雖劉Sir＆佢份工頹，一年總有兩個時段要做野，就係三至六月同九至十一月主要展覽會時期，前夕半個月開始忙，展覽一連幾日駐場，玩完之後半個月跟客，所以每年頭半三月底到五月頭係最忙時段，亦係最灰事段，因為平日band tee涼鞋返工的劉Sir，突然要西裝打呔著鞋著襪，好唔慣，每年正路只得十日唔夠日子要老西，今個月佔左一半，加上要比平日返工更早起身過海去灣仔會展，到左又要做足（即坐／企足）成日冇得訓晏覺，辛苦架。勝在好玩。市道勁差，公司執下執下又未執得晒吊住，展覽一樣要擺，去場館睇睇，就知乜野叫做肅條。

上年會場連地毯都唔舖，原來已經好好，今年冇地毯預左，估佢唔到連最基本ｄ野都搞唔掂。第一次試過收到場刊，純粹兩張A4紙釘埋就算，好在有彩色唔係得黑白，未叫做衰到貼地 － 之前咁多年，任何年份任何展覽都係印到成份報紙噉彩色勁厚一疊架，雖然我從來冇睇過（．．．），但睇見場刊由報紙變A4紙，又唔肯舖地毯石屎地一塊，排場門面已經死晒。同時好多福利削減左，好似每個攤位總會俾個紙盒你裝卡片用，分別在於以前大大個加勁厚卡紙整，今年個卡片盒睇落似廁紙盒多過用黎放卡片。都冇所謂。反正我向來唔多理呢ｄ野。慘在連應有的福利都冇埋嘛。做展覽，永遠為兩樣野 － 唔係生意，我又唔係老細 － 拎免費禮物同野飲野食，同買平貨。首先，要按此重溫劉Sir＆成班同事上兩年點樣假公濟私呃盡主辦單位ｄ免費紀念品，果陣瘋狂到連老細都叫我地唔好睇檔全世界總動員去換禮物，結果會展自2007年起唔再送貴價免費禮物同唔再亂派禮物。

金融海嘯，乜開支都要減，首當其衝，免費野收埋收埋，連最簡單的布袋紙袋，我做左四日除左見鬼佬同內地人拎住，行極唔見邊度有得拎。換著以前？行幾步路就大大疊任你揀完全唔值錢，次次拎十幾個廿個返屋企，自用之餘貪ｄ袋夠大，屋企換季時用黎收衫收被收棉胎一流。今次展覽想拎番個袋紀念都難呀。主辦單位唔派，就連一向出手闊綽的廠商們都收埋唔擺出黎，搞到我做左第一日已失去行會場的意欲，等其他同事冇野做吞pop或煲煙行晒七層會展眼利望到偷幾個又或厚面皮求人俾佢，返到自己攤位分贓時拎番幾個算。我地幾日黎其中一個主要活動，就係望實經過的客人，見到邊個抽住個袋靚立即記低公司名，然後拎本場刊出黎查間公司個攤位邊層樓，邊個「有事」要行開時順便去拎番個，幾日黎儲左差唔多十個袋，全靠各位同事努力。可惜最想拎果個到唔到手。有間公司個袋黑底大大個紅字寫住「宇宙俠」，超級old-school（比「老土」好一點的形容），以為間野賣玩具，立即上網搵，原來係間台灣電腦公司，搵緊人做佢地公司代言人宇宙俠，勝出者仲有五萬蚊台幣獎金。正喎！要應徵！不過等左四日，連同事都出動埋，唔知點解落埋去佢地公司個攤位都搵唔到。似乎我同宇宙俠無緣。

另好流行拎張禮物紙，去會場內離天萬丈遠的五個攤位吸印，再到某個展廳禮物攤位再抽籤，通常有五間唔同公司贊助各式禮品你揀，行貨如最常見電筒，到神奇的金屬探測器、微波洩漏偵測器、電線斷路感應器等都有，雖然好多拎黎冇用，老實講，你會唔會咁得閒無事拎部機測下屋企部微波爐有冇漏微波？我抽左部金屬探測器返黎，掂都未掂過。純粹滿足個人貪念。同做展覽做到悶搵野玩總之唔好俾我留守檔口。最重要，俾左幾皮野參展喎，仲唔拎番夠本？年年我地第一件事都係睇定有乜免費禮物送，誰不知今年超級失望，只得鎖匙扣同電筒仔兩款，唯一可取係唔使吸印又唔需要證件，有飛就直接拎得，而且換禮物個攤位同自己檔口只隔半分鐘路程唔夠，兩樣獎品都唔吸引，我地咁貪小便宜，都冇心機同你走晒全會展集齊五個印花黎換啦！賤格在一早話有得換，點知頭兩日唔派飛，到第三日先至間唔中撞到一兩個姐姐仔，仲要派得掩掩揚揚，中國人樣講廣東話通通唔亂俾，搞到行左好多路先拎到幾張。都係其他同事勁，為左拎飛用盡各種手段，包括扮低能搏肯派多幾張（派飛的都是大學生part-time小妹妹嘛）甚至強搶，最後儲儲埋埋十幾廿張，換禮物攤位又近，坐到悶就拎張過去換，除因為我成日身痕想行下，仲因換禮物要抽波波，紅波鎖匙扣黃波換電筒，女同事唔夠高睇唔到箱入面個波乜色，我夠高望到，咪可以次次抽到電筒唔使拎豬頭骨鎖匙扣囉。拎左差唔多十枝，分ｄ俾同事又或俾人搶／偷，都有五六枝落袋，唔係我好恨要，係冇得選擇呀。你俾我揀，我寧願拎多幾個大布袋或者紙袋最少實用，今次冇袋拎，唔拎番幾枝電筒，返到屋企都唔甘心訓唔著呀。

