劉Sir份工好頹，大家一向都知。（「係咩？我一向只知係劉Sir個人頹！」）但始終都係返工、受人二分四，即係頹還頹，有些時候總要象徵式地做一做野交交差。「交差」有分季節性。每年四月同五月分別係香港同美國展覽，跟住十月底係另一個香港展覽，換言之三月底／四月初起到五月底／六月中同十月底至十一月，都係劉Sir真係要做野的日子，今年仲首次玩埋大陸展，就十月中起立即唔多得閒了。

講展覽會，大陸要幾多有幾多，地大物博嘛工業強國嘛世界第一出口國嘛，但多還多公司多年黎只參加香港、美國同歐洲展覽，大陸多多都唔玩，因為幾年前試過一次，全展四日擺左半日已經收皮，因為噉擺晒自己ｄ野出黎即係請各位國內同胞抄襲（永恆之民族劣根性），自此再冇參加，至事隔多年後的2007。其實今個唔係本年度第一個大陸展覽，個幾月前已經參加過一個，不過果次全公司抽籤我抽唔中冇得去／唔使去（好野！），至於今次呢，今日開始連擺六日，走唔甩。我成日型住老細年年唔擺大陸展，係今年先擺，就係見我實在太頹，夾硬都要屈我做ｄ野先甘心，以雪請錯劉Sir入黎做之恨。
「上次你唔使去，係你好彩！今次你仲唔死？？？」

．．．吹吹水嗟我都係（老細曰：「咩吹水！我好認真！」）。上次展覽會得三四日，果期我又撞正要見客，人手充足我又有充份理由留港加抽到籤豁免，大安旨意乜都唔鬼理。但今個展覽成六日長，加上十月底大陸同香港夾埋四五六個展覽會，勁多鬼佬襯呢段時間走上黎傾生意，就算平均番全公司每人最少都要上一日，走唔甩啦今舖老細你開心啦？
「VERY！！！」
劉Sir懶到一個地步，係連要過海都嫌遠，小學生都推理到佢懶成噉非工作需要要佢肯踏出香港甚至踏過獅子山（隧道）都難，唔計美國，今舖都算係劉Sir史上離鄉別井最遠一次。目的地係古鎮。
「古鎮即係邊？」
「Ｑ知？？？」
我只知道好叉遠。平時坐老細車上工廠，香港到番禺大約兩個鐘車，「冇意外」的話（通常劉Sir跟車都會撞到大量意外），而到左工廠之後，再搭多個幾鐘車先到古鎮會場。今日七點鐘出車（五點半起身呀破紀錄地今個朝早我陰公），十點半俾老細踢醒：
「到左喇！仲訓！」
除左過關，全程不醒人事。正。我鍾意。
「真係點睇都係我先似老細。」

叫得全球燈飾業最蓬勃地區，搞燈飾展梗係城中大事啦，仲有成里遠已經封晒路人車勿近。
「沒通行證沒通行！」
我梗係繼續（扮）神智不清。各位同事努力地搵趴屎。但開始搵未夠十秒，負責睇路位公安已經放行。
「證件都未睇，佢又知我地係入去做展覽？唔驚我地係恐怖份子呀？」
「佢見我地架車有中港車牌嘛！」
冇錯。雖然而家香港人文、文化、生活同社會發展同大陸主要城市相比係幾近頻死，香港人身在大陸仍然有一定招搖力。
「嘩！乜原來我香港人咁威！」
「白痴仔！唔係你威！係你ｄ錢威咋！雖然你條港燦已經冇乜錢剩！」
展覽通常九點幾開始，我（地）可以咁唔志在慢慢香港坐車上黎，因為係第一日。香港地冇咁多呢ｄ野，係大陸鍾意整色整水要整開幕禮，打晒鑼打晒鼓仲舞埋師，仲搵左隊細路銀樂隊，玩乜就梗係唔理啦我從來對呢類乜鬼典禮冇咩興趣，只好想衝上台搶司儀支咪鳴謝大會：
「好彩你地搞咁多無謂野！唔係有個開幕禮浪費時間十點幾先開場，我琴晚已經要走上黎大陸訓定！」

我期望都幾大。香港加美國參展過咁多次，都叫做見過下大場面，呢度話晒「世界燈飾之都」，擺燈展點都叫做有咁上下江湖地位卦、叫做驚天地泣鬼神卦？

同我去深圳行街濕瓶差唔多feel。灰喎我。行到去自己檔口，灰er。我冇諗過所謂展覽可以商場到噉款。唔應該話係商場。係一個裝修緊又未裝修完但迫住要開的商場地盤。有冷氣。但有等於冇（拍得住皆旺108）。係用吊扇，即係小學中學課室天花板果ｄ風扇。熱到飛起。地下地氈又未舖好，人地舖完塊地係平，佢舖完係凸凹不平好似地理堂板塊模型，勁多罅位窿位陰你叉錯腳，然後一野踢起地盤式沙麈。咳番幾野先。執好晒掃好晒個檔口似番ｄ樣，諗住清清場先。唔記得左自己身在大陸。所以發現全場一個垃圾桶都冇時，好驚慌。醒起自己黎左大陸，就唔會咁意外周圍冇垃圾桶，因為係「本土特色」。

每次香港同外國展覽都好大陣仗，十幾個人砌足成日果隻，不過大陸展覽一來怕俾其他國內同胞抄野，二來第一次搞唔知咩來頭，個攤位好簡單兩三個工程師幾下手腳就搞掂晒，我就梗係坐係度印印腳等運／客到啦。或者聽聞過太多，加上本身已對大陸文化有一定認知，首次上黎做展覽，好多野已經見怪不怪。個名堂叫國際燈展。但你會見到好多明顯地同國際、燈、展三樣野都無關係的阿叔阿伯師奶阿嬸入黎行街市噉行，甚至有細佬踩埋單車入黎通街走（斷估唔會係年輕有為到咁細個已經做買手卦？）。同埋完全唔國際，鬼佬數量接近零見親都係大陸人，全體員合力發揚祖國民族精神，個個都係黎呃你公司卡片（拎資料去賣甚至做其他不法野嘛）同目錄（唔使講點解啦），而問佢地拎卡片時梗係例牌話自己派晒啦（第一日已經派晒勁啦真係），好辛苦先俾我撞到個南非妹（南非人係白色的），仲要係我ｄ客黎。
"Ho choi jon dou! Or hang gum dor gan gung ci gan gan dou hai tung or gong RMB, Duck lay day tung or gong US$"
人係好多，但基本上全部冇料到，十個黎到九個白撞一個混吉，第十一個真係搵野係我個南非妹客，亦係唯一一個。
坐足成朝，工作唔係招呼客人，而係趕人走。簡直戇居，好在唔係多人。頂唔順，出去行個圈先。唔係我會死／癲，對住班大陸同胞。

