「我知道劉Sir鍾意食雪夾糕！」
「我都知道劉Sir鍾意食雪夾糕！」
劉Sir鍾意雪夾糕全港都知，不過佢鍾意到有幾鍾意，你又知唔知？

話說端午就到，老細特別每人醒左一舊水買粽食。食完飯第一年事梗係立即衝落樓掃貨。
掃乜？唔使問喇卦！

「雪夾糕糕糕糕糕！！！！！」
圖中只有三包係新貨，開左果包係上星期劉Sir口下餘生之倖存者。
「一次執三包，點解掃咁多？」 「抵囉！」

雪夾糕一包十個，原價成$33.9，有Ｑ人買咩貴成噉！
或者入得太多死貨（就同TRHK一樣），華潤而家做到三折一包九個九，有單為證！
又好食，又多，仲賺左華潤七十二蚊，雪夾糕我愛你！
「又抵又好食，點解掃咁少？」 「唔夠位嘛！」
今次「買粽」，除左有得食，仲可以帶大家睇睇我公司勢力分佈圖。

講起雪糕雪條，我公司分成兩黨：一黨係極品紅豆，包括公司內除左劉Sir以外全部人；
另一黨係咩黨員有邊個唔使講啦。睇劉Sir一個人已經霸左半格，都知公司入面佢位高權重。
唔知點解，全公司唔計劉Sir人人都勁憎食雪夾糕，所恨可同佢地唔妥劉Sir之程度相比，
所以劉Sir好多仇家隨時會俾各位同事打死，好在仲有一股中立勢力，
就係中間專食雪糕蛋撻的經理擋住分開兩邊，唔係有佢劉Sir一早就俾人KO左。
（不過相信唔會，因為劉Sir俾各位同事聯手打死之前，應該已經俾老細炒Ｘ左）

講多無謂食野最實際。每個雪夾糕都有獨立包裝，見到個心窩標誌，就知道係窩氏出品啦。

就噉睇都幾難睇得出一舊雪夾糕有幾大．．．直徑大過一塊Oreo少少左右啦。
個樣都睇到係受Oreo啟發，不過中間由忌廉變左雲呢拿雪糕，夾埋都有兩塊Oreo咁厚架，
另標榜「含豐富鈣質及蛋白質」，係咪真係咁有營養價值唔知，我只在乎入口夠滑夠香夠甜。
不過今次抽中舊野就樣衰左少少移晒位，賣相唔多好睇。
「咪襯番食果個囉！」

上一張相 5 秒後

上一張相 38 秒後

本來我都好擔心雪夾糕減價會好快做完，全公司得我一個食雪夾糕，
驚我食晒存貨先落去已經冇左減價。其實唔需要擔心丫。擔心冰格夠唔夠位仲好啦。
「我遲ｄ一定要推翻極品紅豆黨，霸晒成個雪櫃擺雪夾糕！」