禮物由五款變兩款，代表少左廠贊助，又即好多廠縮左水甚至唔做。以前擺展覽，爭位爭到頭崩額裂，今次我地求求祈祈都霸到展廳最前對正入口個好位，全靠經濟差，行後少少，有三分一個展館變左吉地又或休憩場地，咁多年黎從未試過。心想會好得閒，點知唔好彩（．．．），經濟蕭條未至於影響好大，仍叫做有好多外國客人飛黎香港睇展覽，反應唔比以前差太多，分別在於主流如美國及歐洲開始衰落，取而代之係新興市場好似東歐、中東同東南亞。原來黎展覽要做野，唔係玩夠就放工，搞到好唔開心。（．．．）好在食方面冇蝕底到。次次做專展覽必肥幾磅，自己檔口擺成盤朱古力，話俾客人食，有幾多客？即係買俾我食啦，食晒朱古力仲有兩大包瑞士糖。要一讚今年會展野食做得好，年年有免費咖啡奶茶派，今年派埋免費甜點，加每隔個幾鐘清一轉就轉款式食極唔厭，好似一朝早拎左個椰撻，連一向唔多食椰撻的我都食個唔停，食完再去拎，變左法式餐包，下一轉有蛋撻食。行貨過頭？菠蘿叉燒包食過未？都算是東西飲食文化最完美結晶了，咁大個仔第一次見識到，酒樓同大酒店都冇得食呀。最後仲有重頭戲蘑菇批。想食甜品，有免費爆谷。有兩日自己買早餐，包括一餐KFC同檀島麵包宴（我唔敢試去檀島食正式午餐／晚餐），兩次都後悔，因為單靠會展ｄ免費野，夠由早餐包到你去下午茶。飲咖啡仲多過飲水。

從來會展最擾人食午飯，實Ｑ最鍾意沒收外來外賣紙，入場又隨時查袋捉外賣，玩壟斷局你食會展ｄ飯盒，$37個加生果俾多枝水夠膽死收五十幾蚊，唔平架又唔算飽或好食，好在向來食得求祈，唔好食照食左先算，今次展覽最大得著，係知道肉醬意粉學術名字是Spaghetti Bolognaise，下次去Cafe de Coral一定要叫番次。最後一日餐牌有咖哩羊肉飯，係會展最好食飯盒，真係入得口好好食果隻（講親食野，記住粗食的劉Sir說話不能盡信），點知有個同事躝完街拎左半打爆谷返黎大大個膠袋裝滿晒，結果我在會展最後的午餐變成食爆谷，拎住成袋係噉掟入口好似入左戲院。跟住公司同事帶埋lunch各位女同事食剩ｄ物資過黎，飲左三杯咖啡，＆大量朱古力＋瑞士糖，你話做展覽有乜可能唔肥？你會問，食到劉Sir咁肥，主辦單位叫做對佢不薄喎，點解仲要鬧？就要幫公司出頭了。大家香港人，香港政府有幾廢有幾蠢，唔使我又寫幾千字講啦。為左刺激外國買家到港睇展覽，今年政府用左好多錢資助外國買手黎香港，補貼機票錢同酒店錢，會場內辦理特惠機票同酒店個檔口，長期幾十個／堆外國人排隊永世爆滿。羊毛出自羊身上，貼俾外國人ｄ錢邊度黎？見場內咁多免費野同福利冇左就知啦，同外國人有錢收，相比參展商少左資助，搞一個展覽閒閒地要五位數，好似我地公司搞得較大規模用到近六位數唔奇，但參展商要用最多錢，反而資助得幾千蚊甚至更少，仲要審你唔知幾多次先勉強批俾你，有等於冇又唔幫得幾多。有點本末倒置。雖然而家越南、柬埔寨、印度等國家開始侵佔中國生產市場，大部份外國人始終未放棄中國，香港更是主要商貿基地（雖然相信好快就會輸俾深圳同上海，如而家未），就算唔贊助機票酒店仍然大把人黎，事實亦證明左。反之而家經濟差，應該要幫手果班廠商唔去幫任由你死你事，變相鼓勵開源節流的大家唔好參加展覽，而展覽最重要就係要有多廠家同外國客見面，做到而家噉外國客黎到，發現根本唔多公司俾佢睇冇乜選擇，正如可以有三分一個場吉晒，咪仲樣衰做衰自己個名？香港人十年間由全中國潮流文化及經濟先鋒，變成返到大陸俾人笑的港燦，特區政府無數謬政與無法理解的邏輯居功至偉。