嘩。唔行尤自可。行左，更加懷念自己檔口，寧願死守面對各位客人（即係趕佢地走）都唔想出去。可能大陸人真係用屋村心態看待個展覽／展館，全場處處地方一式一樣仲要冇標記指引，同埋全場設計係有上冇落，全部扶手電梯都係向上，想落樓要行走火通道後樓梯，拍得住旺角皆旺咁懂得留客，雖然「條村」唔係好大亦唔複雜，我第一次出去行真係蕩失左路返唔到自己公司檔口，想搵路回歸，除左靠自己記憶同方向感，就係東南西北各翼之詢問處姐姐識別。返到去坐多個幾幾個鐘，依舊無聊。身邊廠展忽然有所感觸：
「唉！同上個月次展覽，完全冇得比！上次個展覽根本就係地攤場，乜人都入得黎間間公司都係拎野出黎賣，全個場得我地係諗住擺黎搵外國人生意。ｄ人黎唔係問你有冇生意做，係問你ｄ野賣唔賣！個展覽又乜公司都有喎，全部野賣得平五十蚊一條西褲都有，ｄ食品公司又任你試，我地個攤位過ｄ就有好多，眼訓過隔籬拎杯咖啡飲，口渴時行一陣又有保礦力拎，仲有好多日本酒同韓國酒任你試飲，都唔知幾開心又買到平野！」
「你肯收聲未？上次展覽我冇份你知唔知？」
冇錯以上係劉Sir同廠長之對話。連工廠廠長都係如斯，可想而知劉Sir份工有幾頹了。就係噉，大家頹下頹下就到食飯時間。朝早一齊黎但好快就消失左的工廠同事再次蒲頭，帶埋一大袋飯盒，
「我地去左買飯！」
「要兩個幾鐘先買得到，辛苦晒你地！」
黎過幾次大陸，做野有關次次唔係食工廠阿姐飯就係去茶樓幾舊水埋單果種，讀緊書時一班上深圳都係搵名食府，冇邊次係唔好食（食完屙就試過，但起碼食過好味先屙值番ｄ啦），今次工廠同事帶黎之飯盒唔知咩來頭，不過真係．．．好難食。大陸人除左食飯仲有另一樣野食，就係煙，香港室內一早唔准食但大陸冇呢條法例，一冇人或煙癮起立即人手一枝，煙已經成為大陸人生活同文化之一部份，我唔食，但狂食自己檔口ｄ白兔糖。逢展覽會較有體面之公司都會有糖果甚至茶點招呼來賓，我地今次有白兔糖，好多謝老細呢個選擇，因為除左白兔糖，咁多年黎我真係到而家仲未食過有糖係大陸出產或大陸品牌而唔難食，其實可以好似香港展覽噉買朱古力（註明係購自香港，同樣地大陸出產／出品之朱古力一律難食到爆），只係又要顧及大陸國民之文化，大陸人唔使錢就唔會執輸，行過見到有免費糖拎，就算自己唔食都要大手大手幾渣噉拎走，買朱古力咁貴咪蝕桌？白兔糖夠架喇，我又鍾意食，只係要同ｄ大陸人鬥快搶（明明係自己野都要同人爭，真戇居），最後都俾我KO到大半包，對得住自己。跟住廠長四圍行完返黎，帶番黎樣野大家好有興趣：
「啤牌？噉都得？？」
即係ｄ公司賣廣告免費派紙巾派書派mouse墊派乜派物都見過，勁到派啤牌賣廣告真係第一次見，大陸真係無奇不有冇乜野做唔出。大家都俾班大陸客搞到癲＆唔係多人悶到死，好想鋤番舖架，只係今日老細都在場，即使廠長頹如劉Sir，論地位廠長始終都係次於老闆一人之下，老細在場佢都未係最大一個，唯有大家收歛忍耐一下啦。唔通叫埋老細一齊鋤啤咩。
「雖然我覺得老細都一早悶到想拎副啤黎玩，只係佢礙於身份同威嚴，只好陪我地一齊收歛忍耐。」

坐到四點，悶，到我出去行。老細都唔干預喇，有ｄ同事出去行成個幾兩個鐘先返佢都唔出聲，因為佢都知個展覽真係唔擺好過擺，奈何中左招俾晒錢整好晒野點都要撐埋佢。頭先餐晏仔食得唔滿足，會場行左個圈只搵到小飲部得野飲賣乜野食都冇搵包薯片都冇，點知最後俾我發現：

原來KFC係大會指定膳食供應商！皇天不負有心人，我終於有飯開喇！雖然裝修完全唔KFC，除左收錢同賣野食個counter之外你坐同食之地方仍然係同某間工廠之簡陋食堂冇大分別，最少ｄ雞似番ｄ樣呃得下人先！旋趙左個餐：

一個餐包四隻雞翼一包薯條加一杯汽水，大陸KFC（或者只限會場KFC）冇薯格得薯條，普通啦唔係難食但亦唔太好食，雞就保持水準近番香港KFC，始終大陸食野都係幫襯番品牌檔同外國貨有保障。至於杯百事，係自動走冰的，但唔好開心住，唔落冰，但本身亦唔多雪，即係飲暖可樂。三樣夾埋你估幾錢？
「RMB$24。」
大陸人一餐飯只係十幾蚊甚至幾蚊，工廠同事一餐lunch公司津貼係十五蚊人民幣，KFC成廿四蚊個餐幾近香港水平，算係奢侈食物。但餓加口痕，食啦。俾錢時我差少少想問
「收不收港幣？」
我冇問不過。問左我驚會俾人笑。以前香港人上大陸買野洗港紙好威，而家轉左人民幣高過港紙，上大陸買野計番分分鐘仲貴過，好多大陸舖頭甚至講到明港紙唔收，問，咪盞樣衰？好在我傍身之幾舊水人民幣係兩年前唱定，即係港紙仲係高企大段距離時，叫做冇蝕到。人民幣升得高過港紙果日，正正係香港人正式成為港燦之象徵性日子。

