一開始，先介紹一位朋友俾大家識。呢位朋友好多個朵：Lani、Ahlan、阿冷、同大家最熟悉的黃冷里，亦已經於香港metal界揚名六七年、香港聽extreme metal冇乜可能唔知佢係邊個，但讀得正佢個名，可能佔其中10%都冇：
「阿冷個冷，唔係冷氣個冷，係冷衫個冷。」
呢條仆街（請恕劉Sir份人比較坦白和率直），樂器唔多掂得個唱字，夾band唔係夾metal而係夾punk，卻得以在香港金屬界中闖出名堂，因為識聽，同聽完會寫番出黎，亦因此而有好多人藉爛屍金屬網認識到呢位網主，其中個金屬分類每逢各大論壇討論中提及／爭拗到「邊種metal」一定會被引用，碟評之影響就更加唔使講，阿冷之爛屍金屬網、Blue之Xmetal同Bloodkrishna之Reek of Rot都屬於香港第一浪「亞專業」繁體中文金屬網，而阿冷主要寫極端金屬中之經典，唔係有佢個網，香港相信冇幾多人會識得EMPEROR、MY DYING BRIDE、DARKTHRONE、KATATONIA如此這類extreme metal經典。因為佢（地）之努力，令五六年前香港好多人開始去搵(extreme) metal、去買metal碟聽，其中一個就係我，我都係因為佢個網先識得extreme metal係咩一回事、先開始搵black、death、doom野聽，同 － 最重要 － 因為佢個網，我知道左Trinity Records Hong Kong，由上龍珠見阿冷真人再跟住自己入埋去做，經歷過無數風浪低潮到而家「死剩」劉Sir一個，噉就五年幾。果個係metal碟冇幾多地方買得到、有都賣得好貴包括上網訂、sample同MP3未盛行、TRHK係香港metal碟主要庫存及來源兼全港最平之年代。同而家只係相差五年左右，但五年之一半已經足夠改變成完全另一個年代：頭先所講過之三個中文metal網係香港第一浪中文metal網，好遺憾亦係最後一浪，三個網到而家已經死晒，呢三個網之後，你仲諗得到有幾多個新香港中文metal網？你數一數都知冇幾多個，更多係比第一浪三個死得更快。因為年代真係唔同左，睇睇撰文內容已經知：第一浪果種真係去搵碟聽、真係去介紹隻碟去講解有乜長短點樣去聽，已經屬「上一個generation」，搵音樂搵野聽同聽完係研究番隊band，事隔兩年半之「而家個generation」，科技發展太快加極端金屬潮流化地面化，音樂心態已經完全唔同以往，由需要去擁有變成只需要知道，未聽過唔知咩黎唔緊要識得Ｎ隊band名就可以，擁抱音樂之方式變成random BT、「你send俾我」，聽band都只有「metal界英皇」Sony、華納、環球叫你聽果ｄ，較「高級」就上外國網、上MySpace、上metal archives搵band越唔出名越好（冇出過碟同出左都唔知點買果ｄband就更好啦，直頭唔會有「鍾意一隊band就應買碟支持」之包袱嘛），好多被視為「聽extreme metal冇可能唔聽冇可能會冇」之經典已經再冇人會問會搵，而grind、doom、black呢類真正extreme亦已經無人問津（除左「metal界英皇」力谷之幾隊）因為metalcore、emo先係皇道（又解「潮流」）；聽完音樂之後寫亦只限於上forum玩填字遊戲，而唔會好似前人為更多人知道一隊band、更多人認識metal而好花心機噉去寫一隻碟寫一隊band。點解會噉，已經冇人真係寫音樂、而只鬥寫名、鬥寫生字？因為：
「得我自己一個識你地其他人個個都唔識我先夠型嘛，我寫咁多野俾其他人識左我識ｄ野仲得了？」
仲會追一隊band買晒佢地ｄ碟已經變成稀有品種，買碟甚至被視為「怪」（不少朋友於論壇表示自己買碟都面對過如此回應了，而家聽音樂俾錢買碟唔download先係唔正常），而面對如此歪風、「你唔識我識我先夠型」的心態、聽過個名同幾首歌甚至識名唔識音樂就得唔會亦唔需要深入去認識、唔使咁花心機去研究自己鍾意果種音樂、你識野你真係去搵去研究去聽反而會俾人歧視，仲會有幾多人會肯咁認真同花時間去同人分享、去寫碟評、去介紹樂隊，甚至寫得出碟評呢？（劉Sir卦，佢一ｄ都唔型只柒嘛），而會自己上網搵野、會去大陸簡體網同外國英文網睇野係「身份象徵」之一，香港本土中文metal網已經變得唔再稀罕了。所以如今你聽extreme metal但唔知邊個係阿冷黃冷里其實好正常，因為佢同爛屍金屬網／香港第一浪兼最後一浪中文metal網一樣，已經成為歷史一部份，唔係「今個年代」ｄ人會有心去留意去欣賞，正如好多人眼中「香港聽metal最專業果個」劉Sir，你去其他metal友面前提佢個名、提TRHK，一樣冇人知咩料，就算知都笑番你轉頭啦，哈哈哈哈哈哈。

