中一個音樂階段，見咁多年任何以搖滾作宣傳重點之男女歌手下場就知，加上型格及rock路線本地從來唔好走，造型上第一隻碟起碼仲有長頭髮，第二隻去到盡極度男性化就知大鑊，你數得出有幾多成名本地女歌手頭髮可以唔過膊。同類型歌手唔係冇，最少有何韻詩同盧巧音兩個，可惜結局皆不如人意：何韻詩rock到爆出黎，即使大家知佢有料到、有華星撐，都唔係一出即紅，經過多年人及歌從rock演變至（較）pop，亦只得到小眾支持；盧巧音再加難提，最「新」之《天演論》已是2005年，跟住出過作品接近零聲勢。香港玩型格始終冇乜可能，除非你的「型格」跟隨東洋、歐美流行，亦即，唔離開潮流．．．

所以我冇預過佢做到第二個謝安琪，香港地冇幾多奇蹟神話，謝安琪能夠三四年間從indie上到一線頭全港讚頌，可說是萬中無一，每年香港有幾十個新人，當中多少成功得到？同佢同期出道果班又有多少你仲講得出聽到佢地個名？能上到咁高更是夢幻。目標唔需要咁高，只要唔好好似何韻詩，rock左個頭跟住著到成個靚妹噉走出黎唱流行曲，已經好足夠，反而好似關心妍有實力但徘徊於二線頭先有最大發揮空間，得到適度唱片公司支持又能夠繼續試玩「偏門」歌路。上到頂未必係好事。紅左就冇得唱／冇得寫《嚮》架喇。

「期待Eunix cover《龐貝21世紀》。」