食完雞再兜兩兜，可能係第一日，周圍人頭湧湧（自己個檔口除外），好多公司亦搵黎show girl幫手宣傳。而家真係乜叉都要搵條女先似樣。唔好意思冇著左只係好過唔著少少之超少布衫仔短裙，始終市場唔同班show girl都較為正常，又或者唔多正常。普通套裝旗袍實會有。有檔唔知點解搵左成班靚妹著晒婚紗。大陸展覽擺係第一次擺但睇之前都睇過幾次，發現大陸有樣野特別，就係好多時做宣傳做公關都係搵超靚妹做，好似今場見過之promotor甚至會場本身之詢問處女郎，全部清一色個款未夠秤果種，冇幾多個望落似過廿歲。唔止呢度，好多地方都係。
「咁多後生女，做乜唔影張相益下我地班契弟？」
「唔靚的。除左企門口個較似香港女仔算最標青，其他真係冇個得。同全部皮膚差到你驚好似冇補養過，好多都係靠妝遮。你應該多謝劉Sir冇影到相返黎。」

玩夠，先返歸。
「你條友出左去成個鐘，去左邊？」
「老細，頭先我去左刺探敵情！我去左幫公司收集其他工廠ｄ設計同產品概念，一片苦心！」
「咪扮野！我知你頭先去左食雞！」
「你又知？？？」
「點解你會拎住杯百事？」
等我仲諗定晒台詞，點知老細都會篤得爆知我去左食雞咁醒！（「．．．」）此情況，自不然係發爛渣：
「噉點丫！你吹得我脹咩！」
「噉又係劉Sir！我確係吹你唔脹！」
老細旋消失，兩個字之後，蒲番頭，仲帶左桶雞：
「你同我食晒佢先好返香港！」
一桶有幾多？我地又睇睇：

一桶 ＝ 五件大雞 ＋ 半打雞翼 ＋ 一條粟米 ＋ 兩個餐包 ＋ 一枝百事。以量比，似乎香港買一桶抵得多亦多野食得多。除左冇薯格，大陸KFC仲有神奇的餐包，食落似甜麥包，不過香港KFC賣果隻鬆餅仲加好食。頭先食完個餐，已經十分飽（「我唔信！」）。老細即係你諗住買桶返黎就一早講定丫，等我唔使自費食左餐先啦。係我都唔係太想食。不過。有食唔食，好折墮。即叫在場所有人唔好同我爭。

環境係唔好，性質係難頂（要應付各方混吉大陸人同趕佢地走係一種厭惡性工作），大陸展覽有樣好，就係早收，香港展覽會六點半先走得人，大陸早一個鐘，執埋野去埋個廁所，五點九就可以開車回程喇。因為跟住兩日唔係我當值，就跟老細車直接返香港。聽日重陽跟住禮拜六日，各位司機大佬自然把握時間放假前返到香港同送貨入倉，回程理論上兩個半鐘就得因為唔使兜路返工廠又識路，實際上呢，就梗係唔止啦。齋同廿幾架貨櫃車爭線已經夠玩個幾鐘。
「你睇下！又係你！冇次同你上工廠會冇事發生！」
「老細！記唔記得我地第一次上廠，果日係十一黃金週之前一日，成街塞到郁都冇得郁，仲要炒埋架貨櫃車打橫擋晒條路塞左八個鐘先返到屋企？進步左架喇今次我已經！」
八點幾九點返到香港，第一件事係收到107通知，因為劉Sir不在香港，香港股市立即昇破三萬點。我完全唔意外，一早已經有預感。
「大家唔需要咁雀躍地感謝劉Sir，你知佢份人低調開！各位股臣斟量添添香油錢俾股神劉Sir以表心意就得架喇！」

重陽節梗係去登高啦。我登左返公司。冇計啦，中國人就話去登高嗟，外國人關咩事？佢地係要今日上黎公司搵我地，我都冇計唯有奉陪啦，不過唔係咩壞事，前排係噉射波射到冇晒假加蝕左日幾，即係你知啦劉Sir本身已經冇野好做好難夾硬搵個禮拜日返公司話要OT做野嘛，難得有客人肯紅假上黎，
「好呀好呀唔好放飛機呀你唔該！」
名正言順可以紅假返黎返工正！見客呢家野都叫做駕輕就熟，加上呢兩個星期極多展覽多數客人都係一日走幾間廠，唔使我催班人自不然上黎一陣自動急急腳走人。話呢，就係返黎見客，但「見客」其實只佔是日工作時間半日四個鐘之四份一唔夠。其餘四份三，同平時一樣，即係上網、上網、上網、上網、上網．．．
「上上下就多左半日補假了好野！」

一點鐘就走人啦大佬，就算唔使開舖，要扮做野扮做全日唔係容易架。口痕，又食左碗吉野家特盛牛肉飯。出左唔係好耐嗟一個左右咋嘛，點知咁快就轉左盒。以前個垃圾站巨型垃圾桶形橙色盒變左紅色，顏色變左冇緊要都係噉食，慘在入面都變埋。打開蓋，而家多左個盤擺放，不嬲牛肉同汁係直接倒落飯面開蓋就食得，家陣牛肉分開放，即係要先拎盤牛肉出黎先開得餐，好似堂食噉款。完全唔明點解要噉分法。個盤本身難拎出黎，多左個盤又要霸多ｄ位黎擺大佬邊有咁多位放野呀，跟住倒番ｄ送同汁落飯度有90%機會倒到通街都係，頂唔係個飯好食真係試一次之後唔會再叫。本來好地地搞乜春要做咁多無謂野？可能係商業陰謀：未轉盒前，開蓋睇到牛肉堆到上頂，極多；轉盒之後開蓋牛肉睇落一樣咁多，只係用個盤托起中間係成層中空，換言之變相少左牛肉。灰爆。連爆幾句粗口。
「係好唔妥佢地而家，但同麥記一樣，小係噉小，但小完，照係噉死。慘。」

