識吳國敬，因為Bon Jovi。冇特別留意，廿年後見到隻EP，有點手痕。

放入CD機，play，跳線。或者唱片公司顧及忠實old-school fans如我，真真正正模仿二十年前出品之品質，唔止包裝同膠袋，連隻碟都放到「過期」播唔到。I like。

選擇吳國敬，原因好簡單：
「佢可能係全港最metal流行歌手。」
'80至'90初值香港流行曲黃金時代，值得聽之歌手如繁星數，風格百花齊放，才俊眾多，加上潮流起快落更快，難免有所遺漏，吳國敬即為一。八十年代末出道，於當時頗受歡迎，叫明星不如話係搖滾歌星，但香港註定不可能存在rock star，加上唱片公司、音樂工業種種問題，到九十年代中末期幾近消聲匿跡。到近年柴娃娃潮流不再懷舊抬頭，繼環球復黑王系列大賣，唱片公司發現將舊歌手舊歌摷出黎翻炒再翻炒，比簽新歌星出唱片更易賺錢、賺更多錢之餘慳水慳力，各大廠商自然襯潮退前榨乾榨淨，縱有參差，一度難求之名作同經典得以淹沒各大唱片門市，老歌迷總算感到安慰及有所選擇。其中一個伙伴關係，為年來默默協助八九十年代歌星發行之New Century Workshop同EMI (R.I.P.)，令二十幾年前知名不知名歌手遺珠之作得以重見天日，既四首歌都唔差，加上係remix版甚有興趣，決定入手。

當年中文流行曲盛行改編日本與歐美名作，吳國敬走搖滾路線，改編對象自為海外走紅樂團。開場兩首快歌取自八十年代兩大glam metal金曲。《困獸》為遺珠、全女班的VIXEN最名作"Edge of a Broken Heart"，《Animal Mix》將本來情緒高漲之hair metal變成演唱會台上台下互動環節式編排，現場感及投入度十足舖排得相當優秀，同編者為搖滾老手Donald Ashley不無關係。《玩火 (Fire Mix)》原曲乃Bon Jovi "You Give Love a Bad Name"，本為glam metal界殿堂級作品，亦成吳國敬最為人熟悉歌曲，大致同原版一樣再加入更多keyboard同電子修飾，歌曲延長惜結構鬆散，未夠一氣呵成之餘遺下一堆反高潮。作為glam metal兩支經典及吳國敬兩大名曲，'80 glam/hair魅力廿年後仍是無法抗拒令人百聽不厭，只差詞。兩首詞作皆出自潘偉源手，填得相當生手，用詞欠豐富、欠美感、經常重覆及口語化，句式平淡、詞意欠深度，後來雷氏甚多快歌band歌將此更進一步發揚光大。或者，
「噉先夠rock。」

快歌過後，後半為吳國敬兩大情歌，先有《越吻越傷心》，九十年代末蘇永康於《妙手仁心》唱至街知巷聞，但此3"CD中所指，此曲乃1988年作品，吳國敬曲、林夕詞，係手民之誤，98打成88？還是又一「時不我與」個案？收錄版本為蘇吳二人合唱、香港首席爵士結他手包以正木結他伴奏，曲詞出眾實為九十年代粵語流行曲經典，林夕充滿感慨之詞為另一賣點，疑惑在歌名稱越吻越傷心，詞中幾近未有吻過，只係越問越灰。為何用吻而非用問？（記得當年一期《Gameplayers》中「無責任編者話」有討論到相同問題）

最後《酒店大堂》，屬吳國敬其中一首最出名情歌，出道正值bandsound火熱時期，既走rock路線，慢歌自然為輕搖滾。佢未能如其他同輩歌手般名成利就，同期及往後被人淡忘，可能正係過於擁抱樂隊及搖滾，而冇親近大眾所喜之「典型流行」：古典、民歌、的士高，最終淪為各位經歷八十年代之老鬼集體回憶一部份。

有趣在於廿一世紀初偶像時代，唱片公司會選擇重出此「微不足道」之作，理應尚有其他大碟或EP更具商業潛質。可能就係一份獨特、正式大碟唔會有之特別玩法，同四首都係佳作，版本不同仍可視作「精選EP」。只係價錢，同樣唔正常。$78．．．一個流行歌手出新碟$58都冇人買，更何況一個廿幾年前老土到爆、只有間中某間酒吧或某場啤酒品牌音樂會見一見面之阿叔？再相比復黑王系列一張大碟只標三十八，更顯其貴。標如此（高）價，其實係唱片公司早有先見之名，因為目標市場，一早放棄左唔會聽歌只識唱K的靚仔靚妹。
「在這真正音樂已唔再值錢之唱片業夕陽期，只有老餅先會搵音樂、先會捨得俾錢買音樂。」
嘆慣免費午餐的後生仔女，每每斤斤計較、諸多理由；但老坑只係要鍾意、係有心、知你係好音樂，都會肯付出支持價錢非天大問題。因兩代之距之別，難怪當今香港音樂，工業架構又好、創作層面又好，通通一蹶不振。