唔知係謬政問題定經濟真係咁差，好多大公司都冇參到展，睇我地以前通常排位排到去展廳最尾，今次居然可以排頭位對正門口，就係因為大公司冇黎，唔知佢地見個市差索性唔搞定執左。對老細黎講梗係好事啦，少左大公司競爭仲要搶到頭位，我地就喊晒口，因為場內囡囡的質和量直接與市道掛勾。又要時光倒流兩年。2007市道係近年最興旺，當時會展大堂搵左明珠台《講生活．講享受》的Peggy姐同大家唱歌傾偈，又主持抽獎遊戲送勁多禮物大獎有部手提電腦，搵多成隊女大學生著晒整齊制服化晒靚妝列隊歡迎，行幾路就見到一個，跟住佢地行就去到展館十足十路標，難得在選晒最高質素果班做接待個個都靚，萬女空巷之境比內地展覽更壯觀呀。大門搵班性感model拎住個牌教你入場之餘，展館門口仲見到Kawaii，兩年前的佢唔厚粉之餘唔似而家瘦過頭，時至今日仍然為當時冇同佢影番張相抱憾。到2008全球仆直，成街女企到夜總會噉款之景不再，會展明顯冇以前請咁多人／女（以前有ｄ真係請黎純粹企係度充撐場面唔使做其他野，幾豪），質素又下滑，除左門口班性感model，主要promotor來自幾間大公司，真空deep-v短裙姐姐仍然使大家回味無窮，間中又會有細公司請一兩個或搵ｄ省鏡女同事出黎，新一代囡囡都深明上位之道嘛，呢ｄ展覽全場貴人來自世界各地，一唔覺意著少左俾人望到從而釣左隻金龜就搞掂了，大多都執到好正或者著得做得好搏。不過今年會展自己都唔多搵外判promotor，亦冇調多少姐姐出黎做接待，幾間會請promotor的大公司又冇參展，以往都話仲叫做有ｄ理由俾到龍友入場。今年？算吧。

我地公司一向只得會計靚女一件。我成日向老細反映，應該派佢出黎當我地公司promotor吸引人流，人地公司都係噉架咋，搵ｄ後生女職員著到去ball噉企出黎當promotor，多一個囡囡，分別可以好大。咁多年黎老細都唔肯，直到今年開始考慮，除見個市真係好差，仲受到斜對面檔口啟發：我地公司攤位雖然算大，人流唔太多，相反斜對面間公司細細個檔長期爆滿。果間公司賣燈掣，有手觸式同隔空感應兩種，手觸式寫住"Touch Me"點知冇人理，側邊部隔空感應大大隻字"DON'T Touch Me"，明明揮揮手就可以開燈閂燈較光暗，反而人人係噉摸，長期成班人圍實黎玩。事實證明人都係犯賤的，呢著宣傳招數果真奇特，老細諗住下年叫會計靚女拎住我地公司ｄ產品，之後棟個牌"DON'T Touch Me"，客人反應一定超級正面。

既今年冇乜野派，禮物唔吸引，又冇promotor目及，加上單坐低係噉食野已經忙到唔得閒做其他野，今年我完全冇出過去行，就連最後一日成公司走晒去大陸同台灣廠地頭執人地ｄ貨頭貨尾都冇跟隊。要執有大量筍野，上次展覽就出現老闆娘十蚊買左部飲水機、百二蚊買左成個攤位幾十件電器擺到一倉都係之奇景，自己都買左個外置harddisk盒，不過今次大概望過冇好野買，懶參與等其他女同事見到正野call我算。同真係冇野好行／好睇嘛。