聽到一單真人真事：有位師兄同我一樣，春風化雨之餘亦為metal中人，教書時仲有夾band，係一本地melodic death band鼓手（現已為ex）。後來種種原因脫離教育界，之後自己搞生意賣軍事野，越搞越大，最近傳聞係
「賣槍，賣到一個月成百萬！」
「嘩！一百萬？賣真槍呀佢？」
一百萬係咩先？盈利同生意額相差好遠架喎！我都唔太相信係講緊盈利，但就算係生意額，當利潤10%，都一舖賺成十萬，就算唔係個個月有咁多，當你每年一閏都賺到你笑啦，而且當可以去到一個月有一百萬營業額，其他月份衰極都唔會少得去邊。身邊好多成功人士，一係教書教到升埋職，教左唔係好耐已經講緊兩萬幾一個月；一係出黎做其他野，但唔教書一樣搵到錢，最少仲可以做到搵錢搵得多過教書。而劉Sir仍然係全屆畢業生中月入最低果個。或者因為自己笨柒。當連香港玩metal果班都唔多聽metal（同樣註明，係metal，唔係metal band）、起碼叫會聽metal果班又冇幾多個會買碟同試新野肯聽地下野，仲諗住係香港賣metal、仲為左metal去堅持落去，就未免太過戇居了。一早放棄走去搞第二壇野，可能我已經係其中一個成功人士。

係呀禮拜日呀今日，但公司又見到我。大陸展覽個更表，我係返上星期四，同黎緊兩日禮拜一二，因為係朝早一早開始，所以我要今晚上定工廠訓，第二朝一早出發。
「噉關你日頭返工咩事？」
我地計劃得好周詳的。既然前日見完客要跟番開會ｄ野，今日又晏晝買飛上船，就日頭先黎公司做野，晏晝放工去買船飛再行陣街剛剛好。
「素聞劉Sir辦事速度奇高，以劉Sir之工作效率，以前幾日之空餘時間（按：即99%上班時間），相信劉Sir絕對可以短時間內完成有關工作。理應唔需要今日禮拜日先返公司『完成』得到。」
「殊！細聲ｄ！」
「又據聞劉Sir可以網上遙控到公司部電腦，即係留係屋企都可以用到公司部機做野。點解仲要返黎公司做？」
「你仲講？？？」
本來計劃係十一點鐘返到公司，做四個鐘呃半日假之後三點走人，因為尖沙咀上船出去買完飛仲有得行街，行個零鐘食埋飯就可以上船了一Ｘ流。只係你都知劉Sir幾黑仔架啦。十一點上到公司門口，先發現自己冇帶到公司鎖匙。公司又未有人喎！立即急call老細，要老細親自飛車出黎開門俾我。
「嘩，到底你同你老細邊個至係真正老細？」
雖然好多打工仔想做老細，查實做老細係辛苦過打工，打工起碼俾盡你六日叫做有日假期放，但做老細你威水搞得風生水起唔使做都幾百萬落袋一回事，通常都要親力親為返足七日，老細今日點都要返黎做野架喇，我只係提醒佢早ｄ返黎嗟。不過老細噉都忍到我肯立即出車返公司兼唔小九我，又確係幾難得的呵呵呵呵。只係因為噉，搞到全日計劃延遲左半個鐘。由十一點發現冇匙到十一點半老細趕到，中間果半個鐘去左公園捱。等我見今日要返黎做野，特登去麥記買左個早餐諗住返公司邊做邊嘆，噉入唔到公司冇理由拎住個早餐周圍走嘛一定要食埋佢啦，公司附近最近有得坐就係公園迫住要去野餐。灰在我仲要係買早晨住餐即係要自己落手砌個豬柳蛋漢堡出黎但又要貴過就噉豬柳蛋漢堡餐果個早晨全餐，我成日覺得ｄ人叫呢個餐好犯賤俾多錢又要自己整，見今日返公司開OT貪得意叫左個，跟住好得意地淪落到去公園冇檯要同一地一凳螞蟻爭食超折墮。

十一點半先入得場，既然遲左半個鐘打卡，我就頹多個半鐘頭匿係公司唔做野，快手快腳搞掂前日開會單野，跟住就係玩同上網同頹，到三點半準時放工。今日搭六點鐘船，四點未夠出到去仲有大把時間，尖咀都係果兩三度架喇我識行ｄ乜丫。預左上船同返到廠會冇啖好食，諗住今日香港之旅去新港埋尾，好鍾意新港地庫美食廣場有間日本咖哩，勁好食架佢地賣果ｄ日式咖哩飯唔係平時唔順路同價錢貴我肯定成日食，既然今日食飯開公司數梗係唔客氣，點知黎到先知原來新港地庫成層執晒封左。灰。搞到要食麵包，買左三十蚊係噉食。邊食邊等，
「丫乜今日班船咁早到？」
五點半已經見到閘口話入得，五點八已經上得船了。我都感到狐疑，
「有冇咁早呀？」
問埋在場的姐姐仔，姐姐都話「係」，咪上船囉。上到船，班船早左足足四個字開。開始肴底。求祈捉件蛋散問問：
「班船去邊架？」
「去珠海！」
「乜唔係去番禺咩？？？？」
碼頭完全冇標示、入場冇人對飛冇人理你、問埋人個個淨係識講「係係係」，大陸野果然係大陸野。好在仲打到電話，立即call老細再搵工廠問定路點由珠海走番去工廠。
「搞掂。」
上聯係搞掂。下聯梗係餐蛋麵。係食左包係知道船上面ｄ野唔好食，不過口痕，反正都係搭錯船，叫多碗餐蛋麵嘆嘆先。結果．．．
「真係好死難食。」

