自家犬中秋夜突然中風開始，再住院一星期再回家，加上屋企同期多事，勞苦一番到今日，原來先過左一個半禮拜。

返到屋企成日笑騎騎，最重要肯自己食野同飲水，有時夠鐘食飯食藥扭計唔肯食，要一匙一匙狗糧慢慢餵，頭幾日我試過用成個鐘頭先餵到佢食半罐狗糧。不過最緊要肯食。如果唔肯食的話，即係連佢自己都唔想繼續落去。

全家人悉心照顧下，雖然仍未起得番身，日食夜食加日夜按摩，已經練到四隻腳有力番，後腳夠力撐起自己後半身，不過要行只有靠正宗陸上狗仔式，靠對後腳撐呀撐呀噉慢慢躝。為方便移動佢，佢張長方形舊床就變成佢個「行宮」，要郁佢時拉住全屋周圍走唔使抱。

張「行宮」個邊高起左訓得唔舒服，再放埋張圓床仔當枕頭，老又中風成日流口水，上面舖多條毛巾就乾淨晒。搵多件舊冷衫當被仔，訓到唔願起身。

不良於行關係，廢事成日郁動佢，封鎖晒成個客廳比佢任躝任訓。為防佢隨時屙，所有用品包括毛巾、紙巾、尿布、膠袋之類擺到一地都係隨手可得。

皇帝脾氣就梗大過人。冇事之前隻狗一日可以訓十幾個鐘，開頭大家諗住佢本身都唔多郁，中左風唔會話麻煩好多，點知醫院返到屋企反而日郁夜郁，狗最多只得一個三四歲靚仔咁聰明，佢唔會知中風係咩一回事，見自己想起身起唔到，行路只能夠地下躝下躝下，撐幾撐就會吠 － 隻狗本身非常靜，兩年前中風後一直冇吠過，而家一個禮拜夾埋吠得多過晒我養佢咁多年。每當要飲水或想起身行路或要開大開小就會邊躝邊吠，佢唔明白自己情況又同唔到佢講野，每次見到佢郁身郁勢就要嚴陣以待睇佢想做乜。日頭吠冇所謂，夜晚先死。

隻狗例牌朝早四五點起身，跟住就會開始吠你，通常係起身屙尿，跟住要飲水，然後屙屎，跟住可能肚餓想食野，食飽想行街，總之每隔半個鐘九個字就會嘈醒你一次。我通常夜晚搬佢入房一齊訓，不過我訓上格床，佢噉吠法每朝四五點起就要上上落落，又怕佢嘈親隔籬，朝朝幫佢報晒手尾抹完身餵晒糧再呵佢訓覺自己都冇得訓，索性我陪佢訓廳算。最慘天氣涼冇所謂，遇著幾日都天時暑熱，夜晚訓覺搬入房訓一齊嘆冷氣大家開心，而家訓廳唔通一人一狗都開大冷氣咩？

冇冷氣嘆我唔開心之餘，隻狗趴地下最怕焗住個肚，訓親廳又冇冷氣都唔肯訓床要返璞歸真訓地下，有時連一塊毛巾仔墊地都唔鍾意，又想走黎走起，結果踢走晒尿布或者躝到去唔知邊度，一屙尿就搞到成地成日污糟晒有排搞，就要成日睇住佢有冇郁、走去邊，一踢走左塊尿布就要立即舖番好，同睇實佢條尾，只要佢想屙，條尾就會好似天線噉指向天，每次佢有訊號就要立即醒水。

「仲慘過返工。最灰我冇得訓，要返工架大佬！」