上面這位姐姐，是本次展覽會全場絕無僅有的真正promotor，真空deep-v短裙姐姐還是無敵，不過金融海嘯嘛，仲有promotor已經好開心的了，最緊要敬業樂業非常主動熱情地款待客人，除左我之外，我每日平均經過不下於三次，開展到關展佢都冇撩過我，喊。所以我自己冇出動，冇好野換又冇囡囡睇，等班女同事周圍行見到正野就call我，又或遇到靚女影張相俾我睇，足不出戶也能知天下事。同埋，我地夠無賴（劉Sir嗟，其他同事無關的）。幫我地跟進展覽事務個姐姐，絕對要寫信去會展表揚要求加佢人工，間唔中主動問我地有乜需要，我地往往提出好多強人所難的要求，一律冇托手爭有求必應，這就是香港人需要的工作態度了。問晒其他同事，走過黎問劉Sir有乜需要？自然反應話今次紀念品唔夠多又唔夠掂。一聽到劉Sir投訴，姐姐親自走去換禮物個攤位拎左大堆電筒同鎖匙扣俾我地，連換禮物都唔使自己出手，我根本冇離開的必要。搞事的小朋友有糖吃。

「早知係噉，我就話要番三四個deep-v姐姐坐鎮啦！」

攤位對正大門口，除左有助生意，亦為各位同事提供大量娛樂。所有客人出入會場皆難逃我地法眼，公司同事最鍾意排排坐睇實入場同經過的客人，當然各方美女是主要目標啦。九成香港女性面對的問題，係突出上圍與窈窕腰圍難以兼得，所以成日對內地同其他亞洲地區的女性好有興趣。禮拜日砌場已經大開眼界，大家開箱搭架落力做之際，會計靚女突然呼籲各位男同事望向門口：

「嘩！好勁呀！最少有I Cup呀！震到好似睇緊日本卡通！快ｄ望呀，佢就黎轉彎，轉左就睇唔到正面架喇！條腰得十九寸，點解個胸可以咁大？」

經過四日展覽，可以話你聽，會計靚女一眼難忘的「淫賤打樁機」（呢個形容詞出自佢口，劉Sir好乖仔好純情唔識講呢ｄ野架！），已經是碎料的了，所以成日排排坐睇戲，最抵死女同事比各位男性更雀躍，即係連成班男人都唔睇唔講時仲能夠樂此不疲，因為香港女人唔會明白，點解大陸台灣韓國女人一出世已經可以條腰得二十寸唔夠但上圍三十六七八FGH，而佢地要俾幾皮野先執得到咁靚。聽老闆娘講，原來場內有件極品。正正我地攤位對面隔兩個舖位，開展時好多大公司同銀行送花牌，一睇就知唔簡單，咁蹺老闆娘識佢地老細，間公司全家人超級有錢，銀行定期存款最少五千萬，其他物業同公司資產更加不勝其數，最重要太子女單身。過去睇睇，半秒回歸，身家和美貌兩者，與港女胸腰難共存同一道理。不過為己為人，睇見上面張相的劉Sir咁肥，以免影響公司形象，會計靚女走去買左條減肥腰帶：

兩三年前剛剛出果陣，一條減肥腰帶賣到過千銀。而家？同ｄ大陸廠講左成個字價，$180講到$150，一又四分一折搞掂。不過各位女同事最關心，係減肥腰帶送埋條尺，立即度度而家有幾肥。我都係度過先知，原來而家條腰有．．．三十九寸。冇錯三十九寸千真萬確。立即戴番條腰帶減減肥先。不過劉Sir實在太肥了，玩左陣，肥到整壞左條腰帶。會計靚女唯有拎番去退貨，再加錢換左另一條更正的：

頭先條主攻一面，新呢條勁可以環繞三百六十度震晒，只貴本來條廿蚊。自從佢屋企條減肥腰帶壞左（相信理由同劉Sir整壞一樣），吼左好耐想買條新，導火線之一係今期流行的娜姐中環除衫走貓步廣告，佢一睇完個廣告立即想減肥，因為廣告入面套泳衣佢已經買左幾年，幾年前身材拍得住娜姐可以著去海灘游水 － 我知好難想像，我對左佢咁多年都想像唔到。但自從劉Sir入左呢間公司做，學埋晒佢一日食唔知幾多餐的陋習，結果急速暴肥，而家連去泳池游水都唔敢，唯有買番條減肥腰帶減減佢。其他女同事又跟佢一齊買。可惜前幾年見到有間豐乳機，唔知冇黎定執左見唔到。唔係成班女同事肯定發癲。

辛苦左四日，是次展覽圓滿結束，唔算太忙，不過精神透支好大，禮拜五返到公司病埋係噉食必理痛頂住。趣味仍足，但比較以前冇咁多奇人奇事，好似上年擺展覽可以擺到撞到METALIUM bass佬咁傳奇，今年生意內外相對地靜左好多。或者因為我冇周街行四圍探秘，同的確少左好多廠參展。冇所謂啦。成個市道，真係淡得好恐怖，而且大家都型住黎緊會更差，單展覽期間同班舊客傾傾就知，下半年一定更加難捱，特別我做緊的美國市。分分鐘玩埋今次冇得玩架喇！