坐船去番禺要兩個鐘，點知珠海早成個鐘七點未夠已經落得船，瞌下瞌下就到都未訓夠。工廠教路珠海過工廠先巴士轉的士兩程車，落左船仲有九個車先有巴士，
「正我要行街！！！」
好多人蕩失路會好驚，我反而好開心，因為可以去第二度行同玩睇多ｄ野！（請永不要從正常人角度剖析劉Sir）但出到門口立即唔開心，個車站係獨立起遠離市區，最近市集都要行一段路，人生路不熟又唔係多時間廢事亂行啦，唯有匿係車站入面浪費九個字。全個站乜都冇，只得一檔DVD檔，即係報紙檔DVD版，格局完全係報紙檔feel，但你一份報紙一本雜誌都搵唔到，全檔擺滿各式古今中外電視電影動畫DVD，冇野做加咁多正野，圍住個檔行左十幾個圈，高達差唔多全線齊晒，就係冇我最想搵之Turn A，有的話必定執套。七點九上到巴士，問賣飛個阿姐：
「要搭幾耐？」
「嘩！冇兩個鐘都要個半鐘！」
六十五蚊呀大佬我真係未試過搭巴士搭咁貴呀。內陸巴長途車少坐，第一次坐巴士有廁所，但係唔敢試，部車已經夠臭唔使領教埋個廁所喇。行左半個字唔使，沿路經過勁多商場同娛樂場所乜都有多元化，
「頂原來咁多野玩！如果我今晚係滯留珠海你話幾好！」
有時真係羨慕大陸人，八點幾已經大半條街黑晒，好多舖頭晚飯時間已經閂門放工，得番四份一左右舖頭同食肆繼續營業。換著香港做sales做食肆，冇十點零十一點你都唔使旨意放工呀大佬！搭長途巴士最正梗係訓覺啦，可能頭先船上面唔多訓到搞到好鬼精神，兩個鐘車程係噉聽歌同睇電視，同香港巴士一樣大陸巴士都有電視睇叫Bus TV（真夠慳水慳力），除左萬幾個廣告同港產片VCD冇乜好睇，有個旅遊節目搵左兩條女做主持，台灣有大S小S，佢地叫大Ann小Ann，笑爆。
「有番少少創意得唔得呀？」

好彩喎今次唔使兩個鐘就到站喎各位乘客冇俾劉Sir連累。所謂「站」，係高速公路旁邊有個位凹左入去個凹位入面一間破落爛屋，仲要係丟空Ｎ年冇人冇燈果隻，點睇都唔似係車站或供轉車之中途站，條公路本身已經冇燈冇人得車經過，夜媽媽黎到呢個地方都咪話唔驚。落緊巴士對腳都未掂到地，已經一班電單車黨上前塞住巴士門口：
「要不要車？」
即係你貼錢俾我我都唔敢咁夜坐呢班電單的車尾。好在仲有架的士，即時跳上去先冇事，班電單的見冇生意，仲要兜多陣圈擾攘一輪先肯走人。大陸就係咁得人驚。好在個的士佬識路，咁夜九點幾唔會塞車，半個鐘就飛到返工廠。路途上，同個的士佬吹左好多人。人地坐成晚等成晚都悶啦大佬。仲要難得呢ｄ時間呢ｄ地方撞到香港人。有趣地，個的士佬唔係的士佬咁簡單，而係一個文化人，大家乜都講，大陸、香港講到去韓國，我都唔太信佢（只）係一個的士佬。
「坦白講，即係香港撞過咁多人，好多都及唔上呢個相信好多『香港人』會睇唔起的大陸的士佬。」
真係要佩服大陸ｄ的士佬。行市區識路唔奇。大陸ｄ工廠所謂地址只得「某鎮某村某工業區」之類其他乜都冇，入到鄉鎮區又度度一樣樣根本冇任何街道之分。個的士佬又知道高速公路邊個位轉入就係我工廠個鎮鎮入面邊條係咩村，跟住大家都唔知確實位置係邊，就大家開住架車周圍走搵路，放心大陸的跳錶好平的。做左份工咁耐黎過咁多次工廠，你知一向我係老細做司機嘛講認路我梗係唔識啦，又今晚之前未試過入黎鎮／村度行活動範圍只張工廠入面，請勿妄想呢種情況劉Sir會有用處（「我地冇！」）。村真係村，基本上冇乜街可言就係一條大路幾條細路兩邊全部村屋仔，真正村屋拿呢ｄ就係。全條村只得一條真正街道，就係中間條大街，所有豪宅（即係大小小的村屋）同商戶食肆都集中在此，九點半入到去好多舖都未散又多人行仲旺過市區，人多到的士佬都要開慢架車慢慢過，正好俾個機會我可以睇真ｄ。衰在當時冇相機。不過有相機都唔敢影，我怕驚動到全村俾眾村民圍毆。穿過出口個牌坊（夠old-school未？），司機問：
「香港有地方像這樣嗎？」
「四十年前還有。現有沒有了。看電視古裝劇有時也見到。」
最後總算摸下摸下摸到去工廠門口，全程半個鐘。雖然司機大佬只限去到村之地步跟住唔識路，已經算好好架喇大佬夜晚燈都冇得車頭燈搵路又周圍唔係草就係樹，佢撞得到入黎呢條村算係噉架喇。
「見你咁合眼緣，我先送你入到黎村咋！唔係個個司機肯黎呢ｄ地方架！不過都好過以前，幾年前呢ｄ村地得泥路，路都冇條都唔知點行，果時ｄ外省佬大把錢俾我都唔肯黎！」
半個鐘廿幾里路，你估今程的士幾錢？都只不過六十蚊人民幣正，包貼士。抵。我只想知道佢地點維皮。一程收六十蚊，但入村落客之後個幾鐘車先出得返去載另一個客，單出村程油錢都蝕番啦，而家油價幾高你知唔知？（劉Sir柒知識：大陸油價貴，都仲平過香港近一半）
「生活艱難呀。」