兜到去好遠離題到離晒譜，唔好意思一同metal有關劉Sir就會長篇大論。今次主角就係我地冷爺，上年劉Sir大壽衍生出

訓醒個覺返工，無驚無險噉又玩完了，既然星期一至五都已經冇心情做野，更何況星期六丫返到公司上網等放工算鬼數啦！放工之後仲有兩個鐘頭玩，特別去朗豪坊逛逛，CD Warehouse當然要行啦，都幾大幾靚喎只係開到上十三樓咁高，呢度好處係冇乜metal碟，「metal極」咪又係MEGADETH新碟同DREAM THEATER新碟近來呢兩隻最紅啦，目標都係唔係metal的Bjork新碟、椎名林琴新碟，同埋楊乃文《女爵》。死，即係信和舖頭仔已經係一個好大跌錢危機，而家咁近仲要開多間CD Warehouse，危危乎喎而家本身用黎買metal碟果舊錢真係。但唔係因為聽左琴晚903個節目所以專登上黎睇，今次黎朗豪坊真係黎行，由最頂「事派勞」行到最低地庫，就係之前果晚大家傾開傾出黎之計劃。雖然睇過唔少報導／報告講呢度人流同生意額都比預期中低，但大部份舖頭都搞得唔錯，有好多都係做自己設計同自家品牌生意。睇左咁多間，都有所啟發同值得參考，相信第時星期六放工開舖中間兩個鐘會有好多地方去。
行完街好有興致地去且豐坐坐，食番個靚飯順便睇睇書。禮拜六晏晝飯通常係上舖頭叫野食（首選大家食，夠平）又或者唔食（慳埋ｄ錢買碟嘛，ｄ錢／ｄ碟天跌落黎咩自己會），行街行到庸庸懶懶，經過且豐見有時間又有位就入去繼續懶落去。話晒係我地TRHK指定食府，最重要係地獄黑仔王劉Sir幫襯過之後都仲未執笠，梗係有番兩度啦點都要支持下。高檔西餐廳從來唔會係平日得閒無事或者自己一個人開飯走入去果種，好食一回事價錢高到離晒譜嘛，你叫我平日四五十蚊食個飯鋸個扒做一餐實在太奢侈（我已經俾大家食寵壞左），晚市除非有人請或者聚會如果唔係永遠唔使預我，但且豐就係正在連午市都做埋，飯前湯飯後飲全餐包晒再加俾足正餐質素加份量你，未食飯齋食送都多到食到你飽，咁豐富先至收你個廿五蚊仲唔使加一，喂抵玩啦平民級價錢貴族式享受喎而家！食住個飯，繼續睇《達文西密碼》，係呀真係睇左好耐喇，好似係上年開始睇，睇到而家年都過埋暑假都就到仲未睇晒，冇計啦懶嘛成日咁多野做得閒無事打多舖機都懶揭書啦而家，所以本野好耐之前已經睇到最後幾節，但臨大結局都擺低到而家先再拎番出黎繼續。睇黎將來之禮拜六，節目都會係放工後行街行完就黎且豐食飯睇書。
「希望我幫襯到且豐都執埋笠之前可以睇晒本《達文西密碼》啦！」

