十一月底時家犬中風後享多個半月福話走就走，好在星期日走，即日搵車接走，不過等左兩個禮拜先送到最後一程。Marco係九年前有個親戚本身兩隻狗生左竇，養唔晒送左俾我屋企，佢走左自然要通知番其他同Marco有感情親朋好友，大家幫佢準備喪禮，打晒電話搵齊人到場地話冇期，星期一至五大家返工冇時間（唔通要咁多人特登請假咩），禮拜六日爆得離奇，雖然唔想隻狗擺雪櫃咁耐，都唯有隔個禮拜日先去。雖話只係隻狗，有養狗都知對狗絕對開心過同舒服過對人，處理狗後事唔會比人差幾多，我地到時有家十幾人圍住隻狗喊晒，等緊又有另一家到，唔怪得咁難訂期。用左成個禮拜準備，當然唔野少：

十六歲，狗齡計冇過百都九十幾，算笑喪架喇。當然全場仲識得笑得我一個。怕佢上路凍，特登買左套連帽衫俾佢，本身四蹄踏雪都加番四隻手襪腳襪，初時擔心訓左雪櫃兩個禮拜，個身會硬晒唔郁得著唔到衫，好在個身好僵但手手腳腳軟晒，仲幫到佢著衫著襪，同幫到佢闔番眼。仲買左三千大金上路，六七疊做床褥加多疊做枕頭，其他擺頂當被，睇番都覺得好誇張，整到好似笑片場面噉，自己都冇咁多錢呀真係。最弊誇到師傅都話太多紙會搞到好大煙好多灰唔肯燒，最後三千金減到一千金唔夠先送得佢入爐。臨行本來想買ｄ狗零食俾佢，不過隻狗一向唔為食，又朝早先醒起，只買得兩個紙包蛋糕，算好碎料的了，我地之前果家人，又麵包又蛋糕又牛奶連薯片都有。一燒要個半鐘先燒盡，師傅問執骨前使唔使睇番副骨，其實我好想架，影番張相擺上黎夠晒death metal，不過其他家人係度就廢事噉玩法喇，收好帶佢返屋企就算。

火化場有得租靈位，其實即係商場成日見到的格仔櫃，俾一格你放骨灰甕同其他野，覺得我屋企三千大金送隻狗走叫誇張的話，應該黎「靈堂」睇睇，好多人一個格仔搞到好似成間房／屋搬黎噉，又玩具（人玩具，唔係狗玩具！）又零食（人零食，唔係狗零食！）又汽水乜都有，似櫥窗多過似靈位，不過我當然寧願帶佢返屋企，感情始終要跟身。因為隻狗唔鍾意影相，好多時一見鏡頭非常醒水地立即避開閃走，走唔甩都擰埋一二面總之唔肯望鏡頭，骨灰盒張相我已經唔記得幾耐之前影落，係難得一張佢肯望鏡頭又影得靚的大頭，MSN個嘜頭用左幾年，而家最後一面都係用佢。火化儀式剩番果二千幾金帶返夜晚燒埋佢，十分邪門地燒燒下阿媽無端端差錯腳跌襯，仲撞斷手骨入左急症室。可能Marco嫌得果三千蚊，買狗糧都唔夠，呵呵。