根據公司本身安排，香港同事六點鐘坐香港船，兩個鐘船到番禺再轉工廠車，八點半就到工廠承惠港幣一百七十元正。本身有兩位香港職員按此途徑上工廠，係有條ＸＸ唔生性啦（「好似叫ＸSir喎果條ＸＸ！」），自己戇居，結果使多左百三銀＆個半鐘先去到工廠。
「都黎到呀！吹咩老細！」
我地香港同事以往上到工廠係訓老細個單位，今次老細（香港果個）冇上黎，就寄居到另一位老細（大陸果個）個單位。講大，大陸老細個單位大過香港老細果個，但對比就睇得出香港人同大陸人生活態度。香港老細雖然好少上工廠，可能一個月先得四五次，多數只係lunch時訓個零鐘過夜都冇乜機會，但次次上去都係超乾淨勁企理住我舒服。但大陸老細長駐個單位就係佢屋企，日日都有阿姐執屋打掃，但就係殘唔知點解，周圍積晒塵起晒跡生晒鏽唔理就係唔理，慣晒卦。換著係香港人，對居住環境執著得多。上黎之前，老細特別由香港送左大袋杯麵上工廠。因為大陸仲有個非常緊要的問題：飲食。大陸都有杯麵買。問題係，身為香港人的你，信唔信得過品質先？我自己都係上船前買定麵包以備不時之需。講到飲水，自己煲又好，工廠飲飲水機桶裝水又好，一係有粉，一係有味，大陸真係想飲番啖似樣的水都唔係易事。（會計靚女搭嗲：「我以前做野間公司，辦公室ｄ水直頭係個個禮拜由香港運上黎添呀！」）入到房放低野撻低開個電視睇睇，
「喂老細點解冇無線同亞視？」
「我而家係廳睇緊喎！」
老細客廳部電視有得睇，我房果部香港台得明珠同國際台冇中文台睇。雖然大陸多香港幾倍電視台，見過咁多香港人，個個都係睇香港台，大陸人又醒喎係收到香港電視台同同步播放，但一到廣告立即轉播大陸廣告。
「大陸人睇到香港電視台，政府唔怕政治不正確咩？」
明珠台今晚又播《X-Men》，睇左超過四次都係抖抖算，開部電腦先。
「咁勤力做野？」
梗係冇可能啦你知劉Sir。帶埋部電腦上黎，係俾電腦同mp3機叉電，當然可以順便寫寫野啦，最大用途自然係令老細刮目相看：
「咁辛苦黎到咁夜都仲做野，你果然夠搏命！」
「多謝老細讚賞多謝多謝！！！」
開完機，攤低，聽住歌，十點半就訓左覺．．．

．．．第二朝五點半就起左身。幾早，包括訓同醒？其實五點再其實係凌晨四點五十五分起左身，不過聽歌，再撻多陣聽下聽下先肯起，沖個涼刷完牙洗完面先六點三（之前果晚我特登涼都唔沖就係等今朝架），仲可以過去踢老細門，再走返入房印印腳繼續打陣機聽陣歌。
「有冇可能呀？真係劉Sir？」
「劉Sir香港以外生活好唔同。做展覽可以晨咁早彈起，但平日返工未到射波臨界都唔肯起身，吹脹。」

咁早起身係需要的。大陸人同香港唔同，全日作息調早個幾兩個鐘，好在而家仲係熱天咋，冬天果陣，五點幾你唔起老細已經自動叫你起身，六點鐘全工廠起身跑步喇！（立即好慶興自己香港人的身份）展覽九點鐘開始，在香港梗係九點先到啦最多早三個字，但大陸老細乜都要早就要提前一個鐘到場準備，工廠開車過去要一個鐘，即係七點鐘出車死未？我訓工廠冇所謂呀加上我夠早起身，同行仲有其他住市區之工廠同事，我都唔知佢地點樣咁早起身返黎工廠集合一齊出發。朝早陽光唔猛烈，郊野地區冇高樓風大非常舒服，廿幾度又唔曬，坐車都坐得舒服ｄ。工業區轉番出條村，做得村就梗係未開發香港人眼中仍然落後啦，人口非常疏落又冇大型建築，行過都係農地同鴨場。
「上個月報紙賣番禺鄉區爆發禽流感，咪就係呢度囉！」（劉Sir「世紀黑仔王」化身之說早已傳遍工廠，各位內地同事同鴨農無不散發沖天怨氣）
農村地區係落後係唔方便，但生活環境就係舒服同自然，朝早吸啖氣都唔同ｄ。好多大陸「村民」都想出市區，除左為生計，仲因為對都市有所憧憬，就同城市人過盡急速逼迫生活後想歸園田區一樣，大陸人想出，城市人想入，因為未試過。但好多大陸人出過市區，最後選擇係重返農村，生活優悠得多亦冇太重壓力（唔向錢看的話），同環境真係冇得比。好多靚景，不過冇影到相，實在太舒服好訓唔想郁。

八點三停車訓醒，到站，顧及番我地香港人生活同驚唔慣，我同另一位香港同事獲優惠可以先去食個早餐，其他工廠同事先入會場準備。幾日前黎冇入過市集，單車上沿路觀光，已經知道大劑，根本成條街都係賣燈。今次有司機大佬帶路，三個人行左兩個字，冇一間舖頭個名係冇「燈」、「光」或者「照明」其中一樣。唯一一「間」非賣燈舖頭，係報紙檔。大家都係第一次黎，亂行行到入唔知邊條橫街，先搵到一間食粥，唔敢再搵第二間啦點知使唔使又行多兩個字？唔知係天氣、開源還是地區文化，我地食早餐時間係八點半，間粥舖唔係露天係街邊室內地舖果種，陽光猛卦，間野係唔開燈加唔開冷氣，仲要係食粥添就係咁有風味。三個人叫左成檯野食，有兩碗白粥（真係完全淡到冇味入口只覺流質乜味都冇之真．白粥）、油炸鬼兩條（唔似香港孖住上係兩條駁住一條上仲要好粗一條等於香港三條）、煎堆兩個、一碗豆腐花、一碟豬肉豬加多個糯米飯。你估幾錢？
「十一個半？？？」
俾錢時我都唔信。真係食正餐咁多喎先係十一個半？
「香港一碗粥加條油炸鬼已經差唔多呢個價啦！」