食完個飯睇多幾頁，就夠鐘開舖，終於開始踏入正題，話係冷爺生日但寫左幾千字都仲未輪到佢！生意已經唔需要再提，直接講下今日重點節目啦！首先當然係Winning Ele7en！承上次之烈，今次再由大會主要贊助商冷爺贊助PS2一部。
「生日果個都要自己拎部機出黎俾人玩咁灰？」
「TRHK不嬲咁灰架啦！鬼叫你上黎！吹咩！」
講係五點開始玩到八九點唱Ｋ，但唔使講都知啦，未到六點都未正式有人上黎開波。但球賽一開始，嘩！勁喇！本年度TRHK都未試過咁多人、未試過咁「旺」！

TRHK隊大戰TRHK隊慈善賽事非常精彩，平時勁隊對勁隊個個都守得勁打極冇癮，但TRHK全部廢柴，大家都廢就零捨多入球，半場已經可以有十幾次攻門、六七次得分，再加埋一堆白痴仔，好睇幾十倍啦真係！只係有一個非常大之問題：平時打一場係20分鐘，但TRHK對TRHK要較20分鐘一個半場先夠，因為ｄ人慢到離奇人地就噉行都快過佢地開恆turbo，一個半場得十分鐘，走到去龍門都已經夠鐘返休息室。
賽事發展到咁上下，都叫做人齊，可以正式舉行頒獎典禮喇！

跟住繼二寶樂市長伉儷之後，大家最期待的契爺伉儷亦都出現了！有時都不得不佩服契爺咁rock，差唔多三十歲人連婚都結埋，招聘旺季已經有個高薪職位等緊，仲可以先辭做緊分工再推埋份厚職，兩公婆一齊劈炮唔撈，跟住兩個人陸路穿中國入巴基斯坦，最後仲失堆蹤搞到阿媽周圍打電話搵仔，正正今次重要活動前夕終於再現江湖，琴晚返到香港今日已經立即走出黎同大家癲。所以話上得TRHK、群得劉Sir，從來冇個正常。

參與人數同觀眾越黎越多，最後打到四打盲波，兩隊TRHK隊一律著晒黑衫，四條友自己係邊個屬於邊隊攻緊邊邊完全都唔知一味死估。TRHK從未試過咁旺／咁多人。至於生意．．．
「生意？算啦，TRHK仲有客咩？」
真係有。打到八點半臨收檔過去拎Ｋ房，一熄機收檔立即就有生意。咦，似乎版聚都有番ｄ用處喎！

Neway專登打電話黎威脅一定要準時九點拎房，因為星期六晚真係多人唱Ｋ到爆，你遲一分鐘都立即俾第二班人搶左間房去，所以打波打到八點半就收機拉隊過去，但劉Sir自然係堅持到最後一刻，唔使做生意咩尤其是一收左機之後真係立即多番幾單（難得呀！）？未去已經收到冷爺電話「今次間房好細」，九點半收舖後過到去，
「嘩！今次間房好細！」
十二個人先俾得一間細房仔，坐都唔夠位坐仲要冇冷氣，即係TRHK已經冇冷氣架啦（如果有冷氣果日TRHK部冷氣應該係壞左），呢度連上得TRHK多身經百熱的各位都頂唔順！不過點熱都阻止唔到劉Sir的瘋狂亂嗌，邊一首歌要要metal要black metal要death metal要grindcore要hardcore出句聲就得劉Sir立即滿足到你。可能太頂唔順了 － 不論係房內各位對冇冷氣的萬般指控同班友的爆Ｋ行為 － Neway最後都忍唔住調晒成班友去全層最偏遠角落間大房，遠離人煙（「人煙」＝「所有Neway職員＆客人」）由班友亂咁發癲算數。作戰成功。

今晚trhK MKIII，大成，多人多野食多表演睇又有冷爺帶契大家有得食蛋糕同飲香檳成棚都玩得高興，只可惜今日係禮拜六，大家幾開心幾想唱都好，到左一點鐘就夾硬趕你走，九點入場一點走即係唱左四個鐘，十二條友除番開一個人其實先唱得四首歌，錢就收足你每人百四，絕對係唔夠喉，不過就算你俾得起錢同佢講繼續唱都冇用，一點幾散水落到樓下成班靚仔靚妹等緊，ｄMK係多到塞爆埋行人路咁多，你有錢又點？有錢都唔做你生意客大把多到有得揀做邊檯客添而家吹呀！所以禮拜六唱絕對唔抵，根本唔夠ｄ靚妹爭，但講大家就到時間唱又的確只得星期六晚可以。個個好似劉Sir噉禮拜三晚唱通宵之後禮拜四請假唔返工咁癲咩！