Frankfurt Freewalk 2011
Episode 7
2.3科隆自由行．火車總站＆大教堂
Episode 3：1.28-2.1之做乜鬼野展覽丫落吧蒲去睇show才是王道
3/2/2011 THU 法蘭克福
展覽完結後第二日，同事陷家去巴黎玩，其實我留三日從來冇諗過做乜好，亦冇研究過德國有咩玩。係做展覽時聽同事日講夜講，以前擺開科隆個展覽，今年黎左法蘭克福，但佢仲好掛住科隆果邊，因為做展覽之餘好靚好多野睇好多野玩，點點點點點點點，訛到最後我即興上網買張火車飛，琴日海德堡玩完，今日又坐火車出發了。今次仲要坐子彈火車。
火車站望出去，個天仲黑媽媽，梗係啦，為左玩盡，特登買班早車搭七點半，酒店自助早餐都唔食就出發喇。
琴日海德堡來回火車先廿幾歐羅，點知科隆都係來回兩程，頂你收我133，兩個地方都係搭一個鐘，但貴成六倍。同當地人吹吹水，因為多數來回兩個商業區都係生意人，旅遊又發展得好，唔似海德堡只得古建築幾味，乜客路都食晒，仲唔食水深咩。
不過服務真係冇得頂的，今日係大年初一，查飛個阿叔見到我中國人樣，同我講左句
「工時花踩！」（如果係kung hei fat choi就更加正了）
3/2/2011 THU 科隆
之前分享點解科隆火車飛會貴其他地方幾倍果個德國佬，仲同我上左堂history。話說二戰時科隆係其中一個戰事最激烈地區，日夜空襲夷平好多地方，戰後需要大規模重建而比較多摩登建築，亦係令科隆成為繁榮商業區原因之一。火車總站就係新派建築起得好鬼靚，想古老都得另一邊展覽場館站就似法蘭克福總站舊樓新用，不過今日兩程都總站上落，又唔似以前係黎科隆擺fair，冇機會試搭另一個站。
就我所行所見，新舊建築並排並存係科隆城市特色，兩者比例不差太遠，對比大過法蘭克福，亦冇海德堡咁偏古色。
而科隆最出名景點科隆大教堂，正正火車站旁邊一出就見到。真係好宏偉。不過，又搭晒棚．．．
真係太早喇，八點半鐘落車，人地乜舖都九點幾先開想食個早餐都搵唔到，天又仲黑媽媽，早知搭遲個半鐘，酒店食埋早餐先過黎啦。蝕左朝自助餐添。
見張電話卡仲有差唔多半個鐘，今日大年初一，計番香港應該晏晝四點左右，就一路四圍行一路打電話返香港同大家拜年了。最緊要當然係提提老豆老母同親戚
「拿，我人唔到，你地禮都要到呀，唔好扮晒野唔俾利是我呀！」
打晒電話拜年，想去旅客中心八八又等極未開，搵個地方坐低抖抖先。大教堂對出個公園仔，咁鬼古典加多幾棵鬼屋後園款的樹，好鬼gothic。冇野做到我．．．
終於天光，香港六七點見太陽，黎到德國八九點個大白天先至光少少有點唔慣。教堂未出場住，仲有其他野要做。
遊客中心門口話九點開，搭正門口等，有幾個人入面吹水就係度門鎖住入唔到，等到九點幾班友先正式開工，嘆得佢地。跟住先叫真正見識。買左張地圖再執執明信片，想搵郵局寄，去火車站詢問處，兩個師奶本身吹緊水見我問路有點面黑，俾埋地圖佢篤，唔知玩野定點篤條路出黎根本去唔到郵局。行到唔知去左邊，四圍問人問著個阿太，佢返緊工唔得閒教路，不過趕路前都帶我去個油站先非常好人，油站個入油姐姐係個靚女黎，用非常清晰的英文教我點樣行邊度轉左轉右，蕩失幾個字路之後佢一點我就行到去。即係有時唔係歧視老野專登搵後生（靚）女問野，但阿婆師奶真係差唔多個個態度都差到爆粗。
寄完明信片，十點幾，正式開始旅遊。冇理由唔由大教堂開始啦。
放到太高睇唔到，大門對出放左個塔樓頂飾彷製品。有點遺憾是．．．
有十幾種語言講解塔頂歷史，但我搵黎搵去，都只見到簡體中文，祖國強大了。幸是算是我德國行唯一見到的簡體中文。
其實教堂附近圍住好多都係新建築同商場，但唔會太誇或太俗，兩種風格拍埋又夾得到。
轉個角已經有個商場地下全部係名牌舖頭，如果唔鍾意睇名勝，都仲有大把名店你慢慢揀。好在各位女同事女性朋友發癲叫幫手買野之前我已經跳左上機，唔係就要抬幾個LV返香港了。有趣係，留德國咁多日，見得到名牌的地方，就只有名店櫥窗，同中國遊客身上，本地人對呢類貨色睬你都傻。
穿過商場就會到大廣場，或者太凍冇乜人行，沿路可以睇到大教堂唔同面。
廣場仲有間好似歷史博物館的東西，不過我怕入到去會ＺＺＺＺ，都係算了。
唔知點解真係好少搵到餐廳，想食野要出番大街or入火車站，所以見到呢間野立即好大興趣，除左難得有食店，間野個名仲．．．一流呀。
既然英文名叫Big China，直譯做「大中國」就算啦，正常中國人都唔會譯得到間野做「大可以」卦？但照計識得叫燒腊又唔似扮中國人的鬼搞喎間野。側邊間保健品專賣店咁正經反而唔多慣。最抵死都係招牌畫符噉款的字體。笑到我。
笑到我特登兜個圈去隔籬街影佢正門，幾正常喎除左「大可以」三個字，同原來後面賣燒腊前門賣美食。第一次去到外國咁恨食中國菜，唔掂我都大可以當為佢個名而幫襯，可惜間野唔做早市。就出發到下場，想去好耐的動物園了。