九點幾去到，坐，一路坐。講過大陸展覽會多不勝數，黎到第四日，今個禮拜已經同其他大展覽撞，唔好話鬼佬，大陸人搵個都難，全日人流接近零。既然得閒到噉，六條友坐係度吹水，唔係點消磨時間呀大佬九點坐到五點半喎。原來大陸人而家都好關心香港時事仲非常緊貼，分分鐘比香港人更熟更熱心，雖然我地香港人知道香港根本一日衰過一日就快完全俾大陸拋離，始終都市環境同發展都比大陸好，點都仲對香港存有一定想像。只係當大家交流過兩地生活指數之分別，例如早餐，就發覺都係算Ｑ數了。
「我那個300尺單位，兩年前十四萬買下，現在樓價高漲，已經升到四十二萬了！」
「香港一個300尺單位，便宜的都差不多要一百萬！」
「一百萬？一百萬在內地，差不多可以買到這個展覽館整層了！」
「灰！我們咸是港燦！」
最正係今日老細唔在場，香港老細因為近來奇多客人要見要留守香港大本營，大陸老細自然有大陸富人風範「使自己做咩梗係叫ｄ細既做啦！」廠長個頹款你都見過啦，再加劉Sir在場，想像得到今日班友會幾放肆。冇野做又咁早，走出去行，我參加呢個係燈展係賣燈，但唔知點解，我個檔行過幾個位，有一檔係賣．．．磅。同好多老豆老母推住BB車經過，好有行年宵feel。行多幾個展廳，全場死寂，見最多除左訓覺就係剝花生，祖國色彩的消磨時間方法，有檔勁唔剝花生剝瓜子（喂新年唔係仲有四五個月先到咩？），不過最有創意大獎要頒俾一個老母，佢直頭帶埋個BB入場，一面睇場，一面湊仔。更加多公司直頭擺左三日之後全員撤退，梗係啦，反應同前幾日相差咁遠，場租俾足就蝕硬架喇，及早收皮起碼保番燈油火蠟人工錢先。點解我地公司唔效法？

真係悶到飛起。即係吹水都吹到乾啦，班友一係走出去煲煙順便四圍行，一係匿埋一二邊訓覺。到十二點半，我好高興自己仲未悶死。立即走去食番個雞先。又係廿四蚊雞翼餐乙個。我知你會問架喇，就俾個餐牌大家睇睇，解答部份朋友的疑惑：

「點解你唔食大雞？」
唔知問果個有冇你份。睇完個餐牌，你明啦。大雞一係跟桶上一係散買，普通餐想食雞一係成個包一係雞翼，我對包冇興趣又唔鍾意食燒翼，只得一個選擇啦冇得揀啦。係唔明點解雞包餐料多過雞翼餐，但價錢反而仲平。
「理得佢。好食同知道食左唔會有事就得。」

食完，走出去行，我係指會場外面出到街行，仲留係展覽館死硬。反正預左會行個幾鐘（我當自己食兩個鐘頭飯，已經收歛左架喇），今次向另一個方向行往市集進發。終於俾我發現到有商場喇。

因為太多時間（應該話因為返到去會太無聊），成座商場行晒。地下係貴野，唔關我事，一樓係超市，無聊到成層行晒，不過冇買野（飲／食），原因講過啦。再上賣衫，想搵皮褸，一長一短，
「唔整番件皮褸，邊度rock得起？」
點知冇。再上。最頂就正喇，賣玩具，梗係國產貨多啦，變形金剛自然有但係少款過香港好多，同埋價錢拍得住香港玩具反斗城咁貴。都唔係問題。只係唔知點解一上到去，全層所有員工（又係妙齡妹妹居多）立時將注意力集中到呢位香港來客身上。更多職員走上前詢問佢有乜需要。
「咩呀！超齡唔玩得玩具咩！我要變形金剛！」
好似玩具部只有細路仔入得噉。為保顏面，閃。

兩點幾返到檔口，全無分別。係檯面多左張問卷。咪又係咩「客戶服務效用意見」之類。就等我寫臭你。
「『請為本展覽各方面打分數，一分為非常不滿意，三分為滿意，五分為非常滿意』．．．好，睇你點死．．．喂！點解條條都係得三四五分揀！一分果行呢？」
頂佢個肺。可能主辦單位都知道實會俾人怒小，索性唔俾一二分你最少都要表現「滿意」，事後宣傳就可以話俾人聽「迴響100%正面」呃更多人落搭。冇人黎，連問卷都玩埋，點算？捱下捱下，就訓左。訓到不知多少時日後醒番，發現全公司六個人全部訓晒。跟住對面個攤位走過黎話：
「頭先有個人拎住好大台攝影機入黎拍野，用咁大部機，應該係電視台ｄ人黎！佢經過你地個攤位時影左好耐，我諗今晚新聞個花絮部份會見到你地上鏡！」
「真係？噉我要打電話叫老細set定錄影機先！」
終於去到五點半。今日過得相當辛苦。所以各位同事大家同心協力高速收檔。
「話時話，呢度去澳門，遠唔遠？」
「唔係好遠，個零鐘車就去到。」
「早講啦！今日咁悶，係就鼠過去澳門玩番日啦！」

每次香港同事到工廠，老細一定會熱情招待，好似今晚收左工，返廠之前大家先去工廠隔籬村間知名大排檔人民公社食晚飯。

一個簡陋竹棚半露天飯堂，完全按足「當年」搭建佈置，就連侍應都要一身紅衛兵打辦，冇錯呢間係一間主題餐廳，好認真地去主題果隻。食呢就同香港大排檔呀打冷呀一樣，即係如此環境下加紅衛兵陪伴，食得有feelｄ囉。
「呢間人民公社出晒名，全部野即捉即整夠新鮮夠風味，就連好遠市區ｄ人都專登開車入黎食，成區出晒名。因為你兩位香港員工，我地工廠職員先有幸公司俾錢黎呢度食咋！」
又真係勁好食，今次展覽最似樣就係今餐，六個人叫五個送九十蚊加無限白飯，真係好食到爆，唔係要出公司單claim錢肯定再叫多幾味。公社入面有竇狗，唔算係養又唔算係流狼，叫做寄居狗卦，都係有病或者有殘疾，住得係飯堂居然有命冇俾人整黎食，或者因為太多病太老食果班睇見都嫌唔好食卦。睇見佢地個樣都幾慘，但又可能已經比出面建康健康冇病冇殘冇缺但要周圍偷野食仲要除時俾人捉黎食之流狼狗幸福，因為飯堂入面個個食完野，好多時都係順手掟落地下就算，班狗見地下有野食自然會走過去食，所以一有人開飯，自然會有狗坐定側邊等人餵，你見後正ｄ骨呀乜呀都要掟架啦就梗係拎晒黎餵佢地。噉客人滿足，班狗又有搵到食，食果陣又幫手清潔埋個地下，又難怪公社會肯收容佢地。食食下，
「咦？前面樹林火燭喎！」
小火嗟未至於有危險，我當晚飯餘興節目。只係各位同事同在場眾人針對劉Sir的怨氣，又再加深。都係快手食完走人，費事連累大家。

七點鐘食食左個幾鐘，飽晒仲有火燭睇添（．．．），走人。抹完咀，想搵個垃圾桶。大陸同事訝曰：
「隨便掟落地下咪得囉！你地香港人真係有社會公德，超前大陸二十年！我個女今年出世，佢二十歲果年，希望社會公德方面及得上你地！」
夜晚公路冇人冇車，司機開盡都只係六十米，諗番老細次次開車冇百四都百二，大陸人確係乜都慢ｄ。
「香港搭車幾錢？」
「我返小巴返工，三個字港幣六元整！」
「好貴喎！我地搭公車，一程半個小時都未有咁貴，可能先兩三元！」
「你黎到香港搭地鐵的話，仲驚。」
「好貴架？大陸ｄ學生冬天屋企冇暖氣，就一早坐地鐵霸位溫書，兩蚊由朝坐到晚，車廂仲有暖氣！」
「香港地鐵如果你入閘兩個鐘唔出黎，夾硬收你最貴車資三十幾蚊！兩蚊？兩蚊一程車都搭唔到，最平都三個幾啦！」
香港學生話要溫書，大把選擇，屋企嘆住溫、去自修室、去圖書館、返學校．．．總有地方。大陸學生係搭地鐵先有暖氣溫書。呢種苦學生故事，香港好耐未聽過、好耐未有人提過。年代真係唔同左，你同而家ｄ香港人講番呢ｄ野，班靚仔真係唔明你講緊乜。所以點解香港人唔夠大陸人鬥。
「你都未捱過。你知咩叫苦咩？」

返到房第一件事，係攤係度聽歌。正。唔係好多呢ｄ機會，屋企都難噉樣乜都唔到靜靜訓住聽歌啦，工廠張床又要大大張舒舒服服喎。聽聽下就訓左．．．

23/10/2007 TUE

第二朝早，七點起身。唔係我醒，係俾人嘈醒。
「咁遲起身？你唔使去做展覽咩？」
就係唔使呵呵。琴日展覽會完左之後，老細下旨，因為下星期到香港展覽加晏晝有客人到廠，我豁免唔使去展覽會，留係工廠睇定香港展覽個攤位點搞同幫手見客。俾我揀我寧願去展覽會，玩嘛大佬又冇皇管喎。但皇命如此，冇計啦，唯有七點鐘同事起行果陣，起一起身笑佢
「咁早起身！抵死！哈哈哈哈哈哈！！！」

跟住撻番低繼續訓。工廠上班時間呢，就比香港早一個鐘三個字返八點，而我呢起身果時係身在香港的話都已經俾老細call爆電話call到電話都冇電視之時。
「．．．今日星期日咩？做乜冇人叫我起身？」
我又衰喎冇帶鬧鐘上黎，電話個鬧鐘又咁蹻琴晚唔記得左開（well，當中有點兒故意的成份都唔奇架），老細居然又唔叉理我（似乎佢同香港老細一樣，睇化左了），怒撻到十點半先紮醒。跟住緩慢地起身沖涼刷牙換衫執行李。十一點半落到工廠office，撞到老細。
「你知唔知工廠幾點食飯？」
「唔知呀，幾點呀？」
「係十二點！」
「係？唔怪得你冇叫我起身啦老細！都未夠鐘！」
立即衝番上房，再訓。正。香港都冇如此福利。開始想向老細申請長期駐守工廠了。

晏晝有客黎關係，經理十一點幾到工廠，十二點同我地一齊食飯。大陸老細素聞劉Sir眾多傳言，而家已經自動自覺，每之我上廠，都會柯打廚房阿姐斬成隻雞。今日隻雞拎左黎煲湯。正。連飲四碗。
「食呢？好唔好食？」
「如果係麥樂雞或者肯德雞我會食得更加開心囉！即係滿足我其實唔需要咁複雜架老細！」
食完又訓，兩點被摷醒（有理由相信唔摷的話開車回程返香港之前我都唔會郁），客人到喇。我職責係介紹工廠俾客人認識，個客當然係鬼啦。唔知點解，我好鍾意見客更鍾意帶客人遊工廠，一面行9up，差少少講到個客人以為我地工廠係做雪櫃。
「超！個客又唔係我個客！關我叉事！」
個客本身三點鐘要走去第二間廠。唔好彩撞到劉Sir，搞到下一站遲左三個字到。

個客走左，立即上車，返香港最少都要兩個鐘啦加上你知次次有劉Sir份梗有大鑊野發生，不過坐左去上瞌瞌訓訓，等極都未開得車。因為仲要搬定香港展覽ｄ野上車，挑戰一架七人車之裝載量極限，搞到四點先起行。再訓（訓極都有得訓係劉Sir本色），經理都知劉Sir懶就連過關都係乘客跟車過唔係平時跟老細車時自己落車過，四點幾出車臨放工同趕貨時間塞車，經理手車又慢，返到香港仲要五點幾塞上加塞，全程接近唔使郁正呀。順利返到公司，我訓得好滿足，只係有人好唔滿意。
「我地過一次關一次最多帶三包煙，今次架車裝辦裝到走私噉樣，諗住過關時海關會查車，點知冇！早知咁順利，就買番十幾條煙